Mateusi 23

“Moisesi remikusiwarerà rè poromo'e mãe kõ rekoa rupi tapeiko e'ã”, e'i mã'ẽ

(Maku 12.38-39; Rukasi 11.43-46; 20.45-46)

1Ãmẽ Jesu oporegeta aty wasu kõ pè, wemimo'ekwerà kõ pè teve. Kee e'i ijupe kõ:

2– Tãmõ Moisesi remikusiwarerà rè poromo'e mãe kõ, aje ipe okuwa katu tãmõ Moisesi remikusiwarerà. Ãmõ, Pariseu kõ ve a'evo ekoi. Poromo'e katu ipe teve ijayvukwerà rè kupa ipi. 3Ajawyi ijayvu kõ rupi katu tapeiko ipi, a'e pejẽ. Ajamã'ẽ tapeã'ã e'ã ikõ eko kõ ipi nẽ. Ãmõ rupi tè ivo tekoua wyi ekoa kõ ipi. Poromotekokuwa ee mã'ẽ rupi rõwã ekoi kupa ipi. 4Kee ekoi kupa ipi. Janejare'e ayvu omowasuay ãmõ kõ pè ipi. [Tãmõ Moisesi remikusiwarerà omoje'a weko reve ipi. Ãmẽ kee e'i ãmõ kõ pè: “Moko pejẽ kuwa ipi. A'evo 'evo tè peiko”, e'i kõrijõ tè ijupe kõ kupa ipi.] Ajamã'ẽ jane kõ pãtavõa rè noja'ai 'ete iko kupa ipi. Poromomorijauvay kupa ipi. 5Kee e'i kupa ipi. Kegà Janejare'e ayvukwerà jikusiwarerà wãkãg rè opypy eroata jane kõ rovake erojivy jivy kupa ipi. Ojyvaypy rè teve ookwa kupa. Omojikuwa katu ojyvaypy rewarà rè jane kõ tomã'ẽ ee ipi.#23.5 “Ãmẽ tè ãmõ kõ: ‘Haa! Janejare'e rè oja'a katu mã'ẽ tè sipõ ãwĩ kõ’! e'ità ije”, e'i tite oupe kupa ipi. Mat. 6.1; T.M. 6.8; P.Moirõ. 15.38 Ãmõ, kee e'i teve kupa ipi. Janejare'e rè ja'aa jikuwaparà rõmõ rã'ãga topa waipu mã'ẽ opypy erojivy jivy jane kõ rovake teve kupa ipi. A'evo tesõ ipe ekoi kupa mijã. [Ajamã'ẽ opy'a pupe noja'ai Janejare'e rè kupa ipi. Ijayvu rè noja'a ywe'ei tite teve kupa,] e'i Jesu.

6E'i jẽ Jesu ijupe kõ:

– Kee e'i teve kupa ipi. Jimoatya pè remẽ, jõvijã rena 'aryvo tẽ tesõ wapy kupa ipi. Jimi'u wasua pè oo mõropãrà kõ rõmõ remẽ, a'evo ekoi teve kupa ipi. A'evo ve Janejare'e ayvu rè jimo'ea retã kõ wyry pè oo kupa remẽ ipi. 7Kee e'i mã'ẽ tè opota kupa: “Age'e tè, poromo'earà rõvijã”, e'i mã'ẽ tè. Moma'e pyya rena pè teve a'evo ekoi kupa ipi. 8Ajamã'ẽ “poromo'earà” taoty e'ã jane mõ pè, ojevo jẽ ojiapijarerà tè kupa rewarà mõ. Ije rõmõ'ĩte pemo'eare'e rõmõ aiko. 9Ãwĩvo ve “papa” taoty e'ã ike yvy pewarà kõ pè. Oiko pe'ĩte Penuu, a'e yva pewarà. 10Ãmõ, tapejimojõvijãoka e'ã teve jane kõ pè. “Jõvijã” taoty e'ã peupe. Uvepa Penõvijã. A'e Janejare'e Remimuurerà tè. 11Ajawyi kee a'e pejẽ. “Ije ywesõ” tapejẽ e'ã. Poropãtavõarà rõmõ tapeiko, e'i.#Mat. 20.26-27; Mak. 9.35; 10.43-44; Ruk. 22.26 12Ava mõ jo'arà kyty ipe ekoi remẽ, aekwerà Janejare'e jowyry kyty omonookatà. Ajamã'ẽ ava mõ sõ jowyry kyty ekoi remẽ, aekwerà ywesõ Janejare'e jo'arà kyty omonookatà kãramõ, e'i Jesu poromogeta.#Ruk. 14.11; 18.14

“Mokoi pejẽ!” e'i Jesu mã'ẽ

(Maku 12.40; Rukasi 11.39-42,52; 20.47)

13Kee e'i teve Jesu:

– Mokoi pejẽ, tãmõ Moisesi remikusiwarerà rè poromo'e rã'ãga mãe kõ! Pariseu kõ teve! Janejare'e ayvu perovija rã'ãga mãe kõ teve pejẽ peiko! Ajawyi pejimomorijau 'atà tè ky'y, a'e pejẽ. Pekuwa katu ipe ayvu ivo tekoua rewarà kõ mõ ipi. Ajamã'ẽ napemoẽokai Janejare'e pe'arà kyty. Ãmõ kõ: “Amoẽokatà Janejare'e e'arà kyty”, e'i kupa remẽ, pemowasuay wete ijupe kõ ta'evo e'ã kupa, e'i Jesu ijupe kõ.

14E'i jẽ Jesu:

– Mokoi pejẽ, tãmõ Moisesi remikusiwarerà rè poromo'e rã'ãga mãe kõ! Pariseu kõ teve! Janejare'e ayvu perovija rã'ãga mãe kõ teve pejẽ peiko! Ajawyi pejimomorijau 'atà tè ky'y, a'e pejẽ. Peja'a katu rã'ãga terekwarerà kõ rè ipi. A'evoa rupi pemoripe kõ imoma'eekyipa iwyi kõ! Aja paireve Janejare'e pè peporegeta puku rã'ãga ãmõ kõ rovake ipi. Moko pereko pepijarĩ tarepe ipi. Ajamã'ẽ Janejare'e okuwa katu peneko aiwerà. Ajawyi pejẽ ywesõ pejimomorijau mãerã tè pejẽ, e'i Jesu ijupe kõ.#23.14 Kareta karamoe remẽwarà kõ pè jamã'ẽ remẽ, ãmõgwerà kõ pè vs. 14 uve. Ãmõgwerà kõ pè nuvei.

15E'i jẽ Jesu:

– Tãmõ Moisesi remikusiwarerà rè poromo'e mãe kõ! Pariseu kõ teve! Moko pejẽ sõ! a'e itõkõ pejẽ! Poromoripe mãe kõ tè pejẽ! a'e pejẽ. Janejare'e perovija rã'ãga mãe kõ teve pejẽ! Yvy popy rupi peo pekoty rewarà rã kõ reka. Pãranã ovae kyty tesõ peo a'evoa rõmõ peiko. Ãmõ yvy yvy rupi tesõ peo. Ãwisõ opota ipe ivo tekoua rupi ekoi kupa remẽ, pepijarĩ kõ ivo tekoua wyi ipi. Pepota pevo toiko kupa. Ãmẽ pemo'e kõ paire yveve a'e kõ ywesõ nivoi ekoi pewyi ky'y. Ajawyi a'e kõ ve Janejare'e omonotà jimomorijau wasua rena kyty, pevo ve, e'i Jesu ijupe kõ.

16E'i jẽ Jesu:

– Mokoi pejẽ! “Jane kõ mo'earà rõmõ jane”, pejẽ tite ipi. Manyvore põkõ jane kõ mo'earà rõmõtà sõ pejẽ, ãwĩ sõ nivoi peiko remẽ? Ãwitõ naeapyoi mã'ẽ omojisaoka ipe pee remẽ, nomã'ẽi epe ee remẽ. Ãwĩvo ve pejẽ peiko, pemo'e ipe Janejare'e rekoa rè ipi remẽ, e'i. Ãmõ kõ wari waria rõmõ tè poromotekokuwa rã'ãga ipi. Kee pejẽ: “Japota jane kõ ‘aje’ te'i janeayvu pè remẽ, Janejare'e moe'ea retã rerà jamovy janeayvu mokasia rõmõ ipi. Kee. Imoe'ea retã rerà jamovy, janeayvu mokasia rõmõ remẽ. Ãmẽ sõ nijarovijari janeayvu ja'e mã'ẽ remẽ, ikatu jẽ itõkõ ãmẽ. Nijarovijai epe remẽ, nimanyvoi jaiko”, pejẽ tite ijupe kõ. “Ajamã'ẽ imoe'ea retã wyry pewarà karakuri jinõgwerà kõ tè jamovy remẽ, aje janeayvu rupi tijaiko ikenẽ”, pejẽ rã'ãga jane kõ mo'e ipi. 17Petekokuwa e'ã rõmõ aepo pejẽ. Moma'e ywesõ põkõ ikatu Janejare'e pè? Imoe'ea retã wyry pewarà põ? Ãnĩ! Imoe'ea retã ywesõ ikatu Janejare'e pè. Pekuwa kuwasi a'evoa mijã. Ajawyi imoe'ea retã rerà pemovy remẽ, aje ywete kõrijõ tè tapejẽ ipi, e'i Jesu ijupe kõ.

18E'i jẽ Jesu:

– Kee pejẽ tite teve poromo'earà rõmõ peiko: “Janejare'e pè temiapy rena rerà jamovy janeayvu mokasia rõmõ remẽ, nimanyvoi janeayvu rupi nijaikoi remẽ”, pejẽ tite ipi. “Nãwĩvoi janeremime'ẽ rã rerà jamovy remẽ. Aje janeayvu rupi tijaiko ikenẽ ãmẽ”, pejẽ tite ãmõ kõ mo'e ipi. 19Petekokuwa e'ã mõ aepo pejẽ. Janejare'e pè temiapy rena ywesõ ikatu. Naikoi sõ ena remẽ, mã 'aryvo nijaapy'ãi kuwa janeremime'ẽ rã ijupe! Pekuwa kuwasi a'evoa mijã! e'i. 20Ajawyi Janejare'e pè temiapy rena pemovy remẽ, temime'ẽgwerà irõromõ ve sikaepo pemovy teve. Ajawyi aje ywete peayvu rupi katu tapeiko ikenẽ! e'i. 21Ãwĩvo ve, Janejare'e moe'ea retã jamovy remẽ, ijarà ve jamovy eevejẽ. Ajawyi aje peayvu rupi tapeiko ikenẽ, a'e pejẽ. 22Ãwĩvo ve ava mõ yva rerà omovy wayvu mokasia rõmõ remẽ, wayvu rupi toiko ikenẽ. Janejare'e rena tè yva. A'e pè tè Jõvijã wasu rõmõ ekoi. Ajawyi yva rerà jamovy remẽ, a'evo ve ijarà jamovy ve. [Ajawyi aje tapejẽ ãmẽ, e'i. A'evo 'evo peiko pejeayvumokasi epe, poromoripea rõmõ ipi. Ajamã'ẽ Janejare'e jẽsi napemomojyi aepo pejẽ remẽ.] Ajawyi ywesõ Janejare'e pemomorijautà, e'i.#Mat. 5.34

23Jesu e'i jẽ:

– Mokoi pejẽ, tãmõ Moisesi remikusiwarerà rè poromo'e rã'ãga mãe kõ! Pariseu kõ teve! Janejare'e ayvu perovija rã'ãga mãe kõ teve pejẽ peiko! Ajawyi pejimomorijau 'atà tè ky'y. Kee pereko ipe pekarakuri mõ pemowaite ime'ẽ Janejare'e pè ipi. 10 rõmõ pekarakuri moeta remẽ, pe'ĩ pemowaite ime'ẽ Janejare'e pè ipi.#23.23 Ãwĩ rapijarà pè karai kõ dízimo e'i. Janejare'e kareta jikusiwarerà rupi a'evo peiko ipi. Pekarakuri kõrijõ tè rõwã a'evo pereko ipi. Penemitã kã'ãi tẽ tesõ a'evo pereko ipi, pepo'o remẽ. Napejavyi 'ete a'evo peiko mã'ẽ rè ipi. Ãwĩvo peiko remẽ, ivo ipe peiko Janejare'e pè. Ajamã'ẽ kee peiko remẽ ywesõ ivo peiko kuwa Janejare'e pè. Ivo poroereko remẽ. Ãmõ, poroporijauesa remẽ. Ãmõ, Janejare'e ayvu rupi katu peiko remẽ. A'evo 'evo peiko remẽ ywesõ ivo peiko kuwa Janejare'e pè. “Tapeity Janejare'e pè moma'e me'ẽa”, na'ei ajamã'ẽ.

24– Pejẽ, nivoi poromo'e mãe kõ! Kee mã'ẽ vo pejẽ peiko. Ãwitõ ava mõ o'ywa rã omoasa katu rã'ĩ. Meru siri oporo katu rã'ĩ iwatà. Ajamã'ẽ iky'a mã'ẽ mitirõwã mã'ẽ noekyi rã'ĩ iwa. Ãwĩvo pejẽ Pariseu kõ rõmõ. [Jane kõ kegà teipe ijaiwererà ee remẽ, “Nivoi 'eteay neiko!” pejẽ ijupe kõ ipi. Ajamã'ẽ jane kõ nivoi 'eteay remẽ, “nimanyvoi” pejẽ kõrijõ tè ijupe kõ.] Napekuwai manyvoa ywesõ Janejare'e opota tijaiko. Ajawyi a'evo peiko tite, e'i Jesu.

25– Tãmõ Moisesi remikusiwarerà rè poromo'e rã'ãga mã'ẽ kõ! Pariseu kõ teve. Moko pejẽ sõ! Aje Janejare'e perovija rã'ãga mãe kõ tè pejẽ! Ajawyi pejimomorijau 'atà tè ky'y. Ãwisõ Moisesi remikusiwarerà rè poromo'e mãe kõ teipe pejẽ mijã. Ajamã'ẽ iwari mãe kõ rõmõ tè pejẽ peiko. Kui kusuka rè tè poromosã'ãgatà tapekuwa. Ãwitõ kui jakusu rã'ãga remẽ, eme rova'arà rupigà tè jakusu. Waipy nijakusui. Ãwĩvo 'ejẽ peiko. Waipy iky'a jẽ mã'ẽ vo 'ejẽ peiko. Ikatuay maevo sõ tite tè pepirà rova'arà. Ajamã'ẽ nivoi sikaepo pepy'a pupe peiko. Tãnẽ tesõ sikaepo penowaipy pè, peky'akwerà peaiwererà rè. Moma'e kõ moatya rè ywesõ peja'a peiko ipi. Ãmõ, moma'e kõ rè jitupia rè ywesõ peja'a. 26Napetekokuwai wete si peiko, Pariseu kõ! Ajawyi tapeitypypyipa peaiwererà kõ ky'y. Janejare'e pè tapejipy'aky'a'ooka ky'y, a'e pejẽ. Ãmẽ tè pekatuaytà ky'y.

27– Mokoi pejẽ, tãmõ Moisesi remikusiwarerà rè poromo'e rã'ãga mãe kõ! Pariseu kõ teve! Janejare'e ayvu perovija rã'ãga mãe kõ teve pejẽ peiko! Ajawyi pejimomorijau 'atà tè ky'y, a'e pejẽ. Ãmõ, ãwitõ teãgwerà rena isuky katu mã'ẽ pupe jamosuky remẽ, ikatuay maevo sõ tite. Ajamã'ẽ ipupe tè si ipojy tè! Mõa'ãrõwã teãgwerà kãgwerà kõ ipupe tui. Ãwĩvo 'ejẽ peiko, poromoripe mãe kõ tè pejẽ rewarà mõ. Ivo maevo sõ tite mãe kõ tè pejẽ. Ajamã'ẽ pepy'a pupewarà ipojy ai tè.#J.K.R. 23.3 28Ãwĩvo peiko remẽ, ivo mãe kõ vo sõ tite jane kõ pè. Ajamã'ẽ pepy'a pupe peaiwe tesõ peiko, e'i Jesu.

Janejare'e moe'earà rã'ãga kõ momorijaua rã rewarà

(Rukasi 11.47-51)

29E'i jẽ Jesu:

– Mokoi pejẽ, tãmõ Moisesi remikusiwarerà rè poromo'e rã'ãga mãe kõ! Pariseu kõ teve! Janejare'e ayvu perovija rã'ãga mãe kõ teve pejẽ peiko! Peo peo ipe Janejare'e ayvu mojenuarà karamoe remẽwarà kõ ryvy kyty imoe'e rã'ãga kõ ipi. Imoe'ea kõ pemõ'ãoka peja'a ee vo sõ tite. Takuru katuay kõ peinõ inõ ipe teve tyvy pè jikuwaparà rõmõ, imoe'e rã'ãga. 30Ãmẽ kee pejẽ rã'ãga a'evo peiko remẽ: “Õ'õ, aje. Janejare'e ayvu mojenuarà karamoewarà kõ jamoe'e ipi. Janerãmõi kõ vo rõwã jane”, pejẽ rã'ãga. “Emã'ẽ. Ojuka jẽ tesõ ijayvu mojenuarà kõ kupa ipi mijã. Jane sõ eeve kõ remẽ, nisijukaoka kuwa'ãi”, pejẽ rã'ãga. 31Aepo pejẽ remẽ, pejikuwa ijapisiarerà kõ jeapyrerà kõ rõmõ peiko! e'i. 32Penãmõi kõ vokwery pè peiko mijẽ, e'i.

33– Pejavy javy tesõ Janejare'e rekoa ipi. Pepojy ai tè jane kõ pè ãmẽ, ãwĩvo peiko remẽ. Ãwitõ moe ipojy ai tè, ãwĩvo 'ejẽ pejẽ! Ajawyi jimomorijau wasua rena kyty peo 'atà tè. Manyvo napereko'ãi pejipijarĩ ky'y! e'i Jesu.#Mat. 3.7; 12.34; Ruk. 3.7

34E'i jẽ Jesu:

– Ajawyi si kee a'età pejẽ. Amuroka tarepe mijẽ Janejare'e ayvu mojenuarà kõ pekoty. Ãmõ, otekokuwa mãe kõ. Ãmõ, poromotekokuwa mãe kõ. Ajamã'ẽ naperovija kõ'ãi. Pejuka kõtà kõrijõ. Ãmõgwerà yvyra jipokana mã'ẽ rè pejukaokatà. Ãmõgwerà penõpã nõpãtà Janejare'e ayvu rè jimo'ea retã kõ rupi [imoisyry kõ]. Taa kõ rupi pemomijarĩ kõtà, e'i.

35-36– Karamoewarà kõ votà pejẽ. Ajawyi kee e'ità Janejare'e pejẽ: “Manyvo põ pejuka eayvu mojenuarà kõ karamoe remẽwarà? Jevo'e katu si aepo”, e'ità imo'y pene, e'i. Pene omo'y kuwa Apeu amyry jukaawerà karamoe remeve. Kõitokõ teke'yry ojuka, ivo katu ekoi mã'ẽ teipe Apeu remẽ.#Jinõ. 4.8 Ãmõ, Sakarija amyry jukaawerà omo'y kuwa pene. Kõitokõ Janejare'e pè oporegeta mã'ẽ rõmõ ekoi. Parakia ra'yry tè itõkõ a'e. Ivo katu ekoi mã'ẽ teipe teve itõkõ a'e. Ojuka jẽ ajamã'ẽ kupa. Janejare'e moe'ea retã ypy pè tesõ ojuka kupa, Janejare'e pè temiapy rena pyri tesõ. A'evo penãmõi kõ remijarà kõ, mõa'ãrõwã. Pirujẽ aekwerà kõ omo'y kuwa pene, ãwisõ age'ewarà kõ teipe pejẽ remẽ. Aje aepo a'e pejẽ, e'i Jesu. Napeity'ãi penãmõi kõ rekoawerà. Ivo ivo jẽtà peiko age'e, e'i. Ajawyi ãwitõ Janejare'e penãmõi kõ omomorijauvaytà ivo mãe kõ jukaawerà repy rõmõ, ãwĩvo tary ve penerekotà. Ijukaarerà kõ vo ywete pejẽ. Nivoi peiko. Ajawyi aje ywete pemomorijau 'atà tè ky'y, a'e pejẽ, e'i Jesu ijupe kõ.

Aepo e'i Jesu ijayvukasi ijupe kõ. A'e kõ ywesõ Janejare'e rekoa rupi ekoi kuwasi mijã. Ajawyi aepo e'i.

Jesu oporijauesa tarepe Jerusarẽ taa wãnà kõ remẽwarà

(Rukasi 13.34-35)

37Jesu ijãgyoay Jerusarẽ taa wãnà kõ rè omãjã.#23.37 Ãwitõ karamoe remẽwarà kõ Janejare'e ayvu mojenuarà kõ ayvu noenu tari kupa, aekwery vo jẽ tè ekoi kupa. Ajawyi kee e'i wãgyo rõmõ:

– Jerusarẽ taa wãnà kõ! Janejare'e wayvu mojenuarà kõ omuu muu ipe pekoty mijã. Ajamã'ẽ napeenu tari 'ete! Pemomarama kõrijõ kõ ipi! Takuru pupe pejapi japi kõrijõ kõ ijuka ipi. Peenu kuwasi ijayvu kõ mijã! Mapejõ rõmõ tesõ apota ipe poropyy jẽ poroereko mijã! Ãwitõ masakara ta'y siri remẽ, watykapa opepõkã wyry pè wa'yry kõ ipi. Ãwĩvo poromokatu tarepe poroereko mijã. Ajamã'ẽ napepotai sire'e pemokatua. Ajawyi mokoi a'e pejẽ! 38Ajawyi naiko'ãi penena ky'y. Tapererà rõmõtà tè tui upa ky'y. 39Pemã'ẽ esa! Napemã'ẽ'ãi ere ky'y, ajaate Jõvijã wasu rõmõ ajikuwatà ajo mijẽ remẽ. Ãmẽ tè tite emoe'e ipetà pekupa ky'y, Janejare'e Remimuurerà rõmõ, e'i Jesu ijupe kõ.#Jĩg. 118.26

Currently Selected:

Mateusi 23: oymNT

Highlight

Copy