Maku 10
10
Werekwarà wyi opoi mã'ẽ rewarà
(Mateusi 5.31-32; 19.1-12; Rukasi 16.18)
1Ãmẽ Jesu aepo e'i paire, ojisyry oo Juteja yvy kyty. Yy Jotão ovae kyty oo [wemimo'ekwerà kõ reve]. Ãmẽ aty wasu kõ oo ojimoaty mijẽ ikoty. Ãmẽ Jesu poromo'e mijẽ. Ãwitõ poromo'e ipi maekwerà vo jẽ poromo'e.
2Ãmẽ Pariseu kõ mõ uu ikoty. “Jesu siayvumoopa”, e'i tite kupa. Ajawyi kee e'i rã'ãga kupa:
– Kee jaa rè oremo'e rejupa! Manyvo põ tãmõ Moisesi e'i joerekwarà wyi moia rè? e'i rã'ãga kupa. Manyvo remeve põ japoi kuwa iwyi? Japota remẽ põ japoi kuwa janererekwarà wyi? e'i rã'ãga kupa.
3Ãmẽ Jesu e'i ijupe kõ:
– Pekuwapa tãmõ Moisesi remikusiwarerà aepo rè. Moma'e e'i põ? e'i ijupe kõ.
4Ãmẽ Pariseu kõ e'i ijupe:
– Kee e'i maekwerà: “Ava mõ opoità sõ werekwarà wyi imoisyry remẽ, kareta tome'ẽ rã'ĩ ijupe opoia mojikuwaparà rõmõ”, e'i maekwerà, e'i kupa.#T.M. 24.1-4
5Ãmẽ Jesu e'i ijupe kõ:
– Naperovija tari Janejare'e ayvukwerà rewarà mõ aepo e'i tãmõ Moisesi ikusiwa pejẽ. Kee e'i maekwerà naperovija tari: 6“Karamoe remẽ Janejare'e oinõ kwaima'e, wãivĩ reve.#Jinõ. 1.27; 5.2 7Ajawyi ojireko kupa remẽ, opoi oõvijãgwerà kõ wyi oo werekwaa mõ kupa. 8Awyje rõmõ oiko ojeeve iko kupa ky'y, pe'ĩypyte mã'ẽ rõmõ”, e'i maekwerà.#Jinõ. 2.24 9Ajawyi kee a'e pejẽ. Janejare'e pe'ĩypyte mã'ẽ rõmõ oinõ kõ remẽ, tijamowaite kõ e'ã ojiwyi, a'e pejẽ. Awyje rõmõ a'evo oikopa kupa, e'i Jesu ijupe ky'y.
10Aepo e'i paire, Jesu ojisyry Pariseu kõ wyi oo ky'y. Tetã mõ wyry pè oike mijẽ wemimo'ekwerà kõ reve. Oike kupa remẽ, e'i Jesu pè kupa:
– Oremo'e aepo jaa rè rejupa! e'i kupa.
11Ãmẽ Jesu e'i ijupe kõ:
– Kwaima'e mõ sõ werekwarà wyi opoi teywete sõ remẽ. Ajaire wereko ipetà ãmõ wãivĩ. A'evo mã'ẽ pè Janejare'e, “Werekwarà rè nojimoavai iko mã'ẽ tè ãwĩ”, e'i kõrijõtà ãmẽ, omojaiwe tesõ werekwarà ity rewarà mõ. 12Aepo e'i teve wãivĩ mõ pè, opoi sõ omẽnà wyi remẽ, ajaire ãmõ kwaima'e reve ojireko ekovijarerà rõmõ remẽ. “Omẽnà rè nojimoavai iko mã'ẽ tè ãwĩ”, e'i kõrijõtà ijupe, e'i Jesu ijupe kõ.#1Kor. 7.10-11
“Totuu nẽ ja'yrerà kõ ekoty”, e'i Jesu mã'ẽ
(Mateusi 19.13-15; Rukasi 18.15-17)
13Ajaire jane kõ wãkarãgwerà kõ weru Jesu resa toapytepyy kõ [ikatuay Janejare'e toereko kõ]. A'e kõ rè Jesu remimo'ekwerà kõ omã'ẽ remẽ, kee e'i tite kupa:
– Jesu pemo'eaioka peãkarã kõ pè ne! Peeru sõ peãkarãgwerà kõ ikoty! Perojivy kõ eraa! e'i epe kupa.
14Ãmẽ Jesu a'evoa rè omã'ẽ remẽ, nopotai.
– Nemo'eai'ãi ja'yrerà kõ. Totuu nẽ ekoty kupa. Kee aje ywete mã'ẽ rè tapeja'a. Ja'yrerà kõ opota katu Janejare'e omoẽoka o'arà kytywarà rõmõ ipi. A'evo ve tapeiko. 15Na'evoi sõ peiko remẽ, napeo'ãi kuwa ipyri ena pè. Aje ywete aepo a'e pejẽ, e'i ijupe kõ.#Mat. 18.3
16Aepo e'i paire Jesu wajuvy ja'yry kõ. Uu pè oporegeta ãmẽ, owaray toereko kõ.
Kwaima'e imoma'e ywete mã'ẽ uu Jesu pè oporanu remẽwarà
(Mateusi 19.16-30; Rukasi 18.18-30)
17Ãmẽ ajaire Jesu oo iko remẽ, kwaima'e mõ kuise'ẽ uu ikoty. Uu ojimoenãpa'ã ovake javo.
– Poromo'earà, ivo katuay neiko mã'ẽ tè ene. Mano aiko kuwa põ ivo tekoua rupi aiko, taa Janejare'e pyri akãjã remẽ aiko karuaru? e'i Jesu pè.
18E'i ãmẽ Jesu ijupe:
– Manyvore põ “ivo katuay mã'ẽ” ere sõ ije? Nuvei 'ete mirà mõ ivo katuay teãmã mã'ẽ. Janejare'e rõmõ'ĩte a'evo ekoi, e'i ijupe.
19E'i jẽ Jesu imo'e:
– Nekuwapa Janejare'e ayvukwerà tãmõ Moisesi pè ome'ẽ maekwerà, upi tijaiko mã'ẽ. Kee e'i itõkõ: “Terejuka e'ã mirà ikenẽ”, e'i. Ãmõ, “Terejimomy'a e'ã. Nererekwapa remẽ a'e reve kõrijõ tè tereiko ipi mãerã tè”, e'i. Ãmõ, “Tanemona e'ã”, e'i. Ãmõ, “Nivoi mã'ẽ teremo'y e'ã newari rõmõ jane kõ rè nẽ”, e'i. “Toporomoripe e'ã ipi nẽ”, e'i. Ãmõ, “Nerõvijãgwerà kõ teremomojy ipi. Neruu. Ãmõ, ney. Ijayvukwerà rupi tereiko ipi”, e'i.#Jisyry. 20.12-16 A'e a'e kõ nekuwapa teãmã, e'i Jesu ijupe.
20Ãmẽ kwaima'e e'i ijupe:
– Õ'õ, eja'yrĩ remeve aepo rupi katu aiko teãmã ipi. Ivo teãmã aiko, e'i Jesu pè.
21Ãmẽ Jesu omã'ẽ ywete ee. Wauvay ee omãjã.
– I'ete, e'i. Aepo 'aryvo kee tereiko jẽ timanyvo e'ã ene, e'i. Ekwa, nemoma'e kõ tereme'ẽma karakuri repy rõmõ. Ajaire epykwerà emosãima iporijau mãe kõ pè erokwa. Pirujẽ nerekotà neremimota katu kõ Janejare'e pyri kãramõ ãmẽ. Neme'ẽ maire, ejo erupi ãmẽ, e'i.
22Ãmẽ Jesu aepo e'i kwaima'e pè remeve, soõ, naoryi ky'y. Ijãgyo ojisyry oo, imoma'e ywete rewarà mõ.
23Ãmẽ Jesu omã'ẽ wemimo'ekwerà kõ rè erokwa kee javo ijupe kõ:
– Waypete imoma'e ywete mãe kõ pè Janejare'e omoẽoka o'arà kyty ipi. [Oma'e kõ rè ywesõ oja'a Janejare'e wyi ipi,] e'i.
24Ãmẽ Jesu remimo'ekwerà kõ ojimonyi aepo renu. Ajamã'ẽ Jesu kee e'i ijupe kõ:
– Jane kõ waypete Janejare'e omoẽoka o'arà kyty ipi. [Ovote ne'i kuwa'ãi kupa.] 25Tekoua amome'utà peupe tapekuwa sa'u, e'i. Kevoa. Teima rõvijã waypete wasa ikwa'i mã'ẽ rupi okwa. Noasa'ãi kuwa agui ropyta, e'i. Ãwĩvo ve imoma'e ywete mãe kõ pè waypete Janejare'e omoẽoka o'arà kyty,#10.25 Ãwitõ mirà mõ o'arà kyty rejẽ epãnakõ iko mã'ẽ mõ. Noike'ãi yvyra wyry rupi oo wepãnakõ revejẽ. Oity remẽ tè kuwa yvyra wyry rupi wasa oo. Ãwĩvo. e'i ijupe kõ.
26Ameve Jesu remimo'ekwerà kõ aepo wenu remẽ, ojimonyi wete kupa. Ajawyi kee e'i ojiupe kupa:
– Ãwĩvo remẽ ava noiko karuaru kuwa'ãi Janejare'e pyri ãmẽ! Ava nojireko katuoka'ãi kuwa ijupe! e'i tite kupa ãmẽ.
27Ãmẽ Jesu omã'ẽ ee kõ erokwa.
– Aje, ava jẽ rõwã oo kuwa ipyri oiko karuaru rõmõ. Janejare'e rõmõ'ĩte poromoigo karuaruoka kuwa opyri. Nuvei 'ete iwasu mã'ẽ Janejare'e pè, e'i ijupe kõ.
28Ameve Peturu kee e'i Jesu pè:
– Emã'ẽ. Pirujẽ oroitypypyipa orojo nerupi, e'i.
29Ãmẽ Jesu e'i jẽ ijupe kõ:
– Aje pirujẽ peitypypyipa erupi pejo. Uvetà ãmõ kõ ve pevo mãe kõ. Pirujẽ oitypypyità uu eayvu rupi erauvay rewarà mõ kupa. Eayvu e'eay omojenutà erokwa rewarà mõ a'evotà ekoi kupa. Ma'e oitytà kupa. Wetã oitytà oo kupa. Ãmõ, wetãrãgwerà kõ ve. Oõvijãgwerà kõ ve. Wãkarãgwerà kõ ve. Ãmõ, okoo kõ. Wãisõ pirujẽ oitypypyipatà oo, erauvay kupa rewarà mõ, e'i. Ajawyi aje ywete kee a'e pirujẽ oma'e kõ oitypypyipa erupi uu mãe kõ pè: 30Penemitykwerà kõ wyi wete si Janejare'e ome'ẽtà pejẽ, ike yvy pè. Ma'e. Penetã kõ. Penetãrã kõ. Pekoo kõ. Wãisõ ome'ẽtà pejẽ. Ãmõ kõ po pè pejimomorijau 'atà tè, Janejare'e koty rewarà kõ rõmõ peiko rewarà mõ. Ajamã'ẽ kãramõ Janejare'e pyri peiko karuarutà ky'y, yva pè, e'i. 31Keetà ãmẽ. Ijaty jo'arà kyty ekoi epe mãe kõ jokunawyriwarà kõ rõmõ ekoità Janejare'e rena pè ky'y. Jokunawyriwarà rõmõ ekoi mãe kõ ãmẽ jo'arà kytywarà rõmõ ekoità, e'i Jesu ijupe kõ.#Mat. 20.16; Ruk. 13.30
“Ejukatà kupa”, e'i mijẽ Jesu mã'ẽ
(Mateusi 20.17-19; Rukasi 18.31-34)
32Ãmẽ Jesu Jerusarẽ taa kytyre oo iko kupa, wemimo'ekwerà 12 rõmõ mãe kõ reve. Pee wasu rupi oo kupa. Ãmẽ Jesu joãkã rõmõ oo iko. Emimo'earà kõ takypy rõmõ oo kupa. A'e kõ ojimonyi iko. Oo upi mãe kõ ve okyje iko. Ajawyi Jesu omuu wemimo'ekwerà kõ 12 rõmõ mãe kõ opyri sa'u imotekokuwa kõ mijẽ ojukaa rã rè. Kee e'i ijupe kõ:
33– Pejapyaka katu rã'ĩ! Jerusarẽ taa kyty jaatà jaiko. Javãe remẽ, erereko aità erereko kupa, Janejare'e Remimuurerà ajimojane mã'ẽ rõmõ aiko rewarà mõ. Janejare'e pè oporegeta mãe kõ rõvijã kõ po pè tesõ eme'ẽtà kupa. Ãmõ, tãmõ Moisesi remikusiwarerà rè poromo'e mãe kõ po pè teve. A'e kõ, “Pejuka ikenẽ”, e'ità eupewarà mõ. Juteu rõwã mãe kõ po pè emonotà ãmẽ kupa, [Romã pewarà jõvijã kõ po pè.] 34Emojaiwe ywetetà kupa. Otõmõ tõmõ tesõtà ere kupa. Ãmõ, enõpã nõpã tevetà kupa. Ajaate ejukatà kupa ky'y. Ajamã'ẽ moapy 'arà paire apoera tarà mijẽ, e'i ijupe kõ.
Tiaku kõ oporanu Jesu pè remẽwarà
(Mateusi 20.20-28)
35Ãmẽ Semeneu ra'yry kõ uu Jesu kyty. Tiaku. Juwão. Mokopejõ uu kupa. Kee e'i Jesu pè kupa:
– Jõvijã, oroporegetatà rã'ĩ neupe, e'i kupa. Oro'età mã'ẽ pè “hoõ” ere, e'i kupa.
36– Manyvo põ pepota areko peupe? e'i Jesu ijupe kõ.
37Ãmẽ Tiaku kõ e'i:
– Jõvijã wasu rõmõ nejikuwa remẽ, orepyteporo rejupa, neuvuri toroapy jõvijã miti kõ rõmõ oroiko. “Hoõ” tere amãtejẽ ãmẽ, e'i epe kupa.
38Ãmẽ Jesu e'i ijupe kõ:
– Napekuwai wyi aepo pejẽ ije! e'i. Kee a'e pejẽ. Pejimomorijau kuwa pãwĩ ereve pemãnõ ejuka kupa remẽ? e'i Jesu ijupe kõ.#Ruk. 12.50
39“Õ'õ” e'i tite kupa. Ãmẽ Jesu e'i ijupe kõ:
– Aje pejimomorijautà evo ve. Pemãnõtà teve evo ve, e'i. 40Ajamã'ẽ ije rõwã poromojõvijãokatà. Papa tè poromojõvijãokatà, wemikuwa rupi tè, e'i Jesu Tiaku kõ pè.
41Ãmẽ emimo'earà kõ mõ aepo wenu remẽ, ojimõarõ Tiaku kõ rè kupa. 42Ajawyi Jesu omoaty pirujẽ imuu javo ijupe kõ.
– Pejapyaka rã'ĩ! Juteu rõwã mãe kõ ojimokasi oẽ jane kõ 'arà kyty, ãwisõ emĩgwai kõ rõmõ toiko kupa. Ojiayvuerovijaoka jane kõ pè iko kupa ipi. 43A'e kõ vo rõwã tapeiko ajamã'ẽ. Pepota pejimojõvijã remẽ, temĩgwai vo 'ejẽ awi tapeiko. Poropãtavõarà rõmõ tapeiko, e'i.#Ruk. 22.25-26 44Aje pepota pejẽ ywesõ peiko remẽ, temĩgwai vo 'ejẽ awi tapeiko, e'i.#Mat. 23.11; Mak. 9.35; Ruk. 22.26 45Ereruparà mõ awi tapeiko. Janejare'e Remimuurerà ajimojane mã'ẽ rõmõ teipe ije aiko. Ajamã'ẽ, “Jõvijã tè ije”, na'ei pejẽ. Ãwĩvo mã'ẽ rõmõ rõwã ajo ike jane kõ pytery pè aiko ipi. “Jõvijã rõmõ tajikuwa!” na'ei. Temĩgwai vo 'ejẽ tè ajo jopytery pè poropãtavõarà rõmõ aiko. Jane kõ aiwererà repy rõmõ ajo. Emãnõa tè a'e repykwerà rõmõtà. Jane kõ pewarà mõ amãnõtà, Janejare'e pyri toiko karuaru kupa, e'i Jesu ijupe kõ.
Jesu omoeapyo Patimeu remẽwarà
(Mateusi 20.29-34; Rukasi 18.35-43)
46Aja paire Jesu okwa Jeriko taa rupi iko, wemimo'ekwerà kõ reve. Ajaire a'e taa pe wyi ojisyrytà remẽ, aty wasu kõ oo akypy rupi. Ãmẽ okwa remẽ, naeapyoi mã'ẽ mõ wesa. A'e pee reme pè wapy upa ipi, karakuri rãrõ. Patimeu eu erà pè. A'e Timeu ra'yry tè. 47Ãmẽ Jesu vãea ojenu ijupe, kee jaa:
– Jesu Nasare taa wãnà okwa iko! jaa ojenu ijupe.
Ãmẽ Patimeu aepo wenu remẽ, wapukai ojiporijauesaoka ijupe, kee javo:
– Jesu, tãmõ Tavi Jeapyrerà e'eay tè ene!#10.47 Janejare'e Remimuurerà jõvijã ywete rõmõ jaa tè aepo e'i mã'ẽ pè. Eporijauesa rejupa! e'i wapukai rõmõ.
48Ãmẽ aepo e'i remẽ, ãmõ kõ kee e'i ijupe:
– Aepo ere sõ! Nepu sõ! e'i ijupe kupa.
Ãmẽ ywesõ wapuka pukai.
– Tãmõ Tavi Jeapyrerà e'eay! Eporijauesa rejupa! e'i jẽ wapukai rõmõ.
49Ajawyi Jesu opyta rã'ĩ javo ijupe.
– Totuu nẽ ekoty, e'i jane kõ pè.
Ãmẽ ava kõ mõ e'i Patimeu pè:
– Terejipy'a mokasi. “Totuu” e'i Jesu ene! Kuise'ẽ ãmẽ epõ'ã ejo! e'i kupa.
50Ameve kuise'ẽ Patimeu opõ'ã. Oyru poko yvy pè oity opõ'ã oo Jesu kyty. 51Ãmẽ Jesu e'i ijupe:
– Manyvo põ nepota oroereko? e'i.
– Apota ereapyo katu rõmõ aiko, jõvijã! Ereamoapyo rejupa, a'e ene, e'i ijupe.
52– Hoõ! e'i Jesu. Tanereapyo katu mijẽ ajawyi! “Aje” ere ekasia pè rewarà mõ, oromoeapyotà. Ejivy eo ãmẽ, e'i Jesu ijupe.
Ameve eapyo katu ky'y. A'evo paire Jesu rupi oo iko ky'y.
Currently Selected:
Maku 10: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
