Ɉaan 20
20
Jesus ə nwun mɛ̨nį
(Matie 28.1-8; Markə 16.1-8; Lukə 24.1-12)
1Nɔwɔ kuu voló tɔlɔɔ yələ, yələ ɓoi lɔwai, kɛɛ yɛ ɓo ni hvili-hvili, Mari Magdala mun ə li Jesus kámą la. Ə gwɛni kaa ɉəɠɛɛ gámą laaləi, 2ə gilɛ həɠə yɛ li Simɔn Piɛrə pɔ da galan non ŋɛ̨i nwɛli ə kɛ Jesus ɓai, yɛ diɛ: «Daa Ną́mu kulɔ gámąi, ɓɛi di naa la ku hvo nąą kɔ́lɔn.»
3Piɛrə da galan non tii di kulɔ diɛ li gámą la pələ. 4Di nu hveelɛi di kɛi kpɔ gilɛ həɠə, kɛlaa, galan non yii tii ə kɛi gilɛ həɠə yɛ tɛɛ Piɛrə ɓa. Yaa tɔlɔɔ ɓə həli gámą la. 5Ə mąą pɛlɛ ə gámą hu kaa, ɉəɠəi tii kɛ gbinįn ŋąą Jesus ɓa ya lɔ ɓə kɛ laa. Kɛlaa, yaa tii hvo lɔ gámąi. 6Piɛrə ə pa ə tɛɛ mą ə lɔ gámąi, ə ɉəɠə kaa laa puuni. 7Ə mą kɛ yii ŋɛ̨i kɛ ɲiliɛ Jesus nwun mai. Yili puɔ kɛ pələ takpɛli. 8Nąąlɔwai ɓə kɛa galan non yii tii kɛ pa tɔwɔ ə lɔ la gámą hu, yaa kpɛli ə naa kaa, ə laa na. 9Yaan galan nɛa di hvo ni kɛ Yálá laawoo ŋɛ̨i kɛ diɛ: Jesus kaa pai muhəɠəi ə kulɔ haaɓɛlaa lɔwai; di hvo nii kɛ ŋąą kaa li. 10Yili pulu galan nɛa hveelɛi tii di pənə di li di pɔɔli.
Jesus ə gbɔwɔ lɛ Mari Magadala mun ma
(Matie 28.9-10; Markə 16.9-11)
11Mari ə kɛ tɔɔni gámą la, yɛ wɔlɔ, yɛ nwun mąą laa gámą hu. 12Ə malaka hveelɛ kaa həɠə kwɛlɛɛ yɛ ɓo diɛ, diɛ ɓo heeni kpɔlɔ ɓɛi Jesus powa ə kɛ laa laani. Dɔ̨nɔ̨ heɛ nwun na pələ, dɔ̨nɔ̨ heɛ gɔwɔ la pələ. 13Diɛ mą: «Nɛ̨ɛ̨nu, lə mɛ̨nį ɓa ə́ kaa wɔlɔi?»
Ə di woo pulu pənə yɛ diɛ: «Daa Ną́mu kulɔ ɓɛ gámą hu, ɓɛi di naa laa, və́ nąą kɔ́lɔn.»
14Ə lɛɛ lɔ moi tii, ə tinɛ̨n ə Jesus kaa tɔɔni gwɛlɛ, kɛlaa hvo gɔlɔn. 15Jesus yɛ mą: «Nɛ̨ɛ̨nu, lə mɛ̨nį ɓa ə́ kaa wɔlɔi? Gbɛɛ ɓə ə́ kaa gwɛlii?»
Ə kɛ Mari kwəi, ɉihɛn ɲɛai tii mɛ̨i kaa mun ga tii mąąningɛ; yɛ mą: «Ną́mu akɛ yɛ́ ɓə gulɔ ɓɛ, ɓɛi ə́ naa laa nąą lɛ mą́ą́ ŋą li ŋį́ ɉəɠə.»
16Jesus yɛ mą: «Mari!»
Mari ə tinɛ̨n yɛ Jesus ɓa Ɉuifə woo hu: «Rabuni» mukulaa ɓaa: Mąąkwɛli kɛmun.
17Jesus yɛ mą: «Hvó kanąn mą́ą́, mąąhɔlɔɓo, və́ nii tɛ li Ną́n bɔ yələi. Kɛlaa, li ya Ną́n nonnii kaa ə́ mo diɛ, yɛ diɛ: Gáá li Ną́n da ka Nąn bɔ, nwɔ́ Yálá da ka wɔ Yálá pɔ.»
18Mari Magdala mun ə pa ə mo galan nɛa diɛ yɛ diɛ: «Ŋą́ą́ Ną́mu kaa!»
Mɛ̨nįɠaa kpɔ Jesus ə mo mą, ə gəlee hukulɔ kɛa diɛ.
Jesus ə gbɔwɔ lɛ nwɔ kalan nɛai diɛ
(Matie 28.16-20; Markə 16.14-18; Lukə 24.36-49)
19Voló tɔ̨nɔ̨i tii hu, a nɔwɔ kuu voló tɔlɔɔ yələ, yələ wilii pɔ, galan nɛa di kɛ pɛlɛ́n naakpulɔɔ diɛ. Mąąhɔlɔɓo, di kɛi ɲɔ̨w Ɉuifə nwun nąmįną diɛ. Jesus ə lɔ, ə tɔɔ di lɔwai, yɛ diɛ: «Liilaa ə kɛ ka pɔ.»
20Gɛɛ nwooi ti ɓoi diɛ, ə ɲee ŋą lɛ diɛ da bɛlɛi. Ɓɛlɔwai galan nɛa di Ną́mu kaa la di kwəi ə nɛ̨ɛ̨ kpɔ kɛnɛ̨. 21Jesus ə pənə ə mo diɛ yɛ diɛ: «Liilaa ə kɛ ka pɔ. Bələi Ną́n ə dɔ́ɔ́ la, ŋą́ą́ gbɛli gáá ka tɔɔi ti.»
22Ə kpɛɛ lɔ a nwooi tii ɓoɔ, ə nɔ̨ɔ̨ pu diɛ, yɛ diɛ: «Ká ká yee hee Kili-Mąąhəɠɛɛ mu. 23Nui lɔpee ka gɛ nɛ̨ŋɛ̨n mąąhvaalɛɛ, mąąhvaa a lɛɛ. Nui ka wala gɛ nɛ̨ŋɛ̨n mąąhvaalɛɛ, mąąhvaa hva lɛɛ.»
Jesus da Tomasə
24Galan nɛa pow kɔ́w hveelɛ tii tɔ̨nɔ̨ ə kɛ laa diɛ kɛ naa ɓaa: Tomasə, naa ta lɔ ɓaa kɛ a Yonwąąmun, hvo kɛ mɛlaa pɔ ɓɛlɔwai Jesus ə paa la. 25Galan nɛa yiiɠaai tii di di woo hukulɔ mą diɛ mą: «Kwaa Ną́mu kaa.»
Kɛlaa, ə di woo pulu pənə yɛ diɛ: «Akɛ ŋą́ wala ɲéé lɔ bɛlɛi bala kpɔlɔɔn ɉu, vá laa na.»
26Lɔwɔ tɔ̨nɔ̨ tɛɛ pulu, galan nɛa kəlee ŋąąkpɔn ŋąąi kɛ bɛlɛ́n da Tomasə ni. Bɛlɛ́ɠaa kəlee laakpulɔɔ diɛ, Jesus ə lɔ ə tɔɔ di lɔwai yɛ diɛ: «Liilaa ə kɛ ka pɔ.»
27Yili pulu Jesus yɛ Tomasə ɓa: «'Ə́ yeekpiɛ lɛɠɛ ɓɛ, ə́ ɲéé ɲąɠaa kaa, ə́ laa na laa kɛ.»
28Tomasə yɛ Jesus ɓa: «Ną́mu da nwɔ́ Yálá.»
29Jesus yɛ mą: «Gáái ə́ mo, ya ɓə gɛ yɛ́ laa ná; kɛlaa, nuąi di hvo gáá li, diɛ laa ná, di nwun na nɛ̨ɛ̨i.»
Ɉɛɓɛ́ ŋɛ̨i nwun
30Jesus ə kpalo mɛ̨nį tamąą kɛ nwɔ kalan nɛa ɲɛ̨i ɓa, yili kəlee hvo pɛ̨ɛ̨ li ɉɛɓɛ́i ŋɛ̨i hu. 31Kɛlaa, di yiiɠaai ŋɛ̨i bɛ̨ɛ̨ ə gɛ ka laa na ka diɛ: Jesus ɓə gaa a Kristə, gaa a Yálá Lon. Ɛlɛɛ ka laa na yɛnɛ̨ɛ̨i kpɛɛ hvo mą ka ɉɔlɔɓo naa hu.
Currently Selected:
Ɉaan 20: BKPDCG
Highlight
Share
Copy
Want to have your highlights saved across all your devices? Sign up or sign in
