Genesis 33

Jacob-aam Pairtaa Esau

1Jacob-aam kiarcami tangrraa Esau agiirtellria maligluni yuinarnek yuinarnek (400) angutnek. Tua-i elliin avgai mikelnguut Leah-mun, Rachel-aamun, pistegnun-llu. 2Pistek-llu irniartuumakenka ciuqliuvkarak, Leah-llu irniari-llu tungliuvkarluku, Rachel-aankuk-llu Joseph-aaq-llu kinguqlikacagaulutek. 3Ellii Jacob-aaq ciunratgun ayagtuq, ciktaqluni malrunlerqunek anngani ullainanermini. 4Tau͡gaam Esau-m aqvaqurluni pairrsaagaa akuqerluku-llu melugarluku. Tamarmek aluviliurlutek. 5Esau-m tangrramiki arnat mikelnguut-llu aptaa, “Kinkuugat-mi makut maliten?”

Jacob-aam kiugaa, “Agayutem takumcuklua wangnun cikiutekelqai.” 6Pistek arnak irniatek-llu iluvartuk, cikluteng-llu ciuqerranun; 7tuamta-llu Leah irniani-llu kinguatgun tailuteng, kinguatgun-llu Joseph-aankuk Rachel-aaq-llu, tamarmeng ciktaqluteng ciuqerranun.

8Esau-m qanrutaa, “Qaillun umyuartequlluki au͡gkut pairtellrenka ayagcetellrusiki?”

Jacob-aaq kiuguq, “Tuaten pillruunga elluarrlua ciuniuresqumalua.”

9Esau qanertuq, “Amllertut wiinga pinka; elpet piten avaliqiki.”

10Jacob-aaq qanertuq, “Elpeni ciuniuyunarqekuma kaigavikamken cikiutenka ciuniurki. Tangellren Agayutmek tangellriatun ayuqngan, assirlua ciuniuravnga. 11Ciuniurki cikiutenka elpenun Agayutem takumcuknganga cikirlua nuuqairullua.” Aguagucani tua-i ciuniurai.

12Tua-llu Esau qanertuq, “Upluta ayagnaurtukut. Wiinga ciunerpeciuggun piurniartua.”

13Tau͡gaam Jacob-aam qanrutaa, “Nallunritaten mikelnguut piniatut, ungungssiutenka-llu piyagangqerrata, cukangnaqulluki kasmekuneng ernermi ataucimi ping'e'rmeng tamarmeng tuquciqut. 14Ciunemkun tua-i ayii, wiinga maligciiqamken cukassaagarpek'nii ungungssiaraat mikelnguut-llu 'gilertellrat pitaciluku. Anguciqamken Edom-aami.”

15Esau-m qanrutaa, “Kitak unisviknaamken ikayurkarpenek malima angutet ilaitnek.”

Jacob-aam kiugaa, “Aturyunritanka, assirlua tau͡gaam ciuniuresqumallruunga elpenun.” 16Taumi ernermi Esau ayagtuq Edom-aamun. 17Jacob-aaq tau͡gaam Sukkoth-aamun ayagtuq, tuani-llu pikaminek eneliluni, uqisvililuki tuaten ungungssiutni. Tauna pitekluku tauna aterpagtellruat Sukkoth-aamek.#33.17: Sukkoth: Una ateq Hebrew-tun kangingqertuq “uqisviit.”

18Mesopotamia-mek utertellermi Jacob-aaq cavkenani tekituq nunarpagmun Shechem-aamun Canaan-aam nuniini. Carr'ilngurmun-llu arulairluni nunarpiit caniatnun. 19Nuna-llu tauna arulairvikellni kiputaa yuinaq tallimanek (100) akinek kinguvrinek Hamor-am Shechem-aam atiinek. 20Tuani-llu ekuavililuni acirluku-llu El-amek, Agayutiinek Israel-aam.

Currently Selected:

Genesis 33: YPK

Highlight

Copy