Luke 21
21
Uiḷgaŋaruam Aitchuutaa
(Mark 12.41-44)
1Jesus qiviaqłuni tautuŋagai suġalliruat iksriruat aitchuunmiŋnik aŋaiyyuvikpaum maniqaġvianun. 2Suli tautuŋammigaa iḷiappauruaq uiḷgaŋaruaq iksriruaq malġugnik kannuyaŋnik maniuraŋnik. 3Tavra Jesus uqallaŋaruq, Iḷumun uqallautigivsi, una iḷiappauruaq uiḷgaŋaruaq ikisił̣hamaaqtuq iluqaiññiñ allaniñ iñuŋniñ. 4Qanuq iluqaġmiŋ ikisiŋarut piukkaġniġmiŋniñ, aasii ilaa pisuksiuniġmiñiñ ikisiŋaruq iluqaanik pimiñik, iñuusautiksratualuŋmiñikunnii.
Jesus Uqautigigaa Suksraunġiqsauniksraŋa Aŋaiyyuvikpaum
(Matthew 24.1-2; Mark 13.1-2)
5Tavra iñuich iḷaŋisa uqallausiġimmarruŋ aŋaiyyuvikpak, qanutun qiñiyunaġniŋa uyaġagruaġiksuanik aitchuutiniglu God-mun piqaqłuni, Jesus uqallaŋaruq, 6Tautuksigik tamatkua iluqaisa. Taimanigu kisiŋŋuqtaqaġumiñaitchuq uyaqqaŋnik qaliġiiksuaŋnik ulġutauniaŋitchuaŋnik.
Iłuiḷḷiuġutit Nagliksaaqtirrusiallu
(Matthew 24.3-14; Mark 13.3-13)
7Tavra ilaisa apiġiŋagaat, Iḷisaurrii, qakugu taamna piñiaqpa? Suli sumik nalunaiñŋutaqaġniaqpa taamna piyumaagaqsikpan? 8Tavra Jesus uqallaŋaruq, Qaunagisitchi. Iñuŋmun sagluqipkaġnasi. Qanuq iñugiaktuat iñuich qaiñiaqtut uvaŋauŋŋuaqtuat uqaġlutiŋ, Uvaŋa Christ-guruŋa, uqaġlutiglu, Tavraġuutigaatigut. Ilivsi malignagich. 9Suli tusaaguvsi aŋuyaŋnik suli piallakłutiŋ sivuniksraiḷḷitchuanik, iqsiñasi, qanuq tamatkua piqqaaqtuksraurut, aglaan isuksraq tikiñŋaitchuq suli. 10Tavra Jesus uqallautivsaaŋagai, Nunauruat aŋuyaŋniaqtut allanun nunauruanun. Suli umialiqaqtuat aŋuyaŋniaqtut allanun umialiqaqtuanun. 11Nunalu aulaviñaqtaġniaqtuq, suli sumiḷiqaa inini niqaiḷḷiuqtaġniaqtut naŋirrutiqpaiḷḷu, suli piñiaqtut iqsiñaqtuat kamanaqtuallu allayuaġnaqtuat siḷami.
12Aglaan tamatkua iluqaġmiŋ sivuanni, iñuich tiguniaġaasi nagliksaaqtillusiḷu. Aitchuutiginiaġaasiḷu aŋaiyyuviŋñun tigutaaġviŋñullu, qaġġirrauraġaġniaġmiusi sivuġaannun umialgich atanaurallu pisigiluŋa. 13Tavrani nalautinniaqtuq ilivsi quliaqtuaġviksraqsi tusaayugaaġiksuanik. 14#Lk 12.11, 12.Tigukpasi uŋiarrisiginagu sivuani qanuq uqaġniksraqsi. 15Qanuq aitchuġniaġivsi uqaluksravsiññik isumattutiksravsiññiglu. Nalliataunnii uumigirivsi igḷutuġumiñaisaŋannik qapiqtaġumiñaisaŋanniglu. 16Aitchuutigiraġaġniaġaasi unnii aŋayuqaavsi aniqatiivsiḷu nanmiñikkaluavsiḷu avilaitqatikkaluavsiḷu, aasiisuli iḷasi tuqunniaġaich. 17Uumiginiaġaasi iñupayaat pisigiluŋa. 18Aglaan nalupqinaitchuamik annaurrauniaqtusi, nusaqsiunnii atausiq tammaŋiñmatun. 19Qapiġnasi suuramik-unnii, qanuq qapiŋitkuvsi, annautiniaġisi iñuggutisi.
Jesus Uqautigigaa Suksraunġiqsauniksraŋa Jerusalem
(Matthew 24.15-21; Mark 13.14-19)
20Tavraaglaan tautukkuvsiuŋ Jerusalem avanniqparruŋ aŋuyaich, tavrani iḷisimayumausi suksraunġiqsauniksraŋa qallisilaaŋanik. 21Tavraniasii tamatkua Judea-miittuat pigruġlich iġġiñun, suli tamatkua iniqpaŋmiittuat aullaġlutiŋ, suli tamatkua nunamiittuat isiġnagu iniqpak. 22#Ho 9.7.Qanuq tavrani isagutiniaqtut tatavsausiaksraŋich iñuich nalautitchaġlugich iluqaisa Bible uqaluŋich. 23Qanutun naglignaqtiginiaqtut aġnat siŋaiyauruat, aakauruallu miqłiqtuuraqaqłutiŋ. Qanuq kamanaqtuaq iłuiḷḷiuġutiqpak qaiñiaqtuq nunamun qinnautaalu God-im ukunuŋa iñuŋnun. 24Iñuich savikpaŋnik tuquġaġniaġaich, suli iñuich tigutaaqtaulutiŋ nunapayaani. Suli Jerusalem aŋalanniaġaat Jew-guŋitchuat, piviksraŋat Jew-guŋitchuat nalaulġataqtillugu.
Qaiñiksraŋa Iġñiŋata Iñuum
(Matthew 24.29-31; Mark 13.24-27)
25 #
Is 13.10; Ez 32.7; Jl 2.31; Rev 6.12, 13. Tavra siqiñiġmi tatqimiḷu uvluġianiḷu allanaqtuat piyumaaqtut kiliktuutit iñuŋnun. Suli nunami iluqaani nunauruat tutqiiḷiñiaqtut qanuqsausiiġḷutiglu sutigun iqsitchautaullaruatigun ulivrigaqpaktuatun taġiutun qasaqtaqtuatullu qaiḷḷiqsun. 26Iñuich sayaiġñiaqtut sivuuġavaiḷḷutiŋ sutigun piruatigun nunami iluqaani, qanuq qaummatit siḷamiittuat uniuqtinniaqtut inimiŋniñ. 27#Dn 7.13; Rev 1.7.Tavraniasiiñ tautugniaġaat Iġñiŋa iñuum qairuaq nuvuyakun suaŋŋatiqaġluni suli kamanaqtuamik qaumaniġmik. 28Tavra tamatkua piraġaaqsikpata, qiviaġitchi qunmun suli aaġluġlusi, qanuq annaurrauniksraqsi qalliruq.
Iḷisaksraq Fig Napaaqtumiñ
(Matthew 24.32-35; Mark 13.28-31)
29Tavra Jesus quliaqtuaġutiŋagai uuktuunmik. Tautuksiuŋ fig napaaqtua, iluqaisalu napaaqtut. 30Tavra tautukavsigik napaaqtut akutuqpaŋich nausaġataaqsimmata, iḷisimarusi upinġayasisilaaŋanik. 31Tainnatuttauq, tautukkuvsigik tamatkua iqsiñaqtuat nalaurraqsikpata, iḷisimaniaqtusi God-im atanniqsimmataa qallisilaaŋanik.
32Iḷumun uqallautigivsi, ukua iñuich tuquaniŋniaŋitchut iluqaisa tamatkua nalaunŋaunnagich. 33Qiḷaglu nunalu piiġñiaqtuk, aglaan uqalutka piiġñiaŋitchut.
Qaunagisitchi
34Aglaan qaunagisitchi ilivsiññun. Aptatiqaġnasi niqinaqivaił̣aglusi imiŋasiḷusiḷu, suli uŋiarrisigilugich iñuggutisi, qanuq iḷaanni taamna uvlua Atanġum qaiñiaqtuq tavraŋŋatchiaq niġiuŋisillusi. 35Qanuq taamna uvluq qaiyumaaqtuq iluqaiññun iñupayaanun nunamiittuanun, niġiiḷḷautiluni naniġiaq umiksaġmatun. 36Aglaan ilivsi quviqtaiḷiyumausi ataramik, aŋaiyyuuġlusi suaŋŋatiqaġuglusi pillukkumiñaġlugich sugaluaġnasi iluqaisa tamatkua piyumaaqtuat, suli makitayumiñaġuglusi sivuġaani Iġñiŋata iñuum. 37#Lk 19.47.Tavra Jesus uvlutuaġman iḷisaurriŋaruq aŋaiyyuvikpaŋmi, aasii unnuaġmagu unnuiyaqtuqłuni iġġimun atiqaqtuamun Olives-mik. 38Aasii uvlaatchaurami iñuich iluqaġmiŋ ullagaġigaat aŋaiyyuvikpaŋmun naalagiaqługu.
Currently Selected:
Luke 21: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
