Genesis 44

Paqritleq Saskaq

1Joseph-aam alerquraa pisten̄i, “Imiqiki ukut issratait pivigtutaciicetun, akikalgirait-llu issrataita paingitnun elliluki. 2Saskaqa-llu qerrirliq kinguqlikacagiita issratiin painganun akiutainun tapquulluku elliniaran.” Tauna-llu piuq alerquumacirmitun. 3Unuaquan tanqigiarautiini taukut ayagtut ciulvateng malikluki. 4Yaaqsigivailgata nunarpagnek Joseph-aam qanrutaa pisten̄i, “Maligeski imkut angutet; angukuvki qanrutniaten, ‘Ciin assilria assiilngurmek akinaurceciu? Ciin teglegceciu angayuqama qerrirliq saskaa? 5Tuaggun angayuqaqa meqainaqsaitelartuq, tau͡gaam cali ciunerkarcurcuutekaqluku. Picurlagtuci tuaten piluci.’”

6Taum anguamiki tuaten qalarutai. 7Taukut-llu kiugaat, “Ciin waten qalarcit wangkutnun? Wangkuta tuaten pingaitukut! 8Akit nalaqelput issratemten̄i ut'rutellruaput elpenun Canaan-aamek; qaillun tua-i piluta teglegciqseta qerrirlinek wall'u suulutaanek angayuqerpet eniinek? 9Ilamten̄ek nalaqekuvgu tauna tuqucimakili, wangkuta-llu angayuqerpet pisteksagulluta.”

10Tauna qanertuq, “Tuaten ayuqli qanrucirpetun; tau͡gaam kiimi tauna teglelleq saskamek pisteksaguciiqaqa, ilaini tau͡gken qaillun pimangaunaci.” 11Tua-i tamarmeng patagmek issrateteng atrartait ikirrluki-llu. 12Yuariigai-llu ciuqlikacagiitnek ayagluki kinguqlikacagiitnun; saskaq-llu tauna nalaqaa Benjamin-aam issratiinek. 13Anngaqellriit-llu taukut aturateng allgurait qessanayugluteng. Ciulvateng-llu ucilirraarluki ataam utertut nunarpagnun.

14Judah anelgutni-llu tekicameng Joseph-aam eniinun, maaten piat cali tamaantellinilria. Tua-i nuna agturluku ciktut ciuqerranun. 15Joseph-aam qanrutai, “Qaillun piavci waten piceci? Nalluarci-qaa canek nallunriryugngaciqa ciunerkarcuryarakun?”

16Judah-m kiugaa, “Camek qanerciqseta elpenun, qaillun-llu pillrunrilucirput nallunairyugngaciqseta? Agayutem pinarqelriarucirput nasvagaa, tua-i tamamta pisten͞gurrnaurtukut saskam-llu avaliqestellra.”

17Tau͡gaam Joseph-aaq qanertuq, “Arenqia, qang'a! Tuaten wiinga piyunaitaanga! Saskam tau͡gaam avaliqestellra pisteksaguciiqaqa. Elpeci umyuarniurpek'naci uterrniartuci atavcen̄un.”

Judah-m Takumcucarautekaa Benjamin-aaq

18Judah-m Joseph-aaq ullagluku qanrutaa, “Qanrutqernaamken niicugniqernga. Qenqerrucaqunii; elpet Egypt-aarmiut angayuqracetun pitalriaruavet. 19Nauwa aptellrukevkut qanerluten, ‘Atangqertuci-qaa allamek-llu anelguterluci?’ 20Waten-llu kiullruamteggen, ‘Atangqertukut angukara'urlurmek, kinguqlikacaarput-wa ak'allaurrnermikun atamta irniara. Anngaa tuqullruuq, ellii-llu kiimi ellirluni aanami irniarini. Atiin-llu kenekluku cakneq.’ 21Elpet-llu qanellruuten taitesqelluku maavet tangerrnaluku. 22Wangkuta-llu qanrulluten tan'gaurlurmun unitesciigatniluku atani; uniskani tuquciqngan. 23Elpet tua-llu qanrutarpekut, ‘Kinguqlikacaarci malikenrilkuvciu tangenqiggngaitarpecia.’

24“Utercamta atamten̄un qanemcitellruarput makunek qanllerpenek. 25Atavut qanellrani, ‘Cali ayagluci kipucartuqerci neqkamten̄ek,’ 26qanrutellruarput, ‘Ayagciigatukut. Ciuniunqiggngaitaakut, malikekumteggu tau͡gaam kinguqlikacaarput. Tua-i malikarkaukumteggu ayagciqukut.’ 27Atamta waten qanrutaakut, ‘Nallunritarci nulirqa Rachel-aaq malrugnek tau͡gaam irniangellruuq wangkun. 28Ak'a aipaan unitellrukiinga. Yuilqurmiutaat ungungssit allgurluku piunrillrulliatgu tayima tangenqigtenrilkeka ayaggaanranek. 29Una-llu ayauskuvciu wangnek picurlagluni-llu, angukara'urluurcama angniitem ugaani tuquvkarciqerpecia.’

30-31“Tua-llu waniwa, ut'reskumta atamten̄un, kinguqlimten̄ek malingqenritlerput elpekekuniu tuquciquq. Kenekngamiu nanelkauvkenaku-llu, cali-llu angukara'urluurcami, wangkuta angniilutkaanek pikumta angniitem ugaani tuquciquq. 32Wiinga cayailkuciryullruaqa tan'gaurluq qanerlua, ‘Ut'rutenrilkumku elpenun wangnun tusngavkaqiu unguvarma taktaciatun.’ 33Wiinga tau͡gaam uitavkarnga pisten͞guvkarlua elpeni, una tan'gaurluq pivkarpek'naku, utertelluku ilai maliggluki. 34Wiinga utercuumiitua atamnun tan'gaurluq malikevkenaku, tangerrsuumiilamku ataka umyugaa navgumaluku.”

Currently Selected:

Genesis 44: YPK

Highlight

Copy