Luke 21

Aipainrem Elliitii

1Kiartellermini-llu tukuulriit murilkai amllermek elliiluteng tuavet elliivignun. 2Arnaq-llu aipaineq arrsaulria tangrraa akicuaraagnek tuavet elliiluni. 3Qanertuq-llu, “Ilumun, qanrutamci una arnaq aipaineq arrsaulria elliilriani tamalkuitni elliinruuq. 4Taukut tamarmeng cipnermeng ilaitnek elliingata cikiutnun, tau͡gaam uum nurutellriaruluni yuutekaqsallni tamalkuan elliitekaa.”

Iquklitlerkam Nallunailkutai

5Ilaita-llu agayuvigpak qanrutekngatgu, taqenqegcaumacianek, teggalqunek-llu tangnirqelrianek, elliitekumalrianek-llu tangnircautnek, qanertuq, 6“Tua-i tamakut tangvak'ngaci, erenret tekiciiqut, teggalqunek qalliqelriartairuciiquq, itumcimangailngurnek egcimaluteng-llu.” 7Tua-i-llu aptaat, “Elitnauristaa, qaku tamakut tuaten piarkaugat? Cali-llu ca nallunailkutnguarkauga tuaten piqataqata?” 8Qanertuq-llu, “Murilkici kitumun alarcecimanritnaurtuci, amllellriit tekitarkaungata atqa aturluku, qanerluteng, ‘Wiinga Christ-augua!’ cali-llu, ‘Pillerkaq ukaqsigiuq!’ Maligtenrilkiciki taukut. 9Niiskuvci-llu anguyautellrianek ayuqenriqertellrianek-llu, alingallanrilkici, tamakut ciumek tuaten piarkaungata, tau͡gaam iquklitlerkaq egmian pingaituq.”

10Qanrutai cali, “Nunam ataucim yui inglukiciqut nunam allam yuinun, atanruvik-llu atanruvillgutminun. 11Nuna-llu cakneq pektelarciquq, nunat-llu ilaitnun piitnaq, cangerlagpiit-llu tekiciiqut. Qilagmek-llu irranarqelriarpiit nallunailkutet-llu piarkaugut. 12Tamakut tamalkuita ciungatgun teguciqaiceci ilalkelluci-llu, tunluci-llu qaillukuarvignun, itercivignun-llu, tua-i atanernun atanerruanun-llu ullauciiqaiceci atqa ayagneqluku. 13Tuani nallunairiniartuci. 14Taumek nallunrilkiciu ciungakun, umyuarrlugcarauteksunailucia kiullerkarpeci. 15Wiinga cikirciqngamci qanrarkarpecen̄ek, elisngamek-llu nakukestevci tamarmeng asgurakesciigalkiitnek narurcesciigalkiitnek-llu. 16Elpeci-llu angayuqavci anelgutevci-llu, tungelqurpeci-llu, yugnikekevci-llu tuaten tunciqaiceci; ilaci-llu tuquciiqait. 17Uumikumaarkauguci-llu yugnek tamaitnek atqa pitekluku. 18Tau͡gaam nuyavci iliit atauciunger'mi cagmarngaituq. 19Asvailucirpeciuggun tarneci pikumaarkaugaci.

20“Tau͡gaam Jerusalem-aaq tangerquvciu inglukesterugaat kassugusngaluku, tua-i nallunritarkaugarci piunrillerkaan ukaqsigicia. 21Tuani Judea-melnguut ingrinun qimakilit, Jerusalem-aamelnguut-llu ankilit, avatiitnelnguut-llu itenrilkilit. 22Waniwaungata erenret akinaurviit, igausngalriit tamarmeng piciurtellerkaat. 23Nakleng qingalriit aamarcilriit-llu ernerni taukuni! Nanikuanarqelriartangqerciqngan angelriamek nunam qaingani, yugnun-llu ukunun eq'ukun piciqngan. 24Nuussirpagkun picurlaumaarkaugut, ayaucimaarkauluteng-llu qaneryarallgutkenrilngurnun, Jerusalem-aaq-llu Jews-aarunrilnguut tutmararkaugaat, Jews-aarunrilnguut ernerkaita qaqitellerkaata engeliinun.

25“Nallunailkutangqerciquq-llu akertem̄i iralumi-llu agyani-llu. Nunam-llu qainganelnguut nanikuaciqut uivagcirluteng-llu imarpik qairet-llu ellerrarterpakata. 26Yuut tuqucuarciqut alingem ugaani nunam-llu qainganun tekitarkat aaqluki, tua-i qiliim pinii arulaarkaungata. 27Nutaan-llu Yuum Qetunraa tangerciqaat amirlukun agiirrluni piningqerrluni ucurnarquterluni-llu. 28Tau͡gaam tamakut ayagniqata, ciugci, tua-i anirtullerkarci ukaqsigian.”

29Cuqyutmek-llu qanrutai, “Tangerciu napa atsangqetuli, napat-llu tamalkuita, 30cuyangaararqata tua-i tanglararci elpecen̄ek-llu nalluvkenaku kiagem ukaqsigicia. 31Tuaten cali, elpeci tamakut tamarmeng ayagniuciat tangerquvciu, tua-i nallunrilkici Agayutem angayuqauvian ukaqsigicianek. 32Ilumun, qanrutamci, ukut yuullgutkelriit nangengaitut tamakut tamalkuita qaqimavkenaki. 33Qilak nuna-llu pellugciquk, tau͡gaam qaneryaranka pellugngaitut.

34“Tau͡gaam elpecen̄ek murilkici, ircaquci piviirucecuaraci neryunqeggnermek taangaryugmek-llu, unguvam-llu mat'um piinek umyuarrlugcaranermek, taum erenrem tekiararucuaraaci negatun. 35Waten tekitarkaungan tamalkuitnun nunam qainganelngurnun. 36Taumek kesianek tarikici, piicagglainarluci-llu, tamakut tamalkuita piarkat avicunaqnauraci, Yuum-llu Qetunraan ciuqerranun nangengqayunaqnaurtuci.”

37Unuaquaqan-llu agayuvigpagmi elicungcarilallruuq, atakuaqan-llu anlallruuq Olive-aam ingrianun. 38Yuut-llu tamarmeng unuayaarmi Agayuvigpagmun ullalaraat niitnaluku.

Currently Selected:

Luke 21: YPK

Highlight

Copy