O Kandɔɔ 46

Yakɔb kɔɛ o Yosɛf lo Esipte

1Mí Israɛl cua ɲɛ-ɲɛ va ndu o ba, mó bii nɛiyo le kɔlan Esipte. Mɛɛ o tiiya Bɛɛr-Seba, mó solul Hala Isaak fuɲa ndɔ-o sálàlan. 2Mí Hala soaa o ndu lo icɔllo, mó veelu ndu aa: «Yakɔb! Yakɔb!» Mí Yakɔb cɛl aa: «Yoo. I co nɔm lani.» 3Mí Hala dimul ndu aa: «Ya co Hala ni, Hala fuɲa nɔm-ndo pɛɛn. Lelan, siòòŋii bii nɔm le kɔlan Esipte le. I co tosa mì polale nɔmnden le kui lon taw-taw. 4Ya pila co nɔm liila Esipte lon ni, ya pila koni co vɛlɛ nɔm soli lon ni. Lɔ́ɔ́ n vunin-ndo, Yosɛf kɔɔfiaanin#46.4 kɔɔfiaa: Te vanacieo vi pɛ, mì vannda kinda ndu hɔltan a sondoo, mà mingi ndu balan a pelon toosiaa, kon co kɔɔfiaa ni. nɔm ni mò kinda nɔm hɔltan.» 5Mí Yakɔb faŋan Bɛɛr-Seba, mí poaa ndɔa heelu ndu nda cuavaa ndaa a laandaa ndaa o ɲɛla ɲaanannda soa nan-ndan coo, la Faraɔnnɔɔ yɔŋ le kɔlan a nda lenin-ndan pɛɛn. 6Má kɔa vɛlɛ a cɔlua ndaa a ɲɛm ndáà sɔla o lɛŋnde Kanaan-nden nin-ndon kpede. Lende Yakɔb tiiya Esipte a yungu ndɔɔ kpow ni: 7poaa ndɔa, cuavaa ndɔa laandua, cuavaa ndɔa imamaa a vanaa va o polale ndɔlen coo-a kpow. Kan kpede a va ndu o labɛngunin telen o tiiya kon Esipte-o.

Yungu Yakɔb-o o lɛŋnde Esipte len nin

8Diola poaa Israɛl-la la co lan ni, a hin Esipte-a, Yakɔb nda poaa ndɔa: po tase Yakɔb-o yɔŋnun Rubɛn ni. 9Poaa Rubɛn velu-a yɔŋnun haa ni: Henɔk, Pallu, Hɛsrɔn a Karmi.

10Poaa Simeɔn-nda va haa ni: Yemuɛl, Yamin, Ohad, Yakin, Sohar a Saul, po laa ndɔ kanannɔɔ velu-o.

11Poaa Levii-a yɔŋnun Kɛrsɔn, Kehat a Merari ni.

12Poaa Yuda-a yɔŋnun Ɛr, Onan, Sela, Perɛs a Sera ni. Kɛ Ɛr nda Onan ndáà vi nin o lɛŋnde Kanaan-nden nin. Mí Perɛs vialu Hɛsrɔn a Hamul.

13Poaa Isakar velu-a yɔŋnun haa ni: Tola, Puva, Yɔb a Simrɔn.

14Poaa Sabulɔn velu-a va haa ni: Serɛd, Elɔn a Yaleɛl.

15Poaa Yakɔb sɔla o polale Lea len coo Padan-Aram-nda yɔŋnun kan ni. Cua nda laandoo va vɛlɛ, diolan Dina. Hɔ́aa piaandua a hɔ́aa laandua va beleyaa a à yaa.

16Poaa Kad velu-a yɔŋnun haa ni: Sifion, Hakii, Suni, Ɛsbɔn, Eri, Arodi a Areli.

17Poaa Asɛr velu-a yɔŋnun Yimna, Yisva, Yisvi, Beria a Sera yema nda ni. Cuavaa Beria-a yɔŋnun Hebɛr nda Malkiɛl ni.

18Hɔ́aa Yakɔb sɔla nda Silpa, buɛi laandu Laban ndóò yɔngu Lea cua ndɔ-a yɔŋnun kan ni. A va n'van tɔ́ a vanaa ŋɔmpum.

19Poaa Rasɛl, lanɔɔ Yakɔb velu-a yɔŋnun Yosɛf nda Bɛnyamɛn ni. 20O lɛŋnde Esipte len nin, mí Yosɛf vialu poaa nda ŋiɔn nda Asnat laa ndɔ, cua Poti-Fera va vana-solia-lasálàá Ɔn-ndo pɛɛn. Poaa ndɔa kan yɔŋnun Manase nda Efraim ni.

21Poaa Bɛnyamɛn velu-a yɔŋnun haa ni: Bela, Bekɛr, Asbɛl, Kera, Naaman, Ehi, Rɔs, Mupim, Hupim a Ard.

22Hɔ́aa Yakɔb sɔla o kpengii Rasɛl-le coo-a yɔŋnun kan ni, a va tɔ́ a à hiɔɔlu.

23Mí Dan vialu poo diolan Husim.

24Mí Nɛftali vialu Yaseɛl, Kuni, Yesɛr a Sillɛm.

25Hɔ́aa Yakɔb velu nda Bilha-a yɔŋnun kan ni, Bilha kon pɛɛn, buɛi laandu Laban ndóò yɔngu Rasɛl cua ndɔ-o. Hɔ́aa kan va vanaa ŋɔmmɛw.

26Vanaa Yakɔb kɔɛ o ba o lɛŋnde Esipte len nin-nda va n'van belaŋɔmpum a à ŋɔmpum, a cɔm laandaa poaa ndɔa le. 27Poaa Yosɛf ndóò velu nin o lɛŋnde Esipte len nin-nda va a ŋiɔn. Vanaa fula o polale Yakɔb len coo má kɔa Esipte-a va kpow n'van belaŋɔmmɛw.

Yungu Yakɔb-o cal o tàndàá Kosɛn nin

28Mí Yakɔb hivin Yuda po ndɔ ndu laci, mó viam ndu o Yosɛf lo, haliko mi Yosɛf hiow ndu laci o tàndàá Kosɛn nin. Mɛɛ nda tiiya lon, 29mí Yosɛf dovi ɲɛ ɲaanan soa nan-ndo, mó kɔa Israɛl fuɲa ndɔ diomɔɔ Kosɛn ndon. Mɛɛ o ce ndu, mó kɔ demul ndu, mó kafalan ndu o labolo, mó viaw caŋndo taw ndu o labolo. 30O kon mí Israɛl dimul Yosɛf aa: «I vu nin bɛɛ o co isɔɔ le. Kani i ce nɔm a lehɔl mí sina maa a co vɔ yoomu.» 31Mí Yosɛf dimul bɛndaa ndɔa a vanaa fuɲa ndɔa kpow aa: «I muungu vɔ mì kɔ dimul Faraɔnnɔɔ maa puapilɛa nia a yungu fuɲa ni va icali Kanaan-nda a hin ya o labɛngunin. 32Vanaa mandaa n'cɔlua nda co ni, cɔlua nda manda a kundalan ni. A hin a saa ndaa, cuinaa ndaa, navaa ndaa a ɲɛ-ɲɛ nda nɔ. 33Te Faraɔnnɔɔ veelu niaa pɛ mò ɲuna niaa aa: ‹Vali yɛɛ niaa co yɛ tosaa?› 34La mulul ndu aa: Cɔlua naa buɛyaa nɔmnda n co mandaa ni, kandɔɔ a cuaambɔyɛi nɛi, hun bii a sunsun, cɔlua naa n co mandaa ni, vali kon koni fuɲaa naa mamaa ndáà tosa ni. Te la mulul pɛ ndu lende, o co niaa kɛsi o tàndàá Kosɛn nin. Kani nɛyɔnndo taw Esiptea nɔ a vanaa mandaa n'cɔlua ni.»

Currently Selected:

O Kandɔɔ 46: BKG

Highlight

Copy

Compare