Luke 6

Apiqqun Jew-guruat Savaiññiŋatigun

(Matthew 12.1-8; Mark 2.23-28)

1 # Dt 23.25. Jew-guruat savairvianni, Jesus-lu iḷitchitquraniḷu pisuallaġmiŋ palauvaksrat nautchiaqaġviatigun, ilaan iḷitchitquraŋisa nutchugaŋagaich nauganiktuat palauvaksrat, amiġaiyaqługich argaŋmiŋnik, aasii niġivḷugich. 2Tavrali iḷaŋich Pharisees uqallaŋarut, Summan uvva inna pivisi? Qanuq pitquŋisauruq taamna pitquraptiŋni savaiññiptigun. 3Tavra Jesus kiuŋagai, Nalupqinaitchuamik taiguaŋarusi qanuq David piŋatilaaŋanik kaaksiuliqamiŋ piqatiniḷu. 4#Lv 24.9.#1 S 21.1-6.Ilaa isiŋaruq God-im igluanun aasii punniksraqłuni ilaaguaqtauŋaruanik God-mun, niġitquŋisauruanik iñuŋnun aglaan aŋaiyyuliqsiqpaŋnun kisian. David niġiŋaruq suli aitchuqługich piqatini. 5Tavra Jesus uqallautiŋagai, Iġñiŋa iñuum ataniġnaqutiqałhaaqtuq pitquraniñ aŋalatchiruaniñ iñuŋnik savaiññiġmi.

Iñuk Argakisuuraq

(Matthew 12.9-14; Mark 3.1-6)

6Allamisuli Jew-guruat savairvianni, Jesus isiġman aŋaiyyuviŋmun suli iḷisaurrivḷuni, iñuk tavraniinŋammiñiqsuq taliqpia argakisuuraq. 7Tavra pitquranik iḷisaurriḷḷu Pharisees-lu naipiqtuŋagaat, iłuaqsiriñiaqtilaaŋanik savaitchuani, pasisukkaluaqługu. 8Tavra Jesus iḷisimaŋagai ilaisa isumaŋich, aasii uqallautiŋagaa iñuk argakisuurauniqsuaq, Qaiñ. Makittin uvuŋa. Tavra tavruŋa makinŋaruq. 9Tavra Jesus uqallautiŋagai. Apiġigivsi uumiŋa, pitquratiguaŋava Savaiññiġmi nakuurualiqiruni naagga pigiitchualiqiruni? Ikayugaksraġivisigik iñuich naagga iḷatchiġḷugich Savaiññiġmi? 10Tavra ilaan qiñiġaallakkaluaqamigich iluqaisa kiutchiaġivluni, uqallautiŋagaa, Isaakkich argaktin. Tavra isaaŋaruq, aasii argaŋi iłuaqsirauŋarut. 11Tavra iḷisaurriḷḷu Pharisees-lu piavsapiaġataŋarut, aasii uqaagaqsivḷutiŋ avanmun qanuġukkaluaqługu Jesus.

Jesus Piksraqtuq Qulit Malġugnik Tilirauruanik

(Matthew 10.1-4; Mark 3.13-19)

12Taipkunani uvluni Jesus aullaŋaruq qimialuŋnun aŋaiyyuyaqtuqłuni, aasii unnuaqtutilaaŋatun ilaa aŋaiyyuuŋaruq God-mun. 13Tavraasii uvluġman, ilaan qaitquŋagai iḷitchitqurani, aasii piksraġvigivlugich qulit malġugnik, tairauruanik ilaan tiliraŋiñik. 14Ilaan piksraqtaaġiŋagai ukua, Simon ilaan taiguusiŋagaa Peter-mik, Andrew-lu aniqataa, suli James-lu John-lu Philip-lu Bartholomew-lu, 15Matthew-lu Thomas-lu James-lu iġñiŋa Alphaeus, Simon-lu tairauruaq Zealot-mik, 16Judas-lu iġñiŋa James, suli Judas Iscariot aitchuutiginniktuaq ilaanik.

Jesus Iḷisaurriruq Iłuaqsirivḷuniḷu

(Matthew 4.23-25)

17Tavra Jesus atqaqatigiŋagai iḷitchitqurani qimialuŋmiñ, aasii makiłłuni qaiqsuami nunami piqatigivlugich iñusalaich iḷitchitquraliutiruat inmiñun. Allallu iñugiapiaġataqtuat iñuich qairuat iluqaaniñ Judea-miñ Jerusalem-miḷḷu taġium siñaaġmiullu Tyre-miñ Sidon-miḷḷu. 18Tamatkua iñuich qaiŋarut naalagiaqłutiŋ Jesus-mik, suli iłuaqsipkaġiaqtuallu naŋirrunmiŋniñ. Tamatkualu ilitqusiqł̣uqaqtuat iłuaqsirauŋarut. 19Suli iluqaġmiŋ iñusalaich aksiugniataŋagaat, qanuq ilaa suaŋŋatiqaŋaruq inmiñi iłuaqsiḷḷavlugich, aasii iluqaġmiŋ qairuat ilaanun iłuaqsirauŋarut.

Quviasuutit Isumaaġutillu

(Matthew 5.1-12)

20Tavra Jesus qiviaŋagai iḷitchitqurani, aasii uqallakłuni, Quviasugitchi ilivsi iḷiappauruasii, qanuq pigigisi God-im umialgutiŋi. 21Quviasugitchi ilivsi kipiġniuġutiqałhaaqtuat pisukługich God-im pitqutiŋi iñuktun kaaktuatun paŋmapak, qanuq pisuġuiqsitauniaqtusi. Quviasugitchi ilivsi isumaaqtuasii pisigivlugu piḷuun, qanuq taimanigu isumaaŋaiġñiaqtusi.

22 # 1 P 4.14. Quviasugitchi iñuich uumikkiutikpasi, pisuŋitpasiḷu uqamaqłuutilusiḷu, suli uqaġlutiŋ pigiiññiḷusi pisigilugu uvamnik maliġuaġniqsi Iġñiŋanik Iñuum. 23#2 Ch 36.16; Ac 7.52.Quviasukpagitchi taavrumani uvlumi, minŋiqtaġitchiunnii quviasuglusi, qanuq akiḷiusiaksraqsi kamanaqtuq qiḷaŋmi. Itqaumasigik tainnatuttauq maŋŋuuŋisa piyuaŋagaich uqaqtiŋi God-im.

24Qanutun naglignaqtusiuvva ilivsi suġalliruasii paŋmapak, qanuq quviasaaġusiaqaaniktusi suġalivsiññiñ. 25Qanutun naglignaqtigirusi ilivsi pisuksiuŋitchuasii sumik nakuuruamik paŋmapak, iñuktun niqinŋuruatun, qanuq pisuksiuliġñiaqtusi. Qanutun naglignaqtigirusi ilivsi aliasuŋisaaqsiññaqtuasii paŋmapak, qanuq ipiqtutchagniaqtusi, qialusiḷu.

26Qanutun naglignaqtigirusi iñupayaat uqausiġilluataqpasi. Tainnaptauq maŋŋuuŋisa uqautigilluataŋammigaich uqaqtauŋŋuaqtuat God-mun.

Piviuttaġisigik Akiḷḷiḷiqsuqtisi

(Matthew 5.38-48; 7.12a)

27Aglaalli naalaġniruasii uqallautigivsi ukuniŋa. Piviuttaġisigik akiḷḷiḷiqsuqtisi. Nakuuruamik pisigik tamatkua uumikłiqsuat ilivsiññik. 28Apiġisiuŋ God nagligitqulugich tamatkua uqamaqłuurriruat ilivsiññik. Aŋaiyyutilugich pimaqłuktairuat ilivsiññik. 29Iñuum qakiqpasi iqsravsigun, akisaġaluaġnasi mannisiuŋ igḷuanik. Iñuum suli quppiġaagiqpasi, qaliġuuraqsiḷu piḷiuŋ. 30Aitchuisitchi iñupayaanun piatchiaqtuanun ilivsiññiñ. Suli iñuk aannikpan suġauttaġnik, katchuŋairrutiginagich tasuġuglugich. 31#Mt 7.12.Tavra qanuq pitquyumaguvsi iñuŋnun, tainnatulli pisigik.

32Piviuttaġiguvsigik kisiisa piviuttaġirisi, kamanałhaaqtuamik piŋitchusi piḷuusiqiriniñ, qanuq piḷuusiqirit unnii piviuttaġimmigaich piviuttaġiritiŋ. 33Aasiisuli anniqsuisuuguvsi tamatkunuŋa kisiiññun anniqsuqtikaavsiññun, kamanałhaaqtuamik piŋitchusi piḷuusiqiriniñ, qanuq piḷuusiqirit unnii tainna pisuummiut. 34Suli atukkiññikkuvsi tamatkunuŋa kisiiññun niġiugvigikkavsiññun paaqłiusiaksramik, kamanałhaaqtuamik piŋitchusi piḷuusiqiriniñ, qanuq piḷuusiqirit unnii atukkiññiguummiut piḷuusiqirinun, atukkirrutimiktun aktigiruamik utiqtitchivigitquvlutiŋ. 35Aglaan ilivsi piḷḷuatałhaaqtuksraurusi tamatkunaŋŋa piḷuusiqiriniñ. Tavra piviuttaġisigik uumigirisi, anniqsuġlugiḷḷu. Atukkiññigitchi paaqłiusiaksramik niġiuŋaiġḷusi, aasii akiḷiusiaqsi kamanaġniaqtuq, suli miqłiqtuġiniaġaasi sapiġñaġniqsrauruam God-im, qanuq ilaa piaqłuktaŋitchuq quyyataitchuanun unnii anniqsrauruanullu. 36Nagliktausitchi Aapavsisuttauq nagliksrauruatun.

Qanuqinniġaqłiġñiq Allanik

(Matthew 7.1-5)

37Qanuqinniġaqłiġñasi allanik, God-ivli qanuqinniġaġniaŋiñmigaasi. Uqallausiġinagich iñuich anniqsuutauŋiññiḷugich, God-ivli uqallausiġiniaŋiñmigaasi anniqsuutauŋiññiḷusi. Suliqutigiŋaiqsigik itqaumayumiñaiġḷugich iñuich piḷuutiŋich, God-ivli suliqutigiŋaiġñiaġmigai itqaumayumiñaiġḷugich piḷuutisi. 38Aitchuisitchi iñuŋnun sigñataiḷḷusi aasiiḷi God-im aitchuġniaġmigaasi inuaŋaiġḷugu. Aitchuusiaqaġniaqtusi imaqtutilaaġutiqaqtuamik naqittaqługu, tunniġiksaqługulu ukpitaalallasiḷaallaan. Qanuq imaqtutilaaġutitun atukkavsisun aitchuikavsi iñuŋnun, God-iptauq atuġniaġmigaa uuktuutigikkaqsi ilivsiññi.

39 # Mt 15.14. Jesus quliaqtuaġutiŋammigai uuktuunmik. Ayauŋaruam iñuum aullatiyumiñaitkaa ayauŋaruaq iñuk. Iluqatik qargisaġniaqtuk iḷuqsramun. 40#Mt 10.24, 25; Jn 13.16; 15.20.Iḷisaqtuaguruaq iḷisimałhaaŋitchuq iḷisaurrimiñiñ, aglaan iḷisaqtuaguruaq naatchigumi iḷisaamiñik, iḷisimatigiliġñiaqtuq iḷisaurrimisun.

41Summan pasiviuŋ aniqatin killuliqirualivḷugu ilivich pigiił̣haaġaluaŋŋaqpich? 42Tainna pikavich, iñuktun ittutin qirugruaġmik irimiutaqallaġmi irriugauramik piiqsiñiataktuatun aniqanmi iraaniñ. Ukpiŋŋuaqtuatiin, iłuaqsruqqaaġiñ iliŋnun, aasii ikayuġumiñaqsivaalluglugu aniqatin killukuaġutiŋiñik.

Napaaqtuq Siiġñaŋiḷu

(Matthew 7.16-20; 12.33-35)

43Napaaqtuġiksuapayaaq siiġñiḷaitchuq piḷuktuanik, naaggaunnii napaaqtuġiitchuaq siiġñiḷaiñmiuq siiġñaġiksuanik. 44#Mt 12.33.Qanuq napaaqtullaat iḷisimanaqtut siiġñiaŋisigun. Fig-gich pukulaitkisi kakiḷḷaġnaniñ napaaqtuniñ, naaggaunnii grapes-nik pukulaiñmiusi uqpiłhuniñ. 45#Mt 12.34.Iñulluataq nakuurualiqiruq qanuq nakuuvluni isumaqaġviŋmiñi. Aasiisuli pigiitchuaq iñuk pigiitchualiqivluni, pigiitchuamik isumaqaqłuni. Tavra iñuk uqaqami uqaluŋmigun salapqiagaa irrusipiani.

Malġuk Igluqpirik

(Matthew 7.24-27)

46Tuqłuġagaksraġiŋitkivsiŋa Atanivsiññik kamagiyumaŋitkuvsigik iḷisaurrutitka ilivsiññun. 47Iñupayaaq qairuaq uvamnun aasii tusaavlugich uqalutka kamagivlugiḷḷu, iḷisautiniaġivsi sumik arriqaqtilaaŋanik. 48Arriqaqtuq iñuŋmik igluqpiruamik nivakłuni itisivḷugu, maŋŋuliivḷuniasii uyaġaum qaaŋanun. Tavraasii uliqpaŋman, kuugaluich ulutimmarruŋ taamna igluqpak, aulayyaŋaitchuq, qanuq maŋŋuliġḷuataŋaruq. 49Aglaalli iñuktauq tusaagaluaqłuni kamaksriŋiññami uqaluŋnik, arriqaqtuq igluqpiruamik nunam qaaŋanun maŋŋuił̣aaqługu. Tavraasii kuugaluich ulutimmarruŋ, tavraŋŋatchiaq ulġuvluni suksraunġipaluŋaruq.

Currently Selected:

Luke 6: INUPIAQ

Highlight

Copy

Want to have your highlights saved across all your devices? Sign up or sign in

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Learn More About Iñupiatun Mumiksat Uqalugiksuat