Mateusi 27

Kovenatu Piratu rovake weraa Jesu kupa remẽwarà

(Maku 15.1-2; Rukasi 23.1-2; Juwão 18.28-32)

1Ajaire ji'iveay pirujẽ jõvijãgwerà kõ e'ipa manyvotà wereko Jesu jukaoka. Janejare'e pè oporegeta mãe kõ rõvijã kõ. Ãmõ, Juteu rõvijãgwerà kõ. 2Opokwa eraa kupa. Kovenatu Piratu po pè ome'ẽtà kupa. Juteja yvy pewarà kovenatu tè Piratu.#27.2 Juteu rõwã Piratu ajamã'ẽ. Romã wãnà tè a'e.

Jutasi omojivy ipe Jesu me'ẽawerà repykwerà remẽwarà

(Jesu koty rewarà kõ 1.18-19)

3Ãmẽ Jesu jukaa rã ojenu Jutasi pè remẽ, ojimonyi enu.

– Moma'e rã sõpõ a'evo aiko mijã! e'i. Ajawyi epykwerà tamojivy tojuka e'ã kupa, e'i tite oupe.

Weraa ipe epykwerà Janejare'e moe'ea retã gyty imojivy mijã. A'e 30 rõmõ karakuri sĩ moeta. Janejare'e pè oporegeta mãe kõ rõvijã kõ pè ome'ẽtà. Ãmõ, Juteu rõvijã kõ pè. 4Kee e'i ijupe kõ:

– Ije itõkõ erõvijã amoãkwa'ã! Nivoi aiko a'evo remẽ. Mire'eay tesõ erõvijã! Temijarà rã rõwã sõ mijã! e'i epe.

Ajamã'ẽ jõvijãgwerà kõ “aje ipõ” ne'i ijayvu renu. Nopyyi karakuri iwyi kupa.

– Ãnĩ! e'i kupa. Orerewarà rõwã! Nerewarà tè! e'i kupa.

5– Ãnĩ! Ajamã'ẽ napotai ky'y! e'i epe Jutasi ijupe kõ.

Ajawyi karakuri sĩ omopei ipyri kõ ity oo. Janejare'e moe'ea retã pe wyi ojisyry oo. Ajaire oo ojikuruka ãpasĩ omãnõ, ovote.

6Ãmẽ ajaire apykyre kyty jõvijãgwerà kõ omovyvy mijẽ karakuri.

– Aã karakuri porojukaokaa repykwerà tè, e'i ojiupe kupa. Ajawyi nijame'ẽ'ãi kuwa Janejare'e moe'ea retã pewarà kõ pè. Aepo e'ipa Moisesi ikusiwa karamoe remẽ. Ajawyi moma'e rè sipõ simomatà karakuri? e'i jõvijãgwerà kõ ojiupe.

7Ajawyi kee wereko karakuri kupa ky'y. Turuwa reinõgarà rena opyy tyvy rena rã rõmõ kupa. Ãmõ taa wãnà kõ ryvy rena rã rõmõ opyy kupa. Juteu rõwã mãe kõ ryvy rã. 8Ajawyi “Tuwykwerà rena” eu a'e tyvy pè, Jesu jukaawerà repykwerà rè opyy kupa rewarà mõ. Ajaate age'e remẽ aepo eu jẽ ijupe.

9A'evoa Janejare'e ayvu mojenuarà Jeremia omome'u amãtejẽ karamoe remeve. Kee e'i ikusiwa: “Karakuri 30 rõmõ, Isaeu kõ ome'ẽtà imoãkwa'ãa repykwerà rõmõ. 10A'e karakuri rè tyvy rena rã opyytà kupa. Turuwa reinõgarà wyi opyytà kupa”, e'i maekwerà.#Sak. 11.12-13 Aekwerà rupi katu tè a'evo wereko kupa.

Jesu kovenatu Piratu rovake tui remẽwarà

(Maku 15.2-5; Rukasi 23.1-5; Juwão 18.33-38)

11Ãmẽ Jesu weraa kovenatu pyri kupa ky'y. Ayvukasia rena pè kovenatu wapy upa. A'e pè Jesu opõ'ã ovake upa. Ãmẽ Piratu e'i ijupe:

– Aje põ Juteu kõ rõvijã tè si ene? e'i Jesu pè.

– Õ'õ. Aje katu aepo ere, e'i Jesu ijupe.

12Ãmẽ Janejare'e pè oporegeta mãe kõ rõvijã kõ nivoi mã'ẽ omo'y teywete Jesu rè, “Piratu tojukaoka”, e'i kupa rewarà mõ. Ãmõ, Juteu rõvijã kõ ve a'evo ekoi. Ajamã'ẽ nipui 'ete Jesu aepo e'i ijupewarà mõ kupa remẽ.

13Ãmẽ Piratu e'i mijẽ Jesu pè:

– Nereenui põkõ nivoi mã'ẽ omo'y nere kupa remẽ? Manyvo eretà põkõ aepo renu? e'i Jesu pè.

14Jesu nipui 'eteay ajamã'ẽ aepo e'i Piratu remẽ. Ajawyi Piratu ojimonyijay a'evo remẽ.

– Manyvore sipõ nipui eupe? e'i oupe ojipy'amogeta.

Kovenatu Piratu ojukaoka Jesu remẽwarà

(Maku 15.6-15; Rukasi 23.13-25; Juwão 18.39–19.16)

15Tãmõ kõ jisyryawerà moetea 'arà remẽ upi upi kovenatu Piratu wemimopã'ãgwerà mõ omoẽoka ipi. Pe'ĩ tè ajamã'ẽ omoẽoka ipi, kwaray upi upi. Aty wasu tè opyteporo a'evo remẽ tomoẽ ipi. 16Ãmẽ a'evo Jesu wereko kupa remẽ, oiko emimopã'ãgwerà mõ, erãkwẽ mã'ẽ, Parapa eu ijupe mã'ẽ. 17Ãmẽ aty wasu ojimoaty kovenatu Piratu pyri kupa remẽ, kee e'i kovenatu ijupe kõ:

– Mã ywesõ põ pepota tamoẽoka? e'i. Parapa põ ma'e remẽ? Ãnĩ? Jesu põ ma'e remẽ? Janejare'e Remimuurerà eu mã'ẽ põ? e'i Piratu.

18Piratu okuwa Juteu rõvijãgwerà kõ ojimõarõ teywete Jesu rè. Ajawyi tè weru ovake kupa, tojukaoka. A'evoa okuwa katu.

19Ãmẽ Piratu wapy jẽ a'e pè upa remẽ, erekwarà wayvu mõ omonooka ijupe. Kee e'i epe imonooka ijupe:

– Terejukaoka e'ã ãwĩ kwaima'e. Ivo katuay mã'ẽ tè ãwĩ. Apouvai ai wete age'e pya ee. Emonyijay epouvaiawerà! e'i epe imonooka omẽnà pè.

20Ãmẽ Janejare'e pè oporegeta mãe kõ rõvijã kõ omo'eoka aty wasu kõ, kee te'i wapukai rõmõ kupa:

– Parapa tè ikõ emoẽoka nẽ! Jesu ãmẽ ejukaoka! te'i wapuka pukai rõmõ kupa.

Juteu rõvijã kõ ve omo'eoka kõ aepo te'i kupa.

21Ãmẽ kovenatu Piratu “hoõ” ne'ive. Kee e'i mijẽ ijupe kõ:

– Mã põ ajawyi amoẽoka? e'i.

E'i jẽ aty wasu kõ:

– Parapa tè! e'i mijẽ wapukai kupa.

22Ãmẽ Piratu e'i ijupe kõ:

– Jesu pa'e? Janejare'e Remimuurerà eu mã'ẽ? Manyvotà põ areko? e'i.

– Yvyra jipokana rè ejukaoka! e'i e'i kupa.

23Aepo e'i kupa rewarà mõ Piratu e'i:

– Manyvo rewarà mõ põkõ ajukaokatà, ãwisõ naikoi 'eteay ijaiwererà ee remẽ? e'i.

Ne'i kupa ajamã'ẽ. Ãmẽ ywesõ wapuka pukai kupa.

– Ejukaoka yvyra jipokana rè! e'i kõrijõ kupa.

24Ãmẽ kovenatu Piratu manyvo ne'i'ãi ky'y. Jesu nojuka tuvei sõ remẽ, aty wasu ojikõ'õ aità ee ãmẽ. Ajawyi manyvo ne'i ky'y. Ojipokusu kõrijõ ãmẽ aty wasu rovake. “Ije rõwã ajukaokatà” jaa tè ojipokusu. Ajawyi kee e'i aty wasu pè:

– Ije rõwã Jesu ajukaokatà, e'i. Pejẽ tè pejukaokatà, e'i ky'y.

25Ãmẽ aty wasu kõ e'i:

– Hoõ, i'ete! e'i. Orere tè ijukaawerà tojisu'u ajawyi! Orejeapyrerà kõ reve tojisu'u, e'i otekokuwa e'ã rõmõ kupa.

26Ãmẽ Piratu si omoẽoka Parapa ky'y. Jesu ãmẽ ome'ẽ sota kõ po pè tonõpã nõpã eraa ijuka kupa.

Sota kõ omojaiwe Jesu remẽwarà

(Maku 15.16-20; Juwão 19.2-3)

27Ãmẽ ajaire sota kõ weraa rã'ĩ Jesu oõvijã wasu retã wasu ypy pè. Oka mytery pè weraa kupa, kovenatu posikoawerà retã pè. Pirujẽ sota kõ ojimoatypa katu a'e pè. Wãrimã tesõ Jesu kupa.

28Ajaire a'e kõ opota Jesu oojai. Ajawyi omoe'e rã'ãga kupa. Ijyru poko omopyso iwyi kupa. Jõvijã yru poko ipirã mã'ẽ pè oyrunõ rã'ãga rã'ĩ kupa. Tyru pirã poko opypy ee kupa, oõvijã rã'ãga rõmõ. 29Joõ vo sõ mã'ẽ oinõ ãkãnytarà rõmõ kupa. A'e oinõ Jesu ãkãg rè, jõvijã ãkãnytarà rã'ãga rõmõ. Ãmõ, yvyra po'i poko pupe opytunõ kupa, i'ekatu kyty, jõvijã pytu rã'ãga rõmõ. Ajaire ojimoenãpa'ã ovake emĩgwai rã'ãga rõmõ imoe'e rã'ãga kupa.

– Age'e si tereiko puku Juteu kõ rõvijã rõmõ! e'i rã'ãga ijai kupa.

30Ajaire otõmõ tõmõ ee kupa. Jõvijã pytu rã'ãga wekyi ipo pe wyi ijãkã nõpã nõpã ipupe kupa. A'evo wereko imojaiwe kupa. 31Ajaire omopyso ekyi tyru pirã iwyi kupa. Ijyru omojivyrĩ ipypy ee kupa. Ajaate weraa ijukatà kupa ky'y. [Jerusarẽ taa kupei kyty weraatà kupa, imirai mã'ẽ jukaa rena kyty.]

Jesu omoputuputuri yvyra jipokana rè kupa remẽwarà

(Maku 15.21-32; Rukasi 23.26-43; Juwão 19.17-27)

32Ãmẽ taa pe wyi weraa ereko jakatu, kwaima'e mõ reve ojiõvaisĩ kupa. Sireni taa wãnà mõ tè a'e. Simão eu erà pè. Ãmẽ sota kõ kee e'i wayvukasi rõmõ ijupe:

– Aã yvyra jipokana emovy eraa py'ajẽ ikenẽ, e'i ijupe kupa.

Omovy eraa ãmẽ ijayvu kõ rupi.

33Ãmẽ sota kõ weraa jẽ Jesu yvytyry kyty. Kokota e'i Juteu kõ a'e yvytyry pè. “Joãkãgwerà rena” jaa tè Kokota.

34A'e pè ovãe kupa remẽ, sota kõ janeray mogwapa poã oinõ uvary aisiriri katu mã'ẽ pupe ime'ẽ ipe Jesu pè. A'e Jesu wã'ã esa remẽ, no'ui.

35Ajaire omoputuputuri yvyra jipokana rè imõ'ã kupa. Ajaire ojimarai rã'ĩ ijyrukwerà rè kupa.

– Ava põ opyytà ijyrukwerà? e'i imomo momo kupa.

A'evo wereko ipyy imosãi ojiupe kupa.#Jĩg. 22.18 36Ajaire wapy ãrõ kupa.

37Ãmẽ yvyra pee rè kee'i ikusiwa kupa: “Jesu tè aã, Juteu kõ rõvijã wasu tè”, e'i ikusiwa kupa. Ãwĩ jikusiwarerà oinõ Jesu apyte 'aryvo kupa. [A'evo a'e rupi okwa mãe kõ omã'ẽtà ikuwa, manyvo rewarà mõ ojuka kupa.]

38Ãmõ, mõrijõ ve imona mãe kõ omopã'ã yvyra jipokana rè imõ'ã Jesu pyri kupa. Ãmõ, ijaukwerà kyty. Ãmõ, i'ekatu kyty. Mytery pè katu Jesu tui upa.

39Ãmẽ jane kõ okwa Jesu pyryvo remẽ, oojai okwa kupa.#Jĩg. 22.7

40– Ene itõkõ, “Amoma kuwa Janejare'e moe'ea retã! Ajaire moapy 'arà paire, ãmõ tè ainõtà”, ere itõkõ mijã! Ejireko katu ajawyi! Janejare'e Ra'yry tè ene remẽ, ewyjy mokope wyi, teremãnõ e'ã! e'i ijai kupa.#Mat. 26.61; Juw. 2.19

41Janejare'e pè oporegeta mãe kõ rõvijã kõ ve siwã oojai. Ãmõ, tãmõ Moisesi remikusiwarerà rè poromo'e mãe kõ ve siwã oojai. Ãmõ, Juteu rõvijã kõ. A'e a'e kõ kee e'i ojiupe kupa:

42– Poroereko katuarà tè itõkõ ãwĩ mijã! e'i kupa. Manyvore sipõ ajawyi ovote nojireko katui! e'i e'i ijai kupa. Isaeu kõ rõvijã rõwã si ãwĩ! Age'e yvyra jipokana re wyi owyjy remẽ, “Aje ywete Janejare'e Remimuu tè ãwĩ”, oro'età ijupe ky'y, e'i ijai kupa. 43Ãmõ, “Janejare'e rè eako'i. A'e toereko katu imãnõa wyi ajawyi, oporijauesa remẽ. Siãrõ rã'ĩ esa!” e'i rã'ãga teve kupa.#Jĩg. 22.8

44Imona mãe kõ ve siwã oojai, Jesu reve yvyra jipokana rè omãnõtà upa mãe kõ.

Jesu mãnõa rewarà

(Maku 15.33-41; Rukasi 23.44-49; Juwão 19.28-30)

45Jane 'aryvo katu kwaray remẽ apy'awarà mõ ijãpatõma. Pãtõma 'ejẽ ajaate ijãpẽ kwaray remeve. Pirujẽ a'e yvy rupi pãtõnusu. 46Ãmẽ ijãpẽ kwaray remẽ Jesu wapukai wayvo. Kee e'i wayvu rupi:

– Eri, Eri, rama sapakatani! e'i. “Janejare'e, manyvore põ ereity rejupa?” jaa tè aepo e'i.#Jĩg. 22.1

47Ãmõ kõ ipyri'ĩje'ẽ tui mãe kõ mõ wenu aepo e'i remẽ. A'e kõ kee e'i tite ojiupe:

– Tãmõ Eriasi#27.47 Janejare'e ayvu mojenuarà mõ karamoe remeve Eriasi. pè aepo e'i, [towyjy uu,] e'i tite kupa.

48Ameve ava mõ ojã oo moma'e ipyu mã'ẽ pyy imoãkã uvary ai mã'ẽ pupe. A'e omoturisara imono Jesu juru pè, tomosusu mijã.

49Ãmẽ ãmõ kõ kee e'i:

– Siãrõ rã'ĩ esa! Maevo tãmõ Eriasi uutà ereko katu, e'i ijai kupa.

50Ameve Jesu wayvo wapukai ojikyi oo. Opi i'ãg oẽ oo.

51Ãmẽ oiko Janejare'e moe'ea retã wyry pè kamisa ijanamu mã'ẽ ijokenaa rõmõ mã'ẽ, ikatuay mã'ẽ.#Jisyry. 26.31-33 A'e Jesu omãnõ remeve apy'a ojiãvasĩ. Yvate kyty wyi tesõ ojiãvasĩ ojisa. Ãmõ, yvy otyty tesõ teve. Pareti kõ otororo tesõ teve. 52-53Teãgwerà kõ rena kõ ve tesõ otororopa, pareti kwarà kõ. Ameve Janejare'e werovija maekwerà kõ reãgwerà kõ opoerapa oẽ oẽ, mõa'ãrõwã. A'e kõ Jesu opoera opõ'ã paire, oo Jerusarẽ taa kyty. A'e pè mõa'ãrõwã jane kõ omã'ẽtà ee kõ.

54Ãmẽ Jesu omãnõ remẽ, sota kõ rõvijã mõ ipyri'ĩje'ẽ tui upa, wemĩgwai sota kõ reve. A'e kõ Jesu mãnõa rè omã'ẽ upa. Yvy tytya rè teve omã'ẽ kupa upa. Pirujẽ a'evoa rè omã'ẽ kupa upa. Ojimonyijay ee omãjã kupa. Ameve tite e'i sota kõ rõvijã:

– Janejare'e Ra'yry tè sikaepo sijuka! e'i.

55Ãmẽ wãivĩgwerà a'e pè tui, Jesu omãnõ remẽ. Ijaty sa'u kupa. Kuipe'e wyi omã'ẽ ee kupa upa. A'e kõ Jesu rupi uu Karireja yvy kyty wyi maekwerà kõ. Ipãtavõarerà kõ tè a'e kõ.#Ruk. 8.2-3 56Kejõ. Maria Matarena. Ãmõ, Maria Tiaku y. Juse y ve a'e. Ãmõ, Semeneu rerekwarà. Ãmõ wãivĩ kõ ve omã'ẽ ee upa. Mokopejõ Jesu mãnõa rè omã'ẽ.

Jesu reãgwerà mokatua rewarà

(Maku 15.42-47; Rukasi 23.50-56; Juwão 19.38-42)

57-58Ãmẽ Jesu mãnõa ojikuwapa kwaima'e mõ pè, Juse eu ijupe mã'ẽ pè. Arimateja taa wãnà mõ a'e. Imoma'e ywete mã'ẽ tè a'e. Jesu remimo'ekwerà mõ tè a'e. A'e Jesu mãnõa okuwa remẽ, oo kovenatu Piratu resa. Karumẽ oo.

– Jesu reãgwerà taraa imokatu, e'i Piratu pè.

“Hoõ” e'i ãmẽ Piratu ijupe. Ome'ẽoka eãgwerà ijupe ãmẽ.

59Ãmẽ Juse opyy ijõvã jõvã kamisa poko ipyau mã'ẽ pupe, kamisa e'eay mã'ẽ pupe, “rijõ” eu ijupe mã'ẽ pupe. 60Pareti kwarà pupe omokatu eãgwerà, weãgwerà rena rã pupe. Age'e ojinõma mã'ẽ a'e. Eãgwerà omokatu paire, oovapy. Takuru ipowyi mã'ẽ pupe oovapy. Omotore tore ikwarà rovake inõ. A'evo wereko kupa paire, ojivy oo.

61Kejõ wãivĩgwerà a'evoa rè omã'ẽ. Maria Matarena. Ãmõ Maria eu ijupe mã'ẽ teve. A'e kõ a'e pè wapy ee omãjã upa, teãgwerà rena rovake.

Sota kõ oo Jesu reãgwerà rena rãrõ remẽwarà

62Kõ'ẽme Juteu rõvijãgwerà kõ oo mijẽ kovenatu Piratu resa. Jimoava 'arà mẽ oo kupa. Janejare'e pè oporegeta mãe kõ rõvijã kõ teve oo. Ãmõ, Pariseu kõ mõ. Mokopejõ oo kupa. 63Kee e'i ijupe kupa:

– Jesu nomãnõive remẽ, kee e'i owari rõmõ: “Janejare'e emomoeratà amãnõ remẽ. Moapy 'arà remẽ a'evotà erereko”, e'i mã'ẽ.#Mat. 16.21; 17.23; 20.19; Mak. 8.31; 9.31; 10.33-34; Ruk. 9.22; 18.31-33 64Ajawyi kee oro'e ene. Maevo emimo'ekwerà kõ imona vijatà eãgwerà rè inõ gatu. Ajaire, “Opoera tè”, e'i titetà owari rõmõ kupa. Ãmẽ ywesõ ipojytà iwaria kõ poromoripea rõmõ ky'y. Ajawyi kee oro'e ene. Sota kõ teremono eãgwerà rena toãrõ jẽ kupa, oro'e. Moapy 'arà rõmõ a'e pè topyta jẽ ãrõ upa, e'i jõvijãgwerà kõ kovenatu Piratu pè.

65– Hoõ, e'i ãmẽ. Sota kõ peraa ãmẽ, ãrõarà kõ rõmõ. Tapemã'ẽ gatu ee penemikuwa rupi, e'i ijupe kõ.

66Oo ãmẽ kupa. Sota kõ weraa oupi kupa, Jesu reãgwerà rena kyty. Turi vo sõ mã'ẽ pupe wape ape ipe eãgwerà rena rovapyka kupa, ava mõ toovapyjavo e'ã eãgwerà ekyi eraa, e'i kupa.

Ãmẽ ajaire jõvijãgwerà kõ ojivy oo. Sota kõ ãmẽ opyta jẽ a'e pè ãrõ upa.

Currently Selected:

Mateusi 27: oymNT

Highlight

Copy