Genesis 16

Hagar-ankuk Ishmael-aaq-llu

1Abram-aaq Sarai-akun cali irniangeksaituq. Tau͡gaam Sarai-a Egypt-aarmiumek kevgangqellruuq nasaurlurmek aterluni Hagar-amek. 2Sarai-a qanertuq Abram-aamun, “Atanrem irniangevkaqsaitaanga, inartellguteksuavgu-llu kevgaqa nasaurluq, irniniartuq pikamnek.” Abram-aaq-llu Sarai-am qanellratun piuq. 3Abram-aam allrakuni qulni Canaan-aami uitallran kinguani, Sarai-am Hagar-aq Egypt-aarmiu nuliqsagucetaa Abram-aamun. 4Abram-aam-llu qingiraa Hagar-aq. Qingaucini-llu elpekngamiu ellminek pingakuq, qumlik'ngarrluku-llu Sarai-a.

5Tua-llu Sarai-am Abram-aaq qanrutaa, “Elpenun atauq Hagar-am qumlikillra wangnek. Wiinga elpenun tunellruaqa, qingaucini-llu elpekraanerminek qumlikaanga. Atanrem cuqeskiliu nalirpuk alarucia, elpet wall'u wiinga!”

6Abram-aaq kiuguq, “Elpet kevgan ataniumaan, umyuan aturluku piyullerpegun pikiu.” Tua-i Sarai-am mulngakenriqercani Hagar-aq ayakartuq.

7 Atanrem-llu an'gilaan pairtaa Hagar-aq nunami kinertellriami mer'em ulvelriim nuniini, tumyarami ayalriami tungiinun Shur-am, 8qanerluni-llu, “Hagar-aaq, pistiini Sarai-am, naken taisit? Natmun-llu ayagcit?” Kiuguq, “Qimagtua kevgiuqengamnek.”

9An'gilaan Atanrem qanrutaa, “Uterten ataam, maligtaquurautniartuten elliinun.” 10Tua-llu cali qanertuq, “Kinguvengevkarciqamken amllerem ugaani naaqumasciigalngurnek. 11Qetunrangciquten, acirciqan-llu Ishmael-aamek,#16.11: Ishmael: Una ateq Hebrew-tun waten ayuquq “Agayun niitelartuq.” tua-i-wa Atanrem niitellruaten nanikualuten kaigallerpeni. 12Tau͡gaam qetunraan unguvallermini yuungnaqciquq ciulvagtun yuilqurmiutartun; inglukciqai yuut tamalkuita, tamarmeng-llu yuut ellii inglukarkauluku. Tungayaminek ellminek allakarluni yuuciquq.”

13Hagar-aq-llu ellminek aptuq, “Ilumun-qaa wiinga Agayun tangrraarluku unguvalua qanengssaksugngaqata'rqa?” Tua-i Ataneq qalarutestellni aterpagtaa, “Agayun Tangtulria.” 14Tauna pitekluku yuut tamana elakaq aterpagtelaraat, “Elakaa Unguvalriim Tangertem̄a.” Tauna uitaluni akuliigni Kadesh-aankuk Bered-aaq-llu.

15Hagar-aq-llu irniuq qetunrangluni; Abram-aam-llu acirluku Ishmael-aamek. 16Abram-aaq allrakungellruuq yuinarnek cetamanek (80) Ishmael-aaq yuurtellrani.

Currently Selected:

Genesis 16: YPK

Highlight

Copy