Genesis 41

Joseph-aam Nalqigtaa Angayuqam Qavangua

1Allrakuk kinguagni Egypt-aarmiut angayuqrat qavangurturtuq nangengqaluni Kuigem Nile-am cen̄iini. 2Tangertuq nugelrianek kuigmek malrunlegnek kuluvagnek uqurilrianek, nerluteng-llu tamaani canegnek naumalrianek. 3Tuamta-llu allat malrunelgen kuluviit nug'ut kemgitqapiggluteng nangerngaluteng-llu nuniitni taukut allat kuluviit Nile-am cen̄iini. 4Taukut malrunlegen kemgilnguut kuluviit nerait uqurilriit. Egypt-aam-llu angayuqra tupakarluni. 5Qavanqigcami aipiriluni qavangurturtuq; tangerrluni-llu malrunlegnek mukaarkanek qerrunqeggluteng assirluteng naulrianek ataucimek acilqurluteng. 6Tuamta-llu allat mukaarkat naugut nauluaqaumavkenateng calaramek anuqem uulluki. 7Taukut-llu nauluaqaumanrilnguut mukaarkat nerait assirluteng naullret. Egypt-aam angayuqra tupakaami, maaten piuq qavangurtullinilria. 8Taum unuaquani umyuassuugartuq aqvavkarluki-llu angalkut tamalkuita umyuartulriit-llu Egypt-aami. Qavanguminek-llu qanemcilluki, tau͡gaam taukut qavangua nalqigtesciigataat.

9Tauna imna kevgaq wine-aliurta qanertuq angayuqamun, “Unuamek picurlallruciqa elpekaqa. 10Imumi qenrutellrukevkuk wiinga kelipistet-llu ciuqliat, iterrlunuk-llu eniinun kellutestet angayuqrata. 11Caqerlunuk unuut iliitni qavangurturtukuk tamamegnuk, qavangupuk-llu allakarmeng nalqigutengqerrluteng. 12Hebrew-rtangqellruuq tuani ayagyuarluni, kellutestet angayuqrata kevgaqluku. Taum-llu qavangumegnek qanrucamegni nalqigutellruakuk, nalqigglukek tamarkenka ayuqenrilnguuk qavangupuk. 13Nalqigutellruciatun-llu tuaten pimallruukuk. Wiinga caliaqa ataam teguluku, kelipista-llu agarcimaluni.”

14Egypt-aam angayuqran aqvavkaraa Joseph-aaq, patagmek-llu taitaat itercivigmek. Ungairraarluni ac'inqigqaarluni-llu angayuqamun ag'uq. 15Egypt-aam angayuqran qanrutaa, “Qavangurtullruunga nalqigcestekaunani-llu. Qanelrianek niitellruunga elpet qavangunek niiqaarluki nalqigcituniluten.”

16Joseph-aam kiugaa, “Wangnek pisciigatua; Agayutem tau͡gaam nallunriryukevnek nalqiguciiqaaten.”

17Tua-i Pharaoh-m Joseph-aaq qanrutaa, “Qavangumni nangengqaunga Kuigem Nile-am cen̄iini; 18malrunlegen-llu kuluviit uqurilriit nug'ut Nile-amek, nerluteng-llu cen̄am evginek. 19Tua-llu allat cali malrunlegen nug'ut kinguatgun assirpek'nateng kemgitqapiggluteng-llu, tuaten-llu ayuqelrianek tangeqsaitua Egypt-aami tamiini. 20Taukut kuluviit kemgilnguut nerait taukut malrunelgen ciumek nugellret, 21tau͡gaam nererraartelluki taukunek yuum nalluyaraa nerellruciat, ayuqucimegcetun ayuqngata cakanirpek'nateng. Tua-i-llu tupakarlua. 22Qavangumni cali tangertua mukaarkanek malrunlegnek assirluteng nauluaqaumaluteng ataucimek acilqurluteng. 23Cali-llu allat malrunlegen naugut, kinerrluteng, aminateng, calaram anuqem uuvkallri, 24taukut-llu amilnguut nerait taukut assilriit. Makunek qanemcicaaqanka angalkut, tau͡gaam iliita nalqigutenritaanga.”

25Joseph-aam qanrutaa Pharaoh, “Qavangugken ataucimek nalqigutengqertuk; Agayutem nallunrircetaa elpenun piarkani. 26Malrunlegen assilriit kuluviit, malrunlegen-llu assilriit mukaarkat allrakuugut malrunlegen; qavangun atauciuguq. 27Malrunlegen kemgilnguut kuluviit, malrunelgen-llu mukaarkat anuqem calaramek uutellri cali allrakuugut malrunlegen, piitnallerkauluteng. 28Tuaten piciquq qanrutellrucimtun, Agayutem nasvitaaten elliin piarkaminek. 29Allrakuni malrunlegni cat nurnaitarkaugut Egypt-aami. 30Tau͡gaam taukut kinguatgun nuna piitnarciquq allrakuni malrunlegni. Egypt-aarmiut-llu cirillerteng nalluyaguciiqat piitnaq tuskan, tua-i-wa kainiqellrata piunrirciqngaku nuna. 31Enuqitenritlerteng umyuaqngaitaat piitnam tuskateng, tua-i anagutarkaungami kainiqlerkaat. 32Malrurqugnek qavangurtullerpet nallunairaa Agayutmun pinritevkenaku tuaten piarkaurcetellrucia, cali-llu ukaqvaggun tamana piarkauluni.

33“Elpet cucukliyunarquten umyuartulriamek ayuqucingumalriamek-llu Egypt-aam atanirturtekaanek. 34Allanek-llu cali atanerrualiluten avurtekanek ilaita nunam naugillrinek allrakuni malrunlegni cat nurnaitellratni. 35Avurtelluki neqkanek taukuni neqkam nurnaitellrini, qemagtelluki tamakut qemaggvignun, nayurcirluki-llu. 36Tamakut neqkat neqkautekesqelluki yugnun nunam piitnallran nalliini allrakut malrunlegen aturluki, yuut palunritniartut piitnam nalliini.”

Joseph-aaq Atanerruarurtaat Egypt-aamun

37Joseph-aam qanellri assikait Pharaoh-m atanerruarin-llu. 38Pharaoh-llu qanertuq atanerruaminun, “Allamek-qaa yugmek nalaquciiqukut uutun Agayutem anerneranek avalingqelriatun?” 39Pharaoh Joseph-aamun qanertuq, “Agayutem nasvicaten makunek elpetun ellatuluni umyuartulriartaituq. 40Angayuquarciiqamken nunamnun, alerquutevnun-llu yuut tamarmeng maligngatarkaugut. Atanruvigmi tau͡gaam wiinga kiima quyinruciqua elpeni. 41Waniwa elpenun ataniumaarkaurcetaqa Egypt-aaq tamalkuan.” 42Tua-i Pharaoh-m takarnarqucirissuutni kulun yuuluku Joseph-aamun ac'etaa. Aturaqegtaarnek-llu at'elluku, suulutaamek-llu taqumalriamek uyamilirluku. 43Ayagassuutmi-llu aipaigkenkun ayagaarkaurtelluku, ayagaaqan-llu ciunrani kellutestem̄ek ciuqlingqelartuq, qayagauraaqluni, “Avici! Avici!” Tuaten piluku atanirturilriarurcetaa Egypt-aami tamalkuan. 44Cali Pharaoh-m Joseph-aaq qanrutaa, “Wiinga angayuqaugua, yuk camek pisqevvailegpeni pingaituq Egypt-aami tamalkuan.” 45-46Pharaoh-m Joseph-aaq Egypt-aarmiucetun aciraa, Zaphenath Paneah-mek nulirturtelluku-llu Asenath-aamek, Potipher-aam, agayulirtem nunarpagmi Heliopolis-aami panianek.

Joseph-aaq allrakungluni yuinaq qulmek cipluku (30) kevgiungellrua Egypt-aarmiut angayuqrat. Atanruvigmek-llu ayiimi ayagallruuq tamiinun nunamun tamaani. 47Taukuni malrunlegni allrakuni cat nurnaitellratni naucetaat nauluaqerturalartut. 48Joseph-aaq-llu neqkanek quyurtuq taukuni allrakuni malrunlegni naucetaat nauluaqallratni; qemagciluni neqkanek tamalkuitni nunarpagni avataitni naucetaarvignek uitalrianek. 49Joseph-aaq-llu qemagciuq neqkanek amllernek, imarpiim cen̄iini qau͡gyatun amllertalrianek, uspernanrirluki-llu amllerem ugaani uqamaltassiallerkaat caperrnarian.

50Piitnaq nunamun tupailgan Joseph-aaq qetunrangellruuq malrugnek Asenath-aakun nuliamikun, Potipher-aam agayulirtem paniakun. 51Qanertuq, “Agayutem nalluyagucetaa nangtequalqa ilanka-llu tamalkuita”; taumek aciraa ciuqliq qetunrani Manasseh-mek.#41.51: Manasseh: Una ateq ayuquq Hebrew-tun “nalluyagutelluku.” 52Cali-llu qanertuq, “Agayutem irniangevkaraanga nunami nangteqvimni”; taumek aciraa kinguqlia qetunrami Ephraim-aamek.#41.52: Ephraim: Una ateq Hebrew-tun ayuquq “cikiqengluni mikelngurnek.”

53Allrakut malrunlegen cat nurnaitellrat Egypt-aami iquklitut, 54malrunlegen-llu allrakut nunam piitnallerkaa ayagnirtuq, Joseph-aam qanellruciatun. Piitnarluni-llu nunani tamalkuitni; tau͡gaam Egypt-aami tamalkuan neqkartarluni. 55Egypt-aarmiut neqkairucameng kaigavikaat Pharaoh neqkameggnek pisqelluteng. Pharaoh-m-llu qanrutai, “Joseph-aaq ullagciu qanellra maligtaquluku piniartuci.” 56Piitnaq nunanun tamalkuitnun tuc'an, Joseph-aam ikirtai qemaggviit, tun'ivikelarai-llu Egypt-aarmiut tamaaken piitnaq anagucan. 57Cali-llu nunanek tamalkuitnek tailartut Egypt-aamun kipussaagluteng neqkanek Joseph-aamek, piitnaq arenqialan nunami tamalkuan.

Currently Selected:

Genesis 41: YPK

Highlight

Copy