O Kandɔɔ 43

Yakɔb cɛl le Bɛnyamɛn malɔɔ kɔlan Esipte

1 Yima fofolan ma va hiovɔɔ laci tuŋ o lɛŋnde Kanaan-nden nin. 2Mɛɛ yungu Yakɔb-o cii malun nda fula Esipte-on dio kpede, mí Yakɔb dimul poaa ndɔa aa: «La muungu Esipte mì la kɔ pindu naa baloo ɲɛ-pɔmbɔ.» 3Mí Yuda mulul ndu aa: «Langbanɔ co lɛŋnde len bollen-ndo dimul naa ndi kpéŋ-kpéŋ maa te naa n kue a pɔmbɔ naa le, hali mì naa n fula lɛ ndu o hɔl te. 4Lelan, taa cɛl pɛ mì n kɔɛ a Bɛnyamɛn pɔmbɔ naa, n kɔ pindul nɔm baloo. 5Kɛ taa cɛl mì n kɔɛ naa ndaa le, mɛɛ n kuenin tei. Kani langbanɔ kon dimul naa ndi kpendekele maa te n kue a pɔmbɔ naa le, n fúlà lɛ ndu o hɔl te.» 6Mí Israɛl fuɲa nda dimi aa: «Dɛnɛ yɛɛ niaa kondul-lɛ ya hoo? Le yɛɛ niaa dimul-lɛ langbanɔ kon maa la nɔ vɛlɛ pɔmbɔɔ?» 7Kɛ má mulul ndu aa: «Ɲuuniaa langbanɔ kon ɲuuniaa naa ni tɛɛ-tɛɛ o naa pila coo a o vanayan naan coo. Mó ɲuna naa aa: Fuɲa niaa co vɔ yoomu? La nɔ vɛlɛ pɔmbɔ celen? Mí naa bɛɛ n muli ɲuuniaala lan. N ve sina maa o dimulnin naa le ndu pɔmbɔ naa yoo le.»

8O kon mí Yuda dimul Israɛl fuɲa nda aa: «Pua, cɛl mà sɔɔ ya poombɔɔ o ba, mì n kɔɛ a ndu, haliko mi n baŋa yoomu naa. Te o co kon te, naa kpede n co piɔ́mndo sɔla. Kandɔɔ nɔm pila, naa, kɔ bii cuavaa naa, vuo naa kpede n co ndei! 9Poombɔɔ co va o ba nuu bɛngu. Ya n bɛnda ma ɲuna le sɔɛi ndɔɛi ni. Te i mingul nɔm ndu nanu le, te i cuu nɔm ndu le, mɛɛ ya haki kon co va coo nɔm o hɔl le lɔ́ɔ́-lɔ́ɔ̀ ni. 10Te náà n hun viw nanu a kiisanndo le, maa náà n muungu nin bɛmbɛ lediin.» 11O kon mí fuɲa nda dimul nda niko o mɛɛlulan aa: «Te mɛɛ tosaa celen co dɔ́ɔ́ le, mɛɛ i yeema mì la tosa ɲɛ pum: la cua ɲɛm vaan kɛndɛ-kɛndɛn co o lɛŋnde naalen nin-ndon, mì la vow o bɔlɔla niaalan nin, mì la yoo langbanɔ kon. La cua bom ɲɛ-pɔmbɔ a lɛan ɲɛ-pɔmbɔ, mì la cua ɲɛm cun kɛndɔn, mir, pistas a amanndeon. 12La cua volion taw mì la kɔ mingi volin nda sɔɔ o bɔlɔla niaalan nin o hunɔɔ-on. Bɔɔle pɔɛɛnɔnndo ndáà pɔɛɛnun ni. 13La cua pɔmbɔ niaa mì la kɔɛ a ndu. La muungu langbanɔ kon o ibuŋ. 14Màá Hala Vana-Kpaayaa-Kpow tosa mì langbanɔ kon ce niaa ɲia telen niaa tiiyanin o ndu lo-o! Màá o mingul niaa Simeɔn mò mal vɛlɛ niaa hunɔɔ a Bɛnyamɛn! Le ya yɛ, te o va pɛ maa hiɔlɔnndo koni cuawva ha hɛlun ya nuaa ni, mɛɛ o va lende.» 15O kon, má cua ɲɛm kɛndɛn fuɲa nda dimul nda le langbanɔ kon yoo-on, má cua volin ndáà nɔ makoo-on kundalan latiɔn, má cua Bɛnyamɛn, má bii nɛiyo le kɔlan. Mɛɛ nda tiiya Esipte, má kɔ cɔmnun Yosɛf.

Yosɛf yaw ɲɛdiaa le bɛndaa ndɔa

16Mɛɛ Yosɛf ce Bɛnyamɛn bɛndaa ndɔa tɛɛn, mó dimul vana va cɛi ndɔɔ hɔlten coo-o aa: «Kɔ yiya vannda ha o ya lo cɛinin, mà dii cɔloo, mà yaw ndu. Kani naa ndaa co hau ɲɛdiaa ipalaa dio latulu ni.» 17Mí vana va cɛi ndɔɔ hɔlten coo-o tosa mɛɛ o dimul ndu yɛ, mó yaa vanaa kan o yiya o vana ndɔ bɛndoo lo cɛinin. 18Mí siòònde bii nda le yɔɔ nda yɛɛ nda o yiya o Yosɛf lo cɛinin-ndo, má dimulan aa: «Le volin naa n saalun lɔ́ɔ́ kon o bɔlɔla naalan nin-ndon nda hin a naa nanu nuaa ni. A co naa delɔɔ coo mà siinguu naa cɛa, mà puu naa sofɛlɛa naa o laba.» 19Má sɔɔnguu vana va cɛi Yosɛf-o hɔlten coo-o ikɛi o cɛiyo sondoo, 20má dimul ndu aa: «Vana bɛndoo, mal naa haki yandi. N hin nin nanu lepilɛ le baloo piondɔɔ. 21Mɛɛ naa n tiiya o fondaa pum, mí n lɔl lon. Mɛɛ naa n kumbi bɔlɔla naalan, mí vana-vana saalun volin ndɔn o bɔlɔ ndɔɔ nin mɛɛ o yɔngu le balo kon piondɔɔ yɛ kpafii. Kɛ n hin a volin kalan, 22n hin vɛlɛ a volin celen le baloo piondɔɔ. N sínà vana mingi volin mun vow o bɔlɔla naalan nin-ndo le.» 23Mí langbanɔ kon dimul nda aa: «Siòòŋii bii niaa le. Hala niaa, Hala fuɲa niaa co biiloo-o vow ɲɛ-sɔlaa o bɔlɔla niaalan nin ni. Le volin niaan yɛ, mí ndáà yɔngu ya mun.» O kon kɔɔli, mó soli Simeɔn o kaasoo, mó yoo nda ndu. 24Mó luei nda niko o Yosɛf lo cɛinin. Mó yɔngu nda mɛnndan le pelon pulɔɔ, mó yɔngu sofɛlɛa ndaa billo le dioo. 25Mí bɛndaa Yosɛf-a nda toosiaa pɔɔ ɲɛm ndáà yoo ndu-on telen pá mí ɲɛdiaa ipalaa cuu toosiaa. Kani ndáà tuei nin maa lon nda co ɲɛdiaa ipala kon dio ni. 26Mɛɛ Yosɛf muungu o ndu lo cɛinin ndon, má yɔngu ndu ɲɛm ndáà yoo ndu-on, má baŋ vulan ndu o labɛngunin. 27Mó ɲuna nda la vaa kɔɔli, mó ɲuna nda aa: «Vɛ̀ɛ̀ fuɲa niaa yuuvɛi niaa dimul-la sɔɛi ndɔɛi-yo co kɛndɛ?» 28Má baŋ vulan ndu o labɛngunin, má muli aa: «Buɛi nɔmndo, o co fuɲa naa-o co vɔ yoomu. O connun kɛndɛ.» 29Mɛɛ o mɛɛndan Bɛnyamɛn pɔmbɔ ndɔ, o nda fula kala pilɔɔ-o, mó ɲuna nda aa: «Mò va maa pɔmbɔ niaa lum niaa dimul-la sɔɛi ndɔɛi-yo co hoo ni?» Mó cɔɔlu dimi aa: «Màá Hala tosal nɔm dɛnɛ kɛndɔɔ, ponndo!»

30Mí Yosɛf fula a kiltan, kani mɛɛ o ce pɔmbɔ ndɔ, mí mɔnɛi bii ndu, mó nuwviaa fondaa le kɔlan caŋndo, le mɛmɛma va ndu o hɔl-lan tuisio, mó luɛi o cɛi ndɔ lalɔllo nin, mó koŋul. 31Mɛɛ o cii caŋndo, mó pulu hɔlla, mó fula. Mó saa kɔl ndɔɔ, o ceŋ ndɛ le. Mó dimi le nda ɲɛdiaa yɔngoo. 32Má yɔngu nda ɲɛdiaa a kundalan yɛ́-yɛ́. Má yɔngu ndu Yosɛf ɲɛdiaa o ndɔɔ, má yɔngu bɛndaa ndɔa lánda, má yɔngu vɛlɛ Esiptea va dioo nda ndaa-a lánda, kani Esiptea cɛ̀l le ɲɛdiaa dioo nda Hebreea latulu le, dɛnɛ nɔɔlɛi bɛndoo pila nda ce ken ni. 33Mà kɛsi bɛndaa Yosɛf-a ndu Yosɛf laci sakpo a kaasonyɛi, kandɔɔ a bɛ nda tasoo, mà kɔ mɛɛlu a lumndo. Mà va nuannanndo vellaa-velle a kɔndɔfillo. 34Mí Yosɛf dimi aa a yɔngu nda ɲɛm dian ndu pila va dioo-on. Má yɔngu Bɛnyamɛn ɲɛm dian bɛmbɛ leŋuɛɛnu hiovɔɔ n nda ke bɛndaa ndɔa tɔ̀a-on coo. O kon, má kol ɲɛkɛndɛi nda ndaa.

Currently Selected:

O Kandɔɔ 43: BKG

Highlight

Copy

Compare