Maku 7
7
Tãmõ kõ rekoawerà rewarà
(Mateusi 15.1-9)
1Ãmẽ Jerusarẽ taa pe wyi Pariseu kõ mõ uu mijẽ Jesu resa. Ãmõ, tãmõ Moisesi remikusiwarerà rè poromo'e mãe kõ mõ ve uu. 2A'e kõ Jesu remimo'ekwerà kõ mõ jipokusua e'ãa rè omã'ẽ ojimi'utà kupa remẽ. 3A'evo rõwã Pariseu kõ ekoi ipi. Pirujẽ Juteu kõ a'evo rõwã ekoi teve. Ojipokusu katu rã'ĩ ojimi'utà kupa remẽ ipi. Wãmõi kõ rekoawerà rupi tè a'evo ekoi kupa ipi. “Nijajimi'ui jajipokusu e'ãve ipi”, e'i tãmõi kõ ayvukwerà. Ajawyi wãmõi kõ reruparà mõ a'evo ekoi kupa ipi. “Janejare'e kyty tijaneky'a e'ã ãmẽ”, e'i kupa. 4Moma'e pyya pe wyi uu kupa remẽ, nojimi'ui amãtejẽ kupa ipi. Ojipokusu rã'ĩ ojimi'utà kupa ipi. Wãisõ Juteu kõ rekoa rupi ve ekoi kupa ipi. Kaneku kõ kusua kõ rè oja'a katu ipi. Turuwa kusua kõ rè. Patu kusua kõ rè teve. Wãisõ ekoi kupa ipi.
5Ajawyi Jesu remimo'ekwerà kõ rè omã'ẽ kupa remẽ, kee e'i Jesu pè kupa:
– Manyvo põ neremimo'ekwerà kõ nojipokusui rã'ĩ ojimi'u tarà mẽ tãmõ kõ rekoa rupi? Moko ne'i kuwa'ãi si kupa mijã! e'i kupa.
6Ajawyi Jesu kee e'i ijupe kõ:
– Pejẽ pa'e! Janejare'e perovija rã'ãga mãe kõ! Poromoripe mãe kõ tè! Aje ywete sikõ Janejare'e e'i amãtejẽ karamoeve wayvu mojenuarà Isajasi pè tokusiwa! Kee e'i itõkõ emikusiwarerà peupewarà mõ:
“Aã jane kõ, ‘Janejare'e koty rewarà mõ tè ije’, e'i tite kupa ipi.
Ajamã'ẽ ojuru e'e pupe kõrijõ tè emoe'e kupa ipi!
Opy'a kõ pupe rõwã!
Nojipy'amogetai 'eteay ere kupa ipi!
7Emoe'e maevo sõ tite tè kupa ipi!
Manyvo jaa mõ rõwã emoe'e tite kupa ipi!
Wãmõi kõ rekoawerà rè poromo'e kupa remẽ,
‘Janejare'e ayvu tè’, e'i tite wekoawerà pè kupa ipi!” e'i maekwerà.#Isa. 29.13
8Aepo e'i maekwerà rupi katu peiko! Janejare'e ayvukwerà peity ywe'e tite. Tãmõ kõ rekoa rupi peiko tite! e'i.
9E'i jẽ Jesu ijupe kõ:
– Penekoa rè ywesõ peja'a Janejare'e rekoa wyi ipi! Penekoa rupi peiko remẽ, Janejare'e ayvu rupi napeikoi! [Ojevo jẽ rõwã kupa ajamã'ẽ!] 10Kee e'i itõkõ Janejare'e tãmõ Moisesi pè maekwerà: “Penõvijãgwerà kõ tapemomojy ipi. Penuu. Ãmõ, pey”, e'i. Kee e'i teve itõkõ: “Oõvijãgwerà kõ rè oporegeta ai imojaiwe mã'ẽ tapejuka ipi”, e'i teve maekwerà.#Jisyry. 20.12; 21.17
11– Pejẽ ajamã'ẽ Janejare'e ayvukwerà pemotee ywe'e tite! Kee pejẽ ywe'e tite poromo'e ipi. Ava mõ sõ oma'e mõ ome'ẽtà oõvijãgwerà kõ pè ipãtavõ kõ remẽ, “Ãnĩ! Janejare'e pewarà tè ãwĩ!” pejẽ tite. 12“Penõvijãgwerà pewarà rõwã”, pejẽ tite poromo'e. A'evo napepãtavõokari tõvijãgwerà kõ, ãwisõ Janejare'e, “Tapemomojy kõ”, e'i remẽ. 13Wãi wãisõ peiko ipi. “Nimanyvoi Janejare'e ayvukwerà naperovijari remẽ”, jaa tè a'evo pejẽ ywe'e tite mã'ẽ! “Tãmõ rekoawerà ywesõ taperovija Janejare'e ayvu wyi”, jaa teve pejẽ ywe'e tite mã'ẽ! e'i Jesu ijupe kõ.
Jopy'a ai rewarà
(Mateusi 15.10-20)
14Ãmẽ Jesu omuu mijẽ aty wasu imo'e kõ. Kee e'i ijupe kõ:
– Tapejapyaka ikõ eayvu rè nẽ. 15Kee pejẽ tite ipi: “Ja'umã'ẽ nijakusuive mã'ẽ ja'u remẽ, poromoky'a Janejare'e kyty”, pejẽ tite. Aepo jaa rè kee a'e pejẽ. Ja'umã'ẽ rõwã poropy'amoky'a ipi. Janejuru pupe oike mã'ẽ noporopy'amoky'ai ipi! Ayvu ai tè janejuru rupi wyi oẽ mã'ẽ tè poropy'amoky'a ipi, e'i. 16Ajawyi kee a'e pejẽ. Pejipy'amogeta katu ikõ eayvu rè nẽ, pepota pejimotekokuwavay peiko remẽ, e'i Jesu ijupe kõ.#7.16 Kareta karamoe remẽwarà kõ pè jamã'ẽ remẽ, ãmõgwerà kõ pè vs. 16 uve. Ãmõgwerà kõ pè nuvei.
17Ãmẽ aty wasu kõ wyi Jesu oike tetã mõ wyry pè remẽ, emimo'ekwerà kõ uu ipyri oporanu ijupe:
– Oremo'e rejupa, aepo moma'e rè tè poromosã'ãga mã'ẽ rupi ere mã'ẽ rè, e'i kupa. Noroenu katui manyvo jaa põ aepo ere, e'i kupa.
18-19Ãmẽ Jesu e'i ijupe kõ:
– Haa! Napekuwa katuive mãe kõ vo jẽsi pejẽ peiko! Ajawyi oterẽ jẽ amome'utà pejẽ ky'y! Ja'umã'ẽ ja'u remẽ, janereykwerà pè oo rã'ĩ. Ajaire wasa jẽ oo. Nijanepy'amoky'ai Janejare'e kyty ipi. Nomoai janepy'a ipi, nopytai janepy'a pupe rewarà mõ, e'i Jesu.
Aepo e'i Jesu remẽ, “Nuvei ja'umã'ẽ mõ poropy'amoky'a Janejare'e kyty mã'ẽ”, jaa tè aepo e'i.
20E'i jẽ Jesu ijupe kõ:
– Jopy'a ai pupe wyi uu oẽ juru rupi mã'ẽ pè tè, “ijai mã'ẽ” eu. 21Mirà kõ ipy'a aiwerà wyi tè nivoi ekoi kupa ipi. Aje ipy'a aiwerà omoaioka kõ nivoi toiko kupa ipi. Ajawyi ojipy'amogeta ai iko kupa ipi. Ojimomy'a iko kupa ipi. Nojimoavai weevewarà pè iko kupa ipi. Imona jomoma'e rè iko kupa ipi. Mirà kõ ojuka teve iko kupa ipi. 22Ãmõ, moma'e moatya rè ywesõ oja'a iko kupa ipi. Ãmõ, poromoai iko kupa ipi. Ãmõ, poromoripe iko kupa ipi. Ãmõ, ivo e'ãa rupi kõrijõ tè ekoi kupa ipi. Ãmõ, “Ije kuwasi mijã” e'i iko kupa ipi. Ãmõ, ijayvu teitete iko kupa ipi. Ãmõ, poroerõarõ iko kupa ipi. Ãmõ, otekokuwa e'ãa rupi ekoi kupa ipi. A'e a'evo ekoi kupa ipi, ipy'a aiwerà rewarà mõ. 23Ajawyi Janejare'e “nivoi” e'i apijarà pè, ipy'a aiwerà wyi nivoi ekoi mã'ẽ pè. [Ajawyi napejipokusuive pejimiwa remẽ, penãmõi kõ ayvukwerà kõrijõ tè pejavy. Janejare'e rekoa rõwã. Ajawyi “nivoi” ne'i'ãi Janejare'e ãwĩ rapijarà pè,] e'i Jesu wemimo'ekwerà kõ pè imotekokuwa kõ.
Wãivĩ Tiru wãnà ojiporijauesaoka Jesu pè remẽwarà
(Mateusi 15.21-28)
24Ãmẽ Jesu ojisyry rã'ĩ oo Karireja yvy pe wyi, [wemimo'ekwerà kõ reve.] Tiru taa pyri'ĩje'ẽ oo. [Juteu rõwã mãe kõ a'e pewarà kõ. Ãmõ kõ tè.] Ãmẽ Jesu ovãe a'e pè remẽ, tetã mõ wyry pè oike. Nopotai jane kõ okuwa a'e pè ekoi remẽ. Ajawyi nojikuwai uu. Ajamã'ẽ a'e wãnà kõ okuwa jẽ. 25-26Ãmẽ py'awarà mõ wãivĩ mõ pè Jesu vãea ojenu. Siropenisi yvy wãnerà tè a'e wãivĩ. Juteu rõwã mã'ẽ. A'e wãivĩ memyry ojimomorijauvay ãjãgaiwerà remijarai rõmõ iko. Ajawyi oo Jesu kyty ojimoenãpa'ã ovake ojiporijauesaoka. Kee e'i Jesu pè:
– Eporijauesa rejupa! Si'ã ojimomorijauvay ãjãgai remijarai rõmõ iko! e'i. Emomoioka ãwĩ iwyi! e'i.
27Ãmẽ Jesu e'i ijupe:
– Eretãrãgwerà kõ rè ypyry ajo ike! Isaeu kõ rè ypyry ajo. A'e kõ rè ypyry rã'ĩ aja'atà. Tekoua amome'utà terekuwa. Ãwitõ janeãkarãgwerà rè ypyry jaja'a jaiko ipi. Jaapoi katu kõ ipi. Ojimi'u jẽ kupa upa remẽ, nijaekyi amãtejẽ emi'õ kõ iwyi kõ ime'ẽ janerima jawarà pè ipi. Ojimi'upa kupa paire tè katu ikurerà jame'ẽ janerima to'u ipi. Ãwĩvo ve eretãrãgwerà kõ rè ypyry aja'a aiko, e'i Jesu.
28Ãmẽ wãivĩ wenu katu Jesu ayvu manyvo jaa tè e'i remẽ. Kee e'i ãmẽ ijupe:
– Õ'õ aje ere! e'i. Neporegeta katu neiko. Ajamã'ẽ ja'yrerà oitypypyi wemi'õ kurerà yvy pè remeve eima kõ o'u ipi! Ãwĩvo ve ore. Neretãrãgwerà kõ rè neja'a remẽ, nekasi jẽ orere neja'a, e'i. Nopa'ãi nekasia, e'i Jesu pè.
29Ãmẽ Jesu e'i ijupe:
– Hoõ, e'i. Aepo ere rewarà mõ tanepiryvypy katu nejivy neo. Ãjãg ojipe'apa oo nememyry wyi age'eve! e'i wãivĩ pè.
30Oryvay wãivĩ ojivy oo wetã gyty ãmẽ. Omemyry rè omã'ẽ remẽ, aje ojipe'apa ãjãgai iwyi ky'y. Ipiryvypy katu o'au okea pupe upa ky'y.
Jesu nijapyai mã'ẽ omokatu remẽwarà
31Ajaire Jesu ojivy oo Tiru taa kyty wyi. Sitõ taa rupi okwa. Ajaire Tekapori taa atyry kõ rupi okwa teve.#7.31 Tekapori pè “taa atyry 10 rõmõ” jaa tè. Ajaate Karireja pãranã gyty oo ovãe ky'y. 32A'e pè jane kõ mõa'ãrõwã ojimoaty mijẽ esa. Ãmẽ ãmõ kõ weru nijapyai mã'ẽ mõ ipyri. Ãpekõ ãtã 'ejẽ mã'ẽ a'e. Eruarerà kõ kee e'i Jesu pè:
– Epyy imokatu! e'i Jesu pè.
33Ãmẽ Jesu nijapyai mã'ẽ werojisyry rã'ĩ jane kõ pytery pe wyi. Wapyakwapyy rã'ĩ ereko. Ajaire otomu. Wenykwerà oinõ ãpekõ rè. 34Ajaire oyvatesa omãjã oji'ãgekyi puku rõmõ. Ãmẽ wayvu rupi kee e'i:
– Epatà! e'i.
Ma'e jaa pè tè e'i. “Taneapya katu ky'y”, jaa tè aepo e'i. Ãmõ, “Tereporegeta ky'y”, jaa teve aepo e'i.
35Aepo e'i remeve ijapya katu ky'y. Ipyu katu teve ãpekõ ky'y. Oporegeta katu ãmẽ ky'y. 36Ãmẽ Jesu e'i epe a'evoa rè omã'ẽ mãe kõ pè:
– Tapemome'u e'ã imokatuawerà erokwa ajamã'ẽ nẽ! e'i epe ijupe kõ.
Ajamã'ẽ aepo e'i remẽ ywesõ omome'u me'u jẽ erokwa kupa.
– Emã'ẽ! Omokatupa si nijapyai ãpekõ ãtã maekwerà! e'i e'i kupa.
37Ajawyi pirujẽ kee e'i ojiupe kupa:
– Manyvo põ Jesu e'i katuay wete nijapyai mã'ẽ moapya katu? Ãmõ, ãpekõ ãtã 'ejẽ mã'ẽ momoregetaoka? e'i ojiupe kupa.
Currently Selected:
Maku 7: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
