Fulaa 11

Piɔ́m cuavaa tasea

1Mí Mɛlɛka dimul Moise aa: «I co vɛlɛ kpundɛ mɛɛlaa tuisi Faraɔnnɔɔ nda Esiptea coo. Te n malan pɛ naa ndu o laan vaŋ, o co niaa malɔɔ mì la kɔɛ. O co niaa bɛɛ tovɔɔ mì la faŋan o ndu lo le fɛɛn a fɛɛn. 2Lelan, soo o Israɛlla lo, ma dimul nda mì vanapɔnɔ oo vanapɔnɔ piɛi Esiptenɔ piaandu nda co nɛɛ pilɛ-o ɲɛm cɔwnun a volin humbon-ndon a n cɔwnun a sianion-ndon. Vanlaandua bɛɛ a bɛnda mà piɛi caaŋaa ndaa laandua Esiptea ɲɛm mun.» 3Mí Mɛlɛka yoola mí Esiptea ca Israɛlla ɲia taw-taw. Handɔɔ o kon coo, vana kúndàá bɛndoo Moise va o lɛŋnde Esipte len nin ni. Kandɔɔ a buɛyaa Faraɔnnɔɔ, kɔ bii a vanaa tɔ̀a Esipte kpede, ndáà nɔ bɛɛlen a Moise.

4Mí Moise dimi aa: «Mɛlɛka dimi aa a di-tɛɛndo, o co cɔnɔn mò kei o lɛŋnde Esipte len tɛɛn, 5mì poaa tasea a cɔlua piaandua tasea vi o lɛŋnde len nin kpow, kandɔɔ a po tase Faraɔnnɔ co masalen tosaa-o, po tase cɛ laandu co kpeyanndo cuvo-o, kɔ bii a cɔlu piaandu tase cɔloo kom-ndo. 6Yéélan la co isɔɔ o lɛŋnde Esipte len nin kpow, kabi bɛɛ yééla vaa lende la suu vɔ le, le fɛɛn a fɛɛn la suu lɛnin vɛlɛ lende le. 7Kɛ o Israɛlla lo, hali tunndo vana tuinin vanacieo busullo, te kon te cɔloo busullo le. Kon tosannin haliko mi la sina maa Mɛlɛka handu pɛɛngulan Esiptea nda Israɛlla tɛɛn.» 8Mí Moise cɔɔlu vɛlɛ dimi aa: «Paale len le tiiya pɛ, vanaa baalaa nɔmnda ha kpow a hunnin, mà del-la o labɛngunin, mà dimi aa: ‹Cua vanaa nɔmnda mì la kɔɛ›. O kon, i cuanin nda mì n kɔɛnnun.» Mí Moise fula o Faraɔnnɔɔ lo a kɔltuwvo taw.

9Mí Mɛlɛka dimul Moise aa: «Faraɔnnɔɔ yeŋnin nilan o sɔɛi niɛi mò bii ndi le. Kon kpow co tosan haliko mi vangala kpundɛlan Esiptea coo.» 10Faraɔnnɔɔ, Moise a Aarɔn o hɔl kpundɛlan ndan kpow la tosan ni. Kɛ mí Mɛlɛka kindi ndu Faraɔnnɔɔ nilan háá mó kɛɛ le Israɛlla malɔɔ faŋanndo o lɛŋnde ndɔlen nin.

Currently Selected:

Fulaa 11: BKG

Highlight

Copy

Compare