Matta 21

Yeesu nattii Urusaliima

(Markus 11.1-11 ; Luka 19.28-40 ; Yahayya 12.12-19)

1Nde Yeesu e almaajiri'en muuɗum ɓadii *Urusaliima, ɓe njottii ci'el Baytifaaji takkol *vaamnde Jaytunje. O lili almaajiri'en ma'ako ɗiɗo, 2o vi'i ɓe :

— Njahee nattee ci'el gonngel yeeso mooɗon. Ɗoon to nattuɗon, on tawey njaakiwa e mola muuɗum e kaɓɓii. Kaɓɓitoyee ɗi ngaddanee yam. 3To goɗɗo volvanii on, mbi'ee mo : « Moodibbo yiɗi ɗi. » Jaawɗum o wooraney on ɗi.

4Ɗum laatake noon gam ɗum hebbina ko annabiijo vi'inoo, nde o vi'i :

5« Mbi'ee yimɓe *Siyoona :

Raa laamiiɗo mooɗon ɗoon wara to mooɗon,

o leestinɗo hoore ma'ako,

emo waɗɗii njaakiwa,

e mola muuɗum. »#21.5 Jakariya 9.9

6Sey almaajiri'en ɗiɗo ɓeen njahi mbaɗi ko Yeesu vi'i ɓe. 7Ɓe ngaddi njaakiwa ngaan e mola muuɗum, ɓe caɓɓani mo kolte maɓɓe, o waɗɗii. 8Yimɓe ɗuuɗɓe mbe''itani mo kolte mu''en dow laawol, woɓɓe boo itti haakooji leɗɗe, mbe'iti ɗe dow laawol gam taɓɓaago mo. 9Yimɓe aardiiɓe Yeesu e tokkuɓe ɓaawo ma'ako ƴefti gimol mbi'i :

— Maaltoore laatanoo Ɓii-Dawda ! Barkaa laatanoo gareyɗo nder innde Jawmiraawo !#21.9 Jabuura 118.25-26 Maaltoore laatanoo Allah Mo Dow !

10Nde Yeesu natti si'ire Urusaliima, hakkiilo yimɓe fuu ummi, ɓe ƴamƴamtiri :

— O'o gorko o moye ?

11Woɓɓe toontii mbi'i :

— Ɗum annabi Yeesu iɓɗo Najaratu nder lesdi *Gaaliili.

Yeesu tuufii waɗooɓe luumaaku nder Wuro Seniingo

(Markus 11.15-19 ; Luka 19.45-48 ; Yahayya 2.13-22)

12Yeesu natti *Wuro Allah Seniingo, o tuufi soorrooɓe e soodooɓe wonɓe nder ma'ago fuu, o talli teeburji cannjotooɓe ceede e jooɗorɗe soorrooɓe pooli. 13O vi'i ɓe :

— Allah vi'ii nder *Deftere muuɗum : « Wuro am no noddirte wuro do'aare. »#21.13 Ecaaya 56.7 Ammaa onon, on ngartirii ngo « suuɗorde wuyɓe ! »#21.13 Yeremiya 7.11

14Sey vumɓe e voosɓe ngari to ma'ako nder *Wuro Seniingo, o yamɗitini ɓe. 15Ammaa nde *mawɓe aardiiɓe diina e *moodiɓɓe Tawreeta ngi'i kuuɗe kaayniiɗe ɗe o waɗata, e nde ɓe nani ɓikkon e ngulla nder Wuro Seniingo e mbi'a :

— Yettoore laatanoo ɓii-Dawda !

Ɓe kuunƴi, 16ɓe mbi'i Yeesu :

— Koo a nana ko ɓikkon ko'on mbi'ata ?

Sey Yeesu vi'i ɓe :

— Ee, mi nanii. Onon on meeɗaay janngugo ko vinndaa nder Deftere, vi'igo :

« Aan siryii ɓikkon pamaron e musinoohon maalta innde maaɗa. »#21.16 Jabuura 8.2

17Sey o ɗali ɓe, o vurtii si'ire, o dilliri Baytaaniya, o waaloyi toon.

Yeesu la'anii ƴibbi

(Markus 11.12-14,20-24)

18Nde veeti, Yeesu e warta nder si'ire, sey kooƴe nanngi mo. 19O holliri goɗki ƴibbi faro laawol o yaali ki, ammaa o tawi ki walaa ɓikkon, sey haakooji tan. Ndeen o vi'i ki :

— Ta'a ɓesdu rimgo ɓikkon faa abadaa !

Ɗoon e ɗoon ki yo'ori. 20Nde almaajiri'en ma'ako ngi'i ɗum, ɓe kaayɗini, ɓe ƴami mo, ɓe mbi'i :

— Noye ɗum waɗi ki'i ƴibbi yo'oriri nihi jaawɗum ?

21Yeesu toontii ɓe vi'i :

— Emi vi'a on goonga : to on ngoodi goonɗinki, on mbaɗaay cekkaa, on mbaɗey ko ɓuri ko mbaɗanmi ki'i ƴibbi. On mbaawey vi'igo faa e nde'e vaamnde : « Ɗoofa ɗo'o, yoola nder maayo », ɗum waɗa. 22Kul on ngoodi goonɗinki, koo ɗume ko toriiɗon Allah on keɓey ɗum.

Toye baawɗe Yeesu ivoyi ?

(Markus 11.27-33 ; Luka 20.1-8)

23Yeesu natti *Wuro Allah Seniingo, o fuɗɗi wa'ajingo, sey *mawɓe aardiiɓe diina e arɗuɓe Yahuudu'en ɓaditii mo, ƴami mo mbi'i :

— E ɗeye baawɗe kuurataa ɗe'e kuuɗe ? Moye hokku maa baawɗe ɗeen ?

24Yeesu toontii ɓe vi'i :

— Miin boo e woodi fii go'otum ko ƴameymi on. To on toontake yam, miin boo mi yeccoto on e ɗeye baawɗe kuureymi kuuɗe ɗeen. 25Moye liloyi *Yahayya baɗoowo *baptisma, Allah na yimɓe ?

Ɓe mbaɗi caawara hakkunde maɓɓe, ɓe mbi'i :

— To en mbi'ii : « Allah lili mo », ndeen o vi'ey en : « Gam ɗume on ngoonɗinaay mo ? ». 26Ammaa to en mbi'ii : « Yimɓe lili mo », ndeen en kuley ko jama'aare waɗanta en, gam koo moye goonɗinii Yahayya o annabiijo.

27Ɓe toontii Yeesu, ɓe mbi'i :

— Min anndaa.

Ndeen Yeesu vi'i ɓe :

— Miin boo mi yeccataako on e ɗeye baawɗe kuureymi kuuɗe ɗeen.

Balndol ɓiɓɓe ɗiɗo

28Yeesu ɓesdi vi'igo :

— Ɗume nyumɗon dow ngo'ol balndol : Goɗɗo gorko e woodi ɓiɓɓe worɓe ɗiɗo. O yahi to arano, o vi'i mo : « Ɓinngel am, yah ngesaa *innabooje kuwoyaa hannde. » 29Ɓiɗɗo oon toontii vi'i : « Mi yahataa. » Ammaa ɓaawo ɗoon, o nyumti o yahii ngesaa. 30Baaba yahi to ɗiɗaɓo, vi'i mo ka vi'inoo arano. Oon toontii mo, vi'i : « Too Baaba, mi yahey, » ammaa o yahaay. 31Nder ɓiɓɓe ɓeen ɗiɗo, moye waɗi ko baaba muuɗum yiɗi ?

Ɓe toontii mo, ɓe mbi'i :

— Arano.

Ndeen Yeesu vi'i ɓe :

— Emi vi'a on goonga : *jaɓooɓe ceede janngal e rewɓe yeenooɓe no aartey on nattugo *laamu Allah. 32Gam *Yahayya warii to mooɗon, hollii on laawol goonga, on ngoonɗinaay mo. Ammaa jaɓooɓe ceede janngal e rewɓe yeenooɓe ngoonɗinii mo. E noon fuu, koo nde ngiiɗon ɗum, on tuubaay ngoonɗinɗon mo.

Balndol remooɓe halluɓe

(Markus 12.1-12 ; Luka 20.9-19)

33— Too, raa goɗngol balndol feere : goɗɗo neɗɗo aawi ngesaa *innabooje, o howani ka, o wasi ngaska to ɗum ɓiɗata ɓikkon innabooje, o nyiɓi suudu towndu gam reenooɓe. Ɓaawo ma'ajum, o reenni ka woɓɓe remooɓe, o dilli jahaangal. 34Nde wakkaci teɓol ɓikkon innabooje wari, o liloyi maccuɓe ma'ako to remooɓe ɓeen, ɓe njaɓana mo geɗal ma'ako nder ɓikkon innabooje. 35Ammaa remooɓe ɓeen nanngi maccuɓe ma'ako, ɓe piyi go'oto, ɓe mbari go'oto, ɓe perdi tataɓo boo kaaƴe. 36Jawmu ngesaa oon liloyi woɓɓe maccuɓe ɓurɓe aramɓe ɗuuɗgo. Remooɓe ɓeen mbaɗani ɓe kama no ɓe mbaɗannoo aramɓe. 37Ɓaawo ma'ajum, o lili ɓiyiiko to maɓɓe, o nyumi : « Daahir ɓe teddiney ɓiyam. » 38Ammaa nde remooɓe ngi'i ɓiyiiko oon, ɓe mbolvi hakkunde maɓɓe, ɓe mbi'i : « O'o woni donoowo ngesaa. Ngaree mbaren mo, ndonen ngesaa kaan ! » 39Sey ɓe nanngi mo, ɓe mburtini mo yaasi ngesaa, ɓe mbari mo.

40Yeesu ƴami ɓe vi'i :

— Too, to jawmu ngesaa oon warii, noye o waɗanta remooɓe ɓeen ?

41Ɓe toontii mo, ɓe mbi'i :

— O warey halluɓe ɓeen barki kalluki, o reenna ngesaa kaan e juuɗe woɓɓe remooɓe hokkeyɓe mo geɗal ngesaa ma'ako wakkaci teɓol innabooje.

42Ndeen Yeesu vi'i ɓe :

— Asee, on meeɗaay janngugo ko vinndaa nder *Deftere naa ?

« Haayre nde mahooɓe kibini,

kayre laatii ɓurnde jogaago mahadi.

Kanjum ɗum kuugal Jawmiraawo,

e giiɗe meeɗen ɗum kaayniiɗum ! »#21.42 Jabuura 118.22-23

43Gam ma'ajum, emi vi'a on : on te'etete *laamu Allah, ngu hokkee yimɓe huutinirooɓe ngu no Allah yiɗiri. [44#21.44 Goɗɗi ɗereeji ɓesdii aayaare arba'iin e nayi (44) vi'inde : Do''iiɗo dow haayre ndeen, no yevey. Mo nde yooftii dow muuɗum boo, nde ɗigginey ɗum kama conndi.]

45Nde *mawɓe aardiiɓe diina e *Fariisa'en nani balndi ma'ako ɗiin, sey ɓe pahami dow maɓɓe o volvi. 46Eɓe ngiɗi nanngugo mo, ammaa ɓe kulii jama'aare, gam yimɓe fuu njaɓii Yeesu o annabiijo.

Currently Selected:

Matta 21: fuq

Highlight

Copy