Gɛlaɠaa 3
3
Di kpɛlɛɠɛlɛn ɲɔ̨n gɛ mun da ɓalo
1Hvóló mąąlaa pɛlɛ kɔ́n nįnįn da wolo kwɛa, Piɛrə da Ɉaan də li Yálá hee pɛlɛ́ mu Yálá hvɛli mɛ̨nį ɓa. 2Yálá hee pɛlɛ́ naaləi yii kɛi kɛ mą: Bɛlɛ́ laaləi lɛlɛɛ, hulɔnu ta ə kɛ laa heeni, di gaa lɔ gbɛlɛɠɛlɛnŋąą. Hvóló kəlee, di kɛi gbəŋə diɛ pa diɛ ɉee laa, ə gɛ, nuą daa kɛi lɔ Yálá hee pɛlɛ́ mu, yɛ wali hvɛli diɛ. 3Nui ti ə Piɛrə da Ɉaan di kaa diɛ lɔ, ə di hvɛli, yɛ diɛ: ka gɔ́! 4Piɛrə da Ɉaan di di ɲɛ̨i hee kpɔ mą hįį, yili pulu, Piɛrə yɛ ɉulɔnui ti ɓa: «Ə́ ɲɛ̨i hee kuɔ!»
5Ɉulɔnui ti ə ɲɛ̨i hee kpɔ diɛ a nɛlɛɛ; mąąhɔlɔɓo, ə kɛ gwəi yɛ kɛ di kaa pai hɛn da tɛɛi bɔ. 6Piɛrə ə mo kɛa mą, yɛ mą: «Wali hvo ɲə́i, hɛni hvo ɲə́i, kɛlaa, yii gaa ɲə́i, gáá dɛɛi ə́ pɔ. Ya ɓaa: Jesus Kristə Nazarɛtə mun naa hu, ə́ muhəɠə, ə́ hiɛ!»
7Yili pulu, Piɛrə ə ɉon a mamįiyee, ə ɉaŋąn ə dɔɔ. Ɲąąɓa, gɔwɔ nwąną mun ti kɔ́wɔɠaa huwalawala, 8ə pili yələi ə hvilɛn, yɛ hiɛ da gɛlaɠaa di lɔ Yálá hee pɛlɛ́ mu, yɛ pili yələi, yɛ Yálá laa tɛ, yɛ ɉɛɠɛɛɓo. 9Nu kpului ti kəlee di gaa yɛ hiɛ, yɛ Yálá laa tɛ, yɛ ɉɛɠɛɛɓo. 10Ɓɛlɔwai di gɔlɔn na diɛ, ɉulɔnui ti a kɛ heei Yálá hee pɛlɛ́ naaləi lɛlɛɛ ɓa yɛ nuą hvɛli yaa lii, ɲɔw ə lɔ nu kəlee hu, di kwəi ə pili diɛ mɛ̨nį ti kɛ, mąą mɛ̨nį ɓa.
Piɛrə woo hukulɔ woo
11Yɛ bələi ɉulɔnui ti hvo kɛi kɛa həɠə la Piɛrə da Ɉaan di pului, nuą kəlee kwəi piliɛ diɛ, di kpulun diɛ pa Piɛrə da Ɉaan di pɔ, ɓɛi da kɛ nąą laa ɓaa: Salomɔn yəi ɲįmąn mu. 12Nąą kaai Piɛrə ə mo, ə mo nu kpului ti ɓa, yɛ diɛ: «Israɛlə nuą, lə ɓə kɛ yai ka ɲɛ̨i kpanwoɔ lɔ kuɔ hįį, yɛ kuɔ ɓə kwa gɛ nui ŋɛ̨i yɛ hiɛ; ká ɲɛ̨i kpawoɔi lɔ kuɔ yɛ ku hvaŋą awala kɛ tii, ku wɔ Yálá mɛ̨nį kɛ pələ ɓə a gɛ, nui ŋɛ̨i yɛ hiɛ? 13Abrahamə, Isaakə da Ɉakɔbə di nwɔ Yálá, gu nąnni di wɔ Yálá ə nwɔ tímun Jesus ɲɛ̨i pono, a yaa ti ka ɲąɓalɔ mą, ka gwɛlɛ Pilatə ɓa, bələi mąn yili ə kɛ la bɔ, ə ɓo la ma. 14Ká lənə Mąąhəɠəmun tələnmoɔ ɓa, ɛlɛɛ, kaamun ká kɛɛkalamun ɉu hvɛli, di dɛɛ ka pɔ. 15Bələ ɓə ka yɛnɛ̨ɛ̨ Ną́mu paa la. Kɛlaa, Yálá ə gulɔ haaɓɛlaa lɔwai, a vulú; ku kaa a mąą kɛla. 16Ku kilitɔɔ mɛ̨nį Jesus laa ɓa ɓə gɛ, Naa ti yɛ ɉulɔnui ŋɛ̨i ɓalo, yaai ka káá gaai, kaa ɓo a gɔlɔnŋąą. Nu kilitɔɔ mɛ̨nį Jesus laa ɓa ɓə gɛ ɉulɔnui ŋɛ̨i kɔ́lɔi yɛ pono kpɔ la tɛ̨ɛ̨tɛ̨ɛ̨, yɛ bələi ka káá gaai la.
17«Kɛlaa yaamun, nąn nonnii, gílí kaa ɉu gɛ́ ká tuwɔ́ tii, ká tɛɠii, ə mą kɛ ka ɲɛ̨itɔwɔ nuą. 18Kɛlaa, mɛ̨nį wɔlɔ Yálá ə mo Yálá kwəi mɛ̨nį hukulɔ nuą laaləi, ya ka ti bɔ mɛ̨nį aa kɛ; yaai ə kɛ mą: Nuą Nwun mąąɓomun Yálá ə naakwɛlanmo, hvo kɛli kɛ ə mɔ̨nɔ̨ mį́į́. 19Yili ɓa, ka ka túwɔ́ pələ mąąhvalin, ka tinɛ̨n ka pa Yálá pɔ, ə ka wɔ nɛ̨ŋɛ̨nŋaai waa. 20A kɛ ti, Ną́mu Yálá kaa pai hvoló lɛlɛɛɠaa hɔɔi ka mɛ̨i, a ɲələi gaa pai Ɓalomun Jesus tɛɛi la, yai ə ɉee a ka wɔɔ. 21Hvo kɛli yələkɔlɔn ə gbɛa ɲee hee mu, ə lɛɛ ɉu, mɛ̨nįɠaai wɔlɔ Yálá ə bu gwəi mɛ̨nį hukulɔ nuą mąąhəɠɛɛɠaa la, diɛ mo, gəlee ə pu nįnɛ̨ kɔlɔi. 22Moisə ə wɔlɔ kɛ diɛ: ‹Nąmu ka wɔ Yálá, kaa pai Yálá kwəi mɛ̨nį hukulɔ mun da tɔɔi, ə pa ka pɔ, yɛ pələi gáá la, yɛ ɓo a ka huwu ta, yii lɔpee gaa pai moi, ka káá pai ka wəli tɔɔi ma. 23Nui lɔpee a wala nwəli tɔɔ Yálá kwəi mɛ̨nį hukulɔ mun ti woo ɓa, da naa kulɔ nɔi lonnii lɔwai.› 24Yili pulu, ə gɔwɔ tɔɔ Samuɛlə ɓa, yɛ li la Yálá kwəi mɛ̨nį hukulɔ nuą yiiɠaa ti diɛ, di kəlee, volói ŋɛ̨i ɓə di kɛi mąą mɛ̨nį ɓo. 25Ka káá a Yálá kwəi mɛ̨nį hukulɔ nuą lonnii, da mįnɛ̨i Yálá da ka nąnni di ɉəɠə ɉu lonnii. A ɲələi ə kɛ la Abrahamə ɓa: ‹Yɛnɛ̨ɛ̨ nu huwu kəlee kaa pai lúwɔ́ hɔlɔɓoi ə́ huwu háálai.› 26Ka mąą mɛ̨nį ɓə gbɛa gɛ, Yálá yɛ nwɔ tímun həɠə ɉu, yɛ dɔɔ ka pɔɔli, yɛ lúwɔ́ too káá, yɛ ka tɛitɛi ka həɠə ka wɔ túwɔ́ pələ ɲɔnŋaa pulu.»
Currently Selected:
Gɛlaɠaa 3: BKPDCG
Highlight
Share
Copy
Want to have your highlights saved across all your devices? Sign up or sign in
