O Kandɔɔ 32
32
1Diimandɔɔ idiiyo púŋ, mí Laban kɔɔmian cuavaa ndɔa imamaa a cuavaa ndɔa laandua, mó dɔaw nda duaa. O kon kɔɔli, mó muungun o ndu lo.
Yakɔb yɔŋ siòònde le ciikanndo nda Esau
2Mí Yakɔb ndu bii nɛiyo le kɔlan o ndu lo. Mí mɛlɛkaa Hala-a hun ndu bɔŋaa. 3Mɛɛ o ce nda, mó yonda aa: «Nanu dɔ́ɔ́ngɔ́ Hala-o co ni.» Mó ke fonda kon diolan aa: Mahanaim (kon co dimio ni aa «Dɔ́ɔ́ngɔ́la tiɔnndan»).
4O kon kɔɔli, mó vim Esau bɛ ndɔ kiilaa o lɛŋnde Seir len nin, o dɛɛla balu Edɔm-ndo nin. 5Mo congun nda aa: «La kɔɛ pɛ, la kɔ dimul vana ni bɛndoo Esau aa Yakɔb vana nɔm baalaa dimi aa o Laban-ndo ndóò kɔɛ ni, ndu o lo o bɛngu coo ni háá telenndo ho. 6O sɔla nawva, sofɛlɛa, saa, cuinnda, buɛyaa piaandua a à laandua. Lelan o vem naa o nɔm ndo ni haliko ma cɛl ndu.»
7Mɛɛ kiilaa muungu o Yakɔb lo, má kɔ dimul ndu aa: «N kɔɛ mí n komal Esau bɛ nɔm. O co hunɔ̀ɔ́ nɔm diomɔ̀ɔ́ a vannda kɛmɛ lehiɔɔlu.» 8Mí siòònde bii Yakɔb taw, mó buulan. Mó piɔw vanaa va ndu o ba-a kundalan latiɔn, mó piɔw vɛlɛ cɔlua pɔmbɔa a á bɛndua va ndu o ba-a a ɲɔɔmɛɛa kpow. 9Kani nuaa o va dimio o kɔl nin ni aa: «Te Esau del pɛ kundaa pilɛ coo mò nɔla ndu, kundaa pilɔɔ ɲaanun.»
10O kon kɔɔli, mí Yakɔb piɛi aa: «Éé Hala Abraham fuɲa ni mamaa! Hala Isaak fuɲa ni-o! Nɔm dimul-la ni aa ya muungu vanaa nia o ibuŋ o lɛŋnde nilen nin, má tosal-la dɛnɛ kɛndɔɔ. 11Cɔ n ce ya ɲia-o a kɛndɛi n tosal-la vana nɔm baalaa-e co ibɔɔ, yáà bɛnda bɛɛ mì yáà sɔla dɛnɛ kɛndɛ vaa lende nɔm o ba le. Kani telen ya taŋ pee bɛndoo ho-o, Yurdɛn pɛɛn, tinda nuu kínɛí va ya o ba ni. Kɛ nihau, vanndacieea a cɔlua co ya o ba kundalan tan tiɔn. 12I tɛɛlun nɔm yandi, baŋa ya Esau bɛ ni o ba. Kani i co buulanndo yɔŋii o hun dii ya, mò diw vɛlɛ kalla a cuawva. 13Nduyɛ nɔm dimul-la ni aa: ‹I co nɔm dɛnɛ kɛndɔɔ tosal mì kuilul nɔm cuavaa-imamaa, mà va sɛ́lɛ́ maa sióónndon o mɛmma ihɛllan kɔngɔ, vana-vana nɔlanin nda cɔmndo le.›»
14Mí Yakɔb lɔl icɔl kon o fonda kon, mó hɛli ɲɛ ndóò yeema le Esau bɛ ndɔ yoo-o o ɲɛm va ndu o ba-on nin. 15Mó hɛli cuinaa laandua kɛmɛ lediin, cuinaa toovia bidiin, saa laandua kɛmɛ lediin, saa kóndóa bidiin, 16ɲɔɔmɛɛa komsaa beleyaa a cuavaa ndaa, navaa laandua belehiɔɔlu, navaa tovaa tɔ́, sofɛlɛa laandua bidiin a sofɛlɛa cuawva tɔ́. 17Mó sɔaa cɔlua kan buɛyaa ndɔa piaandua o ba a kundalan, mó dimul nda aa: «La hiow ya laci mì la mɛi tiŋndo tiŋ cɔlua kundala pilɛn-pilɛnnda tɛɛn.» 18O kon kɔɔli, mó sila buɛi ndɔ tasoo aa: «Te la bɔŋan pɛ niaa Esau bɛ ni mò ɲuna nɔm aa: ‹Nɛ̀ɛ́-nɛ̀ co yɛ vana nɔm bɛndoo? Kuɛɛ n co yɛ kɔlan? Nɛ̀ɛ́ nɔ yɛ cɔlua co nɔm haa laci-a?›. 19A mulul ndu aa vana ni bɛndoo co Yakɔb ni, vana nɔm baalaa pɛɛn. Cɔlua ha o yeema le nɔm yoo ni, nɔm Esau vana ni bɛndu pɛɛn. Ndu pila co hunɔ̀ɔ́ naa kɔɔli.»
20Mó sila buɛi diinndɔɔ a o yàándɔɔ a vanaa va kɔlan a cɔlua-a kpow lende. Mó dimul nda aa: «Te la bɔŋan pɛ niaa Esau-vaa, lende niaa soo o ndu lo ni. 21La dimul ndu vɛlɛ aa: ‹Yakɔb vana nɔm baalaa co hunɔ̀ɔ́ naa kɔɔli.›» Kani nuaa Yakɔb va yiyanndo o kɔl ndɔɔ nin ni aa: «Te o ce pɛ cɔlua ya yeema haa le ndu yoo-a ya laci, o co kɔllo ɲulul. O kon kɔɔli, ya pila koma fula niko ndu o hɔl. Bɔɔle mò cɛl mì sɔɔnguu ndu ikɛi.» 22Mí cɔlua o tuu kan le bɛ ndɔ yoo-a hiaw ndu laci, mí ndu pila lɔl-lɔ icɔl kon o dɔ́ɔ́ngɔ́ lon.
Yakɔb cɔlɔba nda Hala
23Icɔl kon, mó can, mó cua laandua ndɔa ŋiɔnda, buɛyaa ndaa laandua a poaa ndɔa tɔ́ a ò pilɛa, má taŋ pee pɔmbɔɔ Yabɔk, má kei o fonda mɛnndan ma yingila loo. 24Mɛɛ o cii nda pee kon tɛɛnguu, mó tɛɛnguu ɲɛ-ɲɛ va ndu o ba, 25mí ndu pila lo niko ndu pilɛ. O kon, mí vanndo pum koma lɔl cɔlɔbaa a ndu háá telen paale siaalen. 26Mɛɛ vana kon ce maa o ve le Yakɔb nɔla le, mó lɔaa ndu vongaa, mí paa lɔlu tum Yakɔb-o faŋan o boondei coo telen nda va cɔlɔbaa-o. 27O kon, mí langbanɔ kon dimul Yakɔb aa: «Mal-la mì kɔɛnnun, kani paalen le sɛ.» Kɛ mí Yakɔb mulul ndu aa: «I mel nɔm te. Fɔ mà dɔw ya fɔlɔn duaa.» 28Mí langbanɔ kon ɲuna ndu aa: «Vɛɛ n nɔ yɛ diolan?» Mí Yakɔb mulul ndu aa: «Diola nilan Yakɔb.» 29Mó dimul ndu aa: «Kandɔɔ hau, diola nɔmnda co lɛ aa Yakɔb le, nuaa n nɔ nin diolan ni aa Israɛl. Kani a cɔlɔba a Hala má cɔlɔba a vanndacieea, má tiw nda ba.»
30Mí Yakɔb dimul ndu aa: «Yandi, cɔm ya diola nɔmndan.» Mí langbanɔ kon ɲuna ndu aa: «Le yɛɛ n yeema yɛ le diola nilan sinaa?» Mó dɔaw Yakɔb duaa o fonda kon. 31Mí Yakɔb dimi aa: «I ce Hala hɔlla kpendekele mí va yoomu.» Lelan o ke fonda kon diolan ni aa Penuɛl (kon co dimio ni aa «Hɔlaa Hala-a»). 32Tuma o taŋ peo o fonda mɛnndan ma yingila loo Penuɛl-lo, mí paalen le sia. Yakɔb va kɔlan a tindaa o lɔloo coo le paa lɔlu tum nda faŋa ndu o boondei coo-o. 33Lelan, háá paalen nden, Israɛlla di visii co o bɔŋala lɔlu tumndo a caŋnda tɛɛn-nde le. Kani o visii ken Hala lɔɔ Yakɔb ni.
Currently Selected:
O Kandɔɔ 32: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
