Maku 6
6
Nasare taa wãnà kõ “aje” ne'i Jesu ayvu pè remẽwarà
(Mateusi 13.54-58; Rukasi 4.16-30)
1Aja paire Jesu ojivy oo wekoawerà kyty, Nasare taa kyty. Emimo'ekwerà kõ ve oo upi. 2Ãmẽ jimoava 'arà mẽ, oo oike Janejare'e ayvu rè jimo'ea retã wyry pè poromo'e. A'e pè jane kõ mõa'ãrõwã wenu remẽ, e'i kupa:
– Haa! Ava sipõ Janejare'e ayvu rè omotekokuwavay? e'i kupa. Manyvo'i tesõ mãrãnà jikuwa e'ã imojikuwaoka? Marama tè põ Jesu ekoi! e'i ijupe kupa. 3Emã'ẽ! Janeremikuwa teipe Jesu mijã! Ikewarà teipe mijã! Yvyra jimo'ikwerà rè oposiko mã'ẽ teipe mijã! Maria memyry teipe! Imõmirĩ kõ ve janeremikuwa kõ teve. Kejõ. Tiaku. Juse. Juta. Simão. Mokopejõ. Ikõjã kõ ve janeremikuwa kõ teve. Ikewarà kõ teipe kupa mijã, e'i kupa.#6.3 Nokuwai Janejare'e Ra'yry tè Jesu kupa.
[Noenu tari ijayvu ãmẽ kupa ky'y. “Aje” ne'i'ãi kupa.]
4Ãmẽ Jesu e'i ijupe kõ:
– Ãwĩvo Janejare'e ayvu mojenuarà kõ ipi. Temimoe'e teipe kupa. Ajamã'ẽ ena pewarà kõ nomoe'e'ãi ipi. Etãrãgwerà kõ. Ãmõ, ipyriwarà kõ ve noenu tari ijayvu ipi. Ãmõgwerà pirujẽ wenu takatu ãmẽ, e'i.#Juw. 4.44
5Ajawyi Jesu nomojisaokai okasia a'e tena pè. Mãrãnà jikuwa e'ã nomojisaokai. Pe'ĩpe'ĩ itekorã mãe kõ kõrijõ tè opyy imokatu. A'e wãnà kõ “aje” ne'i ijayvukasia pè rewarà mõ a'evo ekoi.
6Ajawyi Jesu oporegeta oupe:
– Janejare'e ayvu rè amo'e ipe eretãrãgwerà kõ, e'i. Ajamã'ẽ “aje” ne'i eayvu pè kupa, e'i.
Jesu wemimo'ekwerà kõ omonotà rã'ĩ remẽwarà
(Mateusi 10.5-15; Rukasi 9.1-6)
Ajaire Jesu ojisyry oo Nasare tena pe wyi. Ãmõ tena tena kõ rupi oo poromo'e iko, nikuipei mãe kõ rupi. 7Ãmẽ omuu rã'ĩ wemimo'ekwerà kõ, 12 rõmõ mãe kõ, imogeta. Mõrijõ rijõ omono kõtà wenone rupi Janejare'e ayvu tomojenu kupa. Wayvumokasi kõ teve ãjãgaiwerà kõ tomoẽ kupa. 8Kee e'i imono kõ:
– Agyvo tè ikõ pekwa nẽ. Pepytu kõrijõ tè ikõ peraa penupi nẽ. Penemi'õ rã naperaa'ãi. Ãmõ, penepãnakõ naperaa'ãi. Ãmõ, karakuri, e'i. 9Pepyrokape rewarà tapepypy eraa. Ajamã'ẽ tyru poko rekovijarà naperaa'ãi, e'i. 10Tena mõ pè pevãe remẽ, peeka rã'ĩ ava pyri põ pepytatà. A'e pè tapepyta rã'ĩ ãmẽ peke. Ajaatetà pejisyrytà a'e tena pe wyi peo, e'i. [Janejare'e ayvu tapemojenu ijupe kõ, e'i.] 11Ãmẽ, ãmõ oka jarà kõ sõ napepotai sikaepo remẽ, tapejisyry kõrijõ a'e tena pe wyi nẽ. Ãmõ, noenu tari peayvu kupa remẽ, tapejisyry ena pe wyi. Ena pe wyi pejisyry peo remẽ, tapejipyrokape tyvyro rã'ĩ yvy ky'akwerà reity pepy re wyi peo, e'i. “Nerepotai pekupa remẽ, moko pejẽ jẽ peiko” jaa tè a'evo peikoa, e'i imono kõ.#J.K.R. 13.51; 6.8-11; Ruk. 10.4-11
12Ãmẽ oo Janejare'e ayvu mojenu jane kõ pè erokwa kupa, Jesu ayvu rupi.
– Tapejipy'amogeta ikõ peneko rè age'e nẽ. Tapejimosĩoka peaiwererà rè. Tapejimome'u Janejare'e pè peaiwererà reitypypyipaoka, e'i imojenu jane kõ pè kupa.
13Ãmõ, ãjãg kõ omoẽ jane kõ wyi imono kupa ipi. Ijatyray omoẽ. Ãmõ, itekorã mãe kõ mõa'ãrõwã omokatu ijayvu rupi kupa. Moma'eyva kawerà#6.13 Azeite Tku. 5.14 ojoẽ ijapyte kõ 'aryvo imokatuoka Janejare'e pè kupa ipi. A'evo wereko Jesu ayvu rupi kupa.
Kovenatu Eroti okyje remẽwarà
(Mateusi 14.1-12; Rukasi 9.7-9)
14Ãmẽ a'evo remẽ, Jesu manyvo ekoi mã'ẽ rè omã'ẽ mãe kõ omovyvy wete erokwa. Ajawyi Jesu rewarà erãkwẽ ywete. Ajaate aepo jaa ojenu kovenatu Eroti pè ky'y. Ãmõgwerà kee e'i Jesu pewarà mõ:
– Juwão poromojãmorĩ mã'ẽ amyry tè rõwã põkõ opoera? A'e tè rõwã põ Jesu? Ajawyi tè rõwã põkõ ijayvukasiay wete mãrãnà jikuwa e'ã reinõgarà rè? e'i tite kupa.
15Ãmõ kõ kee e'i:
– Ãnĩ maevo! Tãmõ Eriasi tè rõwã põkõ ãwĩ uu mijẽ ojikuwa! e'i tite kupa.
Ãmẽ ãmõ kõ kee e'i:
– Ãnĩ maevo! Janejare'e ayvu mojenuarà karamoewarà tè rõwã põkõ uu! e'i tite kupa.
Ajaate aepo jaa ojenu kovenatu Eroti pè ky'y.#Mat. 16.14; Mak. 8.28; Ruk. 9.19 16Ãmẽ kovenatu Eroti ojimonyi aepo renu ãmẽ.
– Eeee! Aãkãgooka maekwerà rõwã põkõ opoera? e'i. Juwão poromojãmorĩ mã'ẽ? e'i oupe.
17Aje ywete, jypy remẽ Eroti tè opyyoka Juwão ijãkãgooka. Ma'e rewarà mõ. Weke'yry Piripi werekwarekyi maekwerà tè Eroti. Erotiasi eu erekwarà pè. 18Ajare tè Juwão waka Eroti tojimosĩoka. Kee e'i:
– Ni'ei nereke'yry rerekwarà neekyi! e'i. Nivoi neiko Janejare'e pè! e'i ijupe.#Ruk. 3.19-20
19Ajawyi aepo e'i ojenu Eroti rerekwarà pè remẽ, ojikõ'õ ywete Juwão 'ãgwerà rè. Ajawyi opota ipe ojukaoka mijã. Ajamã'ẽ imẽnà okyje ai tè Juwão jukatà. 20Okuwa ivo katu ekoi mã'ẽ tè Juwão. Okuwa werovija katu Janejare'e mã'ẽ tè a'e. Ajawyi nojukaoka tari tite. Ajamã'ẽ omopã'ãoka jẽ Juwão jimopã'ãga pupe.
Ãmẽ Juwão jimopã'ãga pupe tui remẽ, kovenatu Eroti opota katu oporegeta eeve ipi. Ajamã'ẽ ijayvu rè ojapyaka remẽ, nokuwai manyvotà wereko ãwĩvo remẽ.
21Ãmẽ jakatu ojipy'amogeta jẽ Eroti rerekwarà Juwão jukaa rã rè iko.
– Manyvotà põ areko ijukaoka? e'i oupe.
Ajaate okuwa ijukaa ky'y. Ãmẽ jakatu imẽnà oja'a osakyawerà rè. A'evo remẽ okawa oinõ kupa. Ijaty mõropãrà kõ ojimoaty ipyri okawa. Jõvijã kõ. Ãmõ, emĩgwai wasu kõ. Ãmõ, sota rõvijã kõ ve. Ãmõ, Karireja yvy wãnà kõ rõvijã kõ ve. Mokopejõ ojimoaty ipyri okwa kupa.
22Ãmẽ Erotiasi memyry oike ojimomyu ovake kõ, tomã'ẽ ee kupa. Kõjãmuku tè imemyry. Ãmẽ Eroti oryvay ee omãjã. Mõropãrà kõ ve oryvay ee omãjã. Ãmẽ Eroti e'i ijupe, mõropãrà kõ reminu rõmõ:
– Moma'e põ nepota nejimomyua repy rõmõ? e'i. Ere ije tame'ẽ neupe, e'i. 23Pirujẽ neremimotarà ame'ẽtà neupe. Janejare'e reminu rõmõ ewari rõwã aepo a'e ene, e'i ywe'e tite.
24Aepo e'i ijupe remẽ, oo kõjãmuku oporanu oy pè. Ijy kee e'i:
– “Juwão poromojãmorĩ mã'ẽ ãkãgwerà apota”, ere ijupe! e'i.
25Ameve kuise'ẽ ojivy uu kovenatu Eroti kyty.
– Juwão poromojãmorĩ mã'ẽ ãkãgwerà apota. Eeruoka age'eve tè parapi pupe tamã'ẽ ee, e'i kõjãmuku Eroti pè.
26Ãmẽ Eroti ojimopirai tesõ aepo renu. Kee e'i oupe:
– Pirujẽ emõropãrà kõ wenu eayvukasia, “Janejare'e reminu rõmõ ewari rõwã”, a'e ywe'e tite remẽ. Ajawyi manyvo na'e'ãi eayvu motee ky'y, e'i oupe.
27Ameve omono sota mõ jimopã'ãga kyty, toãkãgo Juwão eru. Oo sota ãmẽ oõvijã ayvu rupi. 28Wãkãgo paire, ijãkãgwerà weru parapi wasu mõ pupe ime'ẽ kõjãmuku pè. A'e weraa oy pè ime'ẽ.
29Ãmẽ aepo jaa ojenu Juwão remimo'earà kõ pè remẽ, uu oõvijã reãgwerà pijarà mõ eraa ijaty kupa.
[Aja rewarà mõ tè kãramõ Jesu ayvukasia ojenu kovenatu Eroti pè remẽ, ojimonyi tesõ. “Aãkãgooka maekwerà tè rõwã põkõ opoera?” e'i tite oupe wenu remẽ.]
Jesu remimonokwerà kõ ojivy uu remẽwarà
30Ãmẽ ajaire Jesu remimonokwerà kõ ojivy uu Jesu kyty ky'y, Janejare'e ayvu omojenu paire. Ovãe kupa remẽ pirujẽ omome'u manyvo ekoi kupa maekwerà kõ ijupe kupa.
– A'evo 'evo oroiko oroo. A'evo 'evo oro'e poromo'e, e'i kupa.
31Pe'ĩrõwã jane kõ uu uu Jesu kyty ipi. Ajawyi Jesu nojimi'ui tesõ eewarà kõ mõ ipi. Emimo'earà kõ ve a'evo ekoi. Ajawyi kee e'i wemimo'ekwerà kõ pè:
– Jajisyry rã'ĩ aty wasu pytery pe wyi jaa jajimoava. Jane rõmõ'ĩte rã'ĩ tijaiko janekane'õyo rõmõ, e'i ijupe kõ.
Jesu omoypa katu ja'umã'ẽ aty wasu rè erokwa remẽwarà
(Mateusi 14.13-21; Rukasi 9.10-17; Juwão 6.1-14)
32Ãmẽ yarà rupi ojisyry ipe oo kupa, tekoe'ãma kyty. 33Ajamã'ẽ aty wasu kõ omã'ẽ ee kõ oo kupa remẽ. Kee e'i ãmẽ kupa:
– Ikupei kyty Jesu kõ ootà iko! e'i kupa.
Oo akypy rupi ãmẽ kupa. Pee rupi tè oo kupa ajamã'ẽ. Pirujẽ tena pe wyi ovaiteay oo kupa. Ajawyi aty wasu kõ ypy oo ovãe Jesu kõ renone.
34Ãmẽ Jesu oẽ yarà pupe wyi remẽ, aty wasu kõ rè omã'ẽ. Omã'ẽ ee kõ remẽ, oporijauesa kõ, iporijau Janejare'e ayvu rè kupa rewarà mõ. Nomãrãkuwai teve kupa. Ãwitõ kaneiru jarà nuvei remẽ, kaneiru kõ ojimomorijauvay. A'evo 'ejẽ ekoi kupa. Ajawyi Jesu omo'e ypy kõ Janejare'e ayvu rè. Iteetejẽ omo'e kõ.#P.Moirõ. 27.17; Mat. 9.36
35Ajaire karumẽ emimo'ekwerà kõ uu javo ijupe.
– Ike tekoe'ãma tè! Ajawyi aã jane kõ noesa'ãi ja'umã'ẽ ike rupi ipyy iwa. Karupa ky'y. 36Ajawyi emono kõ too wãime, taa kõ pè, wemi'õ rã kõ topyy pãtõ e'ãve kupa, e'i epe kupa.
37Ajamã'ẽ Jesu e'i ijupe kõ:
– Pejẽ tè tapeapoi kõ! e'i.
– Manyvo noroereko'ãi ijapoipa kõ, ãwisõ ijatyray wete kupa remẽ! e'i kupa. Emã'ẽ! Kejõgà tè janekarakuri moeta. Noy'ãi emi'õ rã kõ repy rõmõ, e'i kupa.
38Ãmẽ Jesu e'i ijupe kõ:
– Mapejõ põ meju uve pejẽ? e'i. Pekwa esa! e'i.
Ãmẽ oo jane kõ pytery rupi meju reka kupa. Wesa kupa remẽ, uu javo Jesu pè kupa.
– 5 rõmõgà tè meju uve, e'i kupa. Ãmõ, mõrijõgà teve pira jimiirerà, e'i kupa.
39Ãmẽ kee e'i Jesu ijupe kõ:
– Aty wasu kõ waite e'y e'yi toapy okwa kupa. Kwãkwã kykyre 'aryvo rupi toapy okwa kupa, e'i Jesu ijupe kõ.
40A'evo wereko ãmẽ kupa. Waite e'y e'yi wapy okwa ãmẽ kupa. Ma'e remẽ 50 rõmõ waiteve wapy kupa. Ma'e remẽ 100 rõmõ waiteve wapy kupa. A'e a'evo ekoi kupa.
41Ãmẽ Jesu meju opyy, 5 rõmõgà mã'ẽ. Ãmõ, pira jimiirerà mõrijõgà rõmõ mã'ẽ opyy. Ãmẽ oyvatesa rã'ĩ yva rè omã'ẽ, Janejare'e moete. Kee e'i ijupe:
– Papa, ikatuay ja'umã'ẽ neme'ẽ toro'u! e'i ijupe.
Ãmẽ omoete paire openo peno meju ime'ẽ wemimo'ekwerà kõ pè tomosãi aty wasu kõ pè. Pira jimiirerà a'evo ve wereko. Wayko yko ime'ẽ ijupe kõ tomosãi teve kupa. 42A'evo jane kõ ojimi'u pirujẽ. Ikasi katu ãmẽ kupa ky'y. 43Ãmẽ ojimi'upa kupa paire, uve jẽ meju kurerà. Pira jimiirerà kurerà uve jẽ teve. Ajawyi ja'umã'ẽ kure kurerà Jesu remimo'ekwerà kõ omoaty ijã rykyry pupe [ajairewarà rã]. 12 rõmõ oõjã kupa ky'y.
44Ãwĩvo Jesu ja'umã'ẽ omoypa katu aty wasu kõ rè. Ãmẽ kwaima'ekwerà kõ kõrijõ jamoirõ irõ remẽ, 5.000 rõmõ tesõ Jesu remiapoiwerà kõ.
Jesu yy rova'arà rupi wata remẽwarà
(Mateusi 14.22-33; Juwão 6.16-21)
45Ãmẽ ajaire Jesu poromo'e paire, e'i wemimo'ekwerà kõ pè:
– Pekwa amãtejẽ pe'yasa yarà rupi. Petesaita tena kyty pekwa erenone rupi, e'i ijupe kõ.
“Hoõ” e'i kupa. Opo ãmẽ yarà rupi oo kupa. Ojisyry kupa paire, Jesu e'i aty wasu kõ pè:
– Awyjepa rã'ĩ poromo'e aiko, e'i. Pejivy peo ãmẽ, e'i imono kõ.
46Ãmẽ omojivy imono kõ paire, Jesu ojiupi yvytyry rè oporegeta Uu pè, Janejare'e pè. A'evo Jesu rõmõ'ĩte tui, 47ajaate pãtõma. Ãmẽ Jesu omã'ẽ imono yarà rè, pãranã reme pe wyi. Pãranã mytery pè jẽ tui. 48Ãmẽ yvytu wete opeju tesõ yarà kytyre. Yy opipo pipo ywete ee. Ajawyi opykui we'e ipe kupa remẽ, yarà waite oo ijupe kõ yvytu ai rewarà mõ. Ãmẽ Jesu omã'ẽ jẽ ee kõ, a'evo ekoi kupa remẽ. Ajawyi kõ'ẽtà remẽ, oo ikoty kõ. Yy rova'arà rupi tẽ tesõ wata oo iko. Yarà pyryvo okwatà iko.
49Ãmẽ emimo'ekwerà kõ omã'ẽ ee, yy rova'arà rupi wata iko remẽ. Ojimonyijay ee omãjã kupa.
– Eeee! Taywerà tè rõwã pãkãwĩ! e'i tite kupa.
Eamamai omã'ẽ ee kupa remẽ. 50Pirujẽ okyje ai tè iwyi omã'ẽ ee kupa remẽ. Ajamã'ẽ ameve Jesu kee e'i ijupe kõ:
– Pekyje sõ ewyi! Pejimokasi jẽsi! Ije tè ajo, e'i ojikuwa ijupe kõ.
51Ãmẽ Jesu yarà pupe opo ipyri kõ. Ameve yvytu opipa ky'y. Emimo'earà kõ ojimonyi a'evoa rè omãjã.
– Haa! A'evo mã'ẽ tè sipãwĩ! e'i kupa.
52Ji'i omã'ẽ ipe Jesu rè temi'õ omoypa katu remẽ kupa. Ajamã'ẽ notekokuwaive omã'ẽ ee maekwerà rè kupa, manyvo jaa teipõ. Mewe tè okuwapatà kupa.
Jesu mõa'ãrõwã omokatu jane kõ erokwa remẽwarà
(Mateusi 14.34-36)
53Ajaire oo jẽ pãranã ovae kyty kupa. Jenesare yvy pè ovãema kupa. Ovãema kupa remẽ, weraa yarà ijãpasĩ kupa. 54Oẽ oẽ oo yarà pupe wyi kupa. Ãmẽ a'e wãnà kõ omã'ẽ ee remẽ, kee e'i kupa:
– Jesu si ovãe! e'i kupa.
55Ameve oo oo kuise'ẽ imojenu jenu kupa a'e rupi. Ameve omono mono itekorã mãe kõ pijarà mõ eru eru Jesu pè kupa, tomokatu kõ. Ikea kõ pupe weru eru kõ kupa. 56Pirujẽ tena tena kõ pè a'evo ekoi kupa. Jesu vãea ojenu tena wãnà kõ pè remeve weru eru itekorã mãe kõ Jesu kyty kupa ipi. Okary pè weru eru kõ kupa ipi, jimoatya pè.
– Jesu, epota tè neyru poko retoapy rè tojipy itekorã mãe kõ okatupa rõmõ! e'i ijupe kupa.
Ãmẽ itekorã mãe kõ ojipy ijyru rè remeve ikatupa kupa ipi. Pirujẽ ikatupa kupa ky'y.
Currently Selected:
Maku 6: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
