Mark 9
9
1Ma Iesu, taui i riwei, “Taumi a ririwana kauemi, rava ḡelaumi weka o maimairi amapo eḡa ona iraḡe da God ana vigulau ona inanai ana rewapanana ina nei.”
Iesu inanana i virai
(Mat 17:1-13; Luk 9:28-36)
2Au pom six muriai, Iesu, Peter, James ma John i taravaini. Ma taui ava i ḡae ola ḡaeḡaena au tepana. Ma kampa taui au matai, Iesu inanana i virai. 3Ana gara i arapoira ma gamrina ivi mata kamokamota; eḡa me aiwai ḡelauna au dobu nanare. 4Ma kampa au matai, Elijah ma Moses i eḡa. Ma Iesu maiteni i bababani. 5Ma Peter Iesu i riwei, “Tauviararamana, i ai da tauta weka. Mavi aninelai da numakweta tonuḡa ana voai: tagogi tam au baim, ḡelauna Moses ma ḡelauna Elijah!” 6Ma taui i rovo kaua ma Peter eḡa ita aramanei da aiwai i latolatoni.
7Anina ma apau i eḡa ma taui i purui. Ma pona apauei i opu ma i riwa i pa, “Wei Tau Natu au nuavainana, ona rau-taniḡanei!” 8Maratagogi taui i inana viravira ma eḡa aiai ḡelauna ita inanai ma Iesu, tauna ava.
9Ma maranai olei i ḡaiḡairai ma Iesu, taui ivi ḡaei da aiwai i inananaia eḡa inavi eḡai da au naona Rava Natuna iraḡelei inavo mairi me.
10Ma taui, Iesu riwana ivo teletelei ma i babani vivira i pa, “Iraḡelei vomairi me anona aiwai?” 11Ma taui, tauna ivi taravirevirei i pa, “Aiwai au baina, Tarawatu Babadai e ririwa da Elijah au naona ina nei?”#9:11 Mai Jew ivi tumaḡana da Elijah au naona ina nememei ma Keriso muriai ita nei. (Mal 3:1, 4:5-6). Ma taui eḡa ita notai da Elijah rau-iviapoapoe ina nelaḡai ana au nememei.
12Iesu i paribelei, “Riwa kaua Elijah au naona ina nei da aiwai anatapuna inavo kaukauei. Aiwai au baina wariaḡa i girumi da Rava Natuna ina vinua-apoapoe kaua ma ina inana geduaiei.#Isa 52:13–53:12; Psa 22 13Wate a ririwana kauemi da Elijah anina i nei ma rava, rava ai ḡoanei tauna i rau-iviapoapoelei me i girugirumia nanare.”#9:13 Iesu lamna John Taubabataito i bababaniei da tauna Elijah. (Mat 11:13-14, 17:10-13)
Iesu arua-apoapoena tevera orotona awarina ivi opuni
(Mat 17:14-21; Luk 9:37-43a)
14Iesu ana tauvotaḡotaḡo tonuḡa maiteni olei i ḡaira memei. Ai rava awari ma patara ḡaeḡaena, taui i gariḡuruvi. Ma Jew ai Tarawatu Babadai, taui maiteni ivivi tarapiri. 15Maranai patara, Iesu i inanai. Taui orai i auepai ma awarina i ruba ma ivi egualauei. 16Iesu, taui ivi taravirevirei, “Aiwai ovi tarapiriei?”
17Oroto tagogi patara au poui i paribelana, “Tauviararamana, arua-apoapoena natu orotona au orana e mamae ma i kauei da eḡa ita bababani, lamna au baina a neiai awarim. 18Maranai ana doria e ururu melei, lamna arua-apoapoena: tauna au doa e tawatawanei; gamona evivi puropuro; ivona e utauta ḡiriḡiriei; ma inina e badobado. Am Tauvotaḡotaḡo avi baḡai da arua-apoapoena itavi opuni, wate eḡa tagotagogina da ita kauei.”
19Ma Iesu i paribelei, “O mara aiwai onavi tumaḡana! Ta mae ḡaḡa ma ami vita ana avara ḡaḡalei? Tevera awariu ona neiai!”
20Ma tevera i neiai Iesu awarina. Ma maranai arua-apoapoena, Iesu i inanai, maratagogi tevera ivi aikwajiana guratei da au doa i tonei ma ivi tatauvira ma ivivi puropuro. 21Iesu, tevera amana ivi taravirevirei, “Wei teverana ana doria mara aiwai ivi karei?”
I paribelei i pa, “Maranai tauna aburunai. 22Arua-apoapoena mara au anatapuna, tauna ai au araratana ma au waira e tawatawanei ma i ḡoei da itavi raḡeni. Mepa da tam tagotagogina ma rau-nuapoapoelelai ma ma voaguiai!”
23Iesu, tauna i riwei, “Menanare da u riwa, ‘Mepa da tam tagotagogina?’ Aiai ravana evivi tumaḡana, God anatapuna ina kauei tauna au baina.”
24Maratagogi tevera amana i garara, “Avi tumaḡana, wate au tumaḡana eḡa ita rata ma ma voaguiu da ina rata!”
25Iesu i inana da patara i rierieiai awarii ma lamna au baina arua-apoapoena i egari i pa, “Tam arua taniḡa-potapotana ma gumgum. Tau a egaegarim da tevera ma oputawanei. Ma eḡa melanai tauna au orana ma rui me!”
26Ma arua i garara ma tevera ivi aikwajiana guratei ma i oputawaneii. Ma tevera inanana me taubeu. Ma rava maḡamaḡaui kampa i riwa, “Tauna i iraḡe!” 27Ma Iesu, tauna urana ivo jijini ma i sinaepai da i mairi.
28Muriai Iesu, ana tauvotaḡotaḡo maiteni i rui au numa. Ma maranai taui ava ma i paridadanei i pa, “Aiwai au baina tauai eḡa tagotagogina da arua-apoapoena atavi opuni?”
29Iesu, taui i riwei, “Arua-apoapoei wenanare, pari ainelana inavi opuni.”
Iesu ana iraḡe i babaniana melei
(Mat 17:22-23; Luk 9:43b-45)
30Iesu, ana tauvotaḡotaḡo maiteni dobuna i netawanei ma Galili i verautuini. Iesu eḡa ita ḡoei da rava ita aramanei da taui mepa. 31Au baina tauna, ana tauvotaḡotaḡo ivi araramani i pa, “Taui Rava Natuna ina amverenei rava ḡelaui au urai. Ma taui inavi raḡeni. Wate au pom tonuḡa au murina inavo mairi me.”
32Wate taui eḡa ita aramanei tauna aiwai i bababaniei. Ma taui paridadanana i rovoei.
Tauvotaḡotaḡo ivi tarapiri vivira da aiai i ḡetelara
(Mat 18:1-5; Luk 9:46-48)
33Iesu ma ana tauvotaḡotaḡo i ḡeta au Kapenaum ma au numa i rui. Ma Iesu, taui ivi taravirevirei, “Au etanai aiwai ovi tarapiriei?”
34Wate taui i genuana au baina au etanai taui ivi tarapiri vivira da aiai i ḡetelara. 35Iesu i kiala ma taui 12 i rau-kwatuei awarina ma i riwei i pa, “Aiai e ḡoeḡoe da inavi bada. Tauna ina tereḡairana melei ma inavi muri dewadewa ma inavi taunola rava au bai.”
36Ma Iesu, tevera i vaia ma au poui ivi mairini. Ma tauna, urana au jiḡona i teretaḡonei. Ma taui i riwei i pa, 37“Aiai ravana; tau wavauei, tevera wenanare i rau-ḡorei. Lamna tau maiteni e rarau-ḡoreiu. Ma aiai da tau e rarau-ḡoreiu. Lamna tauparitawaneu maiteni e rarau-ḡorei.”
Aiai eḡa ata ḡavia, lamna turata
(Luk 9:49-50)
38Anina ma John, Iesu i riwei, “Tauviararamana! Tauai, oroto tagogi a inanai; tam wavamei arua-apoapoena ivivi opuni ma tauna eḡa turata. Lamna au baina avi ḡaei da eḡa ina kauana melei.”
39Iesu i riwa, “Eḡa ona viḡaei! Eḡa aiai au wavau kaua babai ina kauei ma muriai ina parivai-apoapoeniu. 40Aiai ravana eḡa ata ḡavia; lamna turata. 41Tau a ririwana kauemi. Mepa da aiai ravana, waira i veremi tau au wavau; au baina taumi au Tauvotaḡotaḡo. Taui ai maia eḡa ina vineboai.”
Rauelara babanina
(Mat 18:6-9; Luk 17:1-2)
42Mepa da aiai ravana i kauei da wei teverana ana tumaḡana tau awariu ivi apoapoeni da ḡoa-apoapoe i kauei. God, tauna ina kovoḡa guratei. Eḡa me ḡaima ḡaeḡaena, rava au uatabana ina duri ma au boga ina tawanei. 43-44Mepa da nimam i kauem da ḡoa-apoapoe u kauei. Ma bori-tawanei! I ai da nimam tagogi ava ma lawana ma mae nonoana ma vaia. Ma eḡa ma kauei da nimam ruaḡa aiaii ma ma nae ai au menamenana; mepa ai eḡa melanai ita bobo.#9:43-44 Wariaḡa nimaiei i giruma damanei taui riwana tagogina me v 48. 45-46Mepa da aem i kauem da ḡoa-apoapoena u kauei. Ma bori tawanei! I ai da sigesigem au lawana ma mae nonoana ma rui. Eḡa me aem ruaḡa aiaina ma ai au menamenana ina tawanem.#9:45-46 Wariaḡa nimaiei i giruma damanei taui riwana tagogina me v 48. 47Ma mepa da matam ina kauem da ḡoa-apoapoena u kauei. Ma vaitawanei! I ai da matam tagogi ma God ana vigulau ma rui. Eḡa me matam ruaḡa ma ai au menamenana ina tawanem; 48dobuna motamotana eḡa ita irairaḡe ma ai eḡa ita bobo.#Isa 66:24
49Au Tauvotaḡotaḡo anataputapui, ai araratanei ina bogai.#Lev 2:13
50“Nia i ai lam viaiainana au baina. Ma mepa da i tomatoma, mena ma vidagianei. Nia au orami ina mae ma onavi turana vivira!”
Currently Selected:
Mark 9: WEDW
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved
