Exodus 1

Israel-aam Yuin Nangcimallrat Egypt-aami

1Jacob-aam qetunrai maligutellriit Egypt-aamun allakarmeng yuungnaqelriarurrluteng ukuugut: 2Reuben, Simeon, Levi, Judah, 3Issachar, Zebulun, Benjamin, 4Dan, Naphtali, Gad, Asher-aaq-llu. 5Ukut waten yuut amllertalriit tungaunateng kinguvartut Jacob-aamek, amllertaluteng yuinaat pingayun qulmek cipluku (70). Qetunraa Joseph-aaq ak'a Egypt-aametaurallruluni. 6Piinanermeggni Joseph-aaq anelgutni-llu tamarmeng-llu taukut kinguveqellriit tuqullruut. 7Tau͡gaam kinguvri Israel-aam irnialingut amlleriluteng patagmek. Amlleriameng piniriut cekavtengluteng-llu Egypt-aamun tamalkuan.

8Tua-llu nutaram angayuqam, Joseph-aam nallustiin, ataniungartaa Egypt-aaq. 9Yum'inun tauna qanertuq, “Makut Israel-aat amllerissiyaagtut piniriluteng-llu, wangkutnun aarnariluteng. 10Pitsaqevkenani anguyak pikan inglumten̄un ilaulluteng callungnayukluta, ayagnayukluki-llu maaken nunamek. Qaillukuarnarqukut amllerivsiallerkaat-llu cukaiqaningnaqluku.” 11Taumek Egypt-aarmiut ataniurten̄ek kellutescirait nangtestekaitnek calirpagtelluki. Israel-aat-llu nunarpaliut Pithon-aamek Rameses-aamek-llu, Pharaoh-m aklivigkagkenek. 12Tau͡gaam nangcimallerteng maliggluku amlleriinartut, cekavvngiinarluteng nunami. Taumek Egypt-aarmiut alikengait Israel-aat. 13-14Yuugurallrat-llu pinerrlugcet'ngaat calivkarluki teguani arcaqanrurrluki, calivkarluki ellaita caliarkameggni naucetaavimeggni-llu takumcukevkenaki.

15Tua-llu Egypt-aam angayuqran qanrutak Hebrews-aat arnaitnek irnivkaristek Shiphrah-nkuk Puah-llu, 16“Ikayuagaqavteki Hebrews-aat arnat irniaqata, tuqutaqluki tan'gaurluugaqata, nasaurluugaqata unguvavkaraqluki.” 17Tau͡gaam taukuk arnak Agayutmek qigcigyulriaruamek Egypt-aam angayuqra maligtaqunritaak, tan'gaurluut unguvavkaraqluki. 18Taumek taisqak irnivkaristek arnak aplukek-llu, “Ciin waten picetek, tan'gaurluut unguvavkaraqluki?”

19Tua-llu kiugaak, “Hebrews-aat arnait Egypt-aarmiut arnaicetun ayuqenritut, ayaniameng qaciggluteng irnilartut tekipailemegneki.” 20-21Irnivkaristek Agayutem ellminek qigcigyulriaruagnek assikak nakmiin-llu ilakakegnek cikirlukek. Israel-aat-llu amlleriinartut piniriinarluteng-llu. 22Tua-llu Pharaoh-m alerqurai tamalkuita yun'i, “Hebrew-t arnait tan'gaurlurmek irniaqata Kuigmun Nile-amun egtelaqiciki, nasaurluut tau͡gaam unguvavkarluki.”

Currently Selected:

Exodus 1: YPK

Highlight

Copy