Genesis 18
18
Akqun Qetunrangciqniluku Abraham-aaq
1 Atanrem-llu alairvikaa Abraham-aaq Mamre-m napain caniatni uitallrani, aqumgaluni pelatekami amiigani, erenrem puqlanillran nalliini. 2Ciugcami tangertuq pingayunek angutnek nangerngalrianek. Tangrramiki aqvaqurluni pairrsaagai, cikluni-llu nunamun. 3Qanertuq, “Eneka kituryaqunaciu arulairpek'naci; wiinga wantua kevgiurnaluci. 4Mermek taiciiqua it'gavci eruutekaatnek; mernuinercirniartuci-llu uum napam aciani. 5Neqkarpecen̄ek-llu taiciiqamci nerumarikuvci ayagniartuci. Quyavkararpecia arulairviklua, taumek kevgiurnaamci.”
Taukut qanertut, “Tua-i qanllerpetun pii.”
6Abraham-aaq-llu cukangnaqluni pelatekamun agngami Sarah qanrutaa, “Cukangnaqluten mukaamek negtaara kelipayaginiartuten.” 7Abraham-aaq-llu cukangnaqluni ungungssiutminun piami kuluvayagarmek kemkegcilriamek tegulluni pistet iliitnun tunaa, taum-llu cali cukangnaqluni kenirluku tauna. 8Neqkat-llu uptellni agutai ciuqerratnun-llu elliluki. Elliin-llu kevgiurai napam aciani nerellratni.
9Tua-llu taukut aptaat, “Nauwa-mi nulian Sarah?”
Elliin kiugai, “Pelatekami uitauq.”
10Iliit-llu qanertuq, “Pinritevkenii up'nerkaqan ataam uterciiqua elpenun, Sarah-llu nulian irniangeciquq qetunrangluni.”
Sarah-m-llu Abraham-aam tunuani niicugnii pelatekam amiiganek. 11Waniwa Abraham-aankuk Sarah-llu ak'allaurrlutek, Sarah-llu aglernanrillruluni. 12Sarah-llu niicetevkenani engelartuq, qanerluni, “Ak'allaurrlunuk-qaa uika-llu qingarciqua?”
13 Atanrem Abraham-aaq qanrutaa, “Ciin Sarah engelarta qanerluni-llu, ‘Ilumun-qaa ak'allaurrlua irniciqua?’ 14Atanermi-qaa caperrnarqelriartangqertuq? Tuani apertuumalriami up'nerkami ataam taiciqua elpenun, Sarah-llu qetunrangarkauluni.”
15Tau͡gaam Sarah meci'irtuq alingami qanerluni, “Engelaqsaitua.”
Elliin kiugaa, “Qang'a, engelallruuten.”
Abraham-aam Kaigatkaa Sodom-aaq
16Taukut-llu tuaken ayagtut, Sodom-aam-llu igvaumallranun ayagluteng kanavet tangvagaat, Abraham-aam-llu maligtai tumkaatnek apertuutnaluki. 17Ataneq-llu qanertuq, “Aassaqusngaitaqa Abraham-aaq waniwa piqataq'ngamnek. 18Kinguvri angelriarurciiqut pinirluteng atanruvigpaurrluteng, elliikun-llu atawaqerceciiqanka tamalkuita atanruviit. 19Ellii cucukellruaqa alerquusqellukq irniari kinguvri-llu niisngasqellua, ellualria-llu pitalqeggsaraq-llu aturlukek. Tuaten pikata akqutkelqa tamalkuan elliinun aturciqaqa.”
20 Atanrem-llu Abraham-aaq qanrutaa, “Nepliutekagket cakneq Sodom-aaq Gomorrah-llu, arcaqalriamek-llu assiilngurmek aturnilukek. 21Ullagluki tangerrsarturciqanka ilumun nepliutekumacirmegcetun ayuquciat; piciunrilkan nallunrirciqaqa.”
22Tua-i taukuk angutek tuaken ayagtuk Sodom-aam tungiinun; cali tau͡gaam Abraham-aaq nangengqauq Atanrem ciuqerrani. 23Abraham-aam malkanirluku qanrutaa, “Ilumun-qaa piunrirciqaten ellualriit elluanrilngurnun tapquulluki? 24Yugtangqerqan yuinaak malruk qulnek cipluku (50) ellualrianek nunarpagmi uitalrianek; tua-i-qaa piunrirciqan, taukut yuinaak malruk qulnek cipluku (50) catkevkenaki? 25Tuaten piyunaitqapigtuten, tuqulluki ellualriit elluanrilngurnun tapquulluki, ellualriit aturtelluki elluanrilnguut pitaciluki! Tuaten piyunaitaaten. Cuqcistii-qaa nunam tamarmi elluarrluni pingaituq?”
26 Ataneq-llu qanertuq, “Nalaquskuma yuinaak malruk qulnek cipluku (50) ellualrianek yugnek Sodom-aami, piunrirngaitaqa taukut pitekluki.”
27Abraham-aaq kiuguq, “Tangerrluku wangnek cinglua Ataneq qalaruskeka, caunritkacagang'e'rma. 28Ellualriit tallimanek ikgellrukata, yuinaak malruk tallimanek cipluku (45) ellualriartangqerqan, cali-qaa nunarpak piunrirciqan taukut talliman ilangarutait catkevkenaki?”
Atanrem kiugaa, “Piunrirngaitaqa ellualriartangqerqan yuinaak malruk tallimanek cipluku (45).”
29Abraham-aam qanrutenqigtaa, “Yuinaagnek-mi malrugnek (40) ellualriartangqerqan?”
Atanrem kiugaa, “Ellualriit yuinaak malruk (40) pitekluki piunrirngaitaqa.”
30Abraham-aaq qanertuq, “Qannge'rma cali qenqerrucaqunii. Yuinaq-mi qulnek cipluku (30) ellualriartangqerqan?”
Atanrem kiugaa, “Piunrirngaitaqa yuinaq qulnek cipluku (30) ellualrianek nalaquskuma.”
31Abraham-aaq qanertuq, “Tangerrluku wangnek cinglua qalarutaqa Ataneq. Nalaquskuvet-mi yuinarnek (20) ellualrianek tuani?”
Kiugaa, “Yuinaat ellualriit pitekluki piunrirngaitaqa.”
32Abraham-aaq qanertuq, “Ataneq qenqerrucaqunii, ataucirqumek cali qanernaurtua. Qulnek-mi ellualrianek pitangqerqan?”
Atanrem kiugaa, “Qulen ellualriit pitekluki piunrirngaitaqa.” 33Ataneq-llu ayagtuq qalarutenriamiu Abraham-aaq; Abraham-aaq-llu nunaminun uterrluni.
Currently Selected:
Genesis 18: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
