Genesis 38
38
Judah-nkuk Tamar-aq-llu
1Taum nalliini Judah-m ilani unilluki uitallgucillrua Hirah, Adullam-aarmiu. 2Tuani Judah kenkiuq Canaan-aarmiumek nasaurlurmek, atii aterluni Shua-mek. Tauna nuliqsagutaa, 3qetunrangluni-llu elliikun acirluku-llu Er-amek. 4Ataam qingaami qetunranguq cali, acirluku-llu Onan-aamek. 5Allamek cali qetunranguq acirluku-llu Shelah-mek. Judah Achzib-aami uitallruuq tauna tan'gaurluq yuurtellrani.
6Ciuqliq qetunrani Er-aq Judah-m nulirturcetaa Tamar-amek. 7Er-am ayuqucia assillrunrituq ilulliqevkarluku Ataneq, taumek Atanrem tuqutellrukii. 8Judah qanertuq Er-am kinguqlianun Onan-aamun, “Anngairutvet nulirra ullagluku tutegyarturru. Cakiraqngaten picirkiun tamatumun taqumalria aturyarturru anngaan kinguvengqerrniartuq.” 9Tau͡gaam Onan-aam nallunrilamiu qingiutni elliin kinguveqngailamiki cailkamun maq'ilartuq anngani kinguverkiuryuumiinaku. 10Tuaten pillra ilukegcitkenritaa Atanrem, taumek tauna-llu tuqutaa. 11Tua-llu Judah-m ukurrani Tamar-aq qanrutaa, “Uterrluten atavnun uilgaugurniartuten Shelah qetunraqa anglirinatkaanun.” Tuaten qanertuq alingami tuqunayukluku anngaagketun. Tua-i Tamar-aq atami eniinun ayagtuq uitayarturluni.
12Tamatum kinguani Judah-m nulirra tuquuq. Tuqullrem kinguakun piciryararteng pelluan ayagtuq Timnah-mun yugnikek'ngani Hirah Adullamite-aq malikluku, qusngiminek asmegcilriit ullagluki. 13Tua-i iliita Tamar-aq qanrutaa cakia ayakatarniluku Timnah-mun qusngiminek asmegciyarturluni. 14Qanrucatni tuaten yuugai aipainertaat aturani, 'lumarrarmek-llu at'uq, kegginani-llu capkucirluku aqumuq Enain-am iteryaraanun. Tauna nunacuarauluni tumyarami Timnah-mun. Elliin nalluvkenaku Shelah-m yun'erraurucia, tau͡gken taumun cali nulirkiutekumaksaunani.
15Judah-m tangrramiu akissuuyukluku umyuartequq kegginani patumiiku. 16Tumyarat caniatni uitallrani ullagaa qanrulluku-llu, “Tailuten arnaqnaamken.” (Elliin nalluluku ukurraqucia.)
Arnam qanrutaa, “Camek-mi cikirciqsia arnaqevkaquma?”
17Ellii kiuguq, “Payugceciiqamken katngautma piyagaita iliitnek.”
Arnam kiugaa, “Camek kitak asguranairutkarpenek cikirnga avaliqerkamnek taicetnatkarpenun ungungssim piyagaa akqutkellren.”
18Angun qanertuq, “Camek cikiisqessit?”
Arnam kiugaa, “Takarnarqucirissuutevnek uyamigtuumaan ayarurpenek-llu.” Tua-i taukut tunai arnaqluku-llu, arnaq-llu qingarluni. 19Arnaq makluni an'uq kegginami-llu capii au͡g'arluku, uilgaussuutni-llu all'uki.
20Judah-m-llu tuyuqaa ungungssiyagaq akqutkellni yugnikekmikun Adulamite-akun, taukut-llu asguranairutkellni arnamek tegusqelluki, tau͡gaam taum arnaq nalaqesciigataa. 21Enaim-am yui angutet apqaurai, “Nauwa imna akissuq maantelleq tumyarat caniatni?”
Taukut kiugaat, “Man'a akissurtangqeqsaituq.”
22Tua-i utertuq Judah-mun qanerluni-llu, “Nalaqenritaqa. Angutet-llu tamatum yuin qanrutaatnga akissurtangqeqsaitniluku tamaani.”
23Judah kiuguq, “Tua-i tamakut elliin piksagulliki, temciksuaraitkuk. Akilingnaqsaaqaqa tua-i, tau͡gaam nalaqenritan.”
24Iralut pingayun kinguatni Judah qanrutaat, “Tamar-aq ukurraan akissuullrulliniuq, maa-i-llu qingarluni.”
Judah-llu qanertuq, “Anulluku ekuavkarciu.”
25Anusnginanratni Tamar-am qanrucarturcetaa cakini, qanerluni, “Ukut pikestiita qingillruanga.” Qanerluni-llu cali, “Nallunairturciki kitumun pikuciat, takarnarqucirissuun, uyamigtuumarmi ayaruq-wa.”
26Judah nallunairtuq ellminek pikniluki, qanerluni, “Canganarqenrituq. Wiinga pisqun aturarkaqa pillrunrilamku uingevkarluku qetunramnek Shelah-mek.” Judah taum kinguani taumek arniunqigtenrituq.
27Irnillerkaa pinarian elpekaat malriqataucia. 28Teggiurcillrani aipaan unatai an'ut; irnivkartiin-llu qillervikaa kavirlimek yualukamek qanerluni, “Una ciumek an'uq.” 29Tau͡gaam unatni cayullrani aipaa ciumek an'uq, arnaq-llu qanertuq, “Waten cuna-wa elpet anyulriaten.” Taumek tauna aciraat Perez-aamek.#38.29: Perez: Una ateq Hebrew-tun kangingqertuq “pingnaqluni anelria.” 30Kinguakun aipaa-llu an'uq, unatmikun kavirlimek yualukamek nallunailkutalek; aciraat tauna Zerah-mek.#38.30: Zerah: Uum atrem ayuqaa Hebrew-tun aperyaraq, erqaaraam kavircet'lallra piluku.
Currently Selected:
Genesis 38: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.
