San Lucas 22
22
Ka nu loni ge ka benne Israel‑ni regila lekani gasina uttikana Jesús‑ni
(Mt. 26:1-5, 14-16; Mr. 14:1-2, 10-11; Jn. 11:45-53)
1Chi tteba dabigana isia laní nu tee láni Pascua. La'ania nuha tti ro ka benne Israel‑ni yettaxtila nu abittu kua dii dia ikiniha. 2Ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni sigába regila lekani gasina uttikana Jesús‑ni, kumu de rasikinna ge ka benne.
3La'ania nna tti uta'a nu xxegwiha lhe'e lasto Judas nu tegaba láni Iscariote. Lana selana len ka benne tsi'inu (12) rudhetini Jesús‑ni. 4Nianna ugíana gwanne lenna ka nu loni ge ka bixxudiha lhe ka nu loni ge ka nu rise'ekana ruyúkana ro'o yotuha, kini gaxasina uinna ki utena Jesús‑ni lasi ná ka nuha. 5Ka nuha nna bedeakabakinna ge nu ranaha, nianna tti bisia ro'okani ugwekana Judas‑ni belhiu. 6Lana nna gwa uxielhabana dhina belhuha. Nianna udulo ttebana begila leni gasina utena Jesús‑ni lasi ná ka nuha tti anuttu benne se'e.
Jesús‑ni roe len ka benne rudhetinieha irse ge laní Pascua
(Mt. 26:17-29; Mr. 14:12-25; Jn. 13:21-30; 1 Co. 11:23-26)
7Tti chi bisia laní tti ro ka benne Israel‑ni yettaxtila nu abittu kua dii dia ikiniha, la'ania teeki ruttike ka neru re'eni to ki roke tti raka laníha. 8Nianna udhelha Jesús‑ni Pedro‑ni lhe Juan‑ni lhe, ree kana:
―Gwaltsia, gwaluni irseri'i kini gori'i nnanna bisia laní Pascua.
9Lakana nna rákane:
―¿Gá raka lelu tsiatu sentu irseha?
10Jesús‑ni nna bekabie gekani, ree:
―Ganna chi diale ga'ale ro'o yiesiha, niha eti'ale ttu nubiyú dedána denojana ttu re'e inda. Gwaltsia gwatanalha na ataliba eta'ana lhe'e yo'oha. 11Nianna gwaligasi xxana yo'oha: “Maestruha rinnaba tise, ree: ¿Gon‑na do ttu cuartu ata go irse lania ka benne rudhetinia‑ni irse ge laní Pascua?” 12Xxana yo'oha nna ule'enna le yo'o nu do berupa kuaha. Niha chi do tse ttu cuartu xeni. Lhe'e nuha gwaluin irse ki gori'i.
13Nianna diakana nna gwaxxakabakana tti tteba ra Jesús‑ni kana. Niha benkana irse ge laní Pascua.
14Tti chi bisia ura go irsekeha nna bedo Jesús‑ni lenie ka apóstol geeha ro'o mexaha. 15Nianna rabie ke:
―¡Yalhá chi re lasia go irsea len lebi'i nnanna laní Pascua‑ni, tti lani uyúa elha disa gattia! 16Kumu neti ria le, labíru goa luesi irse‑ni, axtaliba ganna chi go irsea attu libe len lebi'i ata rinnabia Tata Do Yebáha.
17Nianna tti bedaxxue ttu xiga ta'a vinu nna iki de chi begwebie ixkixaru len Tata Do Yebáha, nianna rabie:
―Gwaludaxxu nuní nna gwali'iya iyále latti latti. 18Kumu neti ria le, labíru i'iyaa vinu‑ni, axtaliba ganna chi isia sá innabia Tata Do Yebáha.
19Nianna tti bedaxxue yettaxtilaha nna iki de begwebie Tata Do Yebáha ixkixaru, nianna tti ulha'abie lhe'e benneha nna begwebie ke nna ree:
―Benne‑ni anke bela latia. De lebi'i nna rutea bela latia‑ni ki gattia odiláya le. Gwaligo benne‑ni nna aní uinle kini sadú lele neti.
20Aníha‑gaba benie len xiga ta'a vinuha. Iki de chi beko irsekeha, nianna tti bedaxxue xigaha nna ree:
―Vinu‑ni ankana reni kia. Rugwena lidhaka tisa kubi bodha'an Tata Do Yebáha. De lebi'i nna ulalia reni kia‑ni kini odiláya le. 21Ttaka nu utena neti lasi ná ka nu uttikana netiha, niiba do nuha len neti ro'o mexa‑ni. 22Gwalí galá neti benne daya yebáha, eya'abaa attiba chi ga'anna satea. Ttaka gwalíchiru le nu utena neti lasi ná ka nu uttikana netiha.
23Nianna tti udulo ka benne rudhetinieha rinnaba tisa luesike nuxake nuha ruinke uteke Jesús‑ni lasi ná ka nu uttikaneha.
Ka nu rudhetini Jesús‑ni ridaka len luesikani nuxakana aka nu ra xxeniru leni
24Ka benne rudhetini Jesús‑ni uduloke rulisa luesike ki nuxake nuha akaruke benne inná xxeniru leke tti adíke. 25Jesús‑ni nna ree ke:
―Yiesi lo yu‑ni ka nu rinnabia‑na lhe ka nu ra xxeni lekinna lhe, ka nuná rinnabiabakana ka yiesi gekani attiba rakaba lekani, nianna rákana deki ankabakana ka nu ruin tse. 26Ttaka lebi'i labí aná dika uinle. Lebi'i nu uinlale: nu inná xxeniru leniha, nuha‑la uinna deki labí ra xxeni leni; nna nu rinnabiana adí ka nuha, nna akalana attiba ttu benne rixúe rute nee len adí ka nuha. 27Nianna, ¿núkana nuha ra xxeniru lekani ganna? ¿Si nu do lo mexaha ak? ¿Nú riga'ana elho lhe'e ye'ena ro nu do lo mexaha ak? ¿Laaba ganna nu do lo mexaha, lana nuha ra xxeniru leni? Neti nna labí runia aná, sinuki dolaa len lebi'i kini rixúa rute náya len lebi'i.
28’Lebi'i nuná gwa use'ele len neti tti biyúa iyába ka elha disa chi gwatea. 29De nuha nna neti utea lo neda gele ki innabiale ttiba ben Tata kiaha len neti, 30kini anáchu aka gele gole lhe i'iyale len neti ata dhoa innabiayaha. Anágaba lebi'i kwiagabale ata innabiale kini uinle elhuxtisi ge ka benne tsi'inu (12) dhi datiake benne tee lábie Israel.
Jesús‑ni rigixxi'abie deki Simón Pedro‑ni labí dhi ro'oni deki ankabienne
(Mt. 26:31-35; Mr. 14:27-31; Jn. 13:36-38)
31Jesús benne anke Xxanari'iha rágabe Simón‑ni:
―Simón, nu xxegwiha chi unnabana len neti kini ugwelhaa na udekina ikile ttiba ttu xuxtila. 32Ttaka neti nna chi unnabaa len Tata kiaha gelu kini abittu udhanlu tsia lelu neti. Lu nna ganna chi eyekilu odaxxulu neda kiaha, la'ania nna lu nuná ebeki tsitsilu le ka betsi to gelu‑ni kini ese'e tsitsike lo neda kia.
33Simón‑ni nna rane:
―Neti gwadúbaa lenlu xa tata, meskila tsia lania lu lisiyya, lhe o meskila gattia len kwinalu lhe.
34Jesús‑ni nna bekabie geni, ree:
―Pedro, neti ria lu, nnolha, tti lanila kwesi chinkaha, lu tsunna libela chi bedhea lelu a ridí ro'olu deki ankabienlu neti.
Jesús‑ni ree gasina teeki uin ka benne rudhetinieha
35Nianna unnaba tisa Jesús‑ni ke, ree:
―Tti udhelhaa le tti abittu belhiu cheleha lhe tti abittu chele nu ixuinle tsu'ule nedaha lhe anágaba tti abittu che gwaracha geleha, la'ania, ¿si biyasa ttu bixa gele?
Lake nna bekabike, ráke:
―Labí.
36Nianna ree ke:
―Ttaka nnanna nu tee belhiu geniha nna teeki dheni belhiu geni, anágaba nna ujana nu ixuinna tsu'una neda. Nu abittu espada geni tee nna utto'ona jabana geniha kini go'ona ttu espada geni. 37Kumu neti ria le, teeki satea attiba ra lo ka yetsi ge Tata Do Yebáha ata dia ra: “Bedhakabakane ttiba rudhakakana ttu nu ruin satsa.” Kumu iyába nu ra lo ka yetsi ge Tata Do Yebáha deki satea tee kiba aka nuha.
38Lake nna ráke:
―Tata, ne chupa ka espada se'e nii.
Lee nna bekabie, ree ke:
―Chinka, ttanába.
Jesús‑ni rilhapie tisa len Tata Do Yebáha iki i'iya ata daa ka ya olivuha
(Mt. 26:36-46; Mr. 14:32-42)
39Nianna beria tteba Jesús‑ni lhe'e yo'oha nna diabie iki i'iya ata daa ka ya olivuha, benbe attiba chi labinie runie. Ka benne rudhetinieha nna danalhagabake bie. 40Tti bisinke iki i'iyaha, nianna ree ke:
―Gwalinnaba len Tata Do Yebáha kini abittu dhi yie nu xxegwiha le nna eyadi gaale.
41Lee nna biru'une ata se'ekeha, biru'unabe ttiba ata radhá ttu íyya tti rigu'unari'i na. Nianna tti bedú xibie unnebie len Tata Do Yebáha, ree:
42―Tata to, ganna kwinalu edá lelu, bodiláttu neti lo elha disa uyúa‑ni. Ttaka labí nu innía aka; nu inná kwinabalu aka.
43Nuha‑ba ree nna tti uka xxe ttu anjeli ge Tata Do Yebáha bisie kini udú tsitsie bie. 44Tti lo ruyú xxatta Jesús‑ni elha disaha, adikala itú lebie rilhapie tisa len Tata Do Yebáha. Indedha geeha nna tsuin tsuinba riginnina lo yu ttiba risuni reni.
45Tti uluxanie unne lenie Tata Do Yebáha, nianna bedú liibie nna besine ata se'e ka benne tsunna rudhetinieha, gwaxxake ka benneha te'adhike de du si'i leke. 46Nianna ree ke:
―¿Beaka te'adhile? Gwalchadha nna gwalinnaba len Tata Do Yebáha kini abittu dhi yie nu xxegwiha le nna eyadi gaale.
Bedaxxukana Jesús‑ni kini uttikane
(Mt. 26:47-56; Mr. 14:43-50; Jn. 18:2-11)
47Sa dula Jesús‑ni rinnebie, ttiru chi bisin ixe ka benne ata dueha. Nu tee láni Judas, delába nu selagabana ka benne tsi'inu (12) rudhetinieha, lana daneruna lo ka benneha. Nianna ubigana gwattona xxaga Jesús‑ni. 48Jesús‑ni nna rabie na:
―Judas, neti benne daya yebáha, ¿si de utolu xxagaa‑ni nna utelu neti lasi ná ka nu uttikana neti?
49Tti chi bilani ka benne se'eke len Jesús‑ni nu raka la'ania, nianna ráke bie:
―Tata, ¿si gutíatu len ka espada‑ni?
50Nianna ttu ka benneha benie gwe nubiyú riben lo sina ge bixxudi xeniha, uchúe naga ben geni. 51Ttaka Jesús‑ni nna rabie:
―Chinka, ttanába.
Nianna tti utane naga nubiyúha nna beyonie nagani. 52Nianna rabie ka nu daa udaxxukaneha, delába ka nu loni ge ka bixxudiha lhe ka nu rise'e gweyú ro'o yotuha lhe anágaba ka nu anka benneola ge ka nu Israel‑ni lhe, rabie kana:
―¿Beaka ttiba ttu nu daa gwedaxxu ubana dale gwedaxxu neti, denle espada lhe yaga lhe? 53Ki ttu ttu sába udúa len lebi'i ro'o yotuha, nna abí chiga bedaxxule neti. Ttaka nnanna anka ura gele, kumu nnanna anka chulha rinnabia nu xxegwiha.
Pedro‑ni labí uxí ro'oni deki ankabienna Jesús‑ni
(Mt. 26:57-58, 69-75; Mr. 14:53-54, 66-72; Jn. 18:12-18, 25-27)
54Nianna tti bedaxxukana Jesús‑ni nna dechekane lisi bixxudi xeniha. Pedro‑ni nna idittuliba danalhana. 55Nianna tti bekuakana gi lali'a ge yo'oha nna use'ekana abi'iba kwe'e nuha. Niha‑gaba beteche Pedro‑ni lagwi gekani. 56Ttu nuila riben sina niha, tti bilenna Pedro‑ni dona kwe'e giha, nianna begía tsittabana loni nna rana:
―Nubiyú re nii, len Jesús‑nigaba reki nuní.
57Ttaka Pedro‑ni nna labí uxí ro'oni, rálana:
―Labí ankabiati nuná xa nuila.
58Ttu sattiruba chi bedete nna lengwa chi bedeláni attuna, nianna redenána:
―Lu lhe, ki luesi ka nunágabalu.
Ttaka Pedro‑ni nna rana:
―Laa luesi ka nunága neti.
59Ttiba ttu ura chi bedete, lengwa chi redená attuna:
―Neti rakati nu re nii len nunágaba reki nuní, kumu nu Galileagaba nuní.
60Ttaka Pedro‑ni rana:
―Labí yua bí ge nuná rinnelu.
A riluxala rinnenaha, ttiru chi uresi chinkaha. 61Nianna tti bodeki lo Jesús benne anke Xxanari'iha belannie lo Pedro‑ni. Lana nna gwadú tteba leni tti ree: “Nnolha attila lani kwesi chinkaha, lu tsunna libela chi bedhea lelu abí ridí ro'olu deki ankabienlu neti.” 62Nianna beria tteba Pedro‑ni ro'o yo'oha nna uresibana ttibaxkaba leni de releninna.
Jesús‑ni ruxisikana gebie
(Mt. 26:67-68; Mr. 14:65)
63Ka nubiyú se'ekana ruyúkana Jesús‑ni nna ruxisikana gebie lhe rudhenkane lhe. 64Ruttokana lobie nna tti rinnaba tisakane, rákane:
―Unne ya'achu, ¿nú nuná bedhenna lolu?
65Bikala nuha rákane rulisa xxattakane.
Jesús‑ni biso due arlo ka uxtisi ge ka nu Israel‑ni
(Mt. 26:59-66; Mr. 14:55-64; Jn. 18:19-24)
66Tti ugwani dilaha nna bitupa ka benneola ge ka nu Israel‑ni lhe ka nu loni ge ka bixxudiha lhe ka nu rule'ekinna ka benne nu ra lo bia bennabi bodha'an Moisés‑ni lhe, ka nuha uchekane ata ritupakana ruinkana elhuxtisiha. Nianna tti unnaba tisakane, rákane:
67―Utixxi'en ri'itu, ¿si lu ankalu Cristu benne chi ga'anani Tata Do Yebáha idhelhe?
Labie nna bekabie gekani, ree:
―Ganna innía: “Ila”, la'ania nna laa gweyyaga lele kia 68lhe anágaba ganna neti innaba tisaa le ttu bixa, la'ania nna abígaba ekabile kia. 69Ttaka debá nnanna neti benne daya yebáha, esinaa dhoa daka ná ben ge Tata Do Yebaa benne ra xxeni leeha.
70Nianna iyábakana unnaba tisakane, rákana:
―Ganna aníha nna, ¿si lu nuná ankalu Xi'in Tata Do Yebáha?
Jesús‑ni nna bekabie gekani, ree:
―Lebi'iba chi ra deki nuná ankaa xa.
71Nianna rákana:
―Nnanna labíru riyasinri'i kixxi'akinna ri'i nuxa ankana. Ki kwinabari'i chi biyieninri'i nu rana.
Currently Selected:
San Lucas 22: zae
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
