Mateusi 28

Jesu omãnõ maire opoera mijẽ remẽwarà

(Maku 16.1-8; Rukasi 24.1-12; Juwão 20.1-10)

1Jimoava 'arà paire, ji'iveay Maria Matarena oo mijẽ Jesu reãgwerà resa. Ãmõ Maria eu ijupe mã'ẽ teve oo upi esa. 2Ameve yvy py'awarà mõ otyty tesõ. Ãmẽ si Janejare'e remĩgwai mõ yvapewarà owyjy uu yva pe wyi. A'e tè takuru tyvy rovapyka ipowyi mã'ẽ omotore tore ekyi imoisyry. Ajaire wapy ovapyka 'aryvo upa. 3Poroeakwaso tesõ a'e yvapewarà. Ijyru sĩ gatu a'e. Yvasĩ vo tesõ ijyru. 4A'e rè sota kõ omã'ẽ remẽ, okyje ai tè iwyi kupa. Otytypa tesõ ojimonyi iko kupa. Omãnõ mã'ẽ vo 'ejẽ [o'a yvy pè] kupa.

5Ãmẽ Janejare'e remĩgwai e'i wãivĩ kõ pè:

– Pejimonyi sõ! e'i. Akuwa Jesu tè peeka. Yvyra jipokana rè omãnõ maekwerà tè peeka. 6A'e natui ike ky'y. Opoerapa oẽ oo ky'y. Kõitokõ e'ipa maekwerà rupi katu tè a'evo ekoi. Pepota peike esa remẽ, peike ãmẽ esa. Ike eãgwerà tui mijã. [Natui ky'y ajamã'ẽ,] e'i.#Mat. 16.21; 17.23; 20.19

7E'i jẽ ijupe kõ:

– Pekwa imomewa kuise'ẽ emimo'ekwerà kõ pè, e'i. “Jesu opoera mijẽ! Janejare'e omomoerapa”, pejẽ. “Karireja yvy kyty ootà penenone kyty. A'e pè penãrõ tarà mijẽ upa”, pejẽ. Eayvukwerà rupi katu ikõ tapejẽ nẽ, e'i.

8Aepo e'i remeve wãivĩ kõ kuise'ẽ ojivy oo. Ojimonyijay kupa. Ajamã'ẽ ory katu kupa. Ojivy oo Jesu remimo'ekwerà kõ kyty a'evoa momewatà kupa. 9Ajamã'ẽ pee rupi oo jẽ iko kupa remeve sikaepo Jesu ojisa ijupe kõ. Kee e'i ijupe kõ:

– Janejare'e ikõ tapepy'amopiryvypy katu nẽ! e'i ijupe kõ.

Ãmẽ Jesu rè wãivĩgwerà kõ omã'ẽ remẽ, oo ipyri'ĩje'ẽ kupa. Ojimoenãpa'ã ovake kupa. Jesu py rè ojipy imoe'e kupa.

10E'i Jesu ijupe kõ:

– Pejimonyi sõ! Pekwa jẽsi eretãrãgwerà kõ pè erewarà momewa, Karireja yvy kyty too erõvaisĩ kupa, e'i.

Sota kõ remimome'ukwerà rewarà

11Ãmẽ wãivĩgwerà kõ ojivy jẽ oo remẽ jakatu sota kõ mõ Jesu reãgwerà rena wãrõ maekwerà kõ ve ojivy oo Jerusarẽ taa kyty. Juteu rõvijãgwerà kõ mogeta tè oo kupa. Janejare'e pè oporegeta mãe kõ rõvijã kõ mogeta oo kupa. Pirujẽ manyvo ekoi maekwerà kõ omome'u kupa. 12Ãmẽ aepo jaa jõvijãgwerà kõ wenu remẽ, ojimoaty ojimogeta kupa.

– Manyvo jarekotà a'evoa tojikuwa e'ã? e'i kupa.

Ajawyi kejavu karakuri ome'ẽ sota kõ pè kupa, tiwari kupa.

13– Kee tapejẽ ikenẽ: “Pya oroke remẽ, emimo'ekwerà kõ uu vija sikaepo oõvijã reãgwerà rekyi eraa”, tapejẽ ikenẽ. 14Tapekyje e'ã ikõ kovenatu wyi nẽ. A'evoa ojenu sõ ijupe remẽ, poropijarĩtà ãmẽ, kovenatu tapemomorijau e'ã, e'i ijupe kõ kupa.

“Hoõ” e'i sota kõ ãmẽ. 15Ãmẽ owaria repykwerà opyy erojivy eraa kupa. Jõvijãgwerà kõ e'i maekwerà rupi katu omome'u erokwa kupa.

Aepo jaa ojenu jẽ Juteu kõ pè. Ajaate age'e remeve aepo jaa ojenu.#28.15 Kareta ojikusiwa remẽwarà pè “ajaate age'e remeve” jaa tè.

Jesu ojisaoka mijẽ wemimo'ekwerà kõ pè remẽwarà

(Maku 16.14-18; Rukasi 24.36-49; Juwão 20.19-23; Jesu koty rewarà kõ 1.6-8)

16Ãmẽ Jesu remimo'ekwerà kõ ajaire ojivy oo Karireja yvy kyty, 11 rõmõ mãe kõ. Yvytyrapyte 'arà kyty ojiupi oo kupa, ijayvukwerà rupi katu.#Mat. 26.32; Mak. 14.28 17A'e pè ojiõvaisĩ Jesu reve kupa. Omã'ẽ ee kupa remẽ, omoe'e ywete kupa.

Ajamã'ẽ a'e kõ mõ,

– Aje sipõ Jesu tè? e'i tite.

18Ãmẽ Jesu uu ipyri kõ imogeta kõ. Kee e'i ijupe kõ:

– Papa eayvumokasi. Pirujẽ yvapewarà 'arà kyty aiko. Ãmõ, pirujẽ yvy pewarà kõ 'arà kyty teve aiko. 19Ajawyi pekwa eayvu mojenu pirujẽ yvy pewarà kõ pè erokwa, ekoty rewarà kõ rõmõ toiko kupa. A'evo mãe kõ tapemojãmorĩ kõ Papa ayvu rupi. Ãmõ, ije, Ta'yry rõmõ, eayvu rupi teve tapemojãmorĩ kõ. Ãmõ teve, i'Ãg ayvu rupi teve, a'evo tapereko kõ.#J.K.R. 1.8 20Ãmõ, tapemotekokuwa kõ erekoa rè, pirujẽ a'epa pejẽ maekwerà rupi toiko kupa. A'evo peiko remẽ, peneve aikotà. Ajaate yvy opa remẽ peneve aiko jẽtà aiko, e'i Jesu ijupe kõ.

[Awyjepa Mateusi remikusiwarerà Jesu rewarà ky'y.]

Currently Selected:

Mateusi 28: oymNT

Highlight

Copy