Ɉaan 15

Jesus ɓə gaa a nwulu kpinį

1Jesus yɛ diɛ: «Ɲą́ą́ ɓə gáá a ɉihɛn nwulu kpinį, Ną́n yɛ ɓo a ɉihɛn nąmu. 2Nwónwoi lɔpee hva ɓa, Ną́n a dee mą́ą́. Yii nwɔ̨nɔ̨ a kɛi ɓai, a naahɔnmo, əgɛ, ə ɓa kɛnɛ̨. 3Nwooɠaa ŋɛ̨i gáá moi kaa, a ka mąą həɠə. 4Ka kanąn mą́ą́, yɛ bələi gánąn ɲąą la kaa. Bələi lɔ wulu wonwo hva ɓa la gbɔɔ ɓa, hvɛɛ a kɛ a ganąn ŋąą nwulu ɓa, kaa kpɛli mąn, ka hva pɛli ɓai hvo kɛli ka kanąn mą́ą́.

5«Ɲą́ą́ ɓə gáá a nwulu, kaa ɓo a nwonwoɠaa. Nui a kanąn mą́ą́, ɲą́ą́ gbɛli ŋą kanąn mą, a ɓa a damąą. Mąąhɔlɔɓo, ka wala kanąn mą́ą́, ka hva pɛli mɛ̨nį lɔpee ta kɛi. 6Nui a wala kanąn mą́ą́, da bili ɲɛnɛ̨ɛ̨, yɛ wulu wonwo a kulɔ mą, diɛ gɛ a kwɛi. 7Ka kanąn mą́ą́, nwóóɠaa kili ə lɛɛ ka ŋą, yii lɔpee ka mąąkpaan gaa mą, ka vɛli ka ɉɔlɔɓo. 8Yii a Ną́n mąąwiɛ ya ɓaa: ka ɓa a damąą, kaa ɓo a nwɔ kalan nɛa. 9Yɛ bələi Ną́n aa nwɛ́li la kɛ kɛ, pələ kpɔlɔ ɓə ŋą́ą́ ka wɛli la kɛ la. 'Ka lɛɛ nwɔ wɛlikɛmąąlaa hu. 10Akɛ ka nwɔ́ liɛwooɠaai pɔ mɛ̨nį kɛi, ka ka pai lɛɛi nwɔ́ wɛlikɛmąąlaa hu.

11«Ŋą́ yili ɓo kaa, ə gɛ, nwɔ́ kwəinɛ̨ɛ̨ ə kɛ ka yəi, ka wɔ kwəinɛ̨ɛ̨ laa ə kulɔ. 12Nwɔ́ tíɓoi ka: 'Ka ka kee wɛli la kɛ yɛ bələi ŋį́ ka wɛli la kɛ la. 13Wɛli kɛ mąą laa ta hva tɛɛ yii nu a haa la mɛlaa mąą mɛ̨nį ɓa mą. 14Yii ŋį́ ka tí la, ka gɛi, kɛ tii mɛ̨́laa ɓaa kaa. 15Va kɛa ka təli a luwɔɠaa, mąąhɔlɔɓo, luwɔ hvo nąmu nwɔ kiliŋąhiɛ kɔ́lɔn, gáá pai kɛa ka laa heei a mɛ́laa, mąąhɔlɔɓo, mɛ̨nįɠaai ŋį́ həɠə la Ną́n pɔ, ŋą́ą́ gəlee lɛ kaa. 16Kaa hvəə ɉə́ɠə́ ɉu, ɲą́ą́ ɓə ka həɠə ɉu, ŋį́ ka kɛ a nwɔ́ tínuą, ə gɛ, ka ɓai, ə lɛɛ ka yəi; ya ɓə a gɛ, yii lɔpee ka vɛli Ną́n mą náá hu, ə dɛɛ ka pɔ. 17Yii gáá ka tíi la, ya ɓaa: ka ka keeni wɛli la kɛ.

18«Yɛnɛ̨ɛ̨ wɛli kpɛɛ mąą laa kulɔ a kaai, ka gɔlɔn kaa, ɲą́ą́ ɓə nwɛ́li ə gbɛa kpɛɛ mą. 19Ka kɛ kɛ a yɛnɛ̨ɛ̨ nwɔɔi, yɛnɛ̨ɛ̨ ə li ka wɛli la kɛ. Nuąi di kaa a yɛnɛ̨ɛ̨ nwɔɔ, diɛ ɓə yɛnɛ̨ɛ̨ a di wɛli la kɛ. Kɛlaa, ɲą́ą́ ka ɉəɠə ɉu, ŋą́ą́ ka kulɔ yɛnɛ̨ɛ̨ hu. Ka hvo kɛa a yɛnɛ̨ɛ̨ nwɔɔ, mɛ̨nįi yɛnɛ̨ɛ̨ hvo pai ka wɛli la kɛi la yaa li. 20Nwoo tii ŋį́ mo kaa, gɛ́ kɛ kaa: Luwɔ hvo kɛnɛ̨ li hvo tɛɛ nąmu ɓa, ka ka kili lɛɛ ɉu. Akɛ yɛnɛ̨ɛ̨ nuą di mɛ́lɛkpɛɛ mą́ą́, di kaa pai ka ɓɛlɛkpɛɛi kaa. Akɛ di nwóó hon, di kaa lɔ pai ka woo hon ɉi. 21Kɛlaa, di kaa pai mɛ̨nįɠaa tii kəlee kɛi a kaa, náá mąą mɛ̨nį ɓa. Mąąhɔlɔɓo, nui dɔ́ɔ́ di hvo gɔlɔn. 22Ŋą́ wala kɛ pa, Və́ mɛ̨nį ɓo diɛ, nɛ̨ŋɛ̨n vəli kɛ diɛ; kɛlaa yiihu kɛa, woo hukulɔ ta lɔpee hvo di la, di wɔ nɛ̨ŋɛ̨nŋąą mąą mɛ̨nį ɓa. 23Nui nwɛ́li a kpɛɛ mą, a kɛ tii Ną́n nwɛli aa kpɛɛ mą. 24Ə li kɛ və́ pa, və́ kpalo mɛ̨nįɠaa kɛ di lɔwai, yii nui lɔpee ta hva pɛli gɛi, nɛ̨ŋɛ̨n və li kɛ diɛ. Kɛlaa, yiihu kɛa, daa mɛ̨nįɠaa tii kaa, diɛ ku wɛli kpɛɛ mąą laa kulɔ a kuɔ, ɲą́ą́ kwa Ną́n. 25Kɛlaa, yili ə kɛ tii, ə gɛ, mɛ̨nįi bɛ̨ɛ̨ di wɔ tɔ́n ɉɛɓɛ́i hu naa ə hon, yaai da kɛ mą: ‹Daa nwɛ́li kpɛɛ diɛ, nwun və mą.›

26«Ka mąąkɔ̨nwɔ̨mun a pa kɛa pai, yai gáá pai dɔɔi yɛ həɠə Ną́n bɔ, yai a tɛ̨ą Kili, ya ɓə pai mą́ą́ kɛla hvaa ɓoi. 27Ɛlɛɛ, kaa kpɛli, ka káá pai mą́ą́ kɛla hvaa ɓoi. Mąąhɔlɔɓo, ə həɠə gɔwɔ tɔɔ yələ ɓa, ə həli la yiihu ɓa, ka káá lɔ bɔ́.»

Currently Selected:

Ɉaan 15: BKPDCG

Highlight

Copy