Luke 15

Qusngiq Tamaumalria

1Akiliqurautnek quyurcistet assiilngiumalriit-llu tamarmeng quyurrvikaat niitnaluku, 2tua-i-llu Pharisee-aat igatulit-llu qanemyuugautekaat, qanerluteng, “Uum assiilngiumalriit ciuniurai nerellgutekluki-llu.” 3Cuqyutmek-llu mat'umek qalarutai, 4“Ilasi-qaa, qusngingqerquni yuinarnek tallimanek, atauciq-llu tamarikuniu, taukut-qaa yuinaat tallimaunritaraan unisngaitai tamaavet yuilqumun, tamalleq-llu yuarluku nataqvianun? 5Nataqekuniu-llu angnirluni qugciqaa. 6Eneminun-llu tekiskuni, yugnikekni nunalgutni-llu kelegciqai qanrulluki, ‘Angnillgucircia, qusngiqa tamalleq nataqngamku.’ 7Qanrutamci, tuacetun cali assiilngiumalria umyualinqigtellria atauciungraan qilagmi angniutngunruarkauguq ellualriani yuinarni tallimaunrita'arni umyualinqigutekailngurni.

Aki Tamaumalria

8“Wall'u arnam qulnek akiutengqellriim iliit tamaquniu, kenurqutarluni eneni kaginqegcaarngaitaa-qaa cumiggluni yuarluku nataqvianun? 9Nataqekuniu-llu yugnikekni nunalgutni-llu kelegciqai qanrulluki, ‘Angnillgucircia, tamaraqa nataqngamku.’ 10Atam, tuacetun-llu, assiilngiumalria umyualinqigtellria atauciunger'mi angniutnguarkauguq Agayutem an'gilaini.”

Qetunraq Tamaumalria

11Qanertuq-llu, “Yuk malrugnek qetunrangqellruuq. 12Kinguqliim atani qanrutaa, ‘Aataa, pivnek paitarkamnek cikirnga.’ Tua-i pini elkegnun avgai. 13Erenret-llu amllenrilnguut kinguatgun qetunraan kinguqliim pini tamalkuita quyurtai, nunamun-llu yaaqvanelngurmun ayagluni, tuani-llu pini caanguaqai akusrarrluni yuuluni. 14Tamalkuita-llu pini nangengaki, piitnaq nunami taumi tut'uq; ellii-llu kaingluni. 15Tua-i nunam taum yuin iliitnun ayagluni ilaliutuq ellminek, taum-llu nunautminun ayagcetaa sitiinkaat aulukesqelluki. 16Camiryuumiryaaquq-llu caqukuallernek sitiinkaat neqkaitnek, kia-llu camek cikinritaa. 17Tau͡gaam ellminek ellangengami, qanertuq, ‘Atam, atama pisterugai neqkalirtut nuryugcivkenateng, tau͡gken wiinga maani paluqatarlua! 18Nangerrlua atamnun ayaglii, qanrutniarqa-llu, “Aata, wiinga assiilngirtua qilagmun atalriamek elpenun-llu. 19Qetunrarpenek tuqluqaunrirtua, pistevet iliicetun ayuqevkarnga.”’ 20Tua-i nangerrluni atani ullagaa. Tau͡gaam cali yaaqvaarnelluku aatiin tangrraa, takumcuyugluni-llu aqvaqurluni-llu pairrsaagluku, uyaqurrikun akuqeraa melugarluku-llu. 21Qetunraan-llu qanrutaa, ‘Aata, wiinga assiilngirtua qilagmun atalriamek elpenun-llu, qetunrarpenek tuqluqaunrirtua.’ 22Tau͡gaam aatiin pisten̄i qanrutai, ‘Aceciu aturamek assilriamek, kulucirluku-llu, aluilicirluku-llu; 23nuraq-llu uqungcaumalria tailluku tuquciu, nerluta angnirnaurtukut; 24wani-wa qetunraqa tuquyaaqelleq, maa-i unguiran, tamaryaaqelleq-llu, maa-i nataqumaluni.’ Nunaniryunga'artut-llu.

25“Tau͡gaam qetunraa amaqliq nunautmi uitallruuq, uterrluni enemun tekiteqatarluni, niituq aturcetaalrianek agnguarluteng-llu. 26Tua-i pistet iliit taisqaa apluku-llu ca pitekluku tuaten piciatnek. 27Taum-llu kiugaa, ‘Kinguqliin tekican aatavet nuraq uqungcaumalria tuqucetaa, cavkenaku ataam yuksagucamiu.’ 28Tua-i tauna qenqertuq iteryugpek'nani-llu. Taumek atiin anvikaa qarulluku-llu itresqelluku. 29Tau͡gaam aatani kiugaa, ‘Tangerrluku, allrakuni amllerni kevgiuramken alerquuteten-llu uniurteksaunaki, tau͡gaam qusngimek angucalumek cali cikiqsaitarpenga yugnikekenka ilakluki nunaniryuutekamten̄ek. 30Tau͡gaam una qetunraan tekican, elpet piten akissunun caanguaqellruluki, tua-i nuraq uqungcaumalria tuqucesqan ellii pitekluku!’ 31Elliin-llu qanrutaa, ‘Qetunramaa, elpet nayurrlainararpenga, wiinga-llu pinka tamalkuita pikaten. 32Tau͡gaam nunaniryuutekluku angniutnarquq, wani-wa una kinguqliin tuqullruyaaqluni, ataam unguiran, tamallruyaaqluni-llu ataam nataqngan.’”

Currently Selected:

Luke 15: YPK

Highlight

Copy