Wambeela 16
16
Hagari ni Zhumayili
1Sarayi, mwadha a Abaramu, kaambalele mwaana. Mbwenye oliye ahikalana namalaba aaye mu Egubuddu eethaniwa Hagari. 2Ndala Sarayi ahiwoga ni Abaramu, wiira: <<Miyo Nabwiya ahigihiiha okalana ahima. Dhowani wa namalaba aaga, kaahi akala onaagibalele mwaana>>. Abaramu ahiiwelela yoowoga ya Sarayi.#16.2 Omvaha mwiimeleli mamune waali mukalelo wawale woororomeliha obaliwa wa namavolowa mba. Kadhaali muwari mwa efunelo ya Mulugu. Ovalaanya wula wahitatamula dhoorusa. 3Egamalile yaaka kumi egatamele oKanani Sarayi, mwadha a Abaramu, ahimvaha mamune namalaba aaye Hagari wi akale mwihiyanaaye a nabiili. 4Abaramu ahigonana, orubalela. Vanoniliiye wi ohurubalela, Hagari ahambeela ombedda Sarayi, nabwiya aaye.
5Ndala Sarayi ahiwoga ni Abaramu, wiira: <<Mwa ela muhukalana mwaha! Miyo guhuuvahani namalaba aaga, vano virubaleliiye, onoginyemula. Nabwiya dineere anithonge miyo ni nyoovo>>.#16.2-5 Abaramu kaamukohile Mulugu ahineerena. Soofuneya mudhidhi waatene nidheegena efunelo ya Mulugu. Nnavilela vang'ono ni efunelo ya Mulugu mwa mukalelo mmohive Sarayi ni Abaramu yaali oohuvilela. Nnowiirihedha dhabure ohiya ojejihedha mareeliho a Mulugu wi efiye vano nnosayela weeliha dhowiira dheehu. 6Abaramu ahimwaakulaga Sarayi, wiira: <<Oliye di namalaba aawo, we dinamulamula. Omwiirele eyene enafuniiwe>>. Vevale Sarayi ahambeela omooniha goyi, Hagari ahithawa.
7Mungero a Nabwiya ahimfwanyaga agali vaceelani, okokolani, dila yooya oXuri. 8Ahimukohaga oliye, wiira: <<Hagari, namalaba a Sarayi, onadha wuuvi, vano onadhowa wuuvi?>> Oliye ahimwaakulaga, wiira: <<Ginamuthawa Sarayi, nabwiya aaga>>. 9Mbwenye mungero a Nabwiya ahiwogagana, wiira: <<Owelele wa nabwiya aawo, wamwiiwelelege>>. 10Mungero a Nabwiya teto ahiiraga: <<Ginoodha gaweenjedhedhe anaawo a musogolo, kanakalevo muthu onaande waweelengela>>.#16.9-10 Kawuli mwaha mulubale naari dhookathamiha dhedho Mulugu dhihinaandiiye osasanyedha. Oveleele wa Oliye onosasanyedha.
11Mungero a Nabwiya ahiiraga:
<<Ohurubalela, oneere ombala mwaana-mulobwana.
Onamuthwiwe ndina na Zhumayili#16.11 Zhumayili enatapulela Mulugu onowiiwa.
vowi Nabwiya ahiiwa wukuuwa waawo.
12Oneere akale wona mwaneenyama a mukokolani,
awanege mudhidhi dhaatedhene ni akwaaye,
aliwa ewanaga ni oliye.
Avirigane ni addibile
naari agaaddamanena>>.#16.12 Zhumayili di muwalewale a aArabe aatene. AZhudewu bi anamabaliwelamo a Ezaaki, ddibila a Zhumayili. Ohiiwanana vaari va anamabaliwelamo a addibila ala ohukalawoove ofiyedha peeno.
13Hagari ahiromola ndina na Nabwiya, oyene awogiiyena, wiira: <<Nyoovo muli Mulugu munagoona. Ebaribareene gihimoona oyene ogoonile!>>#16.13 Ebaribareene…ogoonile! Mu ewogelo ya eHeberi kineeweya pama. 14Mwa mwaha ola ceela ele eneethaniwa: Ceela ya Lahayi-Royi,#16.14 Lahayi-Royi mu ewogelo ya eHeberi enatapulela Oyene oli mugumi onagoona. vano enafwanyeya vaari va oKadexi ni oBeredi.
15Ndala Hagari ahimbala mwaana-mulobwana. Babe Abaramu ahimuthwa ndina na Zhumayili. 16Abaramu aganna yaaka makumi matanu na maraaru ni yaaka tanu nammohi (86), Hagari ahimbalela Zhumayili.
Currently Selected:
Wambeela 16: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
