Exodus 5

Aaron-aankuk Moses-aaq-llu Ciuqerrani Eqypt-aam Angayuqran

1Tua-llu Moses-aankuk Aaron-aaq-llu ullagaak Pharaoh qanerlutek-llu, “Ataneq Agayutiit Israel-aat qanertuq, ‘Yuunka ayagceski nerevkarin aturniaraat yuilqumi wii piteklua.’”

2Tau͡gaam Pharaoh-m piak, “Kituuga Ataneq? Ciin wiinga niilluku ayagcecarcia Israel-aat? Wiinga nalluaqa Ataneq, Israel-aat-llu ayagcessngaitanka.”

3Moses-aankuk-llu kiuguk, “Agayutiit Hebrews-aat alaillruuq wangkugnun. Ayagceskut ernerni pingayuni yuilqumun ekuagiluta piicallerkamten̄un Atanermun Agayutemten̄un, pinrilkumta tuqucuaraakut cangerlagkun wall'u anguyagkun.”

4Pharaoh qanertuq Moses-aankugnun, “Ciin yuut ukut taqevkarcetki! Caliaritnun utercetki! Ataam caliyarturcetki! 5Elpeci amllenrurtuci Egypt-aarmiuni. Wani-wa tau͡gken elpetek calinermek taqevkarluki.”

6Taumi ernermi, Pharaoh-m Egypt-aarmiut, teguat qaunqestait, Israel-aat-llu atanerruarit, picirkirai: 7“Canegnek cikinqigcaqunaciki teggalquliarita avukaitnek. Ellaitnek wak'nirnek canegtelangevkaqiciki. 8Tau͡gaam piliaqelallrita amllertaciit cakanircetevkenaki, ikeglicaryaqunaciki. Qacigcameng qalartut, ‘Ayagceskut ekuaginiartukut Agayutemten̄un.’ 9Cakviuqanircelluki calivkarciki calinaurtut niicugnivkenateng qannguanek piciunrilngurnek.”

10Tua-i teguat murilkestaita Israel-aat-llu atanerruarita anluteng qanrutait Israel-aat, “Pharaoh waten qanertuq, ‘Canegnek cikirngairutamceci teggalqulissuutekarpecen̄ek. 11Elpecen̄ek ayagluci aqvataqluci pisqelluci, tau͡gaam piliaqelallerpeci amllertataitnek cali pililarciquci.’” 12Tua-llu yuut ayagaut tamiinun Egypt-aamun yuarluteng canegnek. 13Teguat-llu murilkestaita cingait, teggalqulivkarluki ciungani piliaqelallrita amllertataitnek canegnek pikangqelallracetun. 14Murilkestaita-llu Egypt-aarmiut kaugtualarait Israel-aat calilriit atanerruarit ellaita taqelteng aptaqluki, “Ciin teggalqulinriceci ciungani pilallerpeci amllertataitnek?”

15Tua-llu atanerruarit Israel-aam yuin, Egypt-aam angayuqra ullagluku qanemyuugartut, “Ciin waten pisikut, wangkuta elpet pistevni? 16Canegnek cikiumaksaitukut, tau͡gken cali teggalqulisqumaluta kaugtuarumaluta tuaten. Elpet tau͡gaam yut'en pinarqelriaruut.”

17Pharaoh kiuguq, “Elpeci qessanqerruuci caliyuumiinaci-llu, taumek kaigauci wangnun ayagcecesqelluci, ekuagiluci Atanermun piicagyugluci. 18Watua caliyarturci, canegnek cikiumangaituci, tau͡gaam teggalqulilarciquci amllertataitnek pilallerpecetun ciungani.” 19Atanerruat tua-i elpekaat arenqiallugucirteng qanrucateng ciunganitun ernerpak taqlermeng amllertataitnek teggalqulilarciqniluki.

20Anngameng Pharaoh-mek tekitagket Moses-aankuk Aaron-aaq-llu, utaqalriik. 21Qanrullukek-llu, “Atanrem tangerrluku caliartek anucimirqecetaaqilitek, eq'uyagucecavtekut Pharaoh-mun atanerruarinun-llu, tuquciluugutkangevkarluki wangkutnek.”

Moses-aaq Qanemyuugartuq Atanermun

22Moses-aam-llu Ataneq ataam tuiggvikluku qanertuq, “Ciin assiitellriamek mat'umek yugpenun pisit? Ciin-llu wiinga maavet ayagcecia? 23Wani-wa-llu ullaggaanemnek Pharaoh qalarulluku-llu pisqucirpetun, yut'en assiinaki pinga'artai, elpet tau͡gken camek ikayuutekaatnek piksaunaki.”

Currently Selected:

Exodus 5: YPK

Highlight

Copy