Maku 13
13
Jesu omome'u amãtejẽ Janejare'e moe'ea retã momaa rã remẽwarà
(Mateusi 24.1-2; Rukasi 21.5-6)
1Ãmẽ Jesu oẽ Janejare'e moe'ea retã ypy pe wyi oo iko wemimo'ekwerà kõ reve. Ãmẽ emimo'earà mõ kee e'i ijupe:
– Oremo'earà, emã'ẽ Janejare'e moe'ea retã rè esa! Ikatuay wete amã'ẽ ee! Takuru jinõgwerà ikatuay! e'i.
2Ajamã'ẽ Jesu e'i ijupe kõ:
– Õ'õ aje. Ikatuay pemã'ẽ ee. Ajamã'ẽ ikatu ke'ĩatu tè. Ke'ĩ opatà ajamã'ẽ. Kãramõ rire rõwã ãpã kõ omotororopatà ity iku'ikwerà kõ topepei. Omoenawetà ena pe wyi kupa, e'ipa amãtejẽ Jesu ijupe kõ.
“Pemomorijautà kupa”, e'i Jesu mã'ẽ
(Mateusi 24.3-14; Rukasi 21.7-19)
3Ãmẽ ajaire Oriveiraty pè oo kupa. A'e pe wyi Jesu rõmõ'ĩte wapy upa. Omã'ẽ imono remẽ, Janejare'e moe'ea retã rè omã'ẽ upa. Ãmẽ Peturu uu ikoty. Ãmõ, Tiaku. Ãmõ, Juwão. Ãmõ, Aãtere. Mokopejõ uu ipyri. Kee e'i ijupe kupa:
4– Kõi “ãpã kõ omotororopatà ity”, ere maekwerà. Oremo'e si aepo jaa rè rejupa! Manyvo 'arà mẽ põ a'evotà? oro'e ene. Manyvotà põ orokuwa amãtejẽ a'evo tarà mẽ? Ere oreupe ãmẽ torokuwa, e'i kupa.
5Ajawyi Jesu e'i ijupe kõ imo'e kõ:
– Mokoi pemoripea mõ! Pejimoãkwa'ã kee e'i pejẽ mã'ẽ pè ne: 6Ma'e, “Janejare'e Remimuu rõmõ tè ije ajo”, e'ità pejẽ mãe kõ pè. Ijatyray mirà kõ aepo e'ità owari rõmõ. Poromoripeaytà aepo jaa rè kupa. “Aje” tapejẽ ywe'e tite e'ã aepo jaa pè ajamã'ẽ nẽ, e'i Jesu. 7Ajaire kee jaa ojenu jenutà pejẽ: “Ojiapisi kupa upa”, ejaa. Ãmõ, “Ojiapisità ojee maevo kupa”, ejaa ojenutà. A'evo ipe remẽ tapejimonyi e'ã ikõ aepo jaa renu nẽ. A'evo 'evotà rã'ĩ evãea renone. Navãe'ãive a'evo remẽ ajamã'ẽ, e'i Jesu. 8Ãmõ yvy pewarà kõ opõ'ãtà ãmõ ate'y kõ rè. Ojiapisità ojeeve kupa, e'i. Ojimomojy tètà ãmẽ kupa, e'i. Ãmõ, yvy tena tena rupi yvy otytytà. Ãmõ, tena tena rupi tyavorusu okwatà rã'ĩ. [Ãmẽ tè pekuwatà ke'ĩ evãea 'arà.] Ãwitõ ipuru'au mã'ẽ okuwa omemy tarà remẽ ayay tè rã'ĩ iko, ãwĩvo ve pekuwatà ke'ĩ avãerĩ mã'ẽ 'arà, e'i.
9E'i jẽ Jesu ijupe kõ:
– Tapemãrãmoa'u jẽ ikõ peiko nẽ, a'e pejẽ. Penõvajãrà kõ pepyytà jõvijãgwerà kõ atyry rovake peneraa. Nivoi mã'ẽ omo'y teywetetà ovake kõ pene kupa. Penõpã nõpãokatà teve kupa. Janejare'e ayvu rè jimo'ea retã kõ pè penõpã nõpãtà kupa. Ekoty rewarà rõmõ peiko rewarà mõ ojimoãpãtà pene kupa. Ajawyi peneraatà jõvijã wasu kõ gyty tapemomorijauoka kupa. A'e kõ rovake pe'ãtà eayvu mojenu ijupe kõ ãmẽ, e'i. 10Pirujẽ yvy yvy wãnà kõ pè Janejare'e ayvu e'eay erewarà tojenu rã'ĩ, ajo mijẽ e'ãve, e'i. Yvy popy kyty ekoty rewarà kõ omojenu jenutà, tokuwa kupa. A'evo paire tè ajo tarà mijẽ, e'i Jesu wemimo'ekwerà kõ pè.
11E'i jẽ Jesu:
– Aje ojikõ'õ mãe kõ pepyytà peneraa tekoua kuwaparà kõ rovake penereko. Tapejimonyi e'ã ikõ a'evo penereko kupa remẽ peiko nẽ, a'e pejẽ. “Moma'e a'età põkõ a'evo remẽ?” tapejẽ e'ã pejimopirai rõmõ. Janejare'e 'Ãg tẽ tesõ omojikuwatà peayvu rã pejẽ tapemojenu ãmẽ. Ajawyi pevote rõwã pejẽtà. Aje Janejare'e 'Ãg ayvu rupi tè peporegetatà ijupe kõ ãmẽ, e'i Jesu ijupe kõ.#Mat. 10.17-20; Ruk. 12.11-12
12E'i jẽ Jesu imogeta kõ:
– Ãmõ, jane kõ ojikõ'õ ywetetà ojee evãea renone kyty. Ma'e. Teke'yry kõ omonotà omõmirĩ kõ sota kõ rovake tomojaiwe esa katu ijukaoka kupa, e'i. Ojeovajarĩtà weke'yry reve kupa, e'i. A'evo ve janeruu kõ. Wãkarã kõ a'evotà wereko. Ojukaoka tary ve wãkarã kõ kupa, e'i. A'evo tary ve ta'yry kõ uu rè. Wãisõ ekoità kupa. 13Pirujẽ yvy pewarà kõ napenesata'ãi erewarà mõ. Eremĩgwai kõ tè pejẽ rewarà mõ, pemomorijauvaytà penereko kupa. Ajamã'ẽ a'evo penereko kupa remẽ, pejimokasi jẽ ikõ ere pejipykãtã nẽ, a'e pejẽ. Ãmẽ sõsi peiko karuarutà erena pè epyri ãmẽ, e'i Jesu ijupe kõ.#Mat. 10.22
“Jerusarẽ taa wãrimãtà ipãsarõ kupa”, e'i Jesu mã'ẽ
(Mateusi 24.15-28; Rukasi 21.20-24)
14Jesu e'i jẽ:
– Kõitokõ Janejare'e ayvu mojenuarà Tanieu kee e'i amãtejẽ karamoe remẽ: “Ipojy ai mã'ẽ tẽ tesõ oinõtà Janejare'e moe'ea retã wyry pè kupa. Jajeovapyy tesõtà ee jamãjã mã'ẽ. A'e rupi iky'a tesõtà tetã Janejare'e kyty ãmẽ ky'y”, e'i Tanieu maekwerà.#Tan. 9.27; 11.31; 12.11 (Ajare aã eremikusiwarerà omogeta mãe kõ pè kee a'e. Tapejimotekokuwavay aepo jaa renu, manyvo jaa tè aepo e'i maekwerà.) Aekwerà rupi katu pemã'ẽtà Janejare'e moe'ea retã mè kãramõ. Ameve Juteja yvy pè ekoi mãe kõ kuise'ẽ jẽ tojava oo ãmẽ. Yvytyry kõ gyty tojava oo ojemĩ kupa. 15Py'ajẽ ikõ tojava oo kupa nẽ. Ava mõ sõ ikujau pè tetã ape 'aryvo tui remẽ, “Taike rã'ĩ eretã wyry pè ema'e kõ pijarà mõ”, te'i ywe'e tite e'ã ikõ nẽ. Towyjy kõrijõ tè ojava oo. Jikõtevẽ 'arà tè, ajawyi. 16Ãwĩvo ve ava mõ sõ kuipe'e ekoi remẽ, py'ajẽ teve ikõ too nẽ. Tojivy e'ã rã'ĩ wetã gyty omoma'e kõ rè ãmẽ.#Ruk. 17.31 17A'e 'arà mẽ ipuru'au mãe kõ pè ywesõ ipojytà. Ãmõ, omemy sakyre oupi imokamy'u jẽ mãe kõ pè ywesõ teve waypetetà, e'i. 18Ajawyi peporegeta Janejare'e pè remẽ, kee tapejẽ: “Janejare'e, ãmãnà mẽ rõwã ikõ ta'evo nẽ”, tapejẽ, e'i Jesu imo'e kõ ãwĩvoa rã rè.
19E'i jẽ Jesu:
– A'evo remẽ ywesõ iwasuaytà tekoua. Ajawyi jimomorijau wasua okwatà, pirujẽ iwasu mãe kõ kupei kyty wetesi! Yvy Janejare'e oinõ ypy remẽ wyive nijamã'ẽi ãwĩ rapijarà rè, ajaate age'e remẽ. Nijamã'ẽ'ãi a'evo mã'ẽ rè, ajaate a'evotà remẽ, e'i.#J.Jim. 7.14 20Ajamã'ẽ Janejare'e nomopukuoka'ãi a'evoa. Omopukuoka sõ remẽ, opa kuwa pirujẽ jane kõ ãmẽ. Janejare'e wemipyteporokwerà kõ wauvay ipi. Oja'a ee kõ ipi. Ajawyi tè nomopukuoka'ãi mãrãnai ijupe kõ, e'i.
21– Ãmẽ a'evo remẽ, ava kee e'i titetà: “Janejare'e Remimuurerà rè amã'ẽ ike rupi”, e'i titetà. Ãmõ kõ: “Wãime amã'ẽ ee!” e'i titetà. Ãmẽ aepo jaa peenu remẽ, “Aje ipõ?” tapejẽ tite e'ã. 22Kee e'i mãe kõ oiko tevetà, pe'ĩrõwã: “Janejare'e Remimuurerà tè ije”, e'i rã'ãgatà mãe kõ. Ãmõ, “Janejare'e ayvu mojenuarà tè ije”, e'i rã'ãgatà mãe kõ. [Iwarità tè kupa.] A'e kõ mãrãnà jikuwa e'ã iteetejẽ mã'ẽ oinõtà jane kõ rovake kupa, poromoripea rõmõ. “Janejare'e remipyteporo kõ tẽ tesõ tamoripe”, e'ità oupe kupa. 23Pirujẽ a'evo e'ãve a'epa pejẽ, tapekuwa amãtejẽ. Ajawyi pemã'ẽ gatu ikõ a'evo remẽ nẽ, tapejimoripeoka e'ã, a'e pejẽ, e'i Jesu ijupe kõ.
Jesu ovãe tarà mijẽ mã'ẽ rewarà
(Mateusi 24.29-31; Rukasi 21.25-28)
24E'i jẽ Jesu ijupe kõ:
– Ãmẽ jimomorijaua paire, nipuku ywe'e'ãi ky'y remẽ, keetà. Ãmẽ si kwaray omytà. Ãmõ, naeny'ãi jay teve ky'y. 25Ãmõ, jaytata kõ yva pe wyi okukuità teve. Yvag onãrarãmatà ky'y, ipupewarà kõ revejẽ.#J.Jim. 6.12-13 26Ãmẽ sõsi mitirõwã eny mã'ẽ votà ajikuwatà yva rè. Yva rãtasĩ rupi tẽ tesõ ajotà. Ekasia reny revejẽ ajotà, Janejare'e Remimuurerà ajimojane mã'ẽ rõmõ aiko. Ãmẽ si yvy kytywarà kõ pirujẽ omã'ẽtà ere ajo remẽ ky'y.#Tan. 7.13; J.Jim. 1.7 27Ãmẽ eremĩgwai yvapewarà kõ amonotà pirujẽ ekoty rewarà kõ tomoaty eru kupa. Yvy popy rupi amono mono kõtà ekoty rewarà kõ pijarà mõ, e'i Jesu ijupe kõ.
Jesu vãea rã mojikuwapa kõ rewarà
(Mateusi 24.32-35; Rukasi 21.29-33)
28E'i jẽ Jesu ijupe kõ:
– Ma'e rè pemosã'ãga esa. Ãwitõ wakapu okui ypy remẽ, “Kuise'ẽ jẽ kwaraytà ky'y”, ja'e ipi. 29Ãwĩvo vetà evãea rã mojikuwaparà rè pemã'ẽ remẽ. “Ke'ĩ Jesu ovãetà”, pejẽtà ee pemãjã. 30Aje ywete age'e remẽwarà kõ nopaive remeve a'evotà. 31Ãmẽ si yva opatà ky'y. Yvy opa tary ve. Eayvukwerà ãmẽ nopa'ãi, e'i Jesu wemimo'ekwerà kõ pè.
“Evãe tarà 'arà nojikuwa amãtejẽ'ãi jane kõ pè”, e'i Jesu mã'ẽ
(Mateusi 24.36-44)
32E'i jẽ Jesu:
– Ava nokuwa amãtejẽ'ãi evãea 'arà rã. Nojikuwa'ãi manyvo remẽ. Mape kwaray remẽ. Mã jay remẽ. Nojikuwa'ãi wete si! Janejare'e remĩgwai yvapewarà kõ ve nokuwa amãtejẽ'ãi. Ije ipe, Janejare'e Ra'yry rõmõ teipe aiko. Ajamã'ẽ nakuwaive evãe tarà 'arà. Papa rõmõ'ĩte a'evoa okuwapa amãtejẽ. 33Ajawyi tapetekokuwa pemãrãmoa'u peiko! a'e pejẽ. Napekuwa amãtejẽ'ãi manyvo remẽ avãe tarà mijẽ mã'ẽ, e'i Jesu.
34– Kee mã'ẽ votà ajo mijẽ remẽ. Tõvijã rè tè ajimosã'ãgatà tapekuwa sa'u. Ãwitõ tõvijã nou remẽ, wetã oitytà rã'ĩ oo. Omogeta rã'ĩ wemĩgwai kõ iposikoa rã rè toposiko jẽ akypyre kyty kupa. Ãmẽ wetã rova rãrõarà pè kee e'i: “Emãrãmoa'u katu ikenẽ! Nakuwaive manyvo remẽ avãetà”, e'i oo. Ãmẽ emĩgwai wãrõ jẽ oõvijã vãea upa, ijayvu rupi. Wãrõ karuaru iko. 35Ãwĩvo ve napekuwa'ãi evãea 'arà, e'i. Ma'e remẽ karumẽ tè ajotà. Ma'e remẽ pyaikatu. Ma'e remẽ masakara je'ẽ remẽ. Ma'e remẽ ji'ive. Ajawyi tapemoa'u katu jẽ ikõ evãea nẽ, a'e pejẽ. 36Tapetekokuwavay ikõ peiko nẽ! Ãmẽ tè oke mã'ẽ vo 'ejẽ rõwãtà poroesatà avãe, py'awarà mõ avãe remẽ. 37Ajawyi tapemãrãmoa'u jẽ ikõ peiko nẽ! a'e pejẽ. Ãwitõ aepo a'e pejẽ, ãwĩvo ve pirujẽ ekoty rewarà kõ pè aepo a'e teve, e'i Jesu wemimo'ekwerà kõ pè.
Currently Selected:
Maku 13: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
