Mateusi 21
21
Jumẽtu rupi Jesu ovãe Jerusarẽ taa pè oike remẽwarà
(Maku 11.1-11; Rukasi 19.28-40; Juwão 12.12-19)
1Ajaire Jesu oo jẽ Jerusarẽ taa kyty, wemimo'ekwerà kõ reve. Ãmẽ ovãetà pyri'ĩje'ẽ kupa remẽ, ãmõ tena miti pè rã'ĩ ovãe kupa. Petepaje eu a'e taa pè. Yvytyry ypy pè tè a'e tena. Oriveiraty eu yvytyry pè. Ãmẽ Jesu omono wemimo'earà kõ mõ wenone rupi. Mõrijõ omono kõ. 2Kee e'i amãtejẽ imono kõ:
– Pekwa erenone rupi wãi taa tui upa mã'ẽ gyty, e'i. A'e pè pevãe remeve, jumẽtu#21.2 Jumento kõjã rè pemã'ẽtà, imemyry reve. Wãnõ tatui kupa mã'ẽ rè. A'e kõ rè pemã'ẽ remẽ, pejora eru ike ije, e'i. 3Ãmẽ ava mõ sõ kee e'i remẽ, “Moma'e rã mõ põ pejoratà eraa?” e'i sõ pejẽ kupa remẽ, kee tapejẽ: “Ãnĩ. Orerõvijã tè ‘eeru’ e'i ore. Ajawyi oroeraatà rã'ĩ”, tapejẽ. “Hoõ” e'ità peupe ãmẽ kupa, e'i ijupe kõ.
4Janejare'e ayvukwerà rupi katu tè a'evo Jesu ekoi, ijayvu mojenuarà kee okusiwa maekwerà rupi katu tè.
5“Kee teremojenu Jerusarẽ taa wãnà kõ pè:
‘Penõvijã ywete rã jõvijã wasu rõmõ ovãetà iko.
Nojimokasiokai mã'ẽ rõmõ ovãetà iko.
Jumẽtu ape 'arà rupi tè ovãetà iko, jumẽtu memyry ape 'arà rupi tè.
A'evo ojikuwatà peupe’”, e'i maekwerà.#Sak. 9.9
Aekwerà rupi katu Jesu ekoità. Ajawyi “aje” taoty Janejare'e ayvu mojenuarà remikusiwarerà pè.
6Ãmẽ Jesu “pekwa” e'i ijupe kõ remẽ, “hoõ” e'i oo kupa. 7Ãmẽ jumẽtu kõ rè omã'ẽ a'e pè kupa remẽ, weru Jesu pè kupa. Ajaire oyru poko kõ oinõ ijape 'aryvo kupa. A'e ape 'aryvo Jesu oo iko.#21.7 A'evo jõvijã wasu jikuwaparà rõmõ ojikuwa ovãe. 8Ãmẽ ovãe iko remẽ, aty wasu oo upi. A'e kõ oyru poko kõ omovevu vevu imojimoy moy eraa pee rupi Jesu renone rupi ipãrõga rõmõ kupa. Ãmõ kõ ka'aro opo'o, warakuri ro vo mã'ẽ. A'e ve omojimoy moy teve Jesu renone rupi kupa. 9Aty wasu pytery pè werovãe Jesu ereko kupa. Pirujẽ wapuka pukai Jesu vãea rè kupa.
“Tãmõ Tavi Jeapyrerà e'eay simoe'e!
Janejare'e tomory Wemimuurerà imoe'eoka!
Janerõvijã ywete ywesõ yvapewarà kõ 'arà kytywarà rõmõ ekoi!
A'e simoe'e!” e'i e'i kupa.
10A'evo wereko Jesu imoe'e kupa, ajaate Jerusarẽ taa pè ovãe. Ãmẽ ovãema Jesu remẽ, pirujẽ a'e pewarà kõ e'i e'i ojiupe kupa oory rõmõ iko kupa.
– Haa, ava pãwĩ? e'i e'i kupa.
11Ãmẽ Jesu rerovãearà kõ e'i aepo e'i mãe kõ pè:
– Jesu tè ãwĩ! Janejare'e ayvu mojenuarà tè, e'i kupa! Nasare wãnà! Karireja yvy kyty wyi uu mã'ẽ! e'i teve kupa.
Jesu Janejare'e moe'ea retã rè okãte'ã remẽwarà
(Maku 11.15-19; Rukasi 19.45-48; Juwão 2.13-22)
12Ãmẽ ajaire Janejare'e moe'ea retã gyty Jesu oo iko. Etã ypy pè ovãe remẽ, jane kõ mõ Janejare'e pè temime'ẽ rã kõ ome'ẽ karakuri repy rõmõ a'e pè kupa upa.#21.12 Kejõ ome'ẽ kupa: Teima kõ. Jirusi. Ãmõ, kaneiru ra'yry. Ãmõ, pui ra'yry. Wãisõ, itee tee tè ome'ẽ kupa. Ajamã'ẽ a'e pè ome'ẽ kupa remẽ, omoripe tè ipyyarà kõ kupa ipi. Omoepy wete sa'u kupa ipi. A'evo tè karakuri omoaty wete oupe kupa ipi. Ãmẽ Jesu a'evoa rè omã'ẽ erokwa remẽ, nopotai. Ajawyi ime'ẽarà kõ omoisyrypa imono. Ãmõ, opyy mãe kõ teve omoisyrypa imono. Ãmõ, namesa kõ karakuri rewarà kõ oposiko i'aryvo mãe kõ oity ipujere. Karakuri rena kõ oity imopepeipa. Ãmõ, jirusi me'ẽarà kõ apyka kõ oity teve ipujere. A'evo Jesu ekoi, nivoi ekoi kupa rewarà mõ.
13E'i jẽ Jesu:
– Nivoi agyvo Janejare'e moe'ea retã pereko remẽ. Kee e'i itõkõ Janejare'e kareta rè ojikusiwa: “Eretã eupe oporegetatà mãe kõ poregetaa rena tè”, e'i tè.#Isa. 56.7; Jer. 7.11 Aekwerà rupi katu rõwã ajamã'ẽ pereko! e'i. Imona mã'ẽ retã vo 'ejẽ pereko! e'i imoãtãre'ã kõ.
14Ãmẽ jakatu naeapyoi mãe kõ uu uu Jesu kyty, Janejare'e moe'ea retã ypy pè. Ãmõ, etãmã kãnĩ mãe kõ. Ãmẽ Jesu omã'ẽ ee kõ remẽ, omokatu kõ. 15Mõa'ãrõwã jane kõ opota katu Jesu. Ijãgyo ywete ikasia rè omãjã kupa, poromokatu remẽ. Ja'yrerà wyive tesõ Jesu rè oja'a.
– Tãmõ Tavi Jeapyrerà e'eay simoe'e! e'i e'i ja'yrerà wapuka pukai.
Ajamã'ẽ Janejare'e pè oporegeta mãe kõ rõvijã kõ aepo wenu remẽ, ojikõ'õ Jesu rè ãmẽ kupa. Ãmõ, tãmõ Moisesi remikusiwarerà rè poromo'e mãe kõ ve ojikõ'õ ee, ikasia rewarà mõ. Ãmõ, ja'yrerà kõ rewarà mõ teve. 16Ajawyi kee e'i Jesu pè kupa:
– Neenu põ ja'yrerà kõ aepo e'i neupe remẽ? e'i kupa.
Ãmẽ Jesu e'i ijupe kõ:
– Õ'õ, aenu. Ikatuay wete ja'yrerà aepo e'i remẽ, e'i. A'e kõ pewarà mõ kee ojikusiwa amãtejẽ Janejare'e ayvu rõmõ: “Janejare'e! Ene tè ja'yrerà kõ nemo'e, owaray tanemoe'e!”, e'i maekwerà.#Jĩg. 8.2 Napemogetai sipõkõ aekwerà! Ajawyi ikatuay tè ja'yrerà kõ aepo e'i remẽ, e'i.
17Ajaire Jesu oẽ oo iwyi kõ ky'y, Jerusarẽ taa pe wyi. Petãnia taa kyty oo oke.
Jesu omosinĩmaoka moma'eyva'y ni'ai mã'ẽ remẽwarà
(Maku 11.12-14,20-24)
18Ãmẽ ji'ive Jesu ojivy mijẽ oo Jerusarẽ gyty, wemimo'earà kõ reve. Nikasi amyay pè oo iko remẽ. 19Ãmẽ moma'eyva'y rè omã'ẽ, pee reme pè, piku'y eu ijupe mã'ẽ rè.#21.19 Werywete kuruvyu vo ywete mã'ẽ piku'y. Ajamã'ẽ temitãgwerà. Opota ipe a'e'akwerà o'u mijã. Ajamã'ẽ ni'ai. Ookwerygà tè tui.#21.19 Ajawyi i'a maevo sõ tite tè. Ajawyi Jesu e'i moma'eyva'y pè:
– Mãerã tè tane'a e'ã awi ky'y, e'i.
Ameve osinĩma moma'eyva'y ky'y.
20Ãmẽ emimo'earà kõ ojimonyi a'evoa rè omã'ẽ kupa remẽ.
– Manyvo pãwĩvo Jesu py'awarà mõ omosinĩma piku'y! e'i kupa.
21Jesu e'i ijupe kõ:
– Õ'õ, aje. A'evoa rè kee a'e pejẽ. “Aje” pejẽ ikõ Janejare'e kasia pè pepy'a pupe nẽ, e'i. Ãmõ, aã yvytyry pè eayvu rupi, “Ejisyry pãranã wasu pupe ejimomo eo”, pejẽ sõ remẽ, a'evotà kuwa ãmẽ, “aje” pejẽ Janejare'e kasia pè remẽ. “Aje ipõ?” napejẽi pepy'a pupe remẽ.#Mat. 17.20; 1Kor. 13.2 22Pirujẽ peporijau ee mã'ẽ rè peporanu ijupe remẽ, “hoõ” e'ità pejẽ. Ome'ẽtà ãmẽ, “aje” pejẽ ijupe remẽ, e'i Jesu ijupe kõ.
“Ava ayvu rupi põ moko ere neiko?” e'i Jesu pè kupa remẽwarà
(Maku 11.27-33; Rukasi 20.1-8)
23Ãmẽ ji'ive Jesu oo mijẽ Janejare'e moe'ea retã gyty. A'e ypy pè poromo'e upa. Ãmẽ Janejare'e pè oporegeta mãe kõ rõvijã kõ ovãe ipyri. Ãmõ, Juteu rõvijã kõ mõ ovãe.
– Ava ayvu rupi põ moko ere neiko ipi? e'i ijupe kupa.
24-25[Ajamã'ẽ Jesu okuwapa opota tè wayvumoopa kupa remẽ. Ajawyi Jesu jẽ wayvuenone'a kõ amãtejẽ.] Kee e'i:
– Ije ve aporanutà peupe rã'ĩ. Pejẽ ypy pemome'u ije awi. Ava ayvu rupi põ Juwão amyry poromojãmorĩ ipi? Janejare'e ayvu rupi põ? Mirà kõ ayvu rupi põ ma'e remẽ? e'i Jesu ijupe kõ.
Ãmẽ jõvijã kõ ijayvu yvu ojiupe.
– Manyvo ja'età põ aepo e'i remẽ? “Janejare'e ayvu rupi Juwão uu”, ja'e sõ remẽ, “Manyvore sipõ ‘aje’ napejẽi ijayvu pè ãmẽ?” e'ità janeupe. 26Ajamã'ẽ, “Jane kõ ayvu rupi tè Juwão uu”, nija'e'ãi teve. Aty wasu ojikõ'õtà janere aepo ja'e sõ remẽ. “Janejare'e ayvu mojenuarà tè Juwão amyry”, e'i kupa. Ajawyi maevo janemomarama kuwa ãmẽ kupa, e'i ojiupe kupa.
27Ajawyi ne'i'ãi Jesu pè kupa.
– Norokuwai ava ayvu rupi põ uu, e'i rã'ãga ijupe kupa.
Ãmẽ Jesu e'i ijupe kõ:
– Ije ve na'e'ãi pejẽ ãmẽ, e'i ijupe kõ.
Ta'yry kõ rè tè Jesu poromosã'ãga remẽwarà
28Jesu e'i mijẽ jõvijã kõ pè:
– A'età pejẽ Janejare'e remimota rupi ekoia rè, e'i. Ta'yry kõ rè tè poromosã'ãgatà, e'i. Uve kwaima'e mõ, mõrijõ ta'yry mã'ẽ. Ãmẽ ãmõ 'ary pè tuu e'i teke'yry pè: “Ekwa ekoo kyty tereposiko”, e'i. 29“Ãnĩ, naa'ãi”, e'i epe ta'yry mijã. Ajamã'ẽ ajaire ojimotee oo oposiko. 30Ajaire tuu oo mijẽ imõmirĩ gyty tè ky'y. A'e pè e'i teve: “Ekwa ekoo kyty tereposiko”, e'i epe. “Hoõ” e'i tite uu pè. Nooi ajaire ajamã'ẽ. 31Ajare kee a'e. Mã ta'yry põ uu remimotarà rupi oo? e'i ijupe kõ.
– Teke'yry, e'i kupa. A'e tè oo ijayvu rupi, e'i kupa.
E'i jẽ Jesu ijupe kõ:
– Õ'õ aje, e'i. Erekoa rè tè age'e aporegetatà pejẽ. Ãwitõ ta'yry ypykwerà noerovijai rã'ĩ uu. Ajaire tè ojimotee oo. Ãwĩvo ve tekoua repy moatyarà kõ.#21.31 Karakuri opyy jane kõ wyi imoaty Romã pewarà jõvijã wasu pè mã'ẽ. Ãmõ, wãivĩ imy'arai tè maekwerà kõ ve ãwĩvo ekoi. A'e kõ aje ojirova Janejare'e kyty ajaire. Ijayvu rupi oo kupa ky'y. Pejẽ ãmẽ imõmirĩ noerovijai uu mã'ẽ vo 'ejẽ peiko. Ajawyi a'e kõ ypy Janejare'e rena pè ootà pewyi, e'i Jesu ijupe kõ.
32– Emã'ẽ. Jypy remẽ Juwão poromojãmorĩ mã'ẽ amyry uu ipe pekoty. Peenu ipe poromotekokuwa Janejare'e rekoa rè iko remẽ. “Aje” napejẽi ijayvu pè ajamã'ẽ. Nivoi mãe kõ kõrijõ tè “aje” e'i ijayvu pè. Ojirova Janejare'e kyty ãmẽ kupa, e'i. A'evoa rè pemã'ẽ ipe remẽ, napejimosĩokari peaiwererà rè itypypyipaoka Janejare'e pè peiko. Ajamã'ẽ imõmirĩ vo jẽ napejirovijari ee, e'i Jesu ijupe kõ.#Ruk. 3.12; 7.29-30
Koo jarà ra'yry rè tè Jesu ojimosã'ãga remẽwarà
(Maku 12.1-12; Rukasi 20.9-19)
33Ãmẽ Jesu oporegeta jẽ jõvijãgwerà kõ pè. Koo jarà ra'yry rè tè ojimosã'ãga javo ijupe kõ. Kee e'i:
– Koo jarà mõa'ãrõwã moma'eyva oõtã okoo rupi, uva'y. Omojikwa ywete. Ajaire omopari okoo. Ajaire, uvary ty'oa oinõ. Ajaire myta oinõ. A'e 'aryvo wyi omã'ẽtà ava mõ imonatà ee remẽ.
– Ajaire koo jarà ojisyrytà rã'ĩ oo ky'y. Koo oitytà rã'ĩ ãmõ kõ po pè toposiko ee. [“Otãrõma remẽ eremĩgwai kõ amuutà eupewarà pijarà mõ”, e'i ijarà.] Ãmẽ a'e kõ opyta ekovijarerà rõmõ. Omokatutà emitã kõ. Ijarà ãmẽ ojisyry oo ãmõ yvy kyty.
34– Ãmẽ kãramõ sa'u temitã i'a ky'y. Ajaire otãrõma ky'y. Ãmẽ tè ijarà wemĩgwai kõ mõ omono too ipijarà mõ oupewarà. Oo emĩgwai kõ ãmẽ. 35Ajamã'ẽ koo pè oposiko mãe kõ nome'ẽ'ãi ijarà pewarà emĩgwai kõ pè toeraa oõvijã pè. Opyy kõ kõrijõ kupa. Ãmõ onõpã nõpã kupa. Ãmõ ojuka kupa. Ãmõ ojapi japi takuru pè kupa. 36Ãmẽ ajaire koo jarà wemĩgwai kõ mõ omono mijẽ. Ijatyray sa'u wemĩgwai kõ omono ky'y. A'e kõ ve temitã rè oposiko mãe kõ omomarama ovãe kupa remẽ.
37– Ajaate koo jarà e'i oupe: “Era'yry tè amonotà ky'y”, e'i. “Era'yry tè rewarà mõ maevo omomojytà kupa”, e'i tite oupe mijã. 38Ajamã'ẽ temitã mokatuarà kõ nomomojyi. Omã'ẽ ee kupa, uu iko remẽ. Ãmẽ e'i ojiupe kupa: “Haa! Koo jarà ra'yry tè ovãe. Ejo sijuka”, e'i kupa. “Emã'ẽ. Ãwĩ tè uu koo rè ojimojare'età uu rekovijarerà rõmõ. Ãmẽ ãwĩ sijuka remẽ, janekoo rõmõtà tè ky'y”, e'i ywe'e tite kupa.
39– A'evo wereko ãmẽ kupa. Ta'yry opyy ywe'e tite eraa koo kupe kyty ijuka kupa, e'i Jesu.
40Ãmẽ Jesu e'i jẽ jõvijãgwerà kõ pè:
– Ajawyi manyvotà põkõ koo jarà, ojivy mijẽ uu remẽ, koo rè oposiko mãe kõ wereko? e'i.
41Ãmẽ jõvijãgwerà kõ e'i:
– Ojukaoka kõtà, nivoi kupa rewarà mõ, e'i kupa. Ajaire ãmõ ivo katu mãe kõ wesatà wemitã mokatuarà kõ rõmõ, e'i kupa. A'e kõ ome'ẽ gatutà i'akwerà otãrõma remẽ ky'y, e'i kupa.
Takuru e'eay rè tè Jesu ojimosã'ãga remẽwarà
(Maku 12.10-12; Rukasi 20.17-18)
42E'i jẽ Jesu imotekokuwa kõ:
– Napemogetai sikõ Janejare'e ayvukwerà, kee e'i karamoe remẽ maekwerà:
“‘Aã takuru nikatui’, e'i ywe'e tite tetã reinõgarà kõ oinõ ypy takuru tetã rõmõ remẽ.
Ajamã'ẽ a'e takuru ywesõ sikaepo ikatuay tetã mokasia rõmõ.
Janejare'e tè okasia rupi a'evo werekookatà.
A'evo wereko remẽ, owaray janererekotà”, e'i maekwerà, e'i Jesu ijupe kõ.#Jĩg. 118.22-23; J.K.R. 4.11; 1Pe. 2.7
43E'i jẽ Jesu ijupe kõ:
– Ãwĩvo ve Janejare'e pepyteporo ipe wemĩgwai kõ rõmõ mijã. Ajamã'ẽ napemoẽoka tari Janejare'e pe'arà kyty. Ajawyi ãmõ pewarà kõ tè Janejare'e opyteporotà penekovijarerà rõmõ ky'y. A'e kõ omoẽokatà o'arà kyty ky'y, e'i. 44Ãwitõ ava mõ ãwĩ takuru rè ojipyãkãmota remẽ, imarama. Ãmõ, ava mõ 'aryvo takuru o'a remẽ, omomarama ve, e'i.#21.44 Aepo e'i Jesu ijupe kõ, “Nikatui Jesu”, e'i kupa rewarà mõ. “Ãwitõ koo rè oposiko mãe kõ koo jarà ra'yry nomomojyi, ãwĩvo ve nemomojyi Janejare'e Ra'yry rõmõ pekupa”, jaa tè aepo e'i Jesu.
Wee tè sikaepo aepo Jesu oporegeta upa. “Nojirovijai ere mãe kõ ojimomorijautà”, jaa tè aepo e'i.
45Ameve Janejare'e pè oporegeta mãe kõ rõvijã kõ ojikõ'õ Jesu rè aepo e'i remẽ. Pariseu kõ mõ teve.
– Janeupewarà mõ tè aepo e'i! e'i e'i kupa. [“Tetã reinõgarà kõ vo ve pejẽ” jaa tè aepo e'i upa!] 46Ejo sipyy awi imopã'ãoka! e'i kupa.
Manyvo noereko'ãi imopã'ãoka kupa ajamã'ẽ. Okyje aty wasu wyi kupa. “Janejare'e ayvu mojenuarà tè Jesu”, e'i aty wasu ipi, ajawyi.
Currently Selected:
Mateusi 21: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
