Maku 12
12
Koo jarà ra'yry rè tè Jesu ojimosã'ãga remẽwarà
(Mateusi 21.33-46; Rukasi 20.9-19)
1Jesu oporegeta jẽ jõvijãgwerà kõ pè. Koo jarà ra'yry rè tè ojimosã'ãga javo ijupe kõ. Kee e'i ijupe kõ:
– Kwaima'e mõ mõa'ãrõwã moma'eyva'y oõtã okoo pè, uva'y. Omojikwa ywete wemitãgwerà. Ajaire omopari okoo. Ajaire, uvary ty'oa oinõ. Ajaire myta oinõ. A'e 'aryvo wyi omã'ẽtà ava mõ imonatà remẽ ee.
– Ajaire koo jarà ojisyrytà oo ky'y. Okoo oitytà rã'ĩ ãmõ kõ po pè toporu rã'ĩ ipupewarà kõ upa. “I'a remẽ teremoaty ipẽgwerà ije”, e'i ijarà ijupe kõ. “Hoõ” e'i tite ijupe kupa. Ãmẽ a'e kõ opyta ekovijarerà rõmõ iko. Omokatutà emitã kõ ereko kupa. Ijarà ãmẽ ojisyry ãmõ yvy kyty oo. 2Ãmẽ kãramõ sa'u temitã i'a ky'y. Ajaire otãrõma. Ãmẽ tè ijarà wemĩgwai mõ omono too ipijarà mõ oupewarà mõ toeru. Oo emĩgwai kõ ãmẽ. 3Ajamã'ẽ koo pè oposiko mãe kõ nome'ẽ'ãi ijarà pewarà emĩgwai pè toeraa oõvijã pè. Opyy kõrijõ inõpã nõpã kupa. Agyvotè omojivy imono kupa.
4– Ãmẽ ajaire koo jarà ãmõ wemĩgwai omono mijẽ. A'e ve temitã mokatuarà kõ omomarama, ãwĩvo ve. Wãkãnõpã nõpã ity kupa. Ojimorarai ywete ee imojivy imuu kupa. Agyvotè ojivy uu ãmẽ. 5Ajaire koo jarà ãmõ omono mijẽ. A'e temitã mokatuarà kõ ojuka. A'evo tè jẽ ekoi kupa ipi. Ãmõgwerà onõpã nõpã imojivy imuu kupa. Ãmõgwerà ojuka kupa. 6Ta'yry kõrijõ uve jẽ ipyri ky'y, emiauvay tè. A'e pewarà mõ koo jarà e'i oupe: “Era'yry tè amonotà ky'y. Era'yry tè rewarà mõ omomojytà kupa”, e'i tite oupe mijã. Omono ãmẽ. 7Ajamã'ẽ temitã mokatuarà kõ nomomojyi. Omã'ẽ ee kupa, ovãe iko remẽ. Ãmẽ e'i ojiupe kupa: “Emã'ẽ! Koo jarà ra'yry ovãe ky'y. Ãwĩ tè koo opyytà janewyi. Ejo sijuka amãtejẽ. Ãmẽ tè koo sirekotà janekoo rõmõ ky'y”, e'i ywe'e tite kupa. 8Opyy ywe'e tite ijuka ãmẽ kupa ky'y. Eãgwerà omomo imono koo kupe kyty ity kupa, e'i Jesu.
A'evo ojimosã'ãga jõvijãgwerà kõ pè.
9E'i jẽ Jesu ijupe kõ:
– Manyvotà rõwã koo jarà temitã mokatuarerà kõ wereko? Wapisi kõtà uu remẽ, nivoi kupa rewarà mõ. Ajaire ãmõ kõ tè wesatà wemitã rè toja'a ky'y, e'i.
Takuru e'eay rè tè Jesu ojimosã'ãga remẽwarà
(Mateusi 21.42-46; Rukasi 20.17-18)
10E'i jẽ Jesu ijupe kõ:
– Napemogetai sikõ Janejare'e ayvukwerà, kee e'i karamoe remẽ maekwerà:
“‘Aã takuru nikatui’, e'i ywe'e tite tetã reinõgarà kõ oinõ ypy takuru tetã remẽ.
Ajamã'ẽ a'e takuru ywesõ sikaepo ikatuay tetã mokasia rõmõ.
11Janerõvijã ywete tè okasia rupi ãwĩvo werekookatà.
Ãwĩvo wereko remẽ, owaraytà janererekotà!” e'i Janejare'e maekwerà, e'i Jesu ijupe kõ.#Jĩg. 118.22-23; J.K.R. 4.11; 1Pe. 2.7
12Aepo Jesu e'i imovy remẽ, jõvijã kõ okuwa Jesu ayvu manyvo jaa tè aepo e'i remẽ kupa.
– Janeupe tè aepo e'i! e'i kupa. “Tetã reinõgarà kõ vo ve pejẽ, koo mokatuarà kõ vo teve”, e'i upa! e'i ojiupe kupa.
Ajawyi ywesõ opota Jesu mopã'ãoka kupa. Manyvo noereko'ãi imopã'ãoka kupa ajamã'ẽ, okyje aty wasu kõ wyi kupa rewarà mõ. Ajawyi ojisyry kõrijõ tè oo Jesu wyi kupa.
Pariseu kõ wayvumoopaoka tarepe Jesu remẽwarà
(Mateusi 22.15-22; Rukasi 20.20-26)
13Ãmẽ ajaire jõvijã mõ omono Pariseu kõ mõ Jesu pè toayvumoteitete mijã. Kovenatu Eroti remĩgwai kõ mõ ve oo. 14Ovãe Jesu pyri kupa remẽ, kee e'i rã'ãga ijupe kupa:
– Poromo'earà, orokuwa aje mã'ẽ rè poromo'e ipi. “Aje ipõ” ne'i jane kõ neayvu pè remẽ, nerejimo'eai ee kõ neiko ipi. Ãmõ, nerejimoripeokai ivo maevo sõ tite mãe kõ pè ipi. Janejare'e ayvu aje ywete mã'ẽ rupi katu tè poromo'e peiko ipi. Ajawyi kee jaa rè oremo'e rejupa. I'ete põ Romã pewarà rõvijã wasu Sesa pè tekoua repykwerà jame'ẽ ipi? Ãnĩ põ ma'e remẽ? e'i rã'ãga ijupe kupa.#12.14 “Õ'õ” e'i sõ Jesu remẽ, Juteu rõvijã kõ ojikõ'õ kuwa ee, Romã pewarà rõvijã wasu nopotai kupa rewarà mõ. Ajamã'ẽ “ãnĩ” e'i sõ Jesu remẽ, Romã pewarà rõvijã wasu ojikõ'õ kuwa ee. Aepo rè omoãkwa'ã tarepe Jesu kupa.
15Ajamã'ẽ Jesu okuwapa ekoa kõ. Okuwa omoe'e maevo sõ tite kõrijõ tè kupa. Ajawyi nojimoãkwa'ãokai ijupe kõ. Kee e'i kõrijõ tè ijupe kõ:
– Manyvore põ erã'ã ywe'e tite pekupa? Karakuri moeta mõ emuu rã'ĩ tamã'ẽ ee, tekoua repykwerà rã rè, e'i ijupe kõ.
16Ome'ẽ rã'ĩ ijupe tomã'ẽ ee ãmẽ kupa. Ãmẽ Jesu e'i ijupe kõ:
– Pemã'ẽ. Ava rã'ãgawerà põ aã karakuri rè pemã'ẽ? Ãmõ, ava rerà põ ojikusiwa teve ee? e'i ijupe kõ.
– Jõvijã wasu Sesa rã'ãga, e'i ãmẽ kupa.
17Ãmẽ Jesu e'i ijupe kõ:
– Õ'õ. Aje ywete pejẽ! Jõvijã wasu karakuri tè aã, e'i. Ajawyi kee a'e pejẽ. Jõvijã Sesa pewarà tè remẽ, tapeme'ẽ jõvijã Sesa pè ãmẽ. Ãwĩvo ve Janejare'e pewarà tapeme'ẽ Janejare'e pè, a'e pejẽ, e'i Jesu ijupe kõ imogwe kõ.
Aepo wenu kupa mãe kõ kee e'i:
– Haa! Aepo e'i si Jesu! e'i kupa.
Satuseu kõ wayvumoopaoka tarepe Jesu remẽwarà
(Mateusi 22.23-33; Rukasi 20.27-40)
18Ãmẽ ajaire Satuseu kõ mõ uu Jesu kyty.#12.18 Juteu rõvijã kõ mõ tè Satuseu kõ. “Siayvumoopa Jesu,” e'i epe kupa. A'e kõ kee e'i teãmã mãe kõ tè: “Jakãjã remẽ, nijapoera mijẽ'ãi jaẽ Janejare'e pyri. Jakãjã te'ĩte kõrijõ”, e'i tite ipi mãe kõ. 19Kee e'i rã'ãga Jesu pè kupa:
– Poromo'earà, kee jaa itõkõ tãmõ Moisesi okusiwa tijakuwa: “Kwaima'e mõ erekwapa mã'ẽ okãjã sõ nijãkarãive remeve, erekwarerà wereko kuwa imõmirĩgwerà ãmẽ ipi. A'e tè ijãkarãtà ipupe weke'yry amyry rekovijarerà mõ”, e'i emikusiwarerà, e'i kupa.#T.M. 25.5; J.K.R. 23.8
[– Õ'õ, aje, e'i Jesu.]
20Ãmẽ Satuseu kõ e'i jẽ Jesu pè kupa. Ijã'ãa rupi tè e'i kupa:
– Oremo'e rejupa kee jaa rè. Ma'e remẽ uve kwaima'e mõ, ijatyray imõmirĩ mã'ẽ. 7 rõmõ ekoi kupa, weke'yry reve. Ajaire teke'yry ypykwerà wãivĩ mõ wereko mijã. Ajaire nijãkarãive ipupe remeve okãjã werekwarà wyi. 21Ãmẽ ekovijarerà wereko weke'yry rerekwarerà. Ajamã'ẽ a'e ve nijãkarãive remeve okãjã iwyi. A'e rekovijarerà wereko mijẽ a'e rerekwarerà. Ajaire okãjã mijẽ rõnõ, nijãkarãive remeve. Ãmẽ ivo ivo jẽ wereko reko jẽ tite kupa. Ajaate imõmirĩ kõ okãjãma ky'y, nijãkarãive kupa remeve. 22A'evo 'evo ajaate 7 rõmõ wereko ywe'e ipe wãivĩ kupa. Nijãkarãive remeve opa kupa. Ajaate wãivĩ terekwarerà tè omãnõ ky'y, e'i rã'ãga kupa.
23E'i jẽ Satuseu kõ Jesu pè:
– Aepo rè kee oro'e ene. Kãramõ Janejare'e poromomoera remẽ, ava rerekwarà rõmõ ekoità wãivĩ? Emã'ẽ, 7 rõmõ werekopa mijã. Ava reve põ ekoità ãmẽ, opoera opõ'ã mijẽ remẽ? Emome'u ore awi, e'i rã'ãga kupa.
24[Ajamã'ẽ Jesu okuwa Satuseu kõ “nijapoera'ãi” e'i kupa ipi.] Ajawyi e'i ijupe kõ:
– Haa! Napekuwai si Janejare'e ayvukwerà! Janejare'e kasia napekuwai teve. 25Kãramõ Janejare'e okãjã maekwerà kõ omomoera remẽ, nuve'ãi jirekoa ky'y. Ãwitõ Janejare'e remĩgwai yvapewarà kõ nojirekoi ipi, ãwĩvotà ekoi kupa. 26Pekuwa ipe Moisesi remikusiwarerà mijã! A'e ve omojikuwaoka teve jane kõ momoeraa rewarà! Janejare'e ka'a mitigà nokai'ãi maevo sõ tite mã'ẽ pupe wyi oporegeta remẽ. Kee e'i itõkõ Janejare'e ijupe: “Ije tè nerãmõi kõ Rõvijã wasu rõmõ aiko. Aparão Rõvijã wasu. Ãmõ, Isaki Rõvijã wasu. Ãmõ, Jako Rõvijã wasu”, e'i Moisesi pè maekwerà.#Jisyry. 3.6 27A'evo remẽ karamoeve tãmõ Aparão kõ okãjãma. Ajamã'ẽ omãnõ mãe kõ rõvijã rõwã Janejare'e ekoi ipi. Uve jẽ mãe kõ rõvijã rõmõ tè ekoi. Ajawyi “nerãmõi Aparão amyry” ne'i tãmõ Aparão pè. “Nerãmõi Aparão” e'i tè. Ajaa rupi kee jakuwa. Uvetà omãnõ maekwerà kõ jimomoeraa. Ajawyi pejavy, “Janejare'e noporomomoera'ãi”, pejẽ remẽ! Aje ywete a'e pejẽ, e'i Jesu Satuseu kõ pè imogwe kõ.
Poromo'e mã'ẽ wayvumoopaoka tarepe Jesu remẽwarà
(Mateusi 22.34-40; Rukasi 10.25-28)
28Ãmẽ tãmõ Moisesi remikusiwarerà rè poromo'e mãe mõ aepo rè ojapyaka upa, Jesu ojiayvuvaja vaja Satuseu kõ reve remẽ. “Jesu otekokuwavay imogwe kõ”, e'i oupe. Ajawyi wã'ã tarepe Jesu. Kee e'i ijupe:
– Iteetejẽ itõkõ Janejare'e e'i tãmõ Moisesi pè, aekwerà rupi katu tijaiko. Ajawyi kee a'e ene. Mã ywesõ põ ikasiay mã'ẽ, upi tijaiko? e'i.
29Ãmẽ Jesu e'i:
– Kee e'i maekwerà ywesõ ikasiay: “Isaeu kõ, pejapyaka katu ikenẽ. Pe'ĩte penõvijã ywete. Janejare'e tè a'e. Nuvei 'ete ãmõ penõvijã mõ ivo mã'ẽ. 30A'e ywesõ aje peauvay penõvijã ywete rõmõ. Pepy'a pupe peau. Ãmõ, pe'ãg pupe peau. Ãmõ, petekokuwaa pupe peau teve ipi Ãmõ, pekasia pè teve”, e'i maekwerà. Aepo e'i maekwerà ywesõ ikasiay, e'i Jesu ijupe.#T.M. 6.4-5
31E'i jẽ Jesu ijupe:
– Ãmõ ywesõ teve ikasiay, kee e'i maekwerà: “Nepyriwarà kõ tereauvay ereko ipi. Ãwitõ nejiauvay, ãwĩvo ve tereauvay nepyriwarà kõ ereko kõ, koivo kõ ve”, e'i maekwerà.#Tek. 19.18 Ãwĩ rupi ywesõ tijaiko, e'i Jesu.
32Ãmẽ tãmõ Moisesi remikusiwarerà rè poromo'e mã'ẽ aepo wenu remẽ, kee e'i:
– Õ'õ, aje. Pe'ĩte Janejare'e, aje. [Janerõvijã ywete a'e.] Nuvei 'ete ãmõ ivo mã'ẽ rõmõ ekoi mã'ẽ mõ.#T.M. 4.35 33Ajawyi Janejare'e ywesõ tijaau katu janepy'a pupe ereko. Pirujẽ janetekokuwaa pè teve. Ãmõ, pirujẽ janekasia pè teve. Ãmõ ãmõ kõ tijaau katu teve ereko kõ ipi. Ãwitõ jajiau jaiko mã'ẽ vo tijaauvay kõ ereko ipi. A'evo jaiko mã'ẽ ywesõ Janejare'e opota tijaiko ipi. Na'evoi jaiko remẽ, manyvoa rã rõmõ rõwã kuwa janeremime'ẽgwerà Janejare'e pewarà, e'i Jesu pè.#Ose. 6.6
34Ãmẽ Jesu oryvay aepo renu, otekokuwa e'i rewarà mõ. Ajawyi e'i ijupe:
– Werywete Janejare'e nemoẽoka ne'arà kyty neiko, e'i Jesu ijupe.
Aja paire ava, “Jesu aayvumoopatà”, ava ne'i'ãi ky'y. Ojirokyje kupa ky'y. “Kãramõ ajimogweroka ne”, e'i kupa ajawyi.
Jõvijã Tavi Jeapyry rewarà
(Mateusi 22.41-46; Rukasi 20.41-44)
35Ajaire Jesu poromo'e Janejare'e moe'ea retã ypy pè upa remẽ, kee e'i ijupe kõ:
– Tãmõ Moisesi remikusiwarerà rè poromo'e mãe kõ poromo'e remẽ, kee e'i kupa: “Jõvijã Tavi jeapyrerà rõmõ tè Janejare'e Remimuuarà rã”, e'i kupa. Manyvore põ aepo e'i kupa? 36Tãmõ Tavi oporegeta amãtejẽ Janejare'e Remimuuarà rã rè remẽ, “Erõvijã ywete” e'ipa teãmã ijupe tãmõ Tavi. Janejare'e 'Ãg kasia rupi kee e'i itõkõ ojĩgarà rupi maekwerà rè pejipy'amogeta:
“Janejare'e e'i Erõvijã ywete pè:
‘Ejo e'ekatu kytyre tereapy, ereve Jõvijã wasu tè ene rewarà mõ.
Nerõvajãrà kõ newyry kyty rõmõ tainõoka’, e'i Janejare'e ijupe maekwerà”, e'i itõkõ tãmõ Tavi ojĩgarà rupi.#Jĩg. 110.1
37Aepo jaa rè kee a'e pejẽ. Tãmõ Tavi “Erõvijã ywete” e'ipa Janejare'e Remimuuarà rã pè. Manyvore põ aepo e'i ojeapyry rã pè? e'i ijupe kõ.
Ãmẽ aty wasu kõ opota katu Jesu ayvu rè ojapyaka.
“Moisesi remikusiwarerà rè poromo'e mãe kõ rekoa rupi tapeiko e'ã”, e'i mã'ẽ
(Mateusi 23.1-36; Rukasi 20.45-47)
38Ãmẽ Jesu poromo'e upa remẽ, kee e'i:
– Tapeã'ã e'ã ikõ tãmõ Moisesi remikusiwarerà rè poromo'e mãe kõ rekoa kõ ipi nẽ. Wee ypyry oja'a kupa ipi. “Temoe'e ekojẽ ãmõ kõ”, e'i oupe kupa ipi. Ajawyi tyru katukwerà opypy erojivy jivy moma'e mosãia rena pè kupa ipi. “Tajikuwa jõvijã rõmõ aiko”, e'i tè kupa ipi. “Age'e tè, poromo'earà rõvijã”, ejaa opota jane kõ atyry pytery pè oupe kupa ipi. 39Ãmõ, Janejare'e ayvu rè jimo'ea retã kõ wyry pè oo kupa remẽ, opota apyka e'ekwerà 'aryvo tẽ tesõ wapy kupa ipi. Ãmõ, jimiwa wasu pè oo mõropãrà kõ rõmõ remẽ teve, kee e'i oupe kupa ipi: “Poromojimi'uarà kee e'i kuwa ije: ‘Ene ypy ejo aã ike epyri eapy’, e'i kuwa ije”, e'i oupe kupa ipi. A'evo ojimoe'eoka jane kõ pè ipi. Ajawyi tapeeru e'ã ikõ ekoa kõ nẽ, a'e pejẽ, e'i Jesu ijupe kõ.
40E'i jẽ Jesu:
– Ãmõ, oja'a katu põ terekwarerà kõ rè kupa ipi? Ãnĩ! Noja'ai kupa. Omoma'eekyi kõ kõrijõ tè kupa ipi. Imona kõrijõ terekwarerà kõ ma'e rè kupa ipi. Aja paireve Janejare'e pè oporegeta puku rã'ãga ãmõ kõ rovake tè kupa ipi. Ãwĩvo oinõ gatu tarepe weko aiwerà kupa ipi. Ajamã'ẽ Janejare'e okuwa katupa ekoa kõ. Ajawyi omomorijauoka kõtà kãramõ. Ãwĩ kõ ywesõ omomorijautà ãmõ kõ wyi, e'i Jesu ijupe kõ.
Terekwarerà Janejare'e pè nokãte'ãi mã'ẽ rewarà
(Rukasi 21.1-4)
41Ãmõ 'ary pè Jesu oo mijẽ Janejare'e moe'ea retã pè. A'e ypy pè wapy jane kõ rè omãjã upa, karakuri moeta weru inõ karakuri moeta temime'ẽgwerà rena pupe kupa remẽ.#12.41 Janejare'e posikoa pewarà tè a'e temime'ẽ rã. Ãmẽ jane kõ pe'ĩrõwã okwa okwa wemime'ẽ reru inõ ena pupe. Imoma'e ywete mãe kõ kejavu tesõ karakuri moeta ome'ẽ. 42Ãmẽ ajaire terekwarerà mõ uu karakuri me'ẽ. Karakuri moeta nikasi mã'ẽ mõrijõgà ome'ẽ. Wyjaveay ome'ẽ, nimoma'ei mã'ẽ tè rewarà mõ. Ajawyi emime'ẽgwerà naepy ywe'ei. 43-44Ãmẽ Jesu omuu wemimo'ekwerà kõ okoty javo.
– Ãwĩ wãivĩ ywesõ nokãte'ãi okarakuri rè imoma'e ywete mãe kõ wyi, e'i. [A'e kõ ipẽgà tè weru ime'ẽ ipi. Ajamã'ẽ pe'ĩrõwã opyta jẽ ijupe kõ.] Aã ãmẽ wyjaveay weru ime'ẽma. Ajawyi nopyta pe'ĩ ekojẽi tesõ ijupe ome'ẽ maire ky'y. Ajawyi aã wãivĩ ywesõ nokãte'ãi okarakuri rè Janejare'e pè ome'ẽ remẽ. Aje aepo a'e age'e, e'i Jesu ijupe kõ.
Currently Selected:
Maku 12: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
