Luke 10

Jesus Tiligai 70 Iḷitchitqurat

1Taavruma aquagun Ataniq piksraŋaruq 70 allanik iḷitchitquranik, aasii aullaqtiłługich sivumiñi malġuullaavlugich, nunaaqqipayaanun ilaan ullakkumakkamiñun. 2#Mt 9.37, 38.Tavra ilaan uqallautiŋagai, Iñusalaich utaqqirut tusaayumavlutiŋ tusaayugaaġiksuanik, palauvaksratun nauganiktuatun kipisałhiñaaġuqługich, aglaan savaktit iñukitchut. Tavraasii qiññuaqtuġitchi Atanġannun savaktit tilisivsaaqulugu savaktiksravsaamiñik. 3#Mt 10.16.Aullaġitchi. Uvva, tiligivsi imnaiyaatun akunġannun amaqqut. 4Saagaġnasi maniqaġviŋñik, puukataniglu, aluġutiniglu, suli paġlannigḷusi iñaviqqutchiġñasi apqunmi. 5Kisupayaaq iglu isiġvigiguvsiuŋ, uqallaqqaaġitchi inna, Tutqiutiqaġitchi. 6Tavraasii tutqiḷḷaturuaq iñuk tavraniitpan, tutqiun inniaqtuq. Aasii tutqiutiqallaturuamik iñuitpan, tutqiun inniaŋitchuq tavrani. 7#1 Co 9.14; 1 Ti 5.18.Nayuutiyumausi taavrumani iglumi, niġiḷusi sunik niqiksritpasi imiġlusiḷu, qanuq savakti nalliummatiruq akiḷiusiaksramiñun. Nuktaġnasi iglumiñ iglunun. 8Qakugupayaaq tikitkuvsi nunaaqqiñun aasii paġlakpasi, niġiyumausi sunik niqłiqsuqpasi. 9Iłuaqsiḷugich naŋittuat taavrumani nunaaqqimi, suli uqallautilugich, God-im atanniqsimmataata qallipiaġataġaasi. 10#Ac 13.51.Aglaan qakugupayaaq tikitkuvsi nunaaqqimun aasii paġlaŋitpasi, aullaġumausi apqutiŋiññun aasii uqallaglusi, 11#Mt 10.7-14; Mk 6.8-11; Lk 9.3-5.Avyuŋaunnii nunaaqqiunivsi niviruaq isigaptiŋnun, uvagut tilaktiġikput akiḷḷiḷiutivlugu ilivsiññun. Aglaan una iḷisimasiuŋ, God-im atanniqsimmataata qallipiaġataŋagaluaġaasi. 12#Gn 19.24-28; Mt 11.24; Mt 10.15.Uqallautigivsi, uvluani isivġiġvium, God naglikkutiqałhaaġniaqtuq iñuŋiññun Sodom taavrumaŋŋa nunaaqqimiñ tukkuliiŋitchuamiñ ilivsiññik.

Ukpiŋitchuat Nunaaqqich Iḷaŋiññi

(Matthew 11.20-24)

13 # Is 23.1-18; Ez 26.1—28.26; Jl 3.4-8; Am 1.9, 10; Zec 9.2-4. Qanutun naglignaqtigirusi ilivsi, Chorazin-miut. Qanutun naglignaqtigimmiusi ilivsi Bethsaida-ġmiut. Qanuq aliuġnaqtuat savaat savaaguruat ilivsiññi savaaguŋakpata Tyre-miḷu Sidon-miḷu, taimaniuvvaa isumalitqikkumiñaŋagaluaqtut annuġaaġlutiŋ miitchuŋnik suli aquppiḷutiŋ aġrani. 14Tavra uqallautigivsi, uvluani isivġiġvium isivġiusiaksraŋak Tyre-vlu Sidon-lu tunikił̣haaġniaqtuq ilivsi isivġiusiaksravsiññiñ. 15#Is 14.13-15.Aasii ilivsi Capernaum-miut, isumavisi tugliqsruutinasugalusi qiḷaŋmun kamanaunmi? Nunaaqqiqsi suksraunġiqsauniaqtuq. Qanuq aliuġnaqtuat savaaguruat iliŋni savaaguŋakpata Sodom-mi, napanayaġaluaqtuq uumuŋaaglaan uvlumun. 16#Mt 10.40; Mk 9.37; Lk 9.48; Jn 13.20.Tavra Jesus uqallautiŋagai iḷitchitqurani, kialiqaa naalaġnigumisi naalaġnimmigaaŋa. Suli kialiqaa pisuŋitchuam ilivsiññik pisuŋiñmigaaŋa. Aasiisuli kialiqaa pisuŋiññamiŋa, pisuŋiñmigaa tiliriga.

Utiqtut 70 Tilirauruat Iḷitchitqurat

17Utiŋarut 70 iḷitchitqurat quviasuutiqpaqaqłutiŋ, uqaqłutiŋ, Ataniiq ilitqusiqł̣uich unnii kamagigaatigut anittaqaptigik atqiñ atuqługu. 18Tavra Jesus uqallautiŋagai, Tautuŋagiga Satan kataktuaq igniġuuqpatittuatun qiḷaŋmiñ. 19#Ps 91.13.Uvva, suaŋŋasiŋagivsi tunmaġumiñaqsivḷusi nimiġianun igutchaqpaŋnullu kapputiliŋnun, suli payariyumiñaqsivḷugu iluqaan suaŋŋataa uumigirim, suli sum anniġumiñaitkaasi. 20Aglaattauq quviatchakpautiginagu ilitqusiqł̣uich kamaksriñiŋat ilivsiññik, aglaan quviasukpagitchi atisi aglautiŋammata qiḷaŋmi.

Jesus Quviatchakpaktuq

(Matthew 11.25-27; 13.16-17)

21Taavrumani ikarraġmi Ilitqusiġiksuam quviatchaktinniġaa Jesus, aasii uqallaktiłługu, Aapaaŋ, Atanġuruatiin qiḷaŋmun nunamullu, quyyavigigikpiñ tamatkua iriqsimaŋakapkich isumaturuaniñ kaŋiqsisiqaqtuaniḷḷu, aasii satqummiqł̣ugich iñuŋnun ukpiġutiqaqtuanun miqłiqtutun. Aaŋ, Aapaaŋ, taamna piŋagiñ ilivich pisuutigivlugu iviġaumagivlugulu. 22#Jn 3.35; Jn 10.15.Aapama supayaat qaiñŋagai uvamnun, aasii kialiqaa iḷisimaŋitkaa Iġñiq aglaan kisimi Aapam. Kialiqaa suli iḷisimaaġiŋitkaa Aapa aglaan Iġñiġum kisimi, kiapayaaġlu Iġñiġum iḷitchuġipkakkaŋa Aapamik.

23Tavrani qiviaqługich iḷitchitqurani Jesus uqallautiŋagai iñuił̣aami, Quviasugitchi tautukavsi tautuavsiññik. 24Qanuq uqallautigivsi, iñugiaktuat uqaqtiŋisa God-im umialgiḷḷu kipiġniuŋagaluaqtut tautugukługich ilivsi tautukkasi, aasii tautuŋaitkaich, suli tusaayumavlugich sut tusaakkasi, aasii tusaaŋaitkaich.

Uuktuun Iñulluatakun Samaria-ġmiukun

25 # Mt 22.35-40; Mk 12.28-34. Tavra pitquranik iḷisaurri makinŋaruq uuktuaqsaqługu, apiġivlugu Jesus, Iḷisaurrii, sumik piruksrauvik iñuuyumiñaqsisaġluŋa isuitchuamun? 26Jesus kiuŋagaa, Qanuq God-im pitquraŋi iñuutqurivat? Sunik taiguaġuuvich taapkunani? 27#Dt 6.5; Lv 19.18.Ilaan kiuŋagaa, Piviuttaġipiaqsaġiñ Ataniq God-igikkan, piviuttaġilugu iḷuŋniñ, iluqaaniḷu iñuuniaġniġni, iluqaaniḷu piḷġusiġñi, iluqaaniḷu isumaniġni, suli piviuttaġiraksraġigiñ siḷalliñ iliktun iḷiuġlugu. 28#Lv 18.5.Tavra Jesus kiuŋagaa, Kiggutin nalaunŋaruq. Tainna iñuuniaġiñ aasii iñuuniaqtutin isuitchuamun.

29Tavra iḷisaurri pitquranik, kipiġniuqłuni patchisaitchukłuni inmiñi, apiġiŋagaa Jesus, Kiuva siḷalliġa? 30Jesus kiuŋagaa, Iñuk aullaŋaruq Jerusalem-miñ Jericho-mun. Aasii kasuivḷuni tigligayuktinik, ilaisaasii annuġaiyaŋagaat anaumikł̣ugulu aasii qimakługu tuquanŋuqługu. 31Tavra aŋaiyyuliqsiqpak iglaummiñiqsuq tamatkunuuna apqutitigun, aasii tautukamiuŋ ikiḷik iñuk, qaaŋiqsaaŋagaa taavuunatchikun. 32Tainnatun suli Levite, tikiññami tavruŋa qiñiqtuallakkaluaqamiuŋ, qaaŋiqsaaŋaruq taavuunatchikun. 33#2 Ch 28.15.Tavrali Samaritan-guruaq, iglauniallaġmi tikiññiqsuq ikiḷiŋmun iñuŋmun, aasii tautukługu nagliksratchaŋaruq. 34Aasii ullakługu mamitaqtuŋagai kiḷḷiaġniŋi, kuviġaqługich uqsrumik wine-miglu, aasii qakiłługu kakaktimiñun, qaġġisiŋagaa tukkumaviŋmun, aasii qaunagiaqsivḷugu. 35Uvlaakumman tigusiŋaruq malġugnik maniuraŋnik aasii aitchuutigivlugik tukkumavium qaunaksriŋanun uqallautivlugu, Qaunagiyumagiñ, aasii qanutupayaaq maniksuutigigupku, utiqtitchiviginiaġikpiñ utiġuma. 36Tavra Jesus apiġiŋagaa, Isummatigiviuŋ nalliat taapkua piŋasut iñuich nalupqinaiqpa siḷalliutilaamiñik iñuŋmun kasuiruamun tigligayuktinik? 37Iḷisaurri pitquranik uqallaŋaruq, Taamna nagliktuiruaq ilaanik. Tavra Jesus uqallautiŋagaa, Aullaġlutin tainnatulli piyaqtuġiñ.

Jesus Isiqattaaqtuq Martha-mun Mary-mullu

38 # Jn 11.1. Tavra Jesus iḷitchitquraniḷu iglauvlutiŋ suli tikiñŋarut nunaaqqimun. Tavrani aġnam atiqaqtuam Martha-mik paġlaŋagaa aimaaġviŋmiñun. 39Aasii aniqatiqaŋaruq atiqaqtuamik Mary-mik. Mary aquppiŋaruq sivuġaani Atanġum naalaġnivḷuni iḷisaurrutiŋiñik. 40Tavrali Martha isumanŋutaniŋaruq pisigivlugu atqunaq savaŋnini, aasii ullakługu uqallautiŋagaa, Ataniiq, suliqutigiŋitpiuŋ aniqanma kisima savaurripkaġmaŋa? Tilliuŋ ikayuquluŋa. 41Tavra Atanġum kiuŋagaa, Martha, Martha, uŋiarirutin isumaalukpaitchutillu sutigun iñugiaktuatigun. 42Atausiq piraksraupiaqtuq. Mary-m piksraqtaaġiŋagaa nalaunŋaruaq. Piiġumiñaitchuq ilaaniñ.

Currently Selected:

Luke 10: INUPIAQ

Highlight

Copy

Want to have your highlights saved across all your devices? Sign up or sign in

Iñupiatun Mumiksat Uqalugiksuat (North Slope Iñupiaq Bible) © American Bible Society.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Learn More About Iñupiatun Mumiksat Uqalugiksuat