Fulaa 13

Tɔŋnda celen le kafo-hiavaa-coo

1Mí Mɛlɛka soaa o Moise lo, mó dimul ndu aa: 2«Poaa tasea a cɔlua piaandua tasea Israɛlla kpow, á bɛnda ma kɛsi nda a diandaa le ya Mɛlɛka. Kani po tase oo po tase vanalanɔɔ velu pɛ, cɔlu piaandu tase oo cɔlu piaandu tase cɔloo kom pɛ, le ya Mɛlɛka kan co ni.» 3Mí Moise dimul Israɛlla aa: «La loonun a paalen nden o kɔɔ, la va o cɛlen nin o lɛŋnde Esipte len nin, mí Mɛlɛka soli niaa lon a ba ndɔ kpaayaa. Lelan, la va pɛ kafo kon tosaa, la dia bulu toosian a lɛvɛnndo-o le. 4Hau niaa co fula o lɛŋnde Esipte len nin ni, o paangii Abib-e he nin. 5Lelan, lɔ́ɔ́ Mɛlɛka lueinin niaa o lɛŋnde Kanannda, Hitiia, Amoriia, Heviia a Yebusiia nin-ndo, lɛŋnde o yiilu fuɲaa niaa mamaa kpemaa le nda len yɔngoo len, lɛŋnde cɔlua a tɔlɔɔlan la naŋ nin taw-taw len, la bɛnda mì la tosa kafoo ho o paangii pilɛi he nin. 6O palɛi ndii ŋɔmmɛw bɛngu, la bɛnda mì la va bulu toosian a lɛvɛn too dioo. O paale ŋɔmmɛwndɔlen coo, la tosa kafoo le Mɛlɛka biiloo. 7Vana-vana bɛnda mò de bulu toosian a lɛvɛn too o palɛi ŋɔmmɛvii ken bɛngu. O lɛŋnde niaale len nin kpow, vana bɛnda mì vana saalun bulu toosian a lɛvɛnndo-o, te kon te lɛvɛnndo pila o laniaa lo le.

8Paale len le tiiya pɛ, la bɛnda mì la pɛɛku cuavaa niaa, mì la dimul nda aa: ‹Le tùú Mɛlɛka tosal naa dɛnɛ kɛndɔɔ telen naa n fula Esipte-o naa n co hee tosaa ni.› 9Maa mɛɛ ɲɛla co niaa layiyaa o laba a o n'tendu lan la co tɔɔmaseloo yɛ, lende duɲɛi he bɛnda ni mi i va tɔɔmasele loonanndo le niaa, haliko mi tɔŋ Mɛlɛka-o va niaa o lasondo. Kani ndu soli niaa Esipte a ba ndɔ kpaayaa ni. 10Vɔsi oo vɔsi, te paale len le tiiya pɛ, la tosa naamoo ho.

11Tuma Mɛlɛka lueinin niaa o lɛŋnde Kanaan-nden nin-ndo, mɛɛ o mɛnalan niaa a fuɲaa niaa mamaa yɛ, telen o yɔngunin niaa lɛŋnde kalalen-ndo, 12la bɛnda mì la yɔngu ndu poaa niaa tasea a cɔlua piaandua tasea niaa kpow. Le Mɛlɛka kan co ni. 13Le sofɛlɛa yɛ, la tiwba mì la baŋa nda#13.13 Cɔlu dindu Mɛlɛka o hɔl too sofɛlɔɔ va ni, lelan ndóò bɛnda le sálà baŋaa n'vanndaciee soli le Hala le. a saa téndóó, te kon te a cuin téndóó. Te la yeema yɛ le ndu baŋa le, la yem ndu kɛsei. Kɛ o hɔ́aa niaa tɛɛn, la bɛnda mì la baŋa poaa tasea. 14Te cuavaa niaa ɲuna pɛ niaa aa: ‹Le kɔlɔ yɛɛ niaa co yɛ dɛnɔɔ ho tosaa?› La mulul nda aa: ‹A ba ndɔ kpaayaa Mɛlɛka soli naa o cɛlen nin o lɛŋnde Esipte len nin ni, cɛa naa n va lon ni. 15Kani mɛɛ Faraɔnnɔɔ va baŋnɔnndo kɛɔ le naa malɔɔ kɔlan, mí Mɛlɛka diw poaa tasea a cɔlua piaandua tasea o lɛŋnde Esipte len nin kpow. Lelan naa n sòli cɔlua piaandua tasea sálàá le Mɛlɛka ni, mì n baŋa poaa naa tasea. 16Maa mɛɛ ɲɛla co niaa o laba a o n'tendu lan la co tɔɔmasele loonanndo le Mɛlɛka yɛ, lende sálàlan ndan la co ɲɛ loonanndo le niaa le loonɔnndo a ba kpaaya Mɛlɛka soli niaa Esipte-o o kɔɔ ni.›»

Mɛlɛka sim cuavaa ndɔa laci

17Mɛɛ Faraɔnnɔɔ mal yungoo Israɛl kɔlan, Hala muli nda hɔlla le keiyo a ba lɛŋnde Filistia le. Toɲaa, nɛi kon va nɛi bingio ni, kɛ mó dimi aa: «Taa kei pɛ a lon, mà sina maa cɔwla kàlà-kálàlan la co nda laci, siòònde co nda biyɔɔ mà muungun Esipte.» 18Le hee, mó muli nda hɔlla a ba lɛŋnde veselɛilen, a kpengii mɛmma ihɛlma makpɛ̀ndɛ̀an. Mí Israɛlla fula o lɛŋnde Esipte len nin a ɲɔɔn o ba taw#13.18 a ɲɔɔn o ba taw: Sɛbɛlan lapum la hivi fondaa ho aa «a nɔnndan ɲɛkɛndɛ-kɛndɛ», kon co dimio ni maa «o polan maa vanaa cɔw».. 19Mɛɛ nda cɛn kɔlan, mí Moise kɔa a paala Yosɛf lan. Kani mí Yosɛf ndóò veelu puapilɛa ndɔa sindɛ, mó dimul nda aa: «Hala vanin niaa ikɛi. Lelan, la mɛnan maa lɔ́ɔ́ niaa vanin kɔlan-ndo, la kɔanin a paala nilan.»

20Mí Israɛlla faŋan Sukɔt, má kɔannun, má kɔ kila dɔ́ɔ́ngɔ́ɔ̀ Etam o lɛŋnde veselɛilen dangalaa. 21Mɛlɛka va nda kɔlan laci ipala o tindile ikumnden nin le nda nɛiyo cɔmndo, icɔl-lɛ o va kɔlan nda laci o tindile leyinnden nin le nda ɲɔɔ teengiallo, haliko mi ndáà va kɔlan ipala a icɔl. 22Tindile ikumnden léè feŋan nda laci ipala oo ipala le, tindile leyinnden bɛɛ léè feŋan nda laci icɔl oo icɔl te.

Currently Selected:

Fulaa 13: BKG

Highlight

Copy

Compare