Genesis 24
24
Tuvaaqatiksraŋa Isaac-gum
1Abraham aŋayuqaksraġuqtuq, Atanġum piḷḷuatautiqaqtinŋagaa supayaurakun. 2Uqallautigaa utuqqauniqsraq kivgani, qaunaksrauruaq suġalipayaamiñun, “Unniqsuqłiiguiñ iḷḷilugu argaiñ nalikkaamnun#24.2 Tainna tavra piḷgusiŋat unniqsuqłiikamik naviaksrauŋitchuamik.. 3Unniqsuqłiitqugikpiñ atqagun Atanġum, God-auruam qiḷagmullu nunamullu, tuvaaqatiksraġniaŋiññiḷugu iġñiġa maaŋŋa Canaan-miumik. 4Utiqtuksraurutin nunamun annivigiŋaramnun tuvaaqatiksraġiaġlugu iġñiġa Isaac iḷagiramniñ.”
5Aglaan kivgauruaq apiqsriruq, “Aasii niviaqsiam maliguŋitpaŋa mauŋa? Utqutiniaqpigu tavra iġñiġiñ taamuŋa nunamun irvigiŋaraġnun?”
6Abraham-gum kiugaa, “Suuramikunnii utqutinagu iġñiġa taavuŋa! 7Atanġum, God-auruam qiḷagmun, aullaqtitaŋagaaŋa aimmavianiñ aapagma, aimmavimniḷḷu, nunaŋaniḷḷu iḷagma, aasii uqallautiŋagaaŋa unniqsuqłiivḷuŋa qaiññiaġnivḷugu manna nuna kiŋuvaamnun. Tilisiñiaqtuq isaġuligmiñik sivugni, tuvaaqatiksrallayumagiñ taamaŋŋa iġñiġa. 8Niviaqsiam qaiqatigisuŋitpatin, tigummirauŋaiġñiaqtutin uumaŋŋa unniqsuqłiisigiraŋaġniñ. Aglaan suuramikunnii iġñiġa taamuŋautiruksraġiŋitkiñ.” 9Tavraasii kivgauruam argani nalikkaŋanukkaa Abraham-gum, ilaata qaukłiġiraġmi, aasii unniqsuqłiivḷuni savaaġiniaġnivḷugu Abraham apiqsriaġiraŋa.
10Kivgauruaq, qaunaksrauvluni Abraham suġaliŋiñik, aullaurriŋaruq qulinik qaukłiġmi pikukturuaŋiññik silviłługi akisuruanik aitchuusiamignik qaukłiġmigniñ aasii aullaqłuni nunaŋanun Nahor-m Mesopotamia-mi. 11Tikiññami, pikukturuat sitquqtinniġaich nivviamun siḷataani nunaaqqim, uvluq anaqaksraaŋaiñŋaan, aġnat imiqtaġiaġvikaaŋanni. 12Aŋaiyyuruq, “Ataniiq, God-iŋa umialigma Abraham, piḷḷuatautiqaqtinŋa uvlupak unniqsuqłiisigiŋarallu nalautillugu umialimnun. 13Uvva uvaniittuŋa nivviami niviaqsiat nunaaqqimiñ qaivḷutiŋ imiqtaġiaqtaġviŋanni. 14Uqallagniaqtuŋa inna iḷaŋannun, ‘Imiqaġviiñ atqaġlugu imiksriñŋa.’ Uqallakpan, ‘Imiġiñ, suli imiksraġniaġmigitka pikukturuat,’ taaptumiŋauniaqtuq naliġaktaaġiran ilvich kivgaġnun Isaac-mun. Tainna nalautitpan, iḷisimaniaqtuŋa iliŋnun taŋŋiqsilaaŋa unniqsuqłiisigiŋaran umialimnun.”
15Aŋaiyyutaa naatkaluaqtinnagu, Rebekah tikitchuq imiqaġviñi iqsrukługu. Paniginiġaa Bethuel-gum, iġñiguruam Nahor-mullu Milcah-mullu, Nahor Abraham-gum aniqataa. 16Aġnaġipiaġataŋaruq taamna niviaqsiaq aŋusiuŋaił̣ł̣uniḷu. Nivviamuŋaruq, immiqł̣ugu imiqaġviñi, aasii utiqłuni. 17Kivgauruam aqpałłuni kasuġiaŋagaa aasii uqallakłuni, “Imiksritchaŋŋaata imiqaġvigñiñ.”
18Uqallaktuq, “Imiġiñ, aŋuun,” imiqaġviñi atqaqtualukkamiuŋ imiqtitkaa. 19Imianigman, uqallautigaa, “Imiksraŋiññik qaġġirriñiaġmiuŋa pikukturuat imiġumaut imiġuiqsuaġlutiŋ.” 20Qilamiqsruaqłuni imaiqsualukkaa imiqaġviñi niġrutit imiqaġviannun aasii aqpamik nivviamun imiksraisuvsaaqłuni, iluqaisa imiqtitanigataqługich pikukturuat. 21Kivgauruam qiñiŋaġaa nipaiḷaaqłuni taamna aġnaq, iḷitchuġisukłuni Ataniġmun taŋŋiqsinmagaan piraksrautini.
22Naatchimman, kivgauruam aitchuŋagaa qiŋaġunmik piḷiaguruamik kaviqsuamik manigmik, malġugniglu tayaġutignik piḷiagummiruagnik kaviqsuamik manigmik. 23Uqallaktuq, “Kiña aapagiviuŋ? Igluani iniqaqpa iñugiratkalu siñiktaġviksraptignik?”
24“Aapaga Bethuel iġñiŋa Nahor-m Milcah-vlu,” kiugaa. 25“Ivigruaniglu pamiqsaallu niqiŋiññik niqaukkaqtugut igluptinni, iniqaqtugullu siñiktaġviksravsiññik.”
26Tavraasii aŋun punŋaruq aŋaiyyuvigivlugu Ataniq. 27Uqallaktuq, “Nanġaqtauli Ataniq, God-iŋa umialigma Abraham-gum, piŋitqataaŋił̣ł̣uni nalautittaŋa unniqsuqłiisini umialigiramnun. Atanġum aullatiŋagaaŋa nalaupiallakługich umialiŋma iḷaŋich.”
28Niviaqsiaq aqpałłuni aakami igluanuŋaruq aasii quliaqtuaqłuni iluqaanik nalautittuamik. 29Rebekah aniqatiqaŋaruq aŋunmik atiqaqtuamik Laban-mik, aasii aqpamik animaruq nivviamukłuni ullakługu Abraham kivgaŋa taamaniittuaq. 30Laban-gum tautuŋagaich qiŋaġullu tayaġutillu taliŋigñi aniqanmi tusaavlugiḷḷu uqaluŋich aŋutim Rebekah-mun. Ullakkaa Abraham kivgaŋa, qikaqtuaq pikukturuat saniġaanni nivviam qaniŋani, 31uqallautivluguasii, “Qaiñ uvaptinnugluk. Atanġum uvva piḷḷuatautiqaqtinniġaatin. Summan makitaiññaqpich maani? Itqanaiŋagiga amma iniksran iglumni, iniksraqaġmiut pikukturuat.”
32Tavraasii kivgaq iglumuŋaruq, aasii Laban-gum usiagiyaġniġaich pikukturuat aitchuqługulu ivigruanik nallaviksraŋiññik pikukturuat allaniglu niqiksraŋiññik. Aasii imiġmik qaġġirrivḷugu Abraham kivgaŋata iñugiraŋisalu isigamiŋnun iqaġiviksraŋannik. 33Niqiksraŋiññik qaġġirrimmata, Abraham-gum kivgaŋa uqallaktuq, “Niġisaġniaŋitchuŋauvva uqallaqqaaŋaunnaŋa uqaluksrautimnik.”
Laban uqallaktuq, “Ki uqaġiñ.”
34“Kivgauruŋa Abraham-mun,” uqanagutiruq. 35“Atanġum atqunaqługu piḷḷuatautiqaqtitkaa umialigiraġa aasii umiallaktiłługu. Aitchuŋagaa iñugiaktuanik imnaiñik, nagrulignik, pamiqsaaniglu, qatiqtuanik kaviqsuaniglu manigñik, aŋutiniglu aġnaniglu kivganik, pikukturuat, kakaktiniglu. 36Sarah, umialigiraġma tuvaaqataa, iġñiqaŋaruaq aaquaganikkami, aasii umialigiraġma qaiñŋagaich suġalipayaurani iġñiŋanun. 37Umialigiraġma unniqsuqłiipkaŋagaaŋa kamagitquvlugu piraksriutini. Uqallaktuaq, ‘Tuvaaqatiksraġnagu iġñiġa paniŋiññiñ Canaan-miut, nunaŋanni iñuuvigiramni. 38Aglaan, aullaġutin aapama iñuŋiñun, nanmiñiq iḷamnun, aasii tuvaaqatiksraġlugu tavraŋŋa.’ 39Apiġiraġa umialigiraġa, ‘Aasii maliguŋitkaqsikpaŋa?’ 40Umialigma kiuŋagaaŋa, ‘Atanġum, kamagisuuraġma ataramik, tiliñiaġaa isaġuliñi piqatigitqulutin aasii piḷḷuatautiqaqtillutin. Iġñiġa tuvaaqatiksraġniaġiñ nanmiñiq iḷamniñ, aapama iḷaŋiññiñ. 41Tigummisaiġñiaqtutin unniqsuqłiisigiraġniñ uvamnun inna, ullautiguvich iḷamnun aasii iliŋisa ayyakpatin, tavra tigummisaiġñiaqtutin.’
42“Nivviamukkama uvlupak, aŋaiyyuruaŋa, ‘Ataniiq, God-iŋa umialigma Abraham, piḷḷuatautiqaqtinŋa savaaġiramni. 43Uvva uvani nivviamiittuŋa. Niviaqsiaq qaiḷuni imiqtaġiaqpan, apiġiniaġiga imisritquluŋa imiqtautaaniñ. 44Aŋiqpan imiksraġukpagiḷḷu pikukturuat, taavsrumiŋaulituq ilvich tuvaaqatiksraqtaaġiran umialigma iġñiŋanun.’ 45Aŋaiyyutiga nipaiḷaaqłuŋa naanŋaisillugu, Rebekah qairuq imiqtautini iqsrukługu aasii takanuŋa nivviamukłuni imiksraġiaqłuni. Uqallautigiga, ‘Imiksriñŋaata.’ 46Imiqtaġviñi atqaqtualukamiuŋ tuiqqagmiñiñ uqallaktuq, ‘Imiġiñ, pikukturuat imiqtinniaġmigitka.’ Tavraasii imiqtuŋa, ilaata imiqtinmigaich pikukturuat. 47Apiġigiga, ‘Kia panigivatin?’ Aasii ilaata kiugaaŋa, ‘Aapaga Bethuel, iġñiŋak Nahor-mlu Milcah-vlu.’ Tavra qiŋaġusiŋagiga tayaġutchiqługulu. 48Pułłuŋa aŋaiyyuvigiŋagiga Ataniq. Nanġautiqaŋaruŋa Ataniġmun, God-iŋanun umialigma Abraham-gum, aullatiniġmaŋa nalaupiallakługu umialiŋma iḷaŋa, paqitiłługu umialigma uyuġua, iġñiŋata tuvaaqatiksrautaa. 49Tavra, iviġaumagigupku umialigma pisuutaa iḷisimapkaŋŋa; naakkaunnii piyumaŋiññiġuvich, nivliġiñ, sivunniġumauŋa suniaqtilaamnik.”
50Laban-guvlu Bethuel-guvlu kiugaak, “Tavra taamna Atanġum piraksriutigimmauŋ, qanuġumiñaisimaruguk. 51Uvva Rebekah; aullauttuuŋ. Tuvaaqasiutiyumauq umialikpich iġñiŋanun, Atanġum ilaata uqallausiatun.” 52Kivgaŋata Abraham-gum taamna tusaagamiuŋ, pułłuni nanġaġniġaa Ataniq. 53Tavraasii salapqiiruq annuġaanik suli qiñiyunaqutinik savaaguruanik qatiqtuaniglu kaviqsuaniglu manigñik, aasii qaił̣ł̣ugich Rebekah-mun. Qaitchivḷuniḷu aniqataanullu aakaŋanullu akisuruanik aitchuutinik.
54Tavra Abraham kivgaŋa aŋutillu piqatigirani niġiñiqsut suli imiqłutiŋ, tavrani aasii siñiktaqłutiŋ. Makinnamiŋ uvlaami, uqallaktuq, “Ki, aullaġlaŋa umialimnun.”
55Aglaan Rebekah-m aniqataatalu aakaŋatalu uqallaktuk, “Tamaaniivsaallagliuna qulinuaglaan uvluni, aasii aullaqpaallugluni.”
56Aglaan uqallaktuq, “Aullaqsaiḷiñasigut. Atanġum uvva iglaunimni piḷḷuatautiqaqtitkaaŋa; utiġlaŋa umialimnun.”
57Iliŋiksa kiugaak, “Ququaġlugu amna Rebekah apiqsruġlakput qanuġniaġmagaan.” 58Ququaqługu aasii Rebekah apiġigaat, “Aullaqatigisukpiuŋ una aŋun?”
“Ii” ilaata kiugaich.
59Tavraasii Rebekah aullaqtinŋagaak piqatiqaqługu qaŋapak ilaata kivgaŋanik piqatigivlugiḷḷu Abraham-gum kivgaŋalu iñuŋiḷḷu. 60Rebekah uqallautiŋagaak ikayuutiksraŋiññik:
“Qanuqtuq, aniqatiiŋ, aakaġuġumautin iñugiakpaktuanun!
Kiŋuvaaġiniaqtatillu akimmatiqaġuuyumaut piññaktaaġilugich nunaaqqiŋich akiḷḷiqpich!”
61Tavraasii Rebekah kivgaŋiḷḷu niviaqsiat itqanaiyaqłutik ikuniqsut pikukturuanun aullaqatigisaqługu Abraham kivgaŋa, aasii iluqaġmiŋ aullaqłutiŋ.
62Isaac iñuuniaġniqsuq Negev-mi, Beer Lahai Roi#24.62 Hebrew-t uqaluanni “Beer Lahai Roi” sivuniqaqtuq “Nivviaŋa Iñuuruam Tautuguuruam Uvamnik.” -miŋŋaqłuni. 63Aniñiqsuq anaqaqsraaqtuami pisuaqtuaġiaqłuni nunaraami aasii tautukługich pikukturuat qaiḷġataviksuat. 64Rebekah-m tautukkamiuŋ Isaac, niuŋaruq pikukturuamiñ 65aasii apiġivlugu Abraham kivgaŋa, “Kiña amna aŋun pisuaqłuni tuŋiptinnukpa?”
“Umialiga Isaac taavva,” kivgauruam kiugaa. Tavraasii Rebekah-m nasaġauramiñik taluniġaa kiiñani.
66Kivgauruam uqautigaa Isaac iluqaanik nalautittuanik savaaġiramiñik. 67Tavraasii Isaac-gum Rebekah tupiġmuutiŋagaa aakami Sarah-m tupqanun, aasii tuvaaqasiutivlugu. Isaac-gum piviuttaġiqpaŋagaa Rebekah, araktigivluguasii aakamiñik piitchiaqaġnimiñi.
Currently Selected:
Genesis 24: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
