Kabavelamu 37
37
Iosepa ikenokisakisa
1Mulineye Aisake iwapa, Iakobo menasusuvo, gumanidiavo mesaida olaolaga, imiamia vikainina base tamana imiamia waineye, me Kenani tomo'otoqa divikai.
2Iakobo menatunavo vesipusipupudi dede mesaida.
Natuna Iosepa tubuauna kanadiqaba 17, we gumanina sipi wete gouti kaditovekisabodaboda tatanavo taiauda, gumanidiavo tamadi mwanenavo Biluka we Silupa natudiavo.#37:2 Dani, Napitalai, Gada we Aseli. We Iosepa tatanavo divalabubuna kapoina paipaina tamana waineye ivesipupuyeni.
3Tutuyanina Iosepa itubuqa Iakobo, tamo kanawavaqa Isileli, itomwaya-otoqa, beqa Iakobo Iosepa ivenapwayewa-otoqeni, matautauda tatanavo. Beqa tamo kanatalauma ivalabubuni giamaiotoqina mekanavaiqavu, we Iosepa iveleni. 4Tutuyanina tatanavo ikiseni tamadi Iosepa ivenapwayewa-otoqeni, matautauda kaisedi, kadikapoka ioqala-otoqa wete ibaila-otoqeni. We ge kadisala vona giamaina inavesipupuyeni waineye.
5Tamo lovana Iosepa ikenokisakisa, we tutuyanina kanakenokisakisa ivesipupuyeni tatanavo waidie, kadikapoka kaia ioqala-otoqa. 6Iosepa ivonedi ivo, “Kwavevaneneqa, kagukenokisakisa aivesipupuyeni. 7Kida datanoqe witi#37:7 Witi kanakisa mesaida kayalele wete me Diu ibagubagulidi ditanoqe. tagusudi, tavelagudi we tasikwagigidi. We no tutuyanina Yau gusikwagigi itovotovoi, we komi misikwagigi imiakauqeni isobwanu gusikwagigi waineye.”
8We tatanavo ivoneni ivo, “Banikodiqa, komu kunuani nigo mwaqitana makini we kiloinema?” Paina Iosepa kanakenokisakisa ivesipupuyeni dede mesaida, beqa tatanavo kadikapoka kaia ioqala-otoqa ivetalavualeni.
Iosepa tatanavo ivegimwaneyeni Me Isimeli waidie inaweni Itipita waineye
12We tamo tutuya Iosepa tatanavo tamadi nasipinagouti meyokodi ikewadi inawedi Sikemi navikaie iekisabodebodedi we meyokodi iekalakani. 13Beqa tamadi Iakobo, Iosepa ivoneni ivo, “Tatamwavo bwaigidi Sikemi navikai waineye imiamia sipi we gouti iekisabodaboda. Wayaqigu aivetunemu kinaqo waidie.”
Beqa itagwana ivo, “Giamaina, ainaqo.”
14Beqa tamana ivoneni ivo, “Kinaqo tatamwavo kikisedi, kago giamaidi inamiamia medikaisayavo, matautauda kivila kimai valea kivonegu.” Beqa Iakobo Iosepa ivetuneni itauya, matautauda kawagovanina Ebiloni navikai ikiaweni.
15Tutuyanina Sikemi navikaie ilekwa, isasasala no vikainina waineye. We tutuyanina tamo tomoqo Iosepa ibabaneni ivelautolieni ivo, “Vakai kulalaualeni?”
16Ibaivila ivo, “Yau tatagwavo alalaualedi, disipi wete digouti meyokodi iekisabodebodedi. Kanasala kivonegu vakaiebei imiamia?”
17Ibaivila ivo, “Gunabeida dede vikainina ikiaweni itauya inaqo. We anoqai ivo, ‘Taitauya, tainaqo Dotani navikaie.’ ” Beqa Iosepa tatanavo ivemuliedi, inaqo Dotani navikaie ibabanedi.
18Tutuyanina tatanavo ikisanaqo ikiseni kanikieqa imaimai, we saiqanaqa inalekwa waidie kaisedi ienuana ivesipupu velautaubama wayaqidi inaluvewapai. 19Kaisedi waidie iesipupu ivo, “Kwakisanaweni, tokenokisakisanina imaimai! 20Tailuvewapai matautauda vovona taitaweni inaobu tamo guli tomo'otoqa itavia bwasi nakabatutuna paipaina waineye.#37:20 Guli dede ge mesaida tomo'otoqa kadiguli. Me Diu gileu itavia iobu-otoqa bwasi nakabatutuna, we tutuyanina kwei inakweiqa bwasi inaveadaqidi kabayemu paipaina. Matautauda tainaqo tamada waineye taisimana tanavo, ‘Kaisaya dabadabadi ikania.’ Mulineye kanakenokisakisa taikiseni oge mwaqitana inasauyeni o gebuka.”
21Lubeni divona inoqai we wayaqina Iosepa inaketoyavuya,#37:21 We Ibeliu divalabubuna waineye tomwayai taidiavo iekisabodebodedi. We kago vakai inasauyeni, Iakobo kanakapoka inaoqala Lubeni waineye. beqa ivo, “Ge yawaina taigusuya, 22wete dayaqina taigiaveulai. We kaia taitaweni inaobu tamo guli waineye dede pwayapwayamaiqe sayasayana waineye, we dimada ge waineye taisiketoidi.” Lubeni dede mesaida ivesipupuyedi, paina wayaqina Iosepa inaketoyavuya inakewai inavileni inanaweni tamadi waineye.
23Tutuyanina Iosepa ilekwa tatanavo waidie ivunuqi, we kanatalauma giamaiotoqina lausabasabana isitakia. 24We ikewai inaweni itaweni iobu tamo guli bwasi nakabatutuna naqekavana waineye, we bwasinina ge idakenokeno gunabeida isaya.
25Matautauda inaqo imiabui ikanikani. We ikisanaqo Isimeli#37:25 Dede tovegimwanevo Ebelamo wete Ega natudi Isimeli tubuleleleqinavo. nayoko tovegimwane Midiani pwayapwayana waineye'eqa ikisedi medikamelivo imaimai. We saku tupwaidiavo kabavegimwane ivedodoqidi mesaida kadi kabalaumaqamaqaila, tupwaidiavo maqaidi giamaiotoqidi wete bunama mulo. Gumanidiavo imai vanuqa Giliadi waineye'eqa inaqonaqo Itipita.
26We Iuda enavo ivonedi ivo, “Kago taida tailuvewapaiqa valeana taivaigavuyeni nawapa paipaina, vakai giamaina kawaie taibabaneni? 27Kwamai taivegimwaneyeni tovegimwane waidie, we dimada ge waineye taisiketoidi paina kida taida, bunuda wete dayaqida tamoqana.” We enavo itagwana. 28#Aposi 7:9Beqa tutuyanina no tovegimwanenidiavo ilekwa, matautauda tatanavo Iosepa ibiuya ilagaqeteni gulinina waineye'eqa ivegimwaneyeni tovegimwanenidiavo waidie kanatutula seluba 20 beqa. Beqa Iosepa ikewai inaweni Itipita pwayapwayana waineye.
29Mulineye Lubeni ivila imai inaqo ikisaobu gulinina waineye, Iosepa ge idakiseni, beqa nuana ikapo kanakaleko ilabukidi.#37:29 Me Isileli divalabubuna tutuyanina nuadi inakapo kadikaleko inalabukidi. We kida mesaida kanikani ge taikani, ge taitoa o kaleko giamaidi ge taikwesenidi. 30Beqa ivila inaqo tainavo waidie ivonedi, “Taida tubuauna ge adakiseni gulinina naqeneye. Banikodiqa, deqoina aivalabubunedi?”
31Beqa Iosepa tatanavo gouti iluvewapai dayaqina beqa kanatalauma idayaqi. 32Matautauda ikewai inaweni tamadi waineye ivo, “Kima talauma kaniakwanina dede kababaneni. We kukisa-vekavekaia, oge kanakisa mesaida natumu kanatalauma?”
33We tamadi talaumanina ikiseni matautauda ivesipupu ivo, “Ee, we natugu kanatalauma. O, mwaqitana natugu kaisaya dabadabadi iovai!” 34Beqa kanakaleko ilabukidi paina nuana ikapo-otoqa, matautauda kaleko mwesimwesiana ikweseni kaisaya bunudieqa ivalabubuni,#37:34 Tutuyanina tamo tomo'otoqa inawapa, me Isileli kaleko mwesimwesiadi inakwesenidi dinuakapo inavekaivevenedi. we tutuya kaniakwanina iemoqai natuna paipaina.
35We natunavo lamoqidiavo wete vavinediavo inaqo waineye wayaqidi inalaunuagemai, we ibaila ge wayaqina divona inanoqai. Beqa ivo, “Yau kaia aiemoqai kanaketoava aiwapa.” Beqa kaia itaitaiqamo, we ge inavekwada natuna paipaina.
Currently Selected:
Kabavelamu 37: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
