Kabavelamu 39
39
Potipali mwanena Iosepa ikisakwayaieni
1Tutuyanina tovegimwanenidiavo Iosepa ikewai inaweni Itipita kabaloina bwaigina waineye, matautauda Potipali igimwanei gumanina nalituqa paipaina. Potipali tamo Itipita tomoqina wete tolituqa bwaigina Pelo#39:1 Pelo me Itipita diwavaqa Kini paipaina. paipaina, we Pelo navanuqa kanatomiagamata kaditogumeta.
2 #
Aposi 7:9
Beqa Iosepa imiamia tomoqonina navanuqe, gumanina igimwanei. We Iave Iosepa taiauda imiamia we ikaivaiseni nalituqa waineye, beqa vakai puepuedi Iosepa ivalabubunidi kaia giamaikavadi. 3Potipali iyagovi Iave Iosepa taiauda imiamia ikakaivaiseni, beqa vakai ivalabubunidi kaia giamaikavadi, 4we paipaina imwasana. Beqa ivoneni kaia Iosepa kaisena natolituqa bwaigina, we iyatoi inavetogumeta navanuqa kanatolituqavo, wete nasakuvo matatabudi iyatodi dimaneye inavekisabodebodedi.
5No tutuyanina Iosepa ilitulituqa Potipali waineye, Iave Potipali navanuqa kanatomo'otoqavo ivonavenapwayewedi giamaina ibababaneni. Wete nasaku puepuena vanuqa naqeneye wete natanoqa ivonavenapwayewedi giamaikavadi. Paina Iosepa taiauda imiamia, beqa dede mesaida Iave ivalabubunedi. 6Potipali nasakuvo matatabudi kadiloina Iosepa iveleni inavekisabodebodedi, we ge tamo vakai paipaina idanuanuana kaia kanikani inakanikani.
Iosepa itubumatakaikai wete kanakisa giamaiotoqina tomobwaina. 7Tutuya kalakusana imiamia we Potipali mwanena ikisakwayaieni beqa ivoneni ivo, “Kumai, taiauda taikenoluqa.”
8We Iosepa ibaila ivonedi ivo, “Dede waineye amiamia avetoloina beqa Potipali navanuqa naqeneye ge tamo vakai paipaina idanuanua. Nasakuvo matatabudi dimague iyatodi aekisabodebodedi. 9Yau avetoloina vanuqa dede naqeneye mesaida taunina, we no ge tamo vakai idavekokoleni waigue kaia komi mwanena. Beqa banikodiqa, dede kapoina bwaigiotoqina aivalabubuni? Kago aivalabubuni aikapoina-otoqa Yaubada waineye.” 10We kaiata tamoqana tamoqana vavinenidi Iosepa iweweweseni, we ibaila ge idakenoluqa we ge taiauda idamiamia.
11Tamo kaiata Iosepa inaqo vanuqa naqeneye inalituqa, we no kaiatanina ge tamo aitoi vanuqa kanatolituqa idamiamia no waineye. 12Matautauda Potipali mwanena inaqo Iosepa waineye we kanakaleko ikavikavini wete ivoneni ivo, “Tainaqo, taiauda taikenoluqa!” We Iosepa ilaupeledi ideqa isauyeni maleweye, we kanakaleko isiyavuya vavina dimadie.
13Tutuyanina vavinenidi ikiseni Iosepa ideqa kanakaleko isiyavuya dimadie, 14we vanuqa kanatolituqavo iqoledi imai waidie, we ivonedi ivo, “Kwakise side! Tomoqo Isileli#39:14 Me Isileli tamo kadiwavaqa “Ibeliu.” mwanema imaieni waimeye isasaidibiema. Matutudaba naqeneye iluguma wayaqina inakenovema, we bonama bwaigina kabwau. 15Tutuyanina bonama inoqai, kanakaleko ikenokeno vivimeye, we ideqa isauyeni maleweye.”
16We vavinenidi Iosepa kanakaleko iyatoi vividie imiamia kanaketoava mwanedi imai vanuqe. 17We kaia tamoqana divonanina mesaida ditolituqavo ivonedi wete tutuyanina mwanedi ilekwa ivoneni ivo, “Datolituqa Isileli tomoqina kumaieni waideye, matutudaba naqeneye iluguma wayaqina inasaidibiema. 18We tutuyanina kabwau, kanakaleko ikenokeno vivimeye, we ideqa isauyeni maleweye.”
19Potipali mwanena bonadi inoqai beqa kanakapoka ioqala-otoqa, 20tolauqaviavo ivonedi Iosepa ikavikavini inaweni deli naqeneye iyatoi, dede vikainina Pelo napilisinavo dikabamiana.
Tutuyanina Iosepa dede waineye imiamia, 21#Aposi 7:9Iave taiauda imiamia, navenapwayewa ge menasivilavila iveleni we ivonavenapwayeweni, beqa deli kanatogumeta imwasana Iosepa paipaina. 22Beqa Iosepa iyatoi pilisinavo kaditogumeta, we deli kanalituqa matatabuna iekisabodebodedi. 23We Iave taiauda imiamia beqa ikaivaiseni vakai puepuedi ivalabubunidi kaia giamaikavadi, beqa Iosepa kanatogumeta ge idavenuanaluqa lituqanina iveleni iekisabodaboda paipaina.
Currently Selected:
Kabavelamu 39: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
