Genesis 26
26
Isaac Iñuuniaġman Gerar-mi
1Kaagnaq allasuli iḷiŋaruq nunami taimani nalautinŋaruatun Abraham iñuuŋŋaan. Isaac Abimelech-mugniqsuq, umialiŋannun Philistia-ġmiut Gerar-mi. 2Ataniq niptaŋaruq Isaac-mun aasii uqallakłuni, “Egypt-mugnak; maani nunamiittin, irvigitquramni. 3#Gn 22.16-18.Maani iñuuniaġiñ, itqatiginiaġikpiñ suli quviasaaġunmik aitchuġlutin. Qaiññiaġiga iluqaan manna nuna iliŋnun kiŋuvaaġiraġnullu. Unniqsuqłiisigiŋaraġa aapagnun Abraham-mun taŋŋiġḷugu. 4Kiŋuvaagsriññiaġikpiñ iñugiaktigiruanik uvluġiatun qiḷaŋmiittuatitun, qaiññiaġigalu iliŋiññun manna iluqaan nuna. Iluqaġmiŋ nunaqpaich apiġiniaġaanŋa piḷḷuatautiqaġuglutiŋ aitchuutigiŋaraptun kiŋuvaagnun. 5Piḷḷuatautiqaqtinniaġikpiñ, qanukkii Abraham-gum kamagiŋagaaŋa suli nalaułługich pitquratka piraksriutitkalu.”
6Tainnaqhuni Isaac iñuuniaŋaruq Gerar-mi. 7#Gn 12.13; 20.2.Tavraniittuat aŋutit apiqsruutigimmarruŋ tuvaaqatini, uqallaktuq aniqatiginivḷugu. Tuvaaqatiginiḷugu nivliusiġilaiññiġaa, sivuuġavluni aŋutinun tamaaniittuanun tuqunniaġasugaluni Rebekah piksraqtaaġisuglugu iliŋisa, aġnaġikpaił̣ł̣uni, 8Isaac tamaaniiksraaġianigmiuġlu, Umialguruam Abimelech-gum itchuaqami anmun igalaurakun tautukkaa Isaac-gum Rebekah tuvaaqatini iqittaŋa. 9Abimelech-gum aipkaŋaġaa Isaac aasii uqallautivlugu, “Tavra ai tuvaaqatiginiġiñ! Summan uqallaŋaruatin aniqatiginivḷugu?”
Ilaata kiugaa, “Tuqutauniaġasugaluŋa uqallakkuma tuvaaqatiginiḷugu.”
10“Qanuq imña aŋalanniqpisigut?” Abimelech uqallaktuq. “Iñuŋma imma iḷaanni iḷaŋata siñiqatiginayaġniġaa tuvaaqatin, aasii ilvich patchisaunayaqtutin pasirauniptinni.” 11Abimelech-gum kiliktuġniġaich iñupayaat: “Kiapayaaq aŋalamaqłukpagu una aŋun naakka tuvaaqataa tuqutauniaqtuq.”
12Isaac nautchirriiŋaruq tamattumani nunami, aasii taaptumani ukiumi kivluiŋaruq tallimakipiatun (100) qaaŋiqł̣ugich kanġaqsruiŋaramiñiñ, qanukkii Atanġum piḷḷuatautiqaqtisimaaqługu. 13Piḷḷuataqpiiññaġniqsuq aasii umiallakpauraqłuni. 14Iñugiaktuanik imnaiqaġman suli pamiqsaanik iñugiaktuaniglu kivgaqaqhuni, Philistia-ġmiut killuġiŋagaat. 15Tavraasii kivviiŋagaich nunamik iluqaisa nivviat aapaŋata Abraham-gum kivgaŋisa nivaaŋich Abraham iñuuŋŋaan.
16Abimelech-gum uqallautiniġaa Isaac, “Aullaġiñ maaŋŋa nunaptiŋniñ. Uvva suaŋŋatiniłhaaŋarutin uvaptinniñ.” 17Tavraasii Isaac aullaŋaruq aasii nullaqłuni Gerar Valley-mun, tavraniiksraaġiŋaruq. 18Ilaata nivatqiŋagaich nivviat nivaaguqqaaŋaruat Abraham iñuuŋŋaan, Philistia-ġmiut kivviiŋaraŋich tuquanigman Abraham. Isaac-gum atchiqsuġniġaich nivviat atchiqsuutigiŋaraŋiññik aapami.
19Isaac-gum kivgaŋich nivaŋarut nivviamik natiġnami aasii paqiłłutiŋ imiġmik. 20Imnaiḷiqirauruat Gerar-mi qanaaŋarut Isaac-gum imnaiḷiqiriŋiññun uqaqłutik, “Una imiq uvagut pigigikput.” Isaac-gum atchiŋamagaa nivviaq “Qanaaġunmik.”
21Isaac-gum kivgaŋich allamik nivaŋarut nivviamik, tavrasuli qanaaġutigimammigaat taamna, aasii atchiŋagaa “Uumikkunmik” 22Nuułłuni tavraŋŋa allamik aasii nivaŋaruq nivviamik. Atiŋirrutigiŋaitkaat taamna, aasii atchiŋagaa “Atanġiqsirrunmik.” Uqallaktuq, “Tavra Atanġum atanġiqsaupkaġaatigut iñuuniallasivḷuta nunami, piḷḷuatautiqaġniaqtugut maani.”
23Isaac aullaŋaruq aasii Beersheba-mukłuni. 24Unnuaġmagu tavrani Atanġum niptaġvigiŋagaa aasii uqallakhuni, “Uvaŋa God-auruŋa aapagnun Abraham-mun. Iqsisiqaġnak; Itqatigigikpiñ. Piḷḷuatautiqaqtinniaġikpiñ suli kiŋuvaagsriḷḷutin iñugiaktuanik pisigilugu unniqsuqłiisigiŋaraġa kivgaġiramnun Abraham-mun.” 25Isaac ikipkaiviḷiuġniqsuq tavrani aasii nanġaqługu Ataniq. Tavraasii nullaġniqsuq tavruŋa, suli kivgaġiraŋich nivavsaaŋarut allamik nivviamik.
Sivunniutaak Iviġaummatikun Isaac-guvlu Abimelech-guvlu
26 #
Gn 21.22. Abimelech qaiŋaruq Gerar-miñ piqatigivlugu Ahuzzath ikayuqtini sunik sivunniġñiaqami suli qaukłiŋat Phicol aŋuyaktimi tautugiaqługu Isaac. 27Isaac apiqsriruq, “Summan uvva qaivisi tautugiaqłuŋa, uumigivluŋa suli aullaqtinŋaqqaaqłuŋa nunavsiññiñ?”
28Iliŋisa kiuŋagaat, “Uvva iḷitchuġirugut Ataniq itqatautilaaŋanik iliŋnun, suli isumarugut inillaisukłuta sivunniuġunmik ilivsiññun. Unniqsuqłiitqugiptigiñ 29anniġñiaŋiññiḷuta, uvaguttauq anniŋaiññaptigiñ. Aŋalalluataŋagiptigiñ suli aullaqtiłłutin aŋuyautaitchuakun. Tavra paŋmami nalunaitchuq Atanġum naglikkusiaqaqtisimaaġaatin.” 30Isaac niqinaqutiksriuŋaruq iliŋiññun, aasii niġiŋarut suli imiqłutiŋ. 31Uvlaakumman uvlaatchaurami unniqsuqłiigutiŋarut avanmun. Isaac-gum aullaqtinŋagaich, aasii avirrutivlutiŋ avilaitqatigiiksuaguvlutiŋ.
32Taaptumani uvlumi Isaac-gum kivgaŋich qaiŋarut aasii uqallautivlugu nivvialiamiktigun. Uqallaktut, “Paqittuagut imiġmik.” 33Atchiġñiġaa nivviaq “Unniqsuqłiiñmik.” Tainnaqłuni nunaaqqiŋa Beersheba-m atchiqsauŋaruq.#26.33 Hebrew-t uqaluŋanni Beersheba-m sivuniŋa “nivviaq unniqsuqłiiñmik.”
Esau-m Tuvaaqatiŋich Allaniñ Nunaniñ
34Esau ukiunikkami malġukipiatun (40), tuvaaqatchiŋaruq malġugnik Hit-miunik, Judith pania Beeri-m, suli Basemath panigiraŋa Elon-gum. 35Isumaaluktitchiŋaruk Isaac-miglu Rebekah-miglu.
Currently Selected:
Genesis 26: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
