Exodus 4
4
God-im Moses Suaŋŋatiksriñmauŋ Aliuġnaqtuamik
1Tavraasii Moses-gum kiugaa Ataniq, “Iḷaanni Israel-gum kiŋuvaaŋich ukpiġiŋitkaqsikpanŋa naalaġniŋiḷḷuŋalu, suniaqpik uqaaqsikpata niptaġvigiŋaiññiḷuŋa iliŋnun?”
2Tavra Atanġum apiġigaa, “Sumik tigummivich?”
“Ayauppiamik,” Moses-gum kiugaa.
3Ataniq uqallaktuq, “Miḷuqsauttuuŋ saagnun nunamun.” Moses-gum miḷuqsautimmagu, taimma nimiġiaġuqtuq, aasii Moses qimaaŋaruq. 4Tavra Ataniq uqallaktuq Moses-mun, “Tigguuŋ pamiuŋagun.” Tavraasii Moses-gum tigugaa, aasii ayauppiaġutqiksuq nimiġiaq. 5Ataniq uqallaktuq, “Taamna tainna piyumagiñ nalupqinaiġutaulugu Israel-gum kiŋuvaaŋiññun, Ataniq, God-iŋat maŋŋuuŋisa, God-iŋa Abraham, Isaac-gum, suli Jacob-gum, niptaŋatilaaŋa iliŋnun.”
6Ataniq uqallavsaaqtuq Moses-mun, “Argaiñ iḷuanuguŋ qaliġuaqpich.” Moses kamaksriruq; aasii amummagu, kiḷḷiġruaqtuliġñiqsuq, qatiqtuagulaaqsiŋavluni, aputitun ittuanik. 7Tavraasii Ataniq uqallaktuq, “Argaiñ iḷuanutqiguŋ qaliġuaqpich.” Tainna aasii piuq, tavrani amummagu, iłuaqsiŋaniqsuq, qiññanikłuni uviñiŋatun. 8Ataniq uqallaktuq, “Ukpiġiniaŋitpatin naagga nikasuutiqaqpata-suli sivullikun aliuġnaqtuakun savaapkun, tavra taaptuma nikasuŋaiqsinniaġaich. 9Ukuak malġuuk aliuġnaqtuak pigaluaġupkik ukpiġiliŋitpatin-suli, naalaġnisuŋiḷḷutillu uqaġuvich, immamik piyumautin kuugmiñ Nile-miñ aasii kuviḷugu nunamun. Imiq auguġniaqtuq.”
10Aglaan Moses uqallaktuq, “Naumi, Ataniiq, tiliñaŋa. Uqalguruagulġataŋaitchuŋa, suli uqalgusiŋaitchuŋa uqaqatigisaqamŋa-qaŋa. Uqalguipiallaktuŋa, uqaqama sukaiñmiuŋa, uqallaksallaiġuummivḷuŋa.”
11Atanġum uqallautigaa, “Kia una iñuk qaniksritpauŋ? Kia tusaalaisitpauŋ naagga uqalaisitpauŋ? Kia tautullapkaqpauŋ naagga ayaupkaqpauŋ? Tavra uvaŋa, Atanġuruam. 12Ki, Aullaġiñ! Ikayuġniaġikpiñ uqaġuvich, suli uqaluksraqaqtinniaġikpiñ.”
13Aglaan Moses-gum kiugaa, “Naumi, Ataniiq, tilisiyumautin allamik iñugmik.”
14Tavrani tavra Atanġum qinnautigaa Moses aasii uqallakłuni, “Aasiimi imña aniqatin Aaron, kiŋuvaaguruaq Levi-mik? Iḷisimaruŋa uqayutilaaŋanik. Imma, qaiḷġataviksuq kasuġiaqhutin samma quviasugniaqtuq tautukkumisin. 15Uqautiyumiñaġiñ aasii uqaluksriqsuġlugu. Ikayuġniaġivsik uqaġuvsik, aasii suli uqautilusik suniaqtilaavsigñik. 16Uqaqtiginiaġiñ iñugnun. Tavraasii God-itun inniaqtutin ilaanun, uqaluksriqsuġlugu. 17Una ayauppiaq kaluġlugu; atuġniaġiñ savakkuvich aliuġnaqtuanik.”
Moses Utiġman Egypt-mun
18Tavraasii Moses utiŋaruq Jethro-mun, aaparuamiñun, aasii uqallautivlugu, “Utiġlaŋa Egypt-mun nanmiñiq iḷamnun Israel-gum kiŋuvaaŋiññun iñuugaluaġmagaisa-suli.” Jethro-m iviġaumagivlugu aullaqugaa.
19Moses Midian-miitiłługusuli, Atanġum uqallautigaa, “Utiġiñ Egypt-mun, qanukkii iluqaġmiŋ tuqutchisuŋaruat ilignik tuquŋarut.” 20Tavraasii Moses-gum tuvaaqatiniḷu iġñiġutiiniḷu ikuvlugich kakaktimun, aullaqatigigaich Egypt-mun, tigumiaqługu ayauppiaq God-im kaluquraŋa.
21Ataniq uqallatqiḷgitchuq Moses-mun, “Tavra utiġuvich Egypt-mun, savapiaġumagitin sivuġaani Pharaoh-m iluqaisa aliuġnaqtuat suaŋŋatiksrirrutitka ilignun atuġlugich. Aglaan uqayunaiqsinniaġiga, aasii aullaqtinniaŋitkaich iñutka. 22Tavraasii ilvich uqallautiruksraġiniaġiñ, uvaŋa Atanġuruaq, innaġniḷuŋa, ‘Israel aŋayukłiqpiaq iġñiġa. 23#Ex 12.29.Uqallautiraqpiñ aullaqtitquvlugu iġñiġa, nanġaġumagaaŋa, aglaan aullaqtitchuŋitkiñ. Tavraasii tuqunniaġiga aŋayukłiq iġñiġiñ.’”
24Nullaummivianni Egypt-muksaġiami, Atanġum kasuġaa Moses aasii tuqunniatakługu uvvakii nalunaiñŋutchiqsauŋaiłłuni iġñiŋa. 25-26Tavraasii Zipporah, nuliaŋa, ipiktuamik uyaġagmik pivḷuni, sirguŋagaa iġñini, aasii aksiutigivlugu Moses isigaŋiñun. Pisigivlugu nalunaiñŋutchiqsauniq uqallaktuq Moses-mun, “Uiŋ, uvva tautuguŋ auk. Atanġum tuqutchuminaiġaatin.” Tavraasii Atanġum Moses tuqunŋiñŋagaa.
27Tavrani Ataniq uqallaŋaruq Aaron-mun, “Nunagluktuamugiñ kasuġiaġlugu Moses.” Aaron aullaŋaruq kasuġiaqługu ilaaguaqtauŋaruami iġġimi; kasuqamiuŋ aniqanni Moses kuniŋagaa. 28Moses-gum uqautigaa Aaron Atanġum uqalupayaaŋigun utiqummaniḷu Egypt-mun, uqausiġivlugiḷḷu tiliuġusiani aliuġnaqtuat savaaġitquraŋich. 29Tavraasii Moses-lu Aaron-lu Egypt-muŋaruk aasii Israel-gum kiŋuvaaŋich aullarripayaaŋich atautchimuktiłługich. 30Aaron-gum uqautiŋagai iluqaiññik Atanġum uqaluŋiñik Moses-mun, tavraasii Moses savaŋaruq aliuġnaqtuanik sivuġaanni iñuich. 31Ukpiġiliŋagaik, aasii tusaakamiŋ Ataniġmun ullaŋatilaamignik suli qiñiŋatilaamignik qanuq nagliksaaqtitaukamiŋ, tavra pułłutiŋ nanġaŋagaat God.
Currently Selected:
Exodus 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)