Genesis 14
14
Abram-gum Annautigaa Lot
1Sisamat umialgich, Amraphel Babylonia-ġmiu, Arioch Ellasar-ġmiu, Chedorlaomer Elam-miu, Tidal-lu Goiim-miu, 2aŋuyagiaŋarut akiḷḷiġivlugich tallimat allat umialgich: Bera Sodom-miu, Birsha Gomorrah-ġmiu, Shinab Admah-ġmiu, Shemeber Zeboiim-miu, umialiŋalu Bela-m (atiqaqtuaqtauq Zoar-mik). 3Taapkua tallimat umialgich ikayuqtigiiksinŋarut atautchimukługich aŋuyaktitiŋ Siddim Valley-mi, paŋmami atiqaqtuamik Dead Sea-mik. 4Iliŋich aŋalatauŋagaluaqtuat Chedorlaomer-mun qulit malġugni (12) ukiuni, aglaan paakłaktuliŋagaat qulit piŋayuanni (13th) ukiut. 5Ukiut akimiaġutaiḷaŋanni (14th) Chedorlaomer iḷaaluġiraniḷu qaiŋarut aŋuyaktitiglu aasii akiiḷivḷugu Rephaim Ashteroth-Karnaim-mi, Zuzim-lu Ham-mi, Emim-lu qaiqsuaŋani Kiriathaim-mi, 6suli Hor-miuguruallu iġġiŋiñi Edom, malikataqługich Elparan-muaglaan killiŋanun nunagluktuam. 7Tavraasii utiŋarut Kadesh-mun (taisuuŋaraŋannun Enmishpat-mik). Piññaktaaġiŋagaat iluqaan nunaŋat Amalek-miuguruat suli akiiḷivḷugich Amor-miuguruat iñuuniaqtuat Hazazon Tamar-mi.
8Umialiŋich aasii Sodom-lu, Gomorrah-vlu, Admah-vlu, Zeboiim-lu, Bela-mlu aŋuyagiaŋarut Siddim Valley-mi aasii aŋuyakłutiŋ 9akiḷḷiġivlugich umialiŋich Elam-lu, Goiim-lu, Babylonia-vlu, suli Ellasar-vlu, tallimat umialgich akiḷḷiqaqłutiŋ sisamauruanik. 10Natiġnami iñugiaŋarut iḷuqsrat anŋunmik imaligaat, aasii umialiŋiksa Sodom-lu Gomorrah-vlu aŋuyaktiŋich qimaasaġaluaqamik, kataksiññaġniqsut iḷuqsranun; aglaan piŋasuuruat umialgich aŋuyaktiŋich annakłutiŋ iġġiñun. 11Sisamat umialgich piññaktaaġiŋagaich supayaurat Sodom-miḷḷu Gomorrah-miḷḷu, niqipayaallu, aasii aullaqłutiŋ. 12Lot, Abram-gum uyuġua, iñuuniaqtuaq Sodom-mi, aullautiŋammigaat suġauttaqtuummaan.
13Aglaan iñuum annakłuni kiligiaŋagaa qiñiqtamiñik Abram, Hebrew-guruaq, iñuuniaqtuaq qaniŋanni napaaqtuniqłuŋiññi Mamre-m Amor-miuguruam. Mamre-ḷu suli aniqatiiŋik Eshcol-lu Aner-lu iḷaaluġiŋagaich Abram-gum. 14Abram tusaakami uyuġuni tiguŋatilaaŋanik, ququaŋagaich atautchimuktiłługich aŋuyaktauruat inimigni, iñugiaktigivlutiŋ 318-tun, aasii maliqataŋagaich sisamauruat umialgich Dan-muaglaan. 15Tavrani qavsiigullaavlugich inillaŋagaich iñugirani, aŋuyagiaŋagaich akiḷḷiġiratiŋ unnuakun, aasii akiiḷivḷugich. Maliqataŋagaich tikiḷġataqługu Hobah, salliñaaŋaniittuaq Damascus-gum, 16tasuqługich aasii iluqaisa suġauttapayaat piññaktaaġigaluaqtaŋich. Utqutiŋagaich uyuġuni Lot, suġauttaŋiḷḷu, aġnallu, allallu tigurauŋaruat.
Melchizedek-gum Uqallautigaa Quviasaaġusiqł̣ugu Abram
17Abram utiġman akiiḷianikługich Chedorlaomer-lu allallu umialgich, umialgata Sodom-gum kasuġiaŋagaa Shaveh Valley-mi (taisuumiraŋanniktauq King’s Valley-mik). 18#He 7.1-10.Aasii Melchizedek, Salem umialiŋa aŋaiyyuliqsauruaq Qutchigñiqtauruamun God-mun, qaġġirriŋaruq punniġmik wine-miglu Abram-mun, 19uqallautigaa piḷḷuatautiqaquvlugu, uqallakłuni, “Qanuqtuq Qutchigñiqtauruam God-im, savaŋaruam qiḷagmiglu nunamiglu, quviasaaġusiġḷiuŋ Abram! 20Qanuqtuq Qutchigñiqtauruaq God, akimmatiqaqtitchiruaq ilignik akiḷḷiġiraġniñ, nanġaqtauli!” Tavraasii Abram-gum aitchuŋagaa Melchizedek quliŋannik suġauttapayaat tasuqtaġmi.
21Umialgata Sodom-gum uqallautigaa Abram, “Pigikkich suġauttat, aglaan qaitqigḷugich iluqaisa iñugiratka.”
22Abram-gum kiugaa umialiŋa Sodom, “Unniqsuqłiiruŋa sivuġaani Atanġum, Qutchigñiqtauruam God-im, Savaŋaruam qiḷagmiglu nunamiglu, 23piksraqtaaqaġniaŋiññivḷuŋa sumikunnii ilvich pigiraġnik, ivaluviñauramik unnii naagga aluġutim nimiġutiŋanik. Tavraasii uqallakkumiñaiññiaqtutin, ‘Uvaŋa tavra Abram umiallaktittaġa.’ 24Uvaŋaunnii piksramnik sumik piñiaŋitchuŋa. Iñugma niġianiŋaraŋat naamaruq. Aglaan iḷaaluġiratka, Aner-lu, Eshcol-lu, suli Mamre-ḷu, autaaġusiaqaġlich.”
Currently Selected:
Genesis 14: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
