Genesis 30
30
1Aglaan Rachel-gum qitunġiŋaiñŋagaa Jacob, aasii saŋiagiliqł̣ugu aataurani suli uqallautigaa Jacob, “Miqłiqtuqaqtinŋisuaġumŋa tuquniaqtuŋa.”
2Jacob-gum uumitchautiŋagaa Rachel suli uqallakhuni, “God inaŋiġumiñaitkiga. Ilaata tavra qitunġiḷaisitkaatin.”
3Uqallautigaa, “Uvva kivgaġa Bilhah; siñiqatigisaġiñ, miqłiqtuqautiyumagaaŋa. Taaptumuunaaqługu aakaġuġumauŋa ilaagun.” 4Tavraasii qaiñŋagaa kivgani Bilhah uimiñun tuvaaqasiutiruatun, aasii siñiqatigiŋagaa. 5Bilhah siŋaiyauŋaruq aasii iġñiqaqhuni Jacob iġñiŋanik. 6Rachel uqallaktuq, “God-im isivġiutimiñi iviġaumagiŋagaaŋa. Tusaavlugu aŋaiyyutiga iġñiksritkaaŋa”; tavraasii atchiŋagaa Dan-mik.#30.6 Hebrew-t uqaluŋanni Dan-gum sivuniŋa: “Isivġiuŋaruq.” 7Bilhah siŋaiyauvsaaqhuni igḷugaa Jacob iġñiŋa. 8Rachel uqallaktuq, “Siġġaqivluŋa suġuqatigiŋagiga aatauraġa, aglaan akimaruŋa”; tavraasii atchiŋagaa Naphtali-mik.#30.8 Hebrew-t uqaluŋanni Naphtali-gum sivuniŋa: “Suġuqatiga.”
9Leah miqłiqsiḷḷaiġñiqami, qaiñŋagaa kivgani Zilpah Jacob-mun nuliaġitquvlugu. 10Zilpah iġñiqaŋaruq Jacob-miñ. 11Leah uqallaktuq, “Piḷḷuataqtuaguruŋa”; aasii atchiŋagaa Gad-mik.#30.11Hebrew-t uqaluŋanni Gad-gum sivuniŋa: “Piḷḷuataun.” 12Zilpah iġñivsaaŋaruq Jacob-miñ, 13aasii Leah uqallaktuq, “Quviasupiallaktuŋa! Tavra aġnauruat quviasuktualiullasigaanŋa”; tavraasii atchiŋagaa Asher-mik.#30.13 Hebrew-t uqaluŋanni Asher-m sivuniŋa: “Quvianaq.”
14Kivluiñaqsimman palauvaksranik Reuben nautchiaqaġvigñukkami paqinŋaruq nauruanik mandrake-nik, aasii aakamiñuutivlugich Leah-mun. Rachel-gum uqallautigaa Leah, “Aitchullaŋŋa iġñiqpich mandrake-gutiŋiññiñ.”
15Leah-m kiugaa, “Naamaŋitpa uigiŋakamŋa? Naaggasuli uvva pisuaqsimmigitin iġñiġma mandrake-gutiŋich.”
Rachel uqallaktuq, “Aitchuġumŋa iġñiqpich mandrake-ŋiññik, siñiqatigiyumiñaġiñ Jacob unnuapak.”
16Jacob qaimman nautchiaqaġvigñiñ anaqammagu, Leah-m paaqługu uqallautigaa, “Siñiqatiginiaġiŋma unnuapak qanukkii akiḷiqsauŋarutin uvva iġñiġma mandrake-gutiŋiññik.” Tavraasii nalaqatigiŋagaa taaptumani unnuami.
17God-im kiuŋagaa Leah-m aŋaiyyutaa, aasii siŋaiyauvluni tallimmiŋagai iġñiġutini Jacob-miñ. 18Leah uqallaktuq, “God-im akiḷiusiaqaqtitkaaŋa, qanukkii qaiñŋakapku kivgaġa uimñun”; aasii atchiŋagaa iġñini Issachar-mik.#30.18Hebrew-t uqaluŋanni Issachar-m taiñiŋa itqayaqtuq: “Akiḷiusiaq.” 19Leah aasii siŋaiyauvsaaqłuni itchaksraŋŋuŋagai iġñiġutini Jacob-miñ. 20Ilaa uqallaktuq, “God-im aitchulluataŋagaaŋa. Tavra uigma akuqtullasigaaŋa, qanuq uvva itchaksranik iġñiniktitkiga”; tavraasii atchiŋagaa Zebulun-mik.#30.20 Hebrew-t uqaluŋanni Zebulun-gum sivuniŋa: “Akuqtuun.” 21Aquvatigun paniqaŋaruq, atchiqsamiñik Dinah-mik.
22Tavra God-im itqaumaŋagaa Rachel; kiuŋagaa aŋaiyyutaa aasii miqłiqsiḷḷasivḷugu. 23Siŋaiyausaŋaruq aasii iġñiqaqhuni. Uqallaktuq, “God-im piiġaa kanŋunaqtuaq uvamniñ iġñiqaqtiłłuŋa. 24Atanġumtuq iġñiksrivsaaġliŋa”; aasii atchiŋagaa Joseph-mik.#30.24 Hebrew-t uqaluŋanni Joseph-gum sivuniŋa una: “Iġñiksrivsaaġliŋa.”
Jacob-gum Sivunniuqatigimmauŋ Laban
25Joseph anianiŋman Jacob-gum uqallautigaa Laban, “Aullaqtinŋa, utiġumauŋa aimaaġvimñun. 26Qaiḷḷugich tuvaaqatitka suli miqłiqtutka akiññaktaaġiŋaratka savautivlutin, aullaġumauŋa. Iḷisimarutin qanutun savalluataŋatilaamnik ilignun.”
27Laban-gum uqallautigaa Jacob, “Uumiŋa uqallallaglaŋa: Iḷitchuġiŋaruŋa nalautitchumaaqtuanik Atanġum piḷḷuatautiqaqtinmaŋa ilvich pisigivlutin. 28Qanutun akiññaktaġukkuvich taisiḷutin, akiḷiġñiaġitka.”
29Jacob-gum kiugaa, “Iḷisimarutin qanutun savaŋatilaamnik iliŋnun suli niġrutitin piḷḷuataŋatilaaŋiññik qaunagikapkich. 30Iñugiakitkaluaqtuat pigiratin qaiŋaiñŋaġma iñugiaksipiaġataŋarut, suli Atanġum piḷḷuatautiqaqtitkaatin sugnamukkaluaqama. Paŋmami uvvali savaŋnaqsiruŋa igluqatiitka savautilugich.”
31“Sumik akiḷiġñiaqpigiñ?” Laban apiġigaa.
Jacob-gum kiugaa, “Akiññaktaagiḷḷuŋaunnii. Qaunaginiaġitkasuli niġrutitin una iviġaumaginiaġupku: 32Iluqaisa pamiqsaaġiratin qimilġuuġlagich uvlupak aasii piiqługi aglakulaatuallu naakka miŋuġluktuallu imnaipayaat suli maŋaqtaagulaaqtuallu imnaiyaapayaat suli miŋuġluktuallu naakka aglakulaaqtuallu nagruligit. Tavra taapkuatualuich akiḷiusiaġisuktatka. 33Qakugu siġġaġnaiḷḷugu iḷitchuġiyumiñaqtutin pitqiksiġautaiñŋatilaamnik. Qimilġusaqtuaġupkich akiññaktaatka, nagrulignik piqaġniġuma aglakulaaŋitchuanik naakka miŋuġluktuaguŋitchuanik suli imnaiyaañik maŋaŋitchuanik, tavra iḷisimaniaqtutin tigliktaagutilaaŋiññik.”
34Laban-gum kiugaa, “Iviġaumagigiga taamna. Tainna piñiaġniqsuguk uqallausiqtun.” 35Aglaan taaptumani uvlumi Laban-gum piiŋagaich aŋusallut nagrulgich quvluayuuligaat naakka aglakulaaqtuat suli aġnasallupayaat aglakulaaqtuat naakka miŋuġluktuat naakka qatiqtaaqapayaaqtuallu; piiġmiñiġaisuli iluqaisa maŋaqtuat imnaich. Iġñiġutiini qaunaksriḷiutiŋagaich taapkunuŋa. 36Aullautiŋagaich Jacob-miñ pamiqsaagutini ayuulgutilaamisun piŋasuni uvluni. Jacob-gum qaunaginiġaich Laban-gum pamiqsaaŋich unitchaŋich.
37Jacob suŋaaqtaanik qisiqsiutiksraŋaruq poplar-nik, almond-nik, suli plane-git napaaqtuŋiññiñ aasii qaaŋat iḷaŋagun piiyaqługu qisiqsiutit qatiqtaaŋa qiñiġnaqsivḷugu quvluayuuqłuni. 38Inillakługich aasii tamatkua qisiqsiutit sivuġaannun pamiqsaat imiġviŋisa. Tavruŋa inillaŋagaich, qanukkii niġrutit nulliġuummata imiġiaqamiŋ. 39Tavraasii nagrulgich nulliġmata sivuġaanni qisiqsiutit, piayaaliraqtut miŋuaġniġulaaqtuanik, aglakulaaqtuanik, suli miŋuġluktuanik.
40Jacob-gum imnaich iliŋiguaqsimaaŋagaich nagruligniñ aasii saatiłługich tuŋaanun miŋuaġniġulaatun ittuanun suli maŋaqtaanun niġrutiŋisa Laban pamiqsaaŋisa. Tainnaqłuni naupkaŋagaich ilaata pamiqsaagutini aasii iliŋisiguaŋavlugich Laban-gum pamiqsaaŋiññiñ.
41Suaŋaruat niġrutit nulliġmata, Jacob-gum qisiqsiutit iḷiraġigaich sivuġaannun imiġiaġviich, nuliquvlugich akunġanni qisiqsiutit. 42Aglaan iḷiḷaitkaich qisiqsiutit sivuġaannun sayaitchuat niġrutit. Qakugumman Laban niġrutiniŋaruq iluqaiññik sayaitchuanik, aasii Jacob iluqaiññik sayyaġikhutiŋ niqqaġiksuanik. 43Tainnaqhuni tavra Jacob umiallapiaġataŋaruq. Iñugiaktuanik pamiqsaaqaŋaruq, aġnallu aŋutillu kivgaŋich, pikukturuanik, suli kakaktinik.
Currently Selected:
Genesis 30: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
