Marke 16
16
Yeesu tendu fulaa vanvílɛ́iya tɛɛn
(Matie 28.1-8, Luke 24.1-12, Nsaŋ 20.1-10)
1Paale pɛngiaalen hiovɔɔ, mí Mari Madelɛn, Mari kalaa Nsaki a Salome a piandu ɲɛm cun kɛndɔn le kɔlan Yeesu suiyo. 2O kundɛiyo coo idiiyo púŋ, má kɔa o sɛiyo. 3Má va ɲuunianndo aa: «Ko nɛ̀ɛ́ pimbulul-lɛnin naa powvo le ndu faŋaa o sɛiyo sondoo?» 4Ndáà tofaa, má ca maa pow bɛndu va o sɛiyo sondoo-o va o pimbulaa. 5Má luɛi o sɛiyo nin, má ca langbanɔɔ pum icali o ba kɛndɔɔ coo, doma bɛndu humboo va ndu lekɔɔ, mí siòònde bii nda. 6Mó dimul nda aa: «Siòòŋii bii niaa le, Yeesu Nasarɛt niaa co nuwviaa ni, o ndáà baŋ o yɔm singafilaa coo-o. O tendu fulaa vanvílɛ́iya tɛɛn, o co nanu le, la tofa vɔ fonda ndáà yambu ndu-o. 7Kɛ la kɔ dimul kaandeŋaa ndɔa a Piɛr maa o hiow nda laci Kalile: ‹lon niaa canin ndu ni, maa mɛɛ o dimul niaa yɛ.›» 8Má fula o sɛiyo nin, má ɲaanun, má va ɲiiyaa a siòònde, kɛ a dimul vana-vana ɲɛ-ɲɛ le, kani siòònde va nda.
Yeesu cɔmnun Mari Makdala
(Matie 28.9-10, Nsaŋ 20.11-18)
[ 9#16.9 Kandɔɔ nɛi 9 ndɔɔ kɔlan tiiyaa háá nɛi 20 ndɔɔ bungɛi ken co o sɛbɛla paandulan lapum nin te. Yeesu tendullo fulaa vanvílɛ́iya tɛɛn o paale co paale taselen o lɔ́ɔ́ nin-nden coo, mó cɔmnun fɔlɔn Mari fula Makdala-o, Mari o soli ɲinaa vɔɔnda nda ŋɔmmɛw nin-ndo pɛɛn. 10Mí Mari kon kɔ dimul vanaa va ndu Yeesu kɔɔli, má va caŋndo le vu ndɔɔ-a sɔɛi ken. 11Ndáà tueyɔɔ maa o co yoomu, maa Mari ce ndu, a laalan te.
Yeesu cɔmnun kaandennda nda ŋiɔn
(Luke 24.13-35)
12O kon kɔɔli, mí Yeesu cɔmnun vanaa ŋiɔn o nda tɛɛn a hɔlaa celen, a va nɛi-tɛɛn le kɔlan o sɔndɔkɔlɔ. 13Mí nda bɛɛ muungu, má kɔ dimul vanaa celen, nda bɛɛ laalan nda le.
Yeesu cɔmnun kaandeŋaa tɔ́ a o pilɛa
(Matie 28.16-20, Luke 24.36-49, Nsaŋ 20.19-23, Dɛnnda kiilaa 1.6-8)
14O mɛɛlulan, mí Yeesu cɔmnun kaandeŋaa tɔ́ a ò pilɛa telen nda va dioo-o. Mó soaa nda le laalan lepɛŋ ndaa a le nila kalula ndalan, a le tùú nda kɛɛ vanaa ce ndu, telen o muungu yoomu-o laalan-ndo. 15O kon kɔɔli mó dimul nda aa: «La kɔ o ceendo coo nɛɛ-nɛɛ ka, mì la kɔ yonda Yoongu Kɛndɔɔ o ɲɛm cɔwnun-ndon kpede lo. 16Vana-vana laalan pɛ mò sɔla yinɔɔ, ndu sɔlanin cindaa, kɛ vana laalan te, ndu sɔlanin yaalaa. 17Kaamaala tosannin vanaa laalannin-nda o ba lan la co lan ni: A toawnin ɲinaa vɔɔnda o diola nilan, a soaanin sɔɔn mangalan sɛnɛi n celen, 18a cuanin kɛwva a laba. A kol bɛɛ ɲɛ dii vana-o, ɲɛ-ɲɛ yɔŋnunnin nda le, a handunin vanaa lanàá balan coo, mà piɛi Hala le nda, mà sengu.»
Yeesu muungu o Hala lo
(Luke 24.50-53, Dɛnnda kiilaa 1.9-11)
19Yeesu ciiyo nda sɔɔn mun dimullo, mó hel o halataala, mó kɔ cal Hala o ba kɛndɔɔ coo. 20Má kɔannun a sɔɛi Hala-e dimio nɛɛ-nɛɛ ka. Yeesu va latulu a nda o baala kon nin, mó va nda kpaayaa keo le dɛnnda kaamaalan tosaa. Cɔmndo va kon ni maa toɲaa kaandennda va dimio ni.]
Currently Selected:
Marke 16: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
