Mateusi 24

Jesu omome'u amãtejẽ Janejare'e moe'ea retã momaa rã rewarà

(Maku 13.1-23; Rukasi 21.5-6)

1Ãmẽ Jesu oẽ Janejare'e moe'ea retã ypy pe wyi oo iko remẽ, emimo'ekwerà kõ uu ipyri oporegeta ijupe. Kee e'i ijupe kupa:

– Emã'ẽ Janejare'e moe'ea retã rè. Ikatuay wete mijẽsi. Takuru jinõgwerà ikatuay, e'i tite kupa.

2Ãmẽ Jesu e'i ijupe kõ:

– Õ'õ, aje, pemã'ẽ ee. Ajamã'ẽ ikatu ke'ĩatu tè. Ke'ĩ opatà ajamã'ẽ, e'i. Ãpã kõ omotororopatà ity imoku'i ku'i, e'i. Omoenawetà kupa, e'ipa amãtejẽ Jesu ijupe kõ.

“Pemomorijautà kupa”, e'i Jesu mã'ẽ

(Maku 13.3-13; Rukasi 21.7-19)

3Ãmẽ ajaire Oriveiraty pè oo kupa. A'e pè Jesu rõmõ'ĩte wapy upa remẽ, emimo'ekwerà kõ uu ipyri. Kee e'i ijupe kupa:

– Oremotekokuwa jẽsi ji'i ere mã'ẽ rè rejupa, oro'e ene. Manyvo remẽ põ a'evotà? Ere oreupe ãmẽ torokuwa. Ãmõ, nevãe tarà mijẽ nejikuwa jõvijã wasu rõmõ remẽwarà emome'u oreupe. Manyvo põ oroereko kuwa nejo mijẽtà mã'ẽ ikuwa? Yvy opaerĩ mã'ẽ rewarà emome'u oreupe torokuwa, e'i ijupe kupa.

4Ãmẽ Jesu e'i ijupe kõ imotekokuwa kõ:

– Mokoi! Pejimoãkwa'ã kee e'i pejẽ mã'ẽ pè ne: 5“Janejare'e Remimuurerà rõmõ tè ije ajo penõvijã ywete rõmõ”, e'ità pejẽ mãe kõ pè. “Jesu ayvu rupi ajo”, e'i tevetà pejẽ mãe kõ pè. Ijatyray mirà kõ aepo e'ità owari rõmõ. Poromoripeaytà aepo jaa rè kupa. “Aje” tapejẽ ywe'e tite e'ã aepo jaa pè ajamã'ẽ nẽ, e'i. 6Ajaire kee jaa ojenu jenutà pejẽ: “Ojiapisi kupa upa”, ejaa. Ãmõ, “Ojiapisità ojee maevo kupa”, ejaa ojenutà. A'evo ipe remẽ tapejimonyi e'ã ikõ aepo renu nẽ! A'evo 'evotà rã'ĩ evãea renone kyty. Navãe'ãive a'evo remẽ ajamã'ẽ, e'i. 7Ãmõ yvy pewarà kõ opõ'ãtà ãmõ ate'y kõ rè. Ojiapisità ojeeve kupa. Ojimomojy tètà ãmẽ kupa, e'i. Ãmõ, taa taa rupi yvy otytytà, e'i. Ãmõ, taa taa rupi tyavorusu okwatà rã'ĩ, e'i. [Ãmẽ tè pekuwatà avãerĩ mã'ẽ, e'i.] 8Ãwitõ ipuru'au mã'ẽ okuwa omemy taray remẽ, ãwĩvo ve pekuwatà avãerĩ aiko mã'ẽ, e'i ijupe kõ imomewa.

9E'i jẽ Jesu:

– Aja paire peãpã kõ pepyytà. Pemomorijauokatà pejukaoka kupa. Pirujẽ yvy yvy wãnà kõ ojikõ'õtà pene, ekoty rewarà kõ tè pejẽ rewarà mõ, e'i.#Mat. 10.22

10– A'evo remẽ mõa'ãrõwã “aje” ne'i'ãi ije ky'y. Okyje aità ãpã kõ wyi kupa. Ajawyi opoità ewyi kupa. A'evo kupa paire, ojimotee aità kupa ky'y ojiupe kõ ãmẽ. Ojiupiu tè ojimoripeokatà kupa. Ojimoripe aità ojee kupa, e'i. Sota rõvijã kõ po pè ojime'ẽokatà kupa, e'i. Ojikõ'õ ai ywetetà ojee kupa, e'i.#Mat. 10.22 11Ãmẽ a'evo remẽ, Janejare'e ayvu mojenuarà rã'ãga kõ ve oikotà, mõa'ãrõwã. Ãmẽ a'e kõ mõa'ãrõwã mirà kõ pè ojavyokatà Janejare'e ayvu rupi tekoua, e'i.

12– Ãmẽ ajaire ikasiay wetetà nivoi tekoua jane kõ rè ky'y. Pe'ĩpe'ĩ kõrijõtà tè Janejare'e wauvay mãe kõ ky'y. A'evo remẽ, iwasuaytà ky'y. 13Ãmẽ pejimomãatã jẽ ere pejirovija remẽ, epyri peiko karuarutà kãramõ peiko ãmẽ.#Mat. 10.22 14Ãmõ, keetà rã'ĩ ajo e'ãve. Pirujẽ ãmõ yvy wãnà kõ pè Janejare'e ayvu e'eay tojenu rã'ĩ. Manyvo tekoua Janejare'e jamoẽoka jane'arà kyty remẽ mã'ẽ tojenu rã'ĩ. Yvy popy kyty ekoty rewarà kõ omojenu jenutà, tokuwa kupa. Aje, ekoty rewarà kõ tè omojenu jenutà erokwa. A'evo paire tè ajo tarà mijẽ ky'y. Ãmẽ tè yvy opatà ky'y, e'i Jesu.

[– Haa! A'evotà si! e'i ãmẽ enu kupa.]

“Jerusarẽ taa wãrimãtà ipãsarõ kupa”, e'i Jesu mã'ẽ

(Maku 13.14-23; Rukasi 21.20-24)

15Jesu e'i jẽ:

– Kõitokõ Janejare'e ayvu mojenuarà Tanieu kee e'i amãtejẽ karamoe remẽ: “Ipojy ai mã'ẽ tẽ tesõ oinõtà Janejare'e moe'ea retã wyry pè kupa. Jajeovapyy tesõtà ee jamãjã mã'ẽ. A'e rupi iky'a tesõtà tetã Janejare'e kyty ãmẽ ky'y”, e'i Tanieu maekwerà.#Tan. 9.27; 11.31; 12.11 (Ajare aã eremikusiwarerà omogeta mãe kõ pè kee a'e. Tapejimotekokuwavay aepo jaa renu, manyvo jaa tè aepo e'i maekwerà.) Aekwerà rupi katu pemã'ẽtà Janejare'e moe'ea retã mè. 16Ameve Juteja yvy pè ekoi mãe kõ kuise'ẽ jẽ tojava oo. Yvytyru ypy pè tojava oo ojemĩ kupa. 17Py'awarà mõ ikõ tojava oo kupa nẽ. Ava mõ ikujau pè tetã ape 'aryvo tui remẽ, “Taike rã'ĩ eretã wyry pè emoma'e kõ pijarà mõ”, te'i ywe'e tite e'ã ikõ nẽ. Towyjy kõrijõ tè ojava oo. Jikõtevẽ 'arà tè, ajawyi. 18Ãwĩvo ve ava mõ sõ kuipe'e ekoi remẽ ikõ py'awarà mõ teve tojava oo nẽ. Tojivy rã'ĩ e'ã ikõ wetã gyty omoma'e kõ pijarà mõ nẽ.#Ruk. 17.31 19A'evo remẽ ipuru'a mãe kõ pè ywesõ ipojytà. Ãmõ, omemy saky oupi imokamy'u jẽ mãe kõ pè waype ywetetà. 20Ajawyi peporegeta Janejare'e pè, kee tapejẽ: “Janejare'e, ãmãnà mẽ rõwã ikõ ta'evo nẽ”, tapejẽ. “Ãmõ, jimoava 'arà mẽ rõwã teve ta'evo”, tapejẽ, e'i Jesu imogeta kõ.

21E'i jẽ Jesu ijupe kõ:

– A'evo remẽ ywesõ iwasuay wetetà, pirujẽ iwasu maekwerà kõ wyi! Yvy ojinõ ypy remẽ wyive nijamã'ẽi ãwĩ rapijarà rè, ajaate age'e remẽ. Nijamã'ẽ'ãi a'evo mã'ẽ rè, ajaate a'evotà.#J.Jim. 7.14

22– Ajamã'ẽ Janejare'e nomopukuoka'ãi a'evoa. Omopukuoka sõ remẽ, opa kuwa pirujẽ mirà kõ. Janejare'e wemipyteporokwerà kõ wauvay ipi. Oja'a katu ee kõ ipi. Ajawyi nomopukuoka'ãi mãrãnai ijupe kõ, e'i.

23– Ãmẽ a'evo remẽ, ava mõ kee e'i titetà: “Janejare'e Remimuurerà rè ike amã'ẽ”, e'i titetà. Ãmõ kõ, “Ãnĩ! Mokope tui!” e'i titetà. Ãmẽ aepo jaa peenu remẽ, “Aje ipõ?” tapejẽ tite e'ã. 24Kee e'ità mõa'ãrõwã mirà kõ: “Janejare'e Remimuurerà tè ije”, e'i rã'ãgatà mãe kõ. Iwarità tè kupa aepo e'i mãe kõ. Ãmõ, “Janejare'e ayvu mojenuarà tè ije”, e'i rã'ãgatà mãe kõ. A'e kõ mãrãnà jikuwa e'ã iteetejẽ oinõtà kupa poromoripea rõmõ. “Janejare'e remipyteporo kõ tẽ tesõ tamoripe”, e'i tarepe oupe kupa. 25A'evoa rã amome'u amãtejẽ ajupa, tapekuwa, e'i ijupe kõ.

26E'i jẽ Jesu:

– Ãmõ, kee e'i teywetetà poromoripe mãe kõ: “Janejare'e Remimuurerà tekoe'ãma pè tui. Ja'e esa!” e'ità kupa. Aepo e'i kupa remẽ, tapeo e'ã ikõ esa nẽ. Ãmõ, “Ike tetã wyry pè tui”, e'ità kupa. “Aje ipõ” tapejẽ ywe'e tite e'ã peo esa ãmẽ. 27Kee a'e. Ãwitõ tõpã vera vera okwa yva rè remẽ, pirujẽ jane kõ omã'ẽ ee ipi. Ãwĩvo tary ve avãe tarà mẽ, yva pe wyi ajo remẽ, e'i.#Ruk. 17.23-24

28[Ãmẽ aepo wenu remẽ, kee e'i Jesu pè kupa:

– Mã mẽ põ a'evotà, jõvijã? e'i e'i ijupe kupa.]

Ãmẽ e'i Jesu:

– Uruvu rè tè poromosã'ãgatà tapekuwa sa'u ajawyi. Moma'e reãgwerà 'aryvo katu uruvu kõ ojimoaty ipi. Ajawyi pemã'ẽ ee remẽ, “Moma'e põ omãnõ?” pejẽ ipi. Ãwĩvo ve iteetejẽ evãea rã mojikuwapa kõ rè pemã'ẽtà, “Ke'ĩ Jesu ovãetà”, tapejẽ ije, e'i ijupe kõ.#Ruk. 17.37

[– Haa! e'i ijupe ãmẽ kupa.]

Jesu ovãe tarà mijẽ mã'ẽ rewarà

(Maku 13.24-27; Rukasi 21.25-28)

29Jesu e'i jẽ:

– Ãmẽ a'evo paireve kwaray omy 'ejẽtà ky'y. Ãmõ, jay naeny'ãi teve ky'y. Ãmõ, jaytata kõ yva pe wyi okukuipatà. Yvag onãrarã 'ete tary ve ky'y, ipupewarà kõ revejẽ.#J.Jim. 6.12-13 30Ãmẽ sõsi mitirõwã eny mã'ẽ votà ajikuwa yva rè. Yva rãtasĩ rupi ajotà. Ekasia reny revejẽ ajotà. Ãmẽ si yvy kyty warà kõ pirujẽ omã'ẽtà ere ky'y. Oja'o ywetetà ere omãjã kupa. Pirujẽ yvy kyty warà kõ oja'otà ere omãjã.#J.Jim. 1.7 31Ameve kuipe'e wyive jimi'a puku ojenutà ky'y. Wayvoay tesõ ojenutà. A'e ojenu remeve eremĩgwai yvapewarà kõ amonotà pirujẽ ekoty rewarà kõ tomoaty eru kupa. Yvy popy rupi amono mono kõtà ekoty rewarà kõ pijarà mõ, e'i Jesu ijupe kõ.

Jesu vãea rã mojikuwapa kõ rewarà

(Maku 13.28-31; Rukasi 21.29-33)

32E'i jẽ Jesu:

– Ma'e rè pemosã'ãga esa. Ãwitõ wakapu okui ypy remẽ, “Kuise'ẽ jẽ kwaraytà ky'y”, ja'e ipi. 33Ãwĩvo vetà evãea rã mojikuwapa rè pemã'ẽ remẽ, “Ke'ĩ Jesu ovãetà”, pejẽtà ee pemãjã. 34Aje ywete age'e remẽwarà kõ nopaive remeve a'evotà. 35Ãmẽ si yvag opatà ky'y. Yvy opa tary ve. Eayvukwerà ãmẽ nopa'ãi, e'i Jesu.

“Evãe tarà 'arà nojikuwa amãtejẽ'ãi jane kõ pè”, e'i Jesu mã'ẽ

(Maku 13.32-37; Rukasi 17.26-30,34-36)

36E'i jẽ Jesu:

– Ava nokuwa amãtejẽ'ãi evãe tarà 'arà. Nojikuwa'ãi manyvo remẽ. Mape kwaray remẽ. Mã jay remẽ. Nojikuwa'ãi wete si! Janejare'e remĩgwai yvapewarà kõ ve nokuwa amãtejẽ'ãi. Ije ipe, Janejare'e Ra'yry rõmõ teipe remẽ, nakuwaive evãe tarà 'arà. Papa rõmõ'ĩte a'evoa okuwapa. 37Ja'ave rõwã ekoità kupa, ajo mijẽ remẽ. Ãwitõ tãmõ Noe akatuarà kõ ja'ave rõwã ekoi yy poru renone. 38A'e kõ itõkõ jimiwa règà oja'a. Ãmõ, oporaita règà itõkõ oja'a iko kupa. Ãmõ, jirekoa règà oja'a iko kupa. Janejare'e rè noja'ai 'ete ãmẽ kupa. A'evo 'evo tè ekoi kupa, ajaa puku pè tãmõ Noe oikepa nawiu pupe oike oo remẽ. 39Ãmẽ sõsi yy poru ojiãparõ upa ky'y. Ãmẽ tè tite oja'a ipe Janejare'e ayvu rè kupa ky'y. Opa ãmẽ kupa. A'evo tary ve ajimojane mã'ẽ rõmõ ajo mijẽ remẽ. Ãmẽ tè tite oja'a ipetà ere kupa, e'i Jesu.#Jinõ. 6.5-8; 7.6-24

40E'i jẽ Jesu ijupe kõ:

– Ãmẽ kee e'ità. Ma'e remẽ mõrijõ kwaima'e kõ mõ koo pè oposikotà ojeeve iko kupa. Ãmẽ a'e kõ mõ pe'ĩ tè Janejare'e wekyità eraa okoty. Ãmõ ãmẽ noeraa'ãi.#24.40 Oja'a ee mã'ẽ kõrijõ tè weraatà oupi. 41Ãmõ, mõrijõ wãivĩgwerà kõ, tiriku rã'ãigwerà omoku'i ku'i iko kupa remẽ, ãmẽ pe'ĩ teve Janejare'e weraaokatà okoty.

42– Napekuwa amãtejẽ'ãi mã 'arà mẽ avãetà penõvijã wasu rõmõ ajikuwa. Ajawyi tapemoa'u katu jẽ evãea, a'e pejẽ. 43Evãea tapemoa'u jẽ ikõ peiko nẽ. Najikuwa amãtejẽ'ãi ajo. Ãwitõ imona mã'ẽ nojikuwa amãtejẽi uu. Ajawyi tetã jarà ja'ave rõwã tui upa remẽ, imona mã'ẽ ovãe sikaepo. Omoa'u sõ ijarà remẽ, omã'ẽ kuwa pya ee mijã. Noke'ãi tesõ kuwa imoa'u mijã, toike e'ã imona mã'ẽ.#Ruk. 12.39-40; 1Tes. 5.2; 2Pe. 3.10; J.Jim. 3.3; 16.15-16 44Tãwĩvo ve ikõ pejẽ nẽ. Tetã jarà vo temoa'u karuaru jẽ peiko nẽ rõnõ. Poroapy'atà tè avãe, e'i.

“Eremĩgwai e'eay rõmõ tapeiko erapykyre kyty”, e'i Jesu mã'ẽ

(Rukasi 12.41-48)

45E'i jẽ Jesu:

– [Eremĩgwai otekokuwavay mã'ẽ rõmõ tapeiko. Tapetekokuwavay ikõ erapykyre kyty nẽ.] Temĩgwai e'eay otekokuwavay mã'ẽ rè tè poromosã'ãgatà. A'e pè tõvijã ojisyrytà rã'ĩ remẽ, kee e'i rã'ĩ: “Oromojõvijãtà rã'ĩ erekovijarà rõmõ”, e'i. “Eremĩgwai kõ rè tereja'a. Ja'umã'ẽ teremosãi eremĩgwai kõ pè i'arà mẽ gatu”, e'i tõvijã ijupe. “Hoõ” e'i emĩgwai imono. 46Ãmẽ emĩgwai oõvijã ayvukwerà rupi katu oposiko ipi, apykyre kyty. Ajawyi tõvijã wapy'a ovãe remẽ, oryvay wemĩgwai rè. A'evo remẽ ory teve emĩgwai. 47Ajawyi a'e tè tõvijã opyteporotà ijayvumokasi pirujẽ wemirekokwerà jarà rõmõ toiko ky'y. Aje ywete aepo a'e pejẽ, e'i Jesu. 48Kee e'i ojipy'amogeta mã'ẽ nopyteporo'ãi tõvijã. “Oiko puku jẽtà erõvijã”, e'i ywe'e tite oupe mã'ẽ. 49A'e ãmẽ oõvijã remĩgwai kõ wereko ai sõ tite oõvijã rapykyre kyty. Onõpã nõpã kõ tesõ. Ojimi'u kõrijõ tè iko. Ãmõ, oka'u ka'u tè iko, oka'uay mãe kõ reve. Ja'ave rõwã ekoi. 50Ameve sikaepo tõvijã ovãe iko ky'y, emĩgwai nomoa'ui ywe'e tite remeve. “Mokoi avãetà”, ne'i. Manyvo ne'i'ãi emĩgwai opokou remẽ ky'y. 51Tõvijã ope'atà imono jimomorijaua rena kyty. Oõvijã werovija rã'ãga mãe kõ rena kyty omonotà. A'e pè ojiãpĩkãkãi tesõtà ojawa rõmõ iko kupa. [Ajawyi eremĩgwai otekokuwavay mã'ẽ rõmõ tapeiko teãmã, a'e pejẽ,] e'i Jesu ijupe kõ.

Currently Selected:

Mateusi 24: oymNT

Highlight

Copy