Wambeela 15
15
Nipangano no waandana wa Mulugu ni Abaramu
1Dhigamalile nda Nabwiya ahooneyela wa Abaramu ni madhu owi:
<<Ohoove, Abaramu, miyo ginowuwaakihedha,
vano onoodha okalena ya mahala yuulubale>>.
2Abaramu ahaakulaga, wiira: <<Nyoovo Nabwiya, Mulugu aaga, munaagivahe ddi? Miyo ginookwa gihinna ahima, vano Eliyezeri a oDamasiku dineere ahalena dha vaade vaaga>>.#15.2 Eliyezeri aali musogoleli a amwiimeleli a Abaramu. Mudhidhi olene muthu mmohi akwa ahibalile musogoleli a amwiimeleli daakela dhoohala nde, oliye dakala musogoleli ookameela dhaatedhene, vamohi ni emudhi yoohala. 3Abaramu aheenjedhedhaga owoga, wiira: <<Vowi kamugivahile ahima ndala namalaba aaga dinaakele dha vaade vaaga>>.
4Mbwenye Nabwiya ahimwaakulaga oliye, wiira: <<Naari, kanaakale oyene onaakele dhoohala dhaawo. Mwaana aawo-aawo dinaakele dhoohala dhaawo>>. 5Ahimurumaga Abaramu wi akumele vaade, wiira: <<Osugwe odhulu, woone akala onaande weelengela ttendderi nde. Ahima aawo a musogolo enaakale ndale!>>
6Abaramu oomuroromela Nabwiya. Nabwiya ahimurumeedha wona owogoowa.#15.6 Mulugu onowaakula nroromelo na muthu: arumeedhelaga oharihamo. Moone AGalasiya 3.6; AHeberi 4.3, 9, 22; Tiyago 2.23. Kayaali mabasa a Abaramu mbwenye nroromelo naaye thaali noofuneya ni Mulugu. Hiyo teto nnavulumusiwa mwa nroromelo neehu Mulugu, ehili dhoowiirana. Nirumeedhe baahi wi nili anamathega, nihiye dhoothega dheehu, nirumeedhele wi Yesu ahikwa ovenyihiwa wi anivulumuse, vano nimurumeedhe oliye wona Nabwiya eehu malabo maatene.
7 Nabwiya ahiwogaga ni oliye, wiira: <<Miyo gili Nabwiya, goovenyihile o Uri wa aKalideya wi guuvahe elabo ela ekale yaawo>>.
8Abaramu ahikohaga, wiira: <<Nyoovo Nabwiya, Mulugu aaga, ginaanone addi wi elabo ela enookala yaaga?>>
9 Nabwiya ahimwaakulaga, wiira: <<Wi gilibele, ogidheelena mwaana-ng'ombe yamukolo, mbuzi emohi ni nibila nimohi, dhaatedhene dhenda dhikale dha yaaka thaaru. Odhena teto kangayiwa emohi ni nziya nimohi>>.
10Abaramu ahaadhana aneenyama ale, ahaagwaddaga vaari mmohi ni mmohi okala dhipaddi biili, vano ahaahiyaga esugwanaga. Mbwenye balame kaagwaddile. 11Mpungu dhoomorelaga vaaligi aneenyama ookwa ale, Abaramu owiigarelaga. 12Waasiguwaga kove dhuulubale dhoomudheela Abaramu. Mowaaguva woomudheela woova ni yiihi yuulubale.
13Veva Nabwiya ahiiraga: <<Okale oonona ebaribareene wi anaawo a musogolo enoodha ekale anaweendda mwiilaboni ya amohi. Enoodha yiiriwe adhaari vano enoodha erabulihiwe ofiyedha yaaka mazana mannayi (400). 14Mbwenye miyo ginoodha gaathonge athu eni yawiire adhaari, enoodha ekumemo mwiilaboni mwemule ni dhooreela dhijinji.#15.13-14 Niivuru na Okuma nihikalana thalako ya mwemo aHeberi mwakaleliiwa adhaari wEgubuddu mudhidhi wa yaaka mazana mannayi (400). 15Weevo onoodha okwe mmurenddeleni ni yaaka dhijinji, weethuuwe ni makolo aawo. 16Ahima aawo a musogolo enoodha ewelele veva, dhigavirile yaaka mazana mannayi (400). Sowi obure wa Amori kinaakwanelihe othega weewa wi ethongiwe>>.#15.16 Amori yakala elabo elene Mulugu yamuroromelihiiye omvaha Abaramu. Yaali anamathega ebaribareene mbwenye Mulugu oovilela ni aliwa mwa yaaka mazana mannayi. Yoothegave omagomelo wiwa Mulugu ahaagonjiha. Vano waavaha elaboya anamabaliwelamo a Abaramu. Madhu ala enafwanyeya muniivuruni na Zhozuwe, niivuru na neetanu ni nimohi na mBibiliyani.
17Ndala wahiriba, odha yiihi. Wahooneya munddo othuwaga mwiisi, vevale wahooneya mutigo woohidda oviraga vaari va aneenyama ale yagwaddanyiwe.#15.17 Mutigo watoonyihedha wooneya wa Mulugu. Dhipaddi biili dha nipangano dhooneyiha waandana yeeddaga vamohi vaari va aneenyama oogwaddiwa yakuthiwe. Dhowiira nda dhaali makalelo oolibela wi: <<Dhiireye wa miyo wona yiiriwena aneenyama ala gahaakwaneliha olibela waaga ni ororomeliha waaga>>. Va nipangano ndda wooneya wa Mulugu wahivira vaari va aneenyama vowi aali Mulugu ahiroromeliha waakwaneliha omvaha Abaramu elabo ni amudhi aaye. 18Nlabo nendde, Nabwiya ahisasanyaga nipangano no waandana ni Abaramu, wiira: <<Ginowaavaha elabo elena anaawo, wambeela mwihinje wa wEgubuddu, ofiyedha mwihinje mulubale Ewufarati. 19Ginoodha gaavahe elabo ya aKeni, ya aKenezi, ya aKadimoni, 20ya aHeti, ya aPerezi, ya aRefayiimi, 21ya aAmori, ya aKanani, ya aGirigaxi ni ya aZhebusi>>.
Currently Selected:
Wambeela 15: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
