Luke 9

Elitnaurat Ayagcetellrat

1Imkut-llu qulen malrugnek cipnelget quyurcetai, pinimek-llu cikirai piyunarqucirluki-llu anernerrlugnun apqucinun-llu. 2Ayaasqai-llu qaneryariurtelluki Agayutem angayuqauvianek, apqucilget-llu anirtulaasqelluki. 3Qanrutai-llu, “Camek ang'aqiksaunaci ayaruungraan, wall'u caqurraungraan, wall'u taquamek, wall'u akimek, paltuuci-llu aipirpek'naki. 4Nani enemun itquvci, tuantaurqici ayallerkarpecen̄un. 5Nani-llu ciuniunrilkaceci, tuaken ayakuvci it'gaci evcukiciki taukunun nallunairutkamek.” 6Ellait-llu ayagtut nunat tumekluki, qaneryaraq qalarutekluku anirturiluteng-llu tamiini.

Herod-aam Paqnayullra

7Herod-aaq-llu makunek pillrinek niicami paqnayugtuq, tua-i ilait qanlaata John-aaq tuqumalrianek maktellruniluku, 8allat tau͡gaam Elijah alaillruniluku, allat cali prophet-aat ciuqvallaat iliit maktellruniluku. 9Tua-i-llu Herod-aaq qanertuq, “John-aaq qamiqurrillruaqa, tau͡gaam kina una waten niitnaulria? Tangerrsugyaaqaa-llu.”

Tiissitsaat Talliman Nerevkaumallrat

10Apostle-aat utercameng caliameggnek apervikuagaat. Tua-i-llu allakarmeng ayagtut, elliin malikluki, nunamun Bethsaida-mun. 11Yugugaat-llu tamana elpekngamegteggu maligtaat. Elliin-llu ciuniurai qalarulluki Agayutem angayuqauvianek, apqucilget-llu canrircetai. 12Erneq-llu iquklitqataan imkut, qulen malrugnek cipnelget taigut qanrulluku-llu, “Yugugaat ayagceski nunanun nunarrarnun-llu, qavartallerkaatnun neqkangllerkaatnun-llu, yuilqumlamta.” 13Tau͡gaam qanrutai, “Elpeci nerevkarciki.” Qanertut-llu, “Kelipautengqertukut tallimanek tau͡gaam, neqek-wa malruk; kipucartuqumta tau͡gaam neqkangyallilriit tamarmeng makut,” tua-i amllertiimeng tiissitsaat talliman angutet. 14Elitnaurani-llu qanrutai, “Aqumevkarciki allakaqtaarluki yuinak malruk qulnek ciptaqluki.” 15Tuaten-llu piut, aqumevkarluki tamalkuita. 16Elliin-llu kelipat tamakut talliman neqek-llu malruk tegui, qulmun-llu ciuggluni atawaqaasqai, itumlluki-llu. Elitnauraminun-llu tunai yugugarnun aruqutkesqelluki. 17Ner'ut-llu camirrluteng tamarmeng, ilakuarit-llu quyurtait kalngat qulen malrugnek cipluki imirluki.

Peter-aam Apertuutii

18Tua-i-llu piicagyartullermini allakarmi elitnaurani ilakluki aptai, “Qaillun yuut kilgaat qanlartat caucimnek?” 19Kiugaat, “Angllurcecisten͞guniatgen John-aaq, ilaita tau͡gaam Elijah-uniatgen, allat-llu prophet-aat ciuqvallaat iliit maketnilaraat.” 20Qanrutai-llu, “Tau͡gaam elpeci cauyuksecia?” Peter-aam kiugaa, “Taunguuten Agayutem Christ-aa.” 21Tau͡gaam inerqurai kitumun qanrutkesqevkenaku man'a.

Tuqullerkani Qanrutkaa

22Qanerluni-llu, “Yuum Qetunraa nangteqciquq, qessakumaarkauguq-llu ciulirnerni agayulirten͞gunerni-llu, igatulini-llu, tuqucimaarkauniluni-llu, erenret-llu pingayuatni makcecimaarkauluni.”

23Tamalkuita-llu qanrutai, “Kia imum maligcukunia, ellminek arcaqakenrilli kelistani-llu qugluku maligglua-llu. 24Kia imum unguvani qunukekuniu tamarciqaa, tau͡gaam wii piteklua unguvaminek pegcilriim piksagutarkaugaa. 25Wani-wa yuum nuna tamalkuan piksaguteng'e'rmiu tarneni tau͡gaam tamarluku, tua-llu tamakut cakciqaki? 26Tua-i wangnek qaneryaramnek-llu talluryuutekilria, tauna Yuum Qetunraan cali talluryuutekciqaa tekiskuni ucurnartuumarmi, Atami-llu ucurnarquciakun, an'gilat-llu tanqilriit ucurnarquciatgun. 27Waniwa piciulriamek qanrutqataramci, maani nangengqalriit ilait tuqu elpekngaitaat Agayutem angayuqauvia tangerpailegmegteggu.”

Jesus-aam Allayuurtellra

28Erenret pingayunelgen pellugngatqerluki makut qallatellmi kinguatgun, Peter John-aaq-llu James-aaq-llu malikluki mayurtuq ingrimun piicagyarturluni. 29Piicainanrani-llu kegginaa allayuurtuq, aturai-llu qat'riqapiggluteng qitngirnaqluteng. 30Tangerrluku-llu, yuuk malruk qallatellgutkaak, Moses-aam Elijah-m-llu. 31Taukuk alairtuk ucurnartuumarmek qallallutek-llu elliin tuqumek aturarkaucianek ukaqvaggun, Jerusalem-aami. 32Peter ilagni-llu qavaryukapigtut, tau͡gaam seggaumangnaqngameng ucurnarqucia tangrraat, cali-llu taukuk nangengqallgutek. 33Ayakatainanragni, Peter-aam Jesus-aaq qanrutaa, “Ataneq, maancuuminaqvaa, pingayunek enelilta, elpenun Moses-aamun-llu Elijah-mun-llu.” (Wani-wa qanrucini nallua.) 34Makunek qallasnginanrani amirlutanguq naligluki, tuaten-llu piameng alingut. 35Tuaken-llu amirlumek erinamek niitut, waten qanerluni, “Wani-wa Qetunraqa, nakmik'ngaqa, ellii niisngaciu.” 36Erinamek niicimariameng, Jesus-aaq tangrraat kiimenaku. Tamatum-llu nalliini qanrutkenritaat kitumun tangllerteng.

Anernerrlugmek Anevkarillra Tan'gaurlurmek

37Tua-i-llu unuaquan, ingrimek atraumariata, yugugaat pairrsaagaat. 38Tangerrluku-llu, yugugaat iliit qayagauq: “Ataneq, kaigavikamken, qetunraqa paqesgu, kiingan yukngamku. 39Tangerrluku-llu, anernerrluum kaugaqani alqunaq qanpagalartuq, cagniqercet'laraa-llu kapniurteqevkarluku-llu, qiurqelaraa-llu uitacugpek'naku-llu. 40Elitnauraten-llu kaigaviksaaqanka anevkaasqelluku, tau͡gaam caperqaat.” 41Jesus-aaq-llu kiuguq, “Arenqiapaa, ukuni ukverkilngurni kinguveqellriani, iqlutmuryulriani-llu, qaillun pitalriamek elpenciiqsia ilalcirlua? Qetunraan taisgu.” 42Taisnginanratni-llu, anernerrluum ayaluqercetaa cagniavkarluku-llu. Tau͡gaam Jesus-aam anernerrluk inerquraa, tan'gaurluq-llu tauna anirturluku, atiinun-llu tunluku.

Tuqullerkani Qanrutkaa

43Tamarmeng-llu irriut Agayutem ucurnarqucianek. Irriinanratni pillrinek tamalkuitnek, elliin elitnaurani qanrutai, 44“Makut qaneryaranka keviuciki ciutevcen̄un, Yuum Qetunraan tunumaarkaucianek yuut unataitnun.” 45Tau͡gaam taukut camek qanruciitaat ipesngiimegteggu taringellerkaa, civuuraluteng-llu aptellerkaanek.

Qanemyuugautellrat Kina Angenrucirkaanek

46Tua-i-llu ayuqenriqertut apyutaagulluteng-llu ellmeggnun, nalirteng ciuqliullerkaanek. 47Jesus-aam-llu umyugait elpekngamiki, mikelngurmek tegutuq caniminun-llu aqumlluku, 48qanrulluki-llu, “Kia imum una mikelnguq ciuniuquniu wii atemkun wiinga ciuniuraanga, wangnek-llu ciuniurilriim ayagcesteka-llu ciuniuraa. Ilasi ellmikutuunrulria tauna ciuqliuguq.”

John-aaq Jesus-aam Inerquraa

49Tua-i-llu John-aaq qanertuq, “Ataneq, tangertukut anernerrlugnek anevkarilriamek aterpegun, wangkuta-llu inerqurarput ilakenrilamteggu.” 50Tau͡gaam Jesus-aam qanrutaa, “Inerquqaunrituq, tua-i elpecen̄ek inglukinrilnguq ikayurtekarci.”

Samaria-mi Ciuniurumanritellra

51Tua-i mayuucimallerkani canimellian, Jerusalem-aamun ayallerkaminek taqngairutuq, ciumikun-llu elpengcarilrianek ayagceciuq. 52Taukut-llu ayagtut Samaria-rmiut-llu nuniita iliitnun iterluteng, ellii upyutnaluku. 53Tamakumiut-llu ciuniunritaat, Jerusalem-aamun ayiin. 54Elitnauragken-llu, James-aam John-aam-llu, man'a taringamegnegu, qanertuk, “Ataneq, kenermek-qaa pakmaken igcisqumaarpekuk ukut piunrirtelluki?” 55Tau͡gaam elliin tuiggviklukek inerqurak qanerluni-llu, “Qaillun ayuqelriamek anerniumacirpecen̄ek nalluuci. 56Wani-wa Yuum Qetunraa tekitenrilan piunririyarturluni yuut yuuciatnek, tau͡gaam anirturyarturluki.” Allanun-llu nunanun ayagtut.

Elitnaurauyulriik Naspaamallrak

57Ayainanratni-llu yuum qanrutaa, “Maligtaqunaamken ayallren tamalkuan.” 58Jesus-aam-llu qanrutaa, “Kaviaret igtengqelartut, yaqulget-llu unglungqelartut, tau͡gaam Yuum Qetunraan qamiquni nekaitaa.” 59Alla elliin cali qanrutaa, “Maligesnga.” Tau͡gaam qanertuq, “Ataneq, ciumek atamnek tungmagciyarturraarcessnga.” 60Tau͡gaam qanrutaa, “Tuqumalriit ilameggnek tungmagcikilit, elpet tau͡gaam, ayakina qaneryariurluten Agayutem angayuqauvianek.” 61Allam cali qanrusmia, “Maligciiqamken, Ataneq, tau͡gaam tua-ingunrituurcetraarnga ilamnek.” 62Tau͡gaam Jesus-aam qanrutaa, “Yuk nunamek itumcissuutem epuanek tegumiarluni kingyalria Agayutem angayuqauvianun atuunrituq.”

Currently Selected:

Luke 9: YPK

Highlight

Copy