Maku 14

Jõvijã kõ oja'a Jesu jukaa rã rè remẽwarà

(Mateusi 26.1-5; Rukasi 22.1-2; Juwão 11.45-57)

1Mõrijõ 'arà tè remẽ Juteu kõ rãmõi kõ rekoawerà moetea 'arà okwatà. Kõitokõ karamoe remẽ Janejare'e omoisyryoka kõ jimomorijau wasua wyi.#14.1 Karamoe remẽ Janejare'e wekyioka Juteu kõ rãmõi kõ Ejitu yvy pe wyi imoisyry kõ. Karai kõ Páscoa dos Judeus e'i a'evoa pè. Ajamã'ẽ Jesu poeraawerà pè ywesõ Páscoa e'i kupa. Emogeta Jisyry. 12.1-27; Epr. 11.27-29; J.K.R. 7.30-36 A'e moetea 'arà okwatà. Meju vororo e'ã warerà moetea 'arà ve okwa tary ve.

Ãmẽ jakatu Janejare'e pè oporegeta mãe kõ rõvijã kõ opota Jesu opyy tyvija rupi ijukaoka. Tãmõ Moisesi remikusiwarerà rè poromo'e mãe kõ ve opota ojukaoka.

2Kee e'i kupa:

– Nikatui age'eve ajamã'ẽ, tãmõ kõ rekoawerà moetea okwa remẽ. Aty wasu kõ pytery pè tè Jesu ekoi ipi. Ajawyi ijukaa rã okuwa sõ kupa remẽ, imiraità janere kupa, e'i ojiupe kupa.

Ipije mã'ẽ wãivĩ mõ ojoẽ Jesu rè imogy remẽwarà

(Mateusi 26.6-13; Juwão 12.1-8)

3Ãmẽ ajaire Jesu Petãnia taa pè tui, Simão retã mè. Ipisĩsĩma maekwerà tè Simão. A'e tetã wyry pè Jesu tui. Ojitãrõ namesa 'aryvo upa.

Ãmẽ wãivĩ mõ oike uu ikoty. Ipije katu mã'ẽ weru, epy wete mã'ẽ tè. Teãgwerà rè jamogy ipi mã'ẽ a'e. Takuru sukyry tè ena. A'e pupe weru. Ãmẽ a'e ena ooka. Ipije katu mã'ẽ ojoẽ Jesu ãkãg rè imogy [Jesu rauvaya mojikuwapa mõ].#Ruk. 7.37-38

4Ãmẽ ãmõ kõ omã'ẽ ee remẽ, ojimõarõ ee omãjã. Kee e'i ãmẽ ojiupe kupa:

– Haa! Ipije katu mã'ẽ rè ãwĩ wãivĩ ojimorarapa tesõ upa! 5Karakuri moeta repy rõmõ sõ ome'ẽ remẽ, opyy wete kuwa karakuri epykwerà mijã! 300 rõmõ tesõ kuwa karakuri opyy kuwa mijã! Aekwerà omosãi kuwa nimoma'ei mãe kõ pãtavõa rõmõ mijã! e'i kupa.

Wãivĩ gyty ojimõarõ ywete kupa. Ajawyi ijayvu ai tesõ ee kupa.

6Ãmẽ Jesu okuwapa aepo e'i kupa remẽ. Ajawyi kee e'i ijupe kõ:

– Pemã'ẽ tè aã wãivĩ rè! Peporegeta ai sõ ee ipije mã'ẽ rewarà mõ pekupa. Tomogy nẽ ere! Ikatuay ãwĩvo erereko remẽ! 7Nimoma'ei mãe kõ oiko jẽtà pepyryvo iko ipi! A'e kõ manyvo pepota pereko kõ remẽ, pepãtavõ kõ jẽ kuwa. Ajamã'ẽ ije naiko puku'ãi pepytery pè tapeja'a jẽ ere. Age'e jõ tè aiko pepytery pè.#T.M. 15.11 8Ajawyi agyvo aã wãivĩ erereko wemikuwa rupi tè. Ojiãparõ emãnõa rewarà mõ a'evo erereko. Ãwĩvo eryvy rã renone emokatu amãtejẽ, e'i ijupe kõ.

9E'i jẽ Jesu ijupe kõ:

– Kee tapeenu ikõ nẽ! Aje, kãramõ pirujẽ maipewarà rupi Janejare'e ayvu e'eay erewarà ojenutà okwa remẽ, aã wãivĩ rewarà omojenu jẽtà teve erokwa kupa. Agyvoa noje'o'ãi eewarà, e'i Jesu ijupe kõ.

Jutasi, “Erõvijã ame'ẽtà pepo pè”, e'i remẽwarà

(Mateusi 26.14-16; Rukasi 22.3-6)

10Ãmẽ ajaire Jesu remimo'ekwerà 12 mã'ẽ mõ oo sikaepo Janejare'e pè oporegeta mãe kõ rõvijã kõ pè oporegeta. Jutasi Sikarioti eu erà pè mã'ẽ a'evo ekoi. Kee e'i ijupe kõ:

– Ame'ẽ kuwa erõvijã pepo pè, e'i ijupe kõ.

11Ãmẽ aepo wenu kupa remẽ oryvay kupa.

– Kee javu karakuri orome'ẽ kuwa ene, e'i ijupe ãmẽ kupa.

A'evo paire Jutasi kee e'i oupe:

– Manyvotà pãwĩ areko ime'ẽ ipo kõ pè? e'i oupe upa.

Ajawyi wãrõ jẽ manyvo remẽ ywe'e ome'ẽtà.

Tãmõ kõ rekoawerà moetea 'arà renonewarà

(Mateusi 26.17-25; Rukasi 22.7-16,21-23; Juwão 13.21-30)

12Ãmẽ meju vororo e'ã wa 'arà okwa remẽ, Juteu kõ wãmõi kõ jisyryawerà omoete ypytà. A'evo remẽ kaneiru ra'yry ojuka imii iwa kupa ipi. [Wekoa ãwĩvo ekoi kupa ipi.] Ãmẽ Jesu remimo'ekwerà kõ uu ijupe kee javo rõmõ:

– Mape kyty põ nepota oroo janejimiwa rã oromokatu tãmõ kõ rekoawerà moetea 'arà renone? e'i kupa.

13Ajawyi Jesu omono wemimo'earà kõ mõrijõ a'evoa rè toposiko kupa. Kee e'i ijupe kõ imono:

– Pekwa erenone rupi Jerusarẽ taa kyty, e'i. A'e pè pevãe remẽ, kwaima'e mõ penõvaisĩtà. A'e warypy yy rena mõ omovytà ereko mã'ẽ. 14A'e rakypy rupi peotà, ajaate peotà pemãjã ee, mã tetã wyry pè põ oiketà. Ãmẽ a'e tetã jarà pè kee pejẽtà: “Orerõvijã kee e'i imuu neupe: ‘Neretã pupe tamoete rã'ĩ tãmõ kõ rekoawerà eremimo'ekwerà kõ reve’, e'i jõvijã imuu”, pejẽ ijupe. 15Aepo pejẽ remẽ, tetã jarà peneraatà jura pè. Tena ipevu katu mã'ẽ mõ wesatà peupe ãmẽ. Oikopa namesa a'e pè, apyka kõ teve. Ajawyi a'e pè pirujẽ tapemokatu janejimiwa rã rena, e'i ijupe kõ.

16Oo ãmẽ Jerusarẽ gyty ovãe kupa. Jesu ayvu rupi katu omã'ẽ jimiwa rã rena rè kupa. Moetea 'arà renone oposiko kupa upa.

17Ãmẽ pãtõma remẽ Jesu ovãe a'e pè, wemimo'ekwerà kõ 12 mãe kõ reve. 18Namesa pyri wapy ojimi'u kupa upa remẽ, Jesu e'i ijupe kõ:

– Aje kee a'e pejẽ. Ike janereve ekoi mã'ẽ mõ eme'ẽtà eãpã kõ po pè. Ereve ojimi'u upa mã'ẽ a'evo ererekotà, e'i.

19Ãmẽ aepo e'i Jesu remẽ, ijãgyoay kupa. Ojimonyi aepo renu kupa. Ajawyi pe'ĩpe'ĩ kee e'i ijupe kupa:

– Ije rõwã põkõ a'evo mã'ẽ rõmõtà aiko, jõvijã? e'i e'i kupa.

20Ãmẽ Jesu e'i ijupe kõ:

– Pepõ'õmorà mõ a'evotà erereko. Eparapi pupe ojimi'u upa mã'ẽ a'evotà ekoi, e'i.

21E'i jẽ ijupe kõ:

– Janejare'e Remimuurerà ajimojane mã'ẽ rõmõ tè ije. Amãnõ remẽ, Janejare'e okusiwaokapa maekwerà rupi katu tè amãnõtà. Ajamã'ẽ ipojy aità tè eãpã kõ po pè eme'ẽtà mã'ẽ pè, e'i. Nisakyi remẽ ikatu kuwa ijupe mijã! e'i.

Jesu omãnõa rã rè oja'a remẽwarà

(Mateusi 26.26-30; Rukasi 22.14-20; 1 Korĩtu 11.23-25)

22Ojimi'u kupa upa remẽ, Jesu meju opyy. Omoete Janejare'e ee. Ajaire openo peno imosãi erokwa wemimo'ekwerà kõ pè to'u kupa.

– Aã pepyy iwa. Epirà ra'upa tè aã meju ame'ẽ tape'u, e'i.

O'u ãmẽ kupa. 23Ãmẽ ajaire Jesu uvary aisiriri katu mã'ẽ rena opyy, kaneku. A'e rè omoete mijẽ Janejare'e. Ajaire ome'ẽ erokwa to'u kupa. O'u ãmẽ kupa, pirujẽ. 24Kee e'i Jesu ijupe kõ:

– Eruwykwerà ra'upa tè aã uvary aisiriri katu mã'ẽ ame'ẽ tape'u. Kee jaa tè agyvoa. Ije amãnõtà penekovijarerà rõmõ. Eruwykwerà opeità. Emãnõa rupi mõa'ãrõwã mirà kõ aiwererà amoepypatà. Ajawyi Janejare'e “awyjepa” e'ità peaiwererà kõ pè ky'y. Ovo rupi teve Janejare'e penerekotà emãnõa rupi ky'y, e'i ijupe kõ.#Jisyry. 24.8; Jer. 31.31-34

25Ajaire e'i jẽ Jesu:

– Aje, awyje uvary aisiriri katu mã'ẽ na'u'ãi ky'y. Kãramõ tè a'u tarà mijẽ peneve Janejare'e rena pè, emojõvijãoka emojikuwa paire, e'i.

26A'evo paire Janejare'e pè ojĩga imoe'e kupa. Ojĩga kupa paire, oo yvytyry kyty kupa, temitãgwerà ty kyty. Oriveiraty eu a'e temitãgwerà ty rerà pè mã'ẽ gyty oo kupa.

“Nekuwai rã'ãgatà rejupa”, e'i Jesu Peturu pè remẽwarà

(Mateusi 26.31-35; Rukasi 22.31-34; Juwão 13.36-38)

27Ãmẽ oo iko kupa remẽ, Jesu kee e'i wemimo'ekwerà kõ pè:

– Ke'ĩ pejavatà ereity peo pekupa pemonyia rè, e'i. Ejukatarà kõ uu epyy remẽ, a'evo peikotà, e'i. A'evoa rã rè Janejare'e okusiwaokapa amãtejẽ karamoe remẽ. Aekwerà rupi katu tè a'evotà peiko, e'i. Kee e'i maekwerà rupi: “Kaneiru jarà ajukaokatà. Ãmẽ eimawerà kõ onurutà ojava oo. Ojimosãsãimatà ojava oo kupa”, e'i maekwerà rupi katu a'evotà peiko, e'i.

28E'i jẽ ijupe kõ:

– Apoera tarà mijẽ, amãnõ maire. Aatà penenone, Karireja yvy kyty. [A'e pè poroãrõtà ajupa,] e'i.#Mat. 28.16; Mak. 16.7

29Aepo e'i remẽ Peturu e'i epe ijupe:

– Ãnĩ! Ije noroity'ãi aa! e'i epe. Ãmõ kõ pirujẽ ojipirau nereity sõ oo remẽ, ije ãmẽ apyta jẽtà nepyri. Noroity'ãi, e'i tite mijã.

30Ãmẽ Jesu e'i Peturu pè:

– Aje kee a'e ene! Age'e pya ereitytà neo! “Jesu nakuwai”, ere ã'ãtà eupewarà mõ. Moapy rõmõ tesõ aepo ere ã'ãtà. Masakara oje'ẽ mõrijõ rõmõ e'ãve a'evotà erereko rejupa, e'i Jesu ijupe.

31Peturu noerovijai tite ajamã'ẽ.

– Noroity'ãi ije ãmẽ aa! e'i mijẽ. Nejuka sõ kupa remẽ, nerevejẽ tejuka ãmẽ kupa! e'i epe ijupe.

Jesu remimo'ekwerà kõ pirujẽ aepo e'i epe.

– Ije ve noroity'ãi aa, e'i tite kupa mijã.

Jesu oporegeta Uu pè remẽwarà

(Mateusi 26.36-46; Rukasi 22.39-46)

32Ajaire Jesu oo ovãe opyytà kupa mã'ẽ pè. Jesemani eu a'e pè. [A'e Oriveiraty yvytyry pè tui.] A'e pè ovãe kupa paire, Jesu e'i wemimo'ekwerà kõ pè:

– Pepyta rã'ĩ peapy ike erãrõ pekupa. Aatà Papa pè aporegeta, e'i.

[“Hoõ” e'i ãmẽ kupa. Opyta ãmẽ kupa.] 33Kejõ Jesu weraa oupi. Peturu. Ãmõ, Tiaku. Ãmõ, Juwão. Mokopejõ weraa kõ. Ijãgyoay wete Jesu ojimopirai rõmõ. 34Kee e'i ãmẽ ijupe kõ:

– Ayay tesõ eãgyoa epy'a pupe. Amãnõ 'ejẽ tesõ. Erãrõ rã'ĩ ike pekupa. Tapemãrãmoa'u jẽ ikõ ajamã'ẽ peiko, ereve nẽ, e'i ijupe kõ.

35-36Aepo e'i paire Jesu wãime sa'u oo. A'e rõmõ'ĩte oo ky'y. Ojimoenãpa'ã ojayvy yvy pè upa. Uu pè oporegeta upa. Kee e'i:

– Emomorijaua rã rè ajimopirai, Papa. Akuwa naikoi iwasu mã'ẽ neupe. Nepota manyvo terereko tajimomorijau e'ã remẽ, i'ete. Ajamã'ẽ manyvo nere tari terereko katu jimomorijaua wyi remẽ, i'e teve. Tajimomorijau ãmẽ, e'i. Neremimota rupi tè ta'evo aiko ãmẽ, e'i Jesu oporanu Uu pè.

37Aepo e'i paire, ojivy rã'ĩ uu wemimo'earà kõ pyri. Peturu kõ pyri. Soõ, oke sikaepo kupa upa. Ajawyi e'i Peturu pè:

– Simão Peturu! “Napekei teipõ! Tapemãrãmoa'u jẽ”, a'e itõkõ pejẽ! Naporegeta pukui Papa pè, e'i. 38Age'e peke tite ky'y ne! Tapemãrãmoa'u jẽsi pekupa. Janejare'e pè ikõ peporegeta pejimokasi rõmõ peiko nẽ. Kee pejẽ: “Janejare'e, oremokasi rejupa, toroity tite e'ã”, pejẽ ikõ peporegeta ijupe nẽ. Aje, pepy'a pupe pepota pekasi jẽ peiko. Ajamã'ẽ ajaire waypetetà peupe. Pevote napekasi'ãi. Ereity ywe'e titetà ejukatà kupa remẽ pekupa. Ajawyi ikõ tapejimokasioka Janejare'e pè peiko nẽ, a'e pejẽ, e'i Jesu ijupe kõ.

39Ajaire oo mijẽ Uu pè oporegeta. E'i maekwerà vo jẽ e'i mijẽ Uu pè.

40Ajaire ojivy mijẽ uu wemimo'earà kõ pyri. Soõ, oke mijẽ kupa upa, oke taray kupa rewarà mõ. Nipui kupa ãmẽ, [ojimosĩoka kupa rewarà mõ].

41[Ajaire oo mijẽ Uu pè oporegeta.] Moapy rõmõ tesõ a'evo ekoi ky'y. Ajaire uu mijẽ ikoty kõ. Oke mijẽ sikaepo kupa upa. Ãmẽ si e'i ijupe kõ:

– Peke mijẽ sipõ pekupa! Pemã'ẽ! Nivoi mãe kõ po pè emãnõa 'arà okwa ky'y! Ajawyi awyjepa rã'ĩ peke ky'y. 42Pepõ'ã! Ja'e jẽsi! Eãpã kõ po pè eme'ẽtà mã'ẽ uu iko, e'i ijupe kõ.

Jesu opyy kupa remẽwarà

(Mateusi 26.47-56; Rukasi 22.47-53; Juwão 18.3-12)

43Ãmẽ Jesu oporegeta jẽ upa remeve, Jutasi ovãe ipyri. Jesu remimo'ekwerà kõ 12 rõmõ mãe kõ mõ itõkõ Jutasi mijã. Ijatyray kwaima'e kõ uu upi. A'e kõ imarija poko pawete iko. Ãmõ, jinõpãa pawete weru kupa. Janejare'e pè oporegeta mãe kõ rõvijã kõ ayvu rupi uu kupa. Ãmõ, tãmõ Moisesi remikusiwarerà rè poromo'e mãe kõ ayvu rupi ve uu kupa. Ãmõ Juteu rõvijãgwerà kõ ayvu rupi teve. 44Kõitokõ a'e kõ pè Jutasi ji'ite kee e'ipa sikaepo:

– Erõvijã aetoapemosu rã'ãgatà imojikuwaoka pejẽ. A'evo remẽ pepyy kuwa eraa, e'ipa ji'ite.

45Ãmẽ oõvaisĩ Jesu kupa remeve, oo Jutasi ipyri.

– Jõvijã, e'i rã'ãga ijupe.

Ajaire wetoapemosu rã'ãga. 46Ameve Jutasi rupi uu mãe kõ opyy Jesu ipokwa eraatà ky'y.

47A'evo remẽ ava mõ Jesu pyri o'ã upa mã'ẽ marija poko omopyso. A'e pupe temĩgwai mõ onamimopai. Janejare'e pè oporegeta mãe kõ rõvijã wasu remĩgwai mõ tè onamimopai. 48Ãmẽ Jesu e'i atyry kõ pè:

– Moma'e rã põ marija poko tẽ tesõ peeru? Ãmõ, jinõpãa kõ teve tesõ peeru? “Ojikõ'õ mãe kõ rõvijã”, pejẽ põ ije? 49Emã'ẽ! Kõ'ẽ jawe jawe pemã'ẽ ipe ere ipi. Age'e rõwã pepyterà rupi poromo'e aiko ipi. Janejare'e moe'ea retã ypy pè teipe a'evo aiko ipi. Manyvore põkõ ameve nepyyi pekupa, jane kõ rovake? [Age'e tẽ tesõ epyy vijatà ereraa pekupa!] Õ'õ aje! Janejare'e ayvukwerà rupi katu tè ãwĩvo erereko pekupa. Ãmẽ tè “aje” taoty kãramõ, e'i.#Ruk. 19.47; 21.37

50Ãmẽ a'evoa rè emimo'ekwerà kõ omã'ẽ remẽ, Jesu oity ojavapa oo okyje rõmõ iko kupa ky'y.

51Ãmẽ kõnomĩokyry mõ Jesu rakypy rupi oo jẽ iko. Ijyru poko iko mã'ẽ a'e. A'e sota kõ opyytà imopã'ã mijã. 52Ãmẽ ijyru rè ojipy kupa remẽ, opoity kõ oo. Oyru oity oo. Katu rupi tè ojava oo iwyi kõ.

Jesu jõvijãgwerà kõ rovake weraa kupa remẽwarà

(Mateusi 26.57-68; Rukasi 22.54-55,63-71; Juwão 18.13-14,19-24)

53Ãmẽ Juteu rõvijãgwerà kõ atyry ojimoaty tetã wyry pè upa. Kejõ. Janejare'e pè oporegeta mãe kõ rõvijã wasu. Ãmõ, pirujẽ Janejare'e pè oporegeta mãe kõ rõvijã kõ. Ãmõ, jõvijãgwerà kõ. Ãmõ, tãmõ Moisesi remikusiwarerà rè poromo'e mãe kõ ve. Mokopejõ ojimoaty kupa upa. A'e kõ rovake weraa Jesu kupa. [Tetã wyry pè weroike kupa.]

54Ãmẽ Peturu oo Jesu rakypy rupi. Ipyri'ĩje'ẽ rõwã oo ajamã'ẽ Peturu. Kuipe'e sa'u tè oo. Tetã ypy pè ovãe opyta wapy tetã rãrõarà kõ mõ pyri. Tata ypy pè wapy ojipe'e upa.

55Ãmẽ Janejare'e pè oporegeta mãe kõ rõvijã kõ pirujẽ Juteu rõvijãgwerà kõ reve ojimogeta Jesu rè kupa upa.

– Manyvo ja'età põ Romã pewarà jõvijã pè tojukaoka Jesu? e'i kupa.

Ajamã'ẽ manyvo noerekoi esa ayvu ai mõ eewarà imo'y Jesu rè kupa. 56Ajawyi ijaty iwari wari epe ee kupa. Nivoi mã'ẽ omo'y teywete ee kupa. Ajamã'ẽ ojevo jẽ rõwã e'i kupa. Ajawyi, “Nivoi mã'ẽ tè Jesu”, ne'i'ãi kupa. 57Ãmẽ kwaima'e kõ mõ opõ'ã owari rõmõ Jesu pè. Kee e'i owari rõmõ kupa:

58– Oroenu Jesu kee e'i remẽ: “Amomatà Janejare'e moe'ea retã, jane kõ reminõgwerà tè. Ajamã'ẽ ajaire moapy 'arà paire, ãmõ ainõ tarà mijẽ. A'e sõsi jane kõ reminõgwerà rõwãtà ky'y”, e'i rõwã sipõkõ! e'i owari rõmõ kupa.#Juw. 2.19-22

59Aepo e'i epe kupa remẽ, ojevo jẽ rõwã e'i kupa.

60Ãmẽ aepo Janejare'e pè oporegeta mãe kõ rõvijã wasu wenu remẽ, opõ'ã Jesu pè javo.

– Neenu põkõ aepo e'i neupe kupa remẽ? e'i. Ajawyi manyvo eretà põ nejipija rõmõ? e'i ijupe.

61Nipui Jesu ajamã'ẽ. Ajawyi jõvijã wasu e'i jẽ Jesu pè:

– Aje põ Janejare'e Remimuurerà tè ene? e'i. Ãmõ, Janejare'e janeremimoe'e Ra'yry tè põ ene? e'i Jesu pè.

62Ãmẽ si Jesu e'i ijupe ky'y:

– Õ'õ, a'e tè ije. Janejare'e Remimuurerà ajimojane mã'ẽ rõmõ ajo ipe pepytery pè mijã. Ajamã'ẽ kee pemã'ẽ tarà mijẽ kãramõ ere. Temimoe'e rõmõ tẽ tesõ ajotà kãramõ ky'y. Ekasia ve aerutà. Ãmẽ a'e 'arà mẽ Janejare'e ikasiay mã'ẽ pyri aapytà Jõvijã wasu rõmõ ajupa. I'ekatu kytyre aapytà ajupa ky'y, e'i. Ajaire yva rãtasĩ rupi awyjytà ajo mijẽ. A'evo aiko mã'ẽ rè pemã'ẽtà kãramõ ere! e'i Jesu ijupe kõ.#Tan. 7.13

63-64Ameve Janejare'e pè oporegeta mãe kõ rõvijã wasu aepo e'i Jesu remeve, ojikõ'õ ai ee ky'y. Ajawyi ojiyruãvasĩ tesõ ojimopirai rõmõ enu. Kee e'i ãmẽ ovoarà kõ pè:

– Peenu rõwã aepo e'i oporegeta ai remẽ! Werõarõ ywe'e tite si Janejare'e aepo e'i remẽ! Ajawyi nijaesa mijẽ'ãi ijayvu ai mõ wenu mã'ẽ ky'y. Ovote ojimome'u ky'y, e'i. Manyvo pejẽtà põkõ aepo peenu remẽ? e'i.

– Wayvu rupi tè tomãnõ ajawyi! e'i ywe'e tite ijupe kupa.

– Hoõ! e'i ãmẽ kupa. Aje, tomãnõ! e'i kupa.

65Ajaire wereko ai tesõ Jesu kupa ky'y. Otõmõ tõmõ tesõ teve ee kupa. Oovaõvã teve kamisa pupe kupa, tomã'ẽ e'ã. Ajaire oovapete pete teve kupa. Ãmẽ e'i ijupe kupa:

– Janejare'e ayvu mojenuarà tè ene remẽ, kee ere ore: Ava põ nerovapete pete upa? e'i e'i ijai kupa.

Ãmõ, sota kõ opyy inõpã nõpã tesõ ereko.

Peturu, “Jesu nakuwai”, e'i rã'ãga remẽwarà

(Mateusi 26.69-75; Rukasi 22.56-62; Juwão 18.15-18,25-27)

66Ãmẽ jakatu Peturu tetã ypy pè tui jẽ upa. Ãmẽ ja'y kõjatãi mõ okwa ipyryvo. Janejare'e pè oporegeta mãe kõ rõvijã wasu remĩgwai tè a'e ja'y kõjatãi. 67A'e omã'ẽ Peturu rè tata rè ojipe'e upa remẽ. Omã'ẽ ywete ee. Ajaire e'i ijupe:

– Jesu Nasare taa wãnà reve neiko mã'ẽ tè ene! e'i.

68– Ãnĩ! A'e rõwã ije! e'i rã'ãga Peturu ijupe. Nakuwai ava pewarà mõ põ aepo ere! e'i rã'ãga.

Aepo e'i paire oẽ oo tetã ypy pe wyi. Pari ape kyty oẽ oo. [Ameve masakara oje'ẽ.] 69Ãmẽ temĩgwai mõ omã'ẽ mijẽ ee. Ja'y kõjatãi mõ teve a'e. A'e e'i a'e pè tui mãe kõ mõ pè e'i:

– Jesu Nasare taa wãnà pyriwarà mõ tè ãwĩ! e'i.

70Ãmẽ Peturu e'i:

– Ãnĩ! A'e rõwã ije! e'i mijẽ owari rõmõ.

Ajaire sa'u a'e pè ekoi mãe kõ e'i mijẽ Peturu pè:

– Aje, a'e koty rewarà tè ene! Karireja wãnà tè ene! Neporegeta rupi tè nejikuwa! e'i ijupe kupa.

71Ãmẽ Peturu e'i mijẽ ijupe kõ:

– Nakuwai ije ãwĩ kwaima'e! e'i. Janejare'e okuwa ewari rõwã a'e mã'ẽ! e'i rã'ãga. Janejare'e temomorijau ikõ ewari remẽ nẽ, e'i tite owari rõmõ.

72Ãmẽ jakatu masakara oje'ẽ mijẽ. Ãmẽ tè tite Peturu oja'a Jesu ayvukwerà rè ky'y. “Moapy rõmõ nekuwai ã'ãtà masakara oje'ẽ mõrijõ rõmõ e'ãve”, e'i maekwerà rè oja'a. Ajawyi ijãgyoay ãmẽ ky'y. Ojiãpirõ wasu upa.

Currently Selected:

Maku 14: oymNT

Highlight

Copy