Matta 22
22
Balndol juulɗe koobgal
(Luka 14.15-24)
1Yeesu ɓesdi valndango ɓe balndol feere, o vi'i :
2— *Laamu Allah nanndii e goɗɗo laamiiɗo ciryiiɗo nyaamdu gam koobgal ɓiyum gorko. 3O lili maccuɓe ma'ako noddoya ma'atinaaɓe juulɗe koobgal, ammaa ɓe calii wargo. 4Ndeen o ɓesdi lilgo woɓɓe maccuɓe ma'ako, o vi'i ɓe : Mbi'ee ma'atinaaɓe : « Nyaamdu vo'inaama faa vooɗi, mi hirsii ga'i e biggi payɗi, koo ɗume fuu siryaama. Ngaree mana. » 5Ammaa ma'atinaaɓe ɓeen njaɓaay yahago, koo moye natti gonngal yeeso muuɗum : woɓɓe njahi gese mu''en, woɓɓe njahi luumaaku mu''en. 6Horiiɓe boo nanngi maccuɓe ɓeen, piyi ɓe, mbari ɓe. 7Laamiiɗo oon huunƴi, o lili soojeeji ma'ako mbaroyi warooɓe ko'e ɓeen, ɓe nguli si'ire maɓɓe. 8Ndeen o vi'i maccuɓe ma'ako : « Nyaamdu koobgal siryaama, ammaa ma'atinanooɓe ɓeen keƴaay wargo. 9Gam ma'ajum, njahee dow ɗate mawɗe noddon koo moye mo ngiiɗon, wara nyaama nyaamdu koobgal nduun. » 10Maccuɓe ɓeen njahi dow ɗate, noddoyi yimɓe ɗuuɗɓe, halluɓe e moƴƴuɓe fuu, faa wuro ma'ako heevi yimɓe tep. 11Nde laamiiɗo oon natti gam yi'a ma'atinaaɓe, o yi'i gorko go'o mo sinngitanaaki koobgal. 12O vi'i mo : « Higoo, noye ɗum waɗi nattoyɗaa ɗo'o, a sinngitanaaki koobgal ? » Ammaa oon majji ka toontotoo mo. 13Sey laamiiɗo oon vi'i maccuɓe muuɗum : « Kaɓɓee mo juuɗe e kosɗe, peron mo yaasi nder niɓre, to ɗum voyata, e ɗum nyerƴindira nyiiƴe. »
14Yeesu tokki vi'igo :
— Noddaaɓe e ɗuuɗi, ammaa suɓaaɓe no seɗɗa.
Biyaago ceede janngal
(Markus 12.13-17 ; Luka 20.20-26)
15*Fariisa'en njahi ndarvi no nanngirta Yeesu nder bolle muuɗum. 16Ɓe lili woɓɓe almaajiri'en maɓɓe e woɓɓe yimɓe *Hiruudus. Lilaaɓe ɓeen mbi'i Yeesu :
— Moodibbo, emin anndi a goongaajo, eɗa ekkitinira ko Allah vi'i e goonga, a hulataa koo moye, a ɓurdindirtaa yimɓe. 17Too, e giiɗe maaɗa : koo e haani min mbiyoo *Kaysar#22.17 Kaysar ɗum innde laamu Rooma. ceede janngal, na ɗum haanaa ?
18Ammaa Yeesu annditii nyumooji maɓɓe kalluɗi. Sey o vi'i ɓe :
— Onon munaafuki'en ! Ko jeyi ndaaroton godaago yam ? 19Kollee yam ceede ɗe ɗum biyortoo janngal.
Ɓe ngaddani mo ceedel ajurfaari go'otel.
20Yeesu ƴami ɓe vi'i :
— Footo moye e innde moye woni ɗo'o ?
21Ɓe toontii mo, ɓe mbi'i :
— Ɗum Kaysar.
O vi'i ɓe :
— To noon, kokkee Kaysar ko woni ɗum Kaysar, kokkon Allah boo ko woni ɗum Allah.
22Nde ɓe nani toontol ngool, ɗum haaynake ɓe. Sey ɓe ndilli ɓe ɗali mo.
Ƴamol dow ummitaaki maayɓe
(Markus 12.18-27 ; Luka 20.27-40)
23Nder nyalaande ndeen, sey woɓɓe *Saduuki'en ngari to Yeesu. Kamɓe eɓe mbi'a maayɓe ummitataako. 24Ɓe ƴami Yeesu, ɓe mbi'i :
— Moodibbo, *Muusa vi'i : To gorko hoovake maayii rimaay, sey minyiiko koo mawniiko wa'ata debbo ma'ako, gam o rimana maayɗo oon ɓiɓɓe. 25Too, nder amin e woodi worɓe njoveeɗiɗo rimdaaɓe. Arano oon hoovake, faa maayi rimaay. Minyiiko wa'ati debbo ma'ako, 26kanko boo, o maayi o rimaay. Tataɓo maa waɗi noon, faa ɗum yahari e njoveeɗiɗaɓo. 27Ɓaawo maɓɓe, debbo oon maayi. 28Too, nyannde ummitineeki maayɓe, nder worɓe njoveeɗiɗo ɓeen, koree moye debbo oon laatotoo ? Gam ɓe fuu ɓe koovakeno mo.
29Yeesu toontii ɓe vi'i :
— On mboofi, gam on pahamaay ko *Deftere Seniinde vi'i, kadi boo on anndaa baawɗe ma'ako. 30Gam to maayɓe ummitake, worɓe koovataako, rewɓe boo koovataake, ammaa ɓe laatoto kama malaa'ika'en Allah wonɓe toon dow asama. 31On meeɗaay janngugo ko Allah vi'i dow ummitineeki maayɓe naa ? O vi'i : 32« Miin woni Allah mo *Ibraahim, Allah mo Iciyaaku, Allah mo *Yaakuubu. »#22.32 Burtaaki 3.6 Allah o Allah foofooɓe, naa o Allah maayɓe.
33Ekkitinol ma'ako ngool haaynii yimɓe yewaniiɓe mo fuu.
Dooka ɓurka manngu
(Markus 12.28-31 ; Luka 10.25-28)
34Nde *Fariisa'en nani Yeesu hannyirii *Saduuki'en bolle, sey ɓe kawriti. 35Go'oto maɓɓe *moodibbo Tawreeta ƴami Yeesu, gam o nanngira mo haala, o vi'i :
36— Moodibbo, kaye dooka ɓuri mawnugo nder *Tawreeta ?
37Yeesu toontii mo vi'i :
— « Yiɗ Allah Jawmiraawo maaɗa e ɓernde maaɗa fuu, e yonki maaɗa fuu, e hakkiilo maaɗa fuu. »#22.37 Tokkitaaki Tawreeta 6.5 38Kanka woni dooka arana, ɓurka manngu nder Tawreeta. 39Raa ɗiɗaɓa potka e arana : « Yiɗ ko'odiɗɗaawo maaɗa noon no ngiɗruɗaa hoore maaɗa. »#22.39 Lewinkoo'en 19.18 40Tawreeta Muusa e defte annabo'en fuu e ɗoon ndarii dow ɗi'i dookaaji ɗiɗi.
Ƴamol dow Almasiifu
(Markus 12.35-37 ; Luka 20.41-44)
41Nde *Fariisa'en kawriti ɗoon, Yeesu ƴami ɓe vi'i :
42— Ɗume nyumoton dow *Almasiifu ? O ɓii moye ?
Ɓe toontii mo, ɓe mbi'i :
— O ɓii-Dawda.
43O vi'i ɓe :
— To noon, noye ɗum waɗi *Dawda noddiri mo Jawmiraawo nde o volviri e baawɗe *Ruhu Allah, o vi'i :
44Jawmiraawo vi'i Jawmiraawo am :
Jooɗa e junngo am nyaamo,
faa mi waɗa wanywanyɓe maaɗa laatoo jaaɓruɗum kosɗe maaɗa.#22.44 Jabuura 110.1
45To Dawda noddirii mo « Jawmiraawo », ndeen noye o laatorii ɓiyiiko ?
46Ɓe fuu ɓe mbaawaay toontaago mo koo voliinde wo'ore. Gada nyannde ndeen, koo moye fuu huli ƴamgo mo ƴamol feere.
Currently Selected:
Matta 22: fuq
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
