Genesis 45
45
Joseph-gum Uqallautigaich Aniqatiini Kiutilaamiñik
1 #
Ac 7.13. Joseph irrusiñi nalunaqtilguiḷigaa takkuanni kivgami, tavraasii tiligaich iluqaisa anitquvlugich inimiñ. Alla iñuk inŋaitchuq Joseph-gum kiligmagich aniqatiini kiutilaamiñik. 2Qiagami nipatuvaił̣ł̣uni Egypt-miut tusaaŋagaat, aasii tusaayugaat tikiñŋagaat umialigum igluqpaŋa. 3Joseph uqallaktuq aniqatiimiñun, “Uvaŋauvva Joseph-guruŋa! Aapagasuli iñuuva?” Aglaan aniqatiiŋisa tusaagamirruŋ taamna, iqsitchakpaił̣ł̣utiŋ kiuyumiñaiñŋagaat. 4Joseph-gum aasii uqallautigai, “Qalliḷaaġitchi.” Qalliḷaaqtut, aasii uqallaktuq, “Uvaŋauvva aniqatiksi Joseph, tuniŋaraqsi Egypt-mun. 5Iłuiḷḷiuġnasi naakka pasiñasi ilivsiññun tuniŋatilaamnik mauŋa. God-im uvva aullaqtinŋagaaŋa sivuvsiññi annautitquvlugich iñuggutiŋich iñuich. 6Uvva ukiut igḷuvaallukkaat niqaiḷḷiuġniksrat nunami; tallimanisuli imma ukiuni nauyumiññaksaaġumiñaitkaat naakkaunnii kivluiḷutiŋ. 7God-im uvva tiliŋagaaŋa sivuvsiññi annautitquvlusi kamanaqtuakun suli kiŋuvaasiḷu iñuullatquvlusi. 8Tavra ilivsi tiliŋaitkivsiŋa mauŋa, aglaan God-im. Siḷġiqsuqtiliutiŋagaaŋa Pharaoh-mun, qaukłiġuutivluŋa iluqaiññun igluqatiimiñun suli aŋalatchiriġuqłuŋa Egypt-mun.
9 #
Ac 7.14. “Qilamiksruaġlusi utiġitchi aapamnun aasii uqallautilugu innaġniḷugu iġñiŋa Joseph: ‘God-im qaukłiḷiutiŋagaaŋa iluqaanun Egypt, qaiñ uvamnun; aannagutaaġnak. 10Iñuuniaġumiñaqtusi nunaŋani Goshen Egypt-mi, qanitchumausi uvamnun—ilivsiḷu, miqłiqtusiḷu, tutaaluusiḷu, imnaisiḷu, nagruligaallu, pamiqsaasiḷu, suli iluqaqpiuraŋisa sut pigirasi. 11Goshen-miitkuvsi, qaunagiyumiñaġivsi. Immasuli tallimani ukiuni niqaiḷḷiuġnaq inniaqtuq; ilivsiḷu, iḷasiḷu suli pamiqsaasi kaaksiulusi tuqutquŋitkivsi.’”
12Joseph uqavsaaqtuq, “Iluqavsi, ilviḷḷu Benjamin, qiñiġivsiñŋa Joseph-gupiaqtilaamnik. 13Uqallautilugu aapaga qisiksrautiqaqtilaamnik maani Egypt-mi suli uqallautilugu supayaamik tautuktavsiññik. Qilamiqsruaġlusiasii qaġġisilugu mauŋa.”
14Iqimmalaaġaa nukaaluni Benjamin aasii qianagutivluni; Benjamin-tauq qiammiuq iqimmiḷḷaan. 15Tavra, qiallaġmi, iqittaallaagaich aniqatiini suli kunikługich. Taaptuma aquagun, aniqatiiŋisa uqaqatigiuraallasigaat.
16Tusaayugaat tikiñmata Pharaoh-m igluqpaŋanun, Joseph aniqatiiŋich qaiñivḷugich, umialiglu qaukłiurauruallu iviġaumaŋarut. 17Uqallaktuq Joseph-mun, “Uqautikkich aniqatiitin usiḷḷiitqulugich niġrutiŋich aasii utiġlutiŋ nunaŋanun Canaan. 18Aikł̣iġḷich aapamignik suli qitunġamignik aasii utiġlutiŋ mauŋa. Aitchuġniaġitka nunagigñiqtamik Egypt-mi, iḷaŋaniiqsuallaniaqtut iñuuniaġumiŋ. 19Uqallautilugich aksraktualigaanik usiaġunnaligaaqulugich Egypt-miñ, aasii qaġġisilugich tuvaaqatitiŋ miqłiqtuuratiŋ aapaktiglu. 20Uŋiaritquŋiḷḷugich unitchiñiaġumiŋ suġautamignik; pigigñiqtauruat nunapayaaŋani Egypt piginiaġaich.”
21Jacob iġñiġutiiŋich kamaksrirut uqallausiamignik. Joseph-gum aksraktualigaanik usiaġutiksritkaich, umialgum piraksriusiatun, suli taquaksrił̣ł̣ugich niqinik iglauniksraŋanni. 22Aitchuqługiḷḷu iluqaisa annuġaatqiutiksraŋiññik, aglaan Benjamin aitchuġaa 300-tun iñugiaktigiruanik qatiqtuanik manigñik suli tallimanik annuġaatqiutiksraŋiññik. 23Tuyuŋaġaa aapani quliñik kakaktinik usiaqtuanik nakuuniqtaŋiññik Egypt suġaliŋiñik suli quliñik aġnasallunik kakaktinik usiaqtuanik palauvaksranik, punniġnik, suli allanik niqinik taquaksraŋiññik. 24Aullaqtitkai aniqatiini aasii aullaqisaġmata, uqallaktuq iliŋiññun, “Qanaaġnasi iglaullavsi.”
25Egypt-miñ aullaqtut aisaqłutiŋ aapamignun Jacob-mun Canaan-miittuamun. 26“Joseph iñuumaruqsuli!” uqallautigaat. “Qaukłiġuutiŋamaruq iluqaanun Egypt-mun!” Jacob qaallaummiruq suli ukpiġiŋitkaich.
27Aglaan uqallautimmanni iluqaanik Joseph uqaluŋiññik ilimignun, suli tautukługich aksraktualigaat usiaġutit Joseph tuyuġiraŋich aullautisaqpanni Egypt-mun, tupaummiŋaiġataqtuq. 28“Iġñiġa Joseph iñuumaruqsuli!” ilaa uqallaktuq. “Aarigaa, taamna naamaruq! Tautugiaqtuksraġigiga tuquŋaiñŋaġma.”
Currently Selected:
Genesis 45: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
