Gɛlaɠaa 1
1
Kili-Mąąhəɠɛɛ pa mɛ̨nį
1Nwɛ́li kɛ mąą mun Teofilə, ɉɛɓɛ́ dɔlɔɔi ŋá bɛ̨ɛ̨, ɉu ɓə, gólóɠaai da galanŋaai Jesus ə gɛ, ə həɠə gɔɔ tɔɔi lɔwai ɓa ə həli la yiihu ɓa, gəlee kaa laa, 2ə mą kɛ, ə lɛɛ ɉu ə həli la ɲələi ə tɛ la yələkɔlɔn ɉu mą, yili kəlee ɓə ŋį́ bɛ̨ɛ̨. Gɛɛ hvo kɛ tɛi yələi, Kili-Mąąhəɠɛɛ ŋą huwalawala háálai, nuą ŋɛ̨i ə di həɠə ɉu ə di kɛ a nwɔ kɛlaɠaa, ə di kili ɲą pono, ə di tɔɔ. 3Ɉaa pulu, a kulɔ haaɓɛlaa lɔwai, ə gbɔɔ lɛ nwɔ kɛlaɠaa diɛ a pələ huwu tamąą, hvóló pow nąąn ɲee mu, ə gɛ, di nwun mɛ̨nį kaa a tɛ̨ą, yɛ di kalan a Yálá ŋą tɔɔlaa mąą mɛ̨nį. 4Yələ ta, da diɛni di kɛi kɔ̨nɔ̨n mįi gee ɓa, yili pulu, ə di liɛwoo kɛ, yɛ diɛ: «Ká hvo ká mąą kwɛa Ɉerusalɛmə ɓa, kɛlaa, ka lɛɛ laa, ə lɛɛ ɉu, mɛ̨nįi Ną́n ə naa kwəlanmo, yai ŋį́ mąą mɛ̨nį ɓo kaa, ka mąą kpɔn. 5Ɉaan ə nuą mąąwaa yái, ɉu hvo kwɛa li, di kaa pai ká mąąwaai a Kili-Mąąhəɠɛɛ.»
Jesus ə tɛ mɛ̨nį yələkɔlɔn ɉu
6Galan nɛa ɲąąkpɔn ŋąąi kɛ gwɛlɛ, di mąąni kɛ diɛ mą: «Ną́mu! Akɛti, nąąlɔwai ɓə ə́ kaa pai Israɛlə nwɔ tɔɔlaai heei la?»
7Jesus ə di woo ŋąą pənə yɛ diɛ: «Yii hvilɛn na ɲələi ti kɔ́lɔn mɛ̨nį ɓa, ka wɔɔ naa hvəli, Ną́n yaa kpinįi ɓə ɲələ kɔlɔn, ə ɉee a nwɔ Hééɓolaa. 8Kɛlaa, ka káá pai huwalawala hɔlɔɓoi, ɓɛlɔwai Kili-Mąąhəɠɛɛ a yɛɛ la ka mɛ̨i. Nąąlɔwai, ka kɛ kɛa a nwɔ́ kɛlaɠaa, kaa mą́ą́ mɛ̨nį ɓo: Ɉerusalɛmə, Ɉude lɔi hu nąą kəlee, ə həli la Samari, yɛ li kpɔ la lɔi kpəlai.»
9Jesus kpɛɛ kɛa a nwooɠaa ti ɓoɔ diɛ, ə muhəɠə yɛ tɛ yələkɔlɔn ɉu, di ɲɛ̨i ə lɛɛ mą tulɔ kpinįn ə noo diɛ.
10Jesus liɛ pulu, di ɲɛ̨i ə kɛ lɔ a ɉeɛ ɲələ kpala; nąąlɔwai, kpɔlɔɔ ŋąą ɓa, nu hveelɛ di di kpɔɔ lɛ diɛ, həɠə kwɛlɛɛ yɛ ɓo diɛ, 11di mo galan nɛa ti diɛ, diɛ kɛ diɛ: «Galile nuą, lə mɛ̨nį ɓa ka káá lɔ ɓɛ, ka ɲɛ̨i heɛ ɲələ kpala? Jesus ŋɛ̨i ka ɲɛ̨i ə lɛɛ mą ə tɛ yələkɔlɔn ɉu, bələi lɔ ti ə tɛ la, bələ lɔ ɓə gaa pai pai la.»
Gɛla pow kɔw hveelɛi
12Ɲee ti galan nɛa di kɛ donna Jesus yɛ tɛ yələkɔlɔn ɉu naa ɓa kɛ a Olivə-yee; ɲee ti mąą hvo kɛ kwɛa li Ɉerusalɛmə ɓa, di lɔwai hiɛ a pɛli kɛi a pələ kələn dɔ̨nɔ̨. Galan nɛa di həɠə kɛa ɲee ɓa, di pa taai. 13Pai di mo, ɲələi-pɛlɛ́i di kɛi di ŋąąkpɔn mu a bɔlɔ, nąą ɓə di lɔ laa. Nuąi kɛ laa diɛ ɓaa: Piɛrə, Ɉaan, Ɉakə da Andre, Filipə da Tomasə, Bartelemi da Matie, Alfe lon Ɉakə, Simɔn nɔi-lon, da Ɉakə lon Ɉudə. 14Di kəlee di woo tɔɔi ə kɛ tanɔ̨n, diɛ di ŋąąkpɔn, diɛ Yálá hvɛli da nɛ̨ą taɠaa, ə lɛɛ, da Jesus nee Mari, ə mą kɛ Jesus gaayɔwɔɠaa.
Matiasə kɛ mɛ̨nį a Ɉudasə mąąhvalən
15Laa na nuąi kɛ di ŋąąkpɔnŋąą laa, di kɛ a nu nwun dɔ̨nɔ̨ nu pow hveelɛ. Ɲələi ti, Piɛrə ə muhəɠə ə tɔɔ di lɔwai yɛ diɛ: 16«Ną́n nonnii, mɛ̨nįi Kili-Mąąhəɠɛɛ ə mo ɉɛɓɛ́ mąąhəɠɛɛ hu, hvo kɛli kɛ bɔ mɛ̨nį ə kɛ, yai ə bu Davidə la yɛ hvilɛn na Ɉudasə ɓa, yaai tɔɔ nuą tɔwɔ diɛ pa Jesus hon ɉii. 17Ɉudasə tii ə kɛ a gu ta. Gwa diɛni kəlee ɓə di gólói ŋɛ̨i tɛɛ gu pɔ. 18Yaan nwąnąlɔɔ walii ti ə ɉɔlɔɓo, ə li ə lɔi ya la, nwɔ lɔi ti ə ɲá, yaa tɔlɔɔ ɓə haa laa; ə too, goo ə ɓɛla, gwəi hɛnŋąa kəlee di kulɔ di pu nɔi ɓa. 19Ɉerusalɛmə nuą kəlee di mɛ̨nį ti bələ mɛ̨n. Di nɔi ti laa hee ‹Hakɛldama› yili mukulaa ɓaa: ‹Ɲąmą lɔi›. 20Yaan, mɛ̨nįi bɛ̨ɛ̨ Yálá mąątɛnɛ̨ wələ hɛɓɛ́ hu, ya ka, diɛ mą:
«‹'Nwɔɔ pɛlɛ́i ə lɛɛ aa gboloon, nu hvo lɔ mu.›
«Bɛ̨ɛ̨ nwɔ̨nɔ̨ ɉɛɓɛ́i ti naa ta yɛ mą:
«‹Nu takpɛli ə tɔɔ dɔɔi.›
21«Nuąi gwa diɛni gu kɛli lɔ, guɔ kulɔ, gwa Ną́mu Jesus ni, 22ə gɔwɔ tɔɔ ɓɛlɔwai Ɉaan mąąwaa la, ə həli la ɓɛlɔwai ə tɛ la yələkɔlɔn ɉu, mą, hvo kɛli nu ta ə hɔlɔɓo nuą ti lɔwai, ə too gu pɔ, ə kɛ a Jesus nwun mɛ̨nį mąą kɛla ta.»
23Nu hveelɛ ɓə di di yee lɛ diɛ; dɔ̨nɔ̨ ɓaa: Ɉosɛfə, yai da kɛ mą: Barsabasə, naa mɛ̨i hee ɓa kɛ a: Ɉustusə. Veelɛnąą ɓa kɛ a: Matiasə. 24Yili pulu, nuą kəlee di bɛlɛ gee ɓa di Yálá hvɛli, diɛ kɛ mą: «Ną́mu Yálá, yɛ́i ə nu lii hu mɛ̨nį kɔ́lɔn, nu hveelɛi ŋɛ̨i, dɔ̨nɔ̨ həɠə ɉu, 25ə gɛ, mąą nu ə kɛ a Ɉudasə mąąhvalən, ə́ diɓoi ŋɛ̨i ə́ dɛɛ ku pɔ ɉu; yaai Ɉudasə ə nąą lɛɛ laa, yɛ li ɓɛi gaa bɔ.» 26Di gbɛɛn bili, gbɛɛn ə Matiasə hon, ə kɛ a Ɉudasə mąąhvalin. Ə too gɛla pow kɔw tanɔ̨n pɔ, ə di laa kulɔ.
Currently Selected:
Gɛlaɠaa 1: BKPDCG
Highlight
Share
Copy
Want to have your highlights saved across all your devices? Sign up or sign in
