Maku 5
5
Jesu ãjãgaiwerà omomorijau mã'ẽ omokatu remẽwarà
(Mateusi 8.28-34; Rukasi 8.26-39)
1Yvytu ai paire Jesu oo jẽ pãranã ovae kyty kupa, wemimo'ekwerà kõ reve. [Juteu rõwã mãe kõ rena tè a'e.] Gerasa eu a'e yvy pè. 2A'e pè ovãema kupa remẽ, Jesu oẽ oo yarà pe wyi, wemimo'ekwerà kõ reve. Oo iko kupa remẽ, kwaima'e mõ uu õvaisĩ. Ãjãgaiwerà omomorijau mã'ẽ a'e. 3-4Tyvy rena kyty wyi uu. Ipojy ai mã'ẽ tè a'e kwaima'e. Ikasiay wete iko. Ajawyi etãrã kõ opokwa ipe tatui upa ipi mijã. Jipokwa ãtã mã'ẽ pupe tẽ tesõ opokwa epe kupa ipi mijã. Opykwa ipe ve kupa ipi mijã. Omono jẽ ipi ajamã'ẽ, ãjãgaiwerà kasiay rupi. Ajawyi manyvo noereko'ãi etãrã kõ ipi. 5I'ãgai teve ipi. Pya rupi tyvy rena rupi opõ'ã ojivy jivy ipi. Aryvo rupi ve a'evo ekoi. Eamamai teve ipõ iko ipi. Ojikãrãima e'e teipe teve takuru rè ipi. Katu rupi tè ekoi ipi.
6Ãmẽ a'e omã'ẽ Jesu rè, a'e pè ovãe remẽ. Kuipe'e wyive omã'ẽ ee. Ãmẽ ojã oo Jesu kyty. Eawyry ojimomo Jesu rovake ojimoenãpa'ã. 7-8Ãmẽ Jesu e'i ãjãgaiwerà pè, kwaima'e omomorijau mã'ẽ pè:
– Ãjãgaiwerà, ejisyry ikõ eo nẽ! e'i ijupe.
A'e ãjãgaiwerà kee e'i ijupe:
– Jesu, Janejare'e jo'arà kytywarà Ra'yry tè ene! Nejotà põ emomorijau rejupa? e'i. Temomorijau e'ã rejupa, a'e neupe! e'i wapukai mõ.
9Ãmẽ Jesu e'i ãjãgaiwerà pè:
– Emome'u nererà ije. Manyvo eu põ neupe? e'i ijupe.
Ãmẽ ãjãgaiwerà e'i:
– Oreatyray eu ije, mõa'ãrõwã ore rewarà mõ, e'i.
10E'i jẽ Jesu pè:
– Toremoisyryoka e'ã ike wyi rejupa, a'e ene! e'i Jesu pè.
11Ãmẽ jakatu tajausĩ ijatyray iko ipyri kõ. Yvytyry yke rupi ojimi'u iko kupa. 12A'e kõ pewarà mõ ãjãgaiwerà kõ e'i Jesu pè:
– Oremoẽ sõ rejupa remẽ, tajausĩ kõ pupe jẽsi toroike! I'ete põ ãwĩvo remẽ? “Hoõ” ere ikõ ore nẽ, e'i e'i kupa.
13“Hoõ” e'i Jesu ijupe kõ ãmẽ. Ameve ãjãgaiwerà kõ oẽ oẽma kwaima'e pupe wyi oo. Ãmẽ tajausĩ kõ pupe oike ike mijẽ kupa. Omo'ãgai tesõ tajausĩ kõ ãmẽ kupa. Werojã tesõ tajausĩ kõ eraa vykwae kyty. Okukuipa oo yy pupe kupa, pãranã pupe. Oyvypypa opa kupa, pirujẽ. Mõa'ãrõwã tajausĩ mijã. Werywete 2.000 rõmõ tesõ. Opa pirujẽ.
14Ameve tajausĩ rewarà kõ ojava oo a'evoa mojenu jenu taa rupi kupa. Koo kõ rupi ve oo imojenu erokwa kupa. Ãmẽ jane kõ mõa'ãrõwã uu upi kõ omãjã ee. 15Ovãe Jesu kyty kupa remẽ, ãjãgaiwerà remimomorijaukwerà rè omã'ẽ kupa. Omã'ẽ ee kupa remẽ, aekwery vo rõwã tui ky'y. Otekokuwavay ky'y. Ijyru tè wapy upa ky'y. Ojimonyi tesõ ee omãjã ãmẽ kupa.
16Ãmẽ ãjãgaiwerà moẽa rè omã'ẽ maekwerà kõ omome'u me'u wemisakwerà.
– A'evo 'evo Jesu wereko ãjãgai kõ moẽ imono kwaima'e wyi. Tajausĩ kõ pupe omonooka kõ topa kupa, pãranã pupe! e'i imomewa kupa.
17Ãmẽ jane kõ ojimonyi tesõ aepo jaa renu. Ajawyi e'i Jesu pè kupa:
– Ejisyry ike wyi eo, orerena pe wyi! e'i kupa.
18Ajawyi Jesu ojisyry iwyi kõ oo, [wemimo'ekwerà kõ reve.] Yarà pupe opo remẽ, ãjãgai remimomorijaukwerà kee e'i epe Jesu pè:
– Taa nerupi! e'i epe.
19Ajamã'ẽ Jesu “ãnĩ!” e'i.
– Ejivy jẽsi nerena kyty eo, e'i ijupe. Janerõvijã ywete nerereko katuawerà emojenu neretãrãgwerà kõ pè erokwa, e'i Jesu ijupe.
20A'evo wereko ãmẽ, Jesu rakypyre kyty. Oo Tekapori taa atyry kõ rupi.#5.20 Tekapori pè “taa atyry 10 rõmõ” jaa tè. Pirujẽ manyvo Jesu wereko maekwerà omojenu erokwa. Omoãgyo kõ tesõ aepo wenu kupa remẽ, pirujẽ.
[ – Haa! Ijayvukasiay põ Jesu? e'i e'i enu kupa.]
Jairu ojiporijauesaoka Jesu pè remẽwarà
(Mateusi 9.18-19; Rukasi 8.40-42)
21Ajaire Jesu ojivy mijẽ uu pãranã ovae kyty wyi, wemimo'ekwerà kõ reve. Juteu kõ yvy kyty ojivy mijẽ uu. Yarà pupe wyi Jesu oẽ remẽ, aty wasu kõ ojatykapa ee omãjã. Okena 'ete aty wasu pãranã reme pè. 22Ãmẽ kwaima'e mõ uu Jesu pyri. Janejare'e ayvu rè jimo'ea retã rõvijã mõ a'e. Jairu eu ijupe. A'e Jesu rè omã'ẽ remẽ, ojimoenãpa'ã ovake. 23Ojiporijauesaoka ijupe, kee javo:
– Jõvijã! Erajyry itekorã ywete! Okãjã taray upa! Ejo kuise'ẽ ejipy ee imokatu, tokãjã e'ã! e'i tuu Jesu pè.
24Ãmẽ “hoõ” e'i Jesu. Oo upi ãmẽ. Oo kupa remẽ, aty wasu kõ ojimokyrytyty tesõ oo.
Jesu wãivĩ wyypu mã'ẽ omokatu remẽwarà
(Mateusi 9.20-22; Rukasi 8.43-48)
25Ãmẽ jakatu atyry pytery pè sikaepo wãivĩ mõ itekorã ywete mã'ẽ ekoi. A'e karamoeve sikaepo itekorã puku iko. Wyypu mã'ẽ tè a'e wãivĩ. 12 kwaray rõmõ tesõ nopi'ãi wyy iwyi iko. 26Nipikasi 'eteay otekorãnà pè iko ãmẽ ky'y. Ojimomorijauvay ipõ iko ipi. Oo oo ipe poropõanõgarà kõ pè ipi mijã. Ojikarakuri moma tesõ ipe opõanõa rã rè. Noerovijari moã ajamã'ẽ. Oouvay itekorãnà. Kekejẽ itekorãnà oikopa ee ky'y.
27Ãmẽ Jesu vãea ojenu ijupe remẽ, oryvay wãivĩ. “Jesu emokatu kuwa!” e'i oupe. Oo aty wasu rupi Jesu kyty ãmẽ. Jesu apekwerà kyty wyi oo. Nojikuwai tè oo ipyri ajamã'ẽ. Jesu yru rè ojipy, 28kee e'i rewarà mõ:
– Ijyru poko retoapy rè sõ ajipy remẽ, ekatupa kuwa, e'i oupe rewarà mõ.
29Ajaire ojipy ee remeve opi wyy iwyi ky'y. Okuwa omokatua opirà rupi ky'y.
30-31A'evo wãivĩ ojipy vija teipe Jesu rè remẽ, okuwa jẽ tesõ Jesu opyya. Okuwa okasia pupe omokatu jane mõ. Ajawyi ojirova aty wasu rè omãjã.
– Ava põkõ eyru poko rè ojipy uu? e'i ijupe kõ.
Ãmẽ emimo'ekwerà kõ e'i ijupe:
– Aty wasu kõ ojimokyrytyty tesõ nere. Ajawyi, “Ava põ ojipy eyru rè?” ere remẽ, ava nokuwai! e'i tite kupa.
32Ajamã'ẽ Jesu weka jẽ opyyarerà, wemimokatukwerà. 33Ãmẽ wãivĩ ojikuwa uu Jesu pè ky'y. Otyty jẽ tesõ okyje rõmõ iko uu, Jesu kyty. Ojimoenãpa'ã ovake omokatuawerà momewa. Pirujẽ weewarà omome'u ijupe ky'y.
34Ãmẽ Jesu oporijauesa.
– Ejimokasi jẽ ere, mãsĩ! e'i. “Emokatu kuwa ãwĩ”, ere nepy'a pè. Ajawyi nekatupa ky'y! Tanepiryvypy katu nejivy neo awi neretã gyty! Nejimomorijaua opa ky'y! e'i ijupe.
Jairu rajyry omomoeraa remẽwarà
(Mateusi 9.23-26; Rukasi 8.49-56)
35Ãmẽ Jesu oporegeta jẽ wãivĩ pè upa remẽ, Jairu wãrõ jẽ Jesu upa too tajyry mokatu. Ameve Jairu remĩgwai kõ mõ uu etã gyty wyi, kee javo:
– Nerajyry okãjãma ky'y! Teremo'eai e'ã poromo'earà ky'y ajawyi! e'i kupa.
36Ãmẽ aepo e'i kupa remẽ, “aje ipõ” ne'i Jesu ijayvu kõ pè. Kee e'i kõrijõ tè Jairu pè:
– Nekyje ne. “Aje” ere jẽsi Janejare'e kasia pè, e'i kõrijõ ijupe.
37Oo jẽ Jesu upi ãmẽ. Aty wasu nomonookari oupi ajamã'ẽ. Wemimo'earà kõ mõ kõrijõ tè weraa oupi. Kejõ. Peturu. Ãmõ, Tiaku. Ãmõ, imõmirĩ Juwão. Mokopejõ kõrijõ weraa oupi.
38Ajaire Jairu retã mè ovãema kupa remẽ, mõa'ãrõwã jane kõ a'e pè tui. Tajyry kãjãa rè ojiãpirõ wasu kupa upa. 39Ãmẽ Jesu oike tetã wyry pè remẽ, e'i ojiãpirõ mãe kõ pè:
– Peãpirõ sõ pekupa! Nokãjãi! Oke tè! e'i ijupe kõ.
40Ãmẽ aepo e'i Jesu remẽ, oojai kõrijõ ijayvu kupa. Ajamã'ẽ Jesu omoẽ moẽma aty wasu kõ oka wyry pe wyi imono ikatu kyty. Tuu kõrijõ tè omomyta opyri, ijy reve. Ãmõ, wemimo'earà kõ reve. Mokopejõ opyta kupa. Oo tajyry reãgwerà pyri ãmẽ kupa. 41Ãmẽ Jesu opopyy eãgwerà oporegeta ijupe.
– Tarita kumi! e'i ijupe.
Wayvu rupi tè aepo e'i. A'e, “Epõ'ã, ja'y kõjatãi”, jaa tè aepo e'i.
42Ameve opoerapa opõ'ã wata ky'y. 12 kwaray rõmõ wereko mã'ẽ ja'y kõjatãi. Ãmẽ a'evoa rè omã'ẽ mãe kõ ojimonyi tesõ a'evoa rè omãjã.
[ – Haa! Okãjã itõkõ mijã! e'i kupa. Ajamã'ẽ Jesu omomoera jẽ tesõ! e'i kupa.]
43Ãmẽ Jesu e'i tuu pè, ijy pè teve:
– Imomoerawerà tapemome'u e'ã rã'ĩ ikenẽ, e'i. Tapeapoi katu kõrijõ tè ereko, e'i Jesu ijupe kõ.
Currently Selected:
Maku 5: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
